རྒྱ་ནག་གཞུང་གིས་དཔལ་འབྱོར་གྱི་དཀའ་ངལ་སེལ་སླད་ཡང་བསྐྱར་འཛམ་གླིང་རྒྱལ་ཁབ་བདུན་ཅུ་ཡི་མི་སེར་རྣམས་ལ་ཐོངས་མཆན་རིན་མེད་སྤྲད་ནས་རྒྱ་ནག་ལ་ཡུལ་སྐོར་དུ་ཤར་གཏོང་བྱ་རྒྱུ་ཡིན་འདུག
A group of foreign tourists takes in the Palace Museum in Beijing, on April 7, 2024. (PROVIDED TO CHINA DAILY)
ཏོག་དབྱིབས་གཉན་རིམས་ཁྱབ་རྗེས་རྒྱ་ནག་ནང་སྤྱི་ཡོངས་ནས་དཔལ་འབྱོར་ཉམས་དམས་ཤུགས་ཆེན་འགྲོ་བཞིན་ཡོད་པའི་གནས་སྟངས་ལས་སྐྱོབ་ཆེད། འཛམ་གླིང་རྒྱལ་ཁབ་མང་པོའི་མི་སེར་ཚོར་རྒྱ་ནག་ནང་ལོག་དང་བོད་སོགས་སུ་ཡུལ་སྐོར་དུ་བསྐྱོད་རྒྱུར་ཐོངས་མཆན་རིན་མེད་ཐོག་སྤྲོད་པའི་སྲིད་ཇུས་ཡང་དང་བསྐྱར་དུ་ལག་བསྟར་བྱེད་ཀྱི་ཡོད་པ་ལྟར། རྒྱ་ནག་གི་གཞིས་སྤོར་དོ་དམ་ལྷན་ཁང་གིས། ཟླ་འདིའི་ཕྱི་ཚེས་ ༡༦ ཉིན་ནས་འཛམ་གླིང་རྒྱལ་ཁབ་ ༧༤ ཡི་མི་སེར་ལ་ཉིན་གྲངས ༣༠ རིང་ཐོངས་མཆན་རིན་མེད་དུ་སྤྲོད་རྒྱུ་ཡིན་པ་གསལ་བསྒྲགས་བྱས་འདུག
རྒྱ་ནག་གཞིས་སྤོར་དོ་དམ་ལྷན་ཁང་གི་གསལ་བསྒྲགས་དེའི་ནང་། རྒྱ་ནག་གཞུང་གིས་དཔལ་འབྱོར་འཕེལ་རྒྱས་སླད། རྒྱ་ནག་ནང་རིན་མེད་ཐོངས་མཆན་དུས་འགྱངས་བྱས་ཏེ་ཡུལ་སྐོར་བ་ཇེ་མང་དུ་གཏོང་ཐབས་བྱེད་ཀྱི་ཡོད་སྐོར་དང་། ཕྱི་ལོ་ ༢༠༢༤ ལོར་རྒྱ་ནག་ནང་ཐོངས་མཆན་རིན་མེད་ཀྱི་ཐོག་ནས་ཡུལ་སྐོར་བ་ས་ཡ་ ༢༠ ལྷག་ཡོང་ཡོད་ཅིང་། དེ་ནི་ཕྱི་ལོ་ ༢༠༢༣ ལོ་དང་བསྡུར་ན་ལྡབ་གཅིག་ལས་མང་བ་ཡིན་སྐོར་བསྒྲགས་འདུག
རྒྱ་ནག་གཞུང་འབྲེལ་གོ་ལའི་དུས་བབ་ཀྱིས་དེ་འབྲེལ་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༡༩ ལོར་གཅིག་པུར་འཛམ་གླིང་ཤར་ནུབ་ནས་ཡུལ་སྐོར་བ་མི་གྲངས་ས་ཡ ༣༡།༩ ལྷག་རྒྱ་ནག་ནང་ཡོང་ཡོད་འདུག ཡིན་ནའང་། རྒྱ་ནག་ཝུའུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཀྱི་བཀག་རྒྱ་དང་། དེའི་རྗེས་རྒྱ་ནག་ནང་ཏོག་དབྱིབས་གཙང་སེལ་གྱི་བཀག་རྒྱ་སོགས་བསྡམས་རྗེས་ཡུལ་སྐོར་བ་ཧ་ཅང་ཉུང་དུ་ཕྱིན་ཏེ། ཕྱི་ལོ་ ༢༠༢༣ ལོར་ཡུལ་སྐོར་བ་མི་གྲངས་ས་ཡ་ ༡༣།༨ ཙམ་ལས་བྱུང་མེད་སྟབས། འདས་པའི་ལོ་ཤས་རིང་གི་ཡུལ་སྐོར་བའི་གྲངས་འབོར་ཉུང་ཤོས་ཤིག་ཆགས་ཡོད་འདུག
ཕྱི་ལོ ༢༠༢༣ ལོར་རྒྱ་ནག་གི་སྤྱི་ཡོངས་ཀྱི་དཔལ་འབྱོར་འཕེལ་རྒྱས་འགྲོ་ཚད་ཀྱི་བརྒྱ་ཆ ༥།༤ ལ་བསླེབས་ཡོད་ཀྱང་། གནས་བབ་དེ་ལ་གཞིགས་ན་ཕྱི་ལོ ༢༠༢༨ ལོར་རྒྱ་ནག་གི་སྤྱི་ཡོངས་ཀྱི་དཔལ་འབྱོར་གྱི་གནས་བབ་དེ་བརྒྱ་ཆ་ ༣།༥ ལ་མར་ཆག་རྒྱུ་ཡིན་པའི་ཚོད་དཔག་བྱེད་ཀྱི་ཡོད་ལ། ལྷག་པར་དུ་ཕྱོགས་ཡོངས་ནས་རྒྱ་ནག་གི་དཔལ་འབྱོར་ལ་ཉམས་དམས་ཆེན་པོ་ཕྱིན་རྐྱེན། ཕྱི་ལོ ༢༠༢༣ ལོའི་ལོ་མཇུག་ཙམ་ནས་རྒྱ་ནག་གིས་ཡུ་རོབ་དང་ཨེ་ཤ་ཡ་ཁུལ་གྱི་རྒྱལ་ཁབ་མང་པོར་ཐོངས་མཆན་རིན་མེད་ཐོག་རྒྱ་ནག་ཏུ་ཤར་གཏོང་བྱེད་མགོ་བཙུགས་ཡོད་པ་རེད། རྒྱ་ནག་གིས་ཕྱི་མི་རིན་མེད་ཤར་གཏོང་གི་སྲིད་ཇུས་ལག་བསྟར་བྱས་པའི་འདས་པའི་ཟླ་བ་གསུམ་ཙམ་གྱི་ནང་། ཕྱི་མི་ས་ཡ་ ༡༩༨ ཙམ་གྱིས་རིན་མེད་ཐོངས་མཆན་བླངས་ཡོད་པས། ཕྱི་ལོ་ ༢༠༢༣ བསྡུར་ན་རྒྱ་ནག་ཏུ་ཡོང་མཁན་ཡུལ་སྐོར་བའི་གྲངས་འབོར་འཕར་ཡོད་འདུག
ཕྱི་ལོ་ ༢༠༢༣ ལོའི་ལོ་མཇུག་ཏུ་རྒྱ་ནག་གཞུང་གིས་ཐོག་མར་ཧྥ་རན་སི་དང་། འཇར་མི་ནི། ཨི་ཊི་ལི། ནིའུ་ཌར་ལིན་ཌི། སི་པེན། མེ་ལེ་ཤི་ཡ་སོགས་རྒྱལ་ཁབ་དྲུག་གི་མི་སེར་ལ་ཐོངས་མཆན་རིན་མེད་སྤྲོད་པ་གསལ་བསྒྲགས་བྱས་ཤིང་། ཕྱི་ལོ་ ༢༠༢༤ ལོར་ཨེ་ཤ་ཡ་དང་ཡུ་རོབ་ཀྱི་རྒྱལ་ཁབ་ ༣༨ ཀྱི་མི་སེར་ལ་ཐོངས་མཆན་རིན་མེད་སྤྲད་དེ་ཉིན་གྲངས་ ༣༠ རིང་རྒྱ་ནག་ནང་ཡུལ་སྐོར་དུ་འགྲོ་ཆོག་པ་བཟོས། ཕྱི་ལོ་ ༢༠༢༥ ལོའི་ཕྱི་ཟླ་ ༡༢ ཚེས་ ༣༡ བར་འཛམ་གླིང་རྒྱལ་ཁབ་ ༣༨ ཀྱི་མི་སེར་ཟླ་ངོ་གཅིག་རིང་ཐོངས་མཆན་རིན་མེད་ཐོག་རྒྱ་ནག་ཏུ་འགྲོ་ཆོག་པ་བཟོས་ཡོད་པ་རེད།
འདས་པའི་ལོ་གཉིས་གསུམ་ནང་རྒྱ་ནག་གཞུང་གིས་ཐོངས་མཆན་རིན་མེད་སྤྲོད་པའི་སྲིད་ཇུས་ལག་བསྟར་བྱས་པ་དང་བསྟུན། ཕྱི་རྒྱལ་ཡུལ་གྲུ་ཁག་ནང་ཡོད་པའི་བོད་མི་མང་པོ་བོད་ནང་གཉེན་འཕྲད་དུ་འགྲོ་བཞིན་ཡོད་ཀྱང་། པེ་ཅིན་རྒྱལ་སྤྱིའི་གནམ་ཐང་དང་ལྷ་ས་གོང་དཀར་གནམ་ཐང་། ཁྲིན་ཏུའུ་རྒྱལ་སྤྱིའི་གནམ་ཐང་སོགས་ནས་བོད་མི་ཁག་ཅིག་ཕྱིར་ལོག་བཏང་འདུག་ལ། འདི་གའི་གསར་འགོད་པས་ཕྱིར་ལོག་བཏང་བའི་དབྱིན་ཡུལ་གྱི་བོད་མི་གཅིག་དང་ཡུ་རོབ་ཀྱི་བོད་མི་ཞིག་ལ་ཁ་བརྡ་བྱེད་སྐབས། གནམ་ཐང་ནས་ཞིབ་བཤེར་བྱེད་སྐབས་ཕྱི་ནས་ཡོང་བའི་བོད་མི་ཡིན་པ་ཤེས་བ་དང་སྔོག་བཤེར་མང་བ་བྱེད་ཀྱི་ཡོད་པ་མ་ཟད། ཁ་པར་དང་གློག་ཀླད་སོགས་ཀྱི་ནང་ཞིབ་བཤེར་བྱས་རྗེས་ཆུ་ཚོད་མང་པོར་གནམ་ཐང་དུ་བཀག་པ་དང་དེ་ནས་ཕྱིར་ལོག་བཏང་ཡོད་སྐོར་དང་། ནང་མི་རྣམས་གནམ་ཐང་ལ་བསུ་རུ་ཡོང་ཡོད་པས་ཧ་ཅང་བློ་ཕམ་ཆེན་པོ་བྱུང་སྐོར་བརྗོད་ཀྱི་འདུག་ལ། གནད་དོན་དེ་བོད་མི་གཅིག་གཉིས་ཙམ་ལ་བྱུང་བ་ཞིག་རེད་མི་འདུག
གསར་འགོད་པ། དཔལ་ལྡན། རྩོམ་སྒྲིག་པ། པདྨ་མཚོ།
