སྲིད་སྐྱོང་མཆོག་གིས་རྒྱ་ནག་གཞུང་དང་མཉམ་དུ་སྒོ་རྒྱབ་ཀྱི་འབྲེལ་བ་ཡོད་ཀྱང་འབྲེལ་བ་སླར་གསོ་བྱེད་པར་ཕན་ཐོགས་གང་ཡང་བྱུང་མེད་ཅེས་གསུངས།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་མི་རིགས་མཉམ་བསྲེས་དང་། མི་སེར་སྤེལ་ཡུལ། རྒྱ་བསྒྱུར་སློབ་གསོའི་སྲིད་ཇུས་བཅས་མུ་མཐུད་སྤེལ་ཚེ་བོད་ནང་ཉེན་ཁ་ཆེན་པོའི་གནས་སྟངས་ཤིག་ཆགས་རྒྱུ་ཡིན་སྐོར་གསུངས་སོང་།

ཟླ་འདིའི་ཕྱི་ཚེས་ ༩ ནས་ ༡༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་གྱི་རྒྱལ་ས་ལྡི་ལི་དང་། ཨོ་གླིང་གི་སིཌ་ཎི།(Sydney) ནཱོ་ར།(Nowra) སིན་ཌི་རལ་ཁོ་སི་ཌི།(Central Coast) གནས་མཁར་གསར།(Newcastle) བྷི་རས་བྷེན(།Brisbane) ཁན་བྷི་ར།(Canberra) མེལ་བྷོན་(Melbourne)བཅས་སུ་གཞུང་འབྲེལ་ཕྱོགས་ཕེབས་གནང་གཏན་འཁེལ་ཡོད་པ་ལྟར། དེ་རིང་ཕྱི་ཚེས་༡༡ ཉིན་ཨོ་གླིང་སིཌ་ཎི་བོད་རིགས་མཐུན་ཚོགས་ཀྱི་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་ས་གནས་བོད་རིགས་མི་མང་ལ་གསུང་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས། དབུ་མའི་ལམ་གྱི་སྲིད་ཇུས་འོག་ནས་རྒྱ་གཞུང་ལ་འབྲེལ་ལམ་ཞིག་བཙུགས་བཞིན་ཡོད་པ་རེད། ད་ལྟ་ཡང་རྒྱ་ནག་གཞུང་དང་མཉམ་དུ་སྒོ་རྒྱབ་ཀྱི་འབྲེལ་བ་ཞིག་ཡོད་ཀྱང་། དེའི་འབྲེལ་བ་སླར་གསོ་བྱེད་པར་ཕན་ཐོགས་པ་གང་ཡང་བྱུང་མེད། དོན་དག་ཅིག་འགྲུབ་དགོས་ཚེ་འབྲེལ་བ་སླར་གསོ་བྱེད་དགོས་པ་རེད། འབྲེལ་བ་སླར་གསོ་བྱས་པའི་རྗེས་སུ་སྐུ་ཚབ་སུ་དང་སུ་གཏོང་དགོས་པར་སྐད་ཆ་བཤད་དགོས། ད་ལྟའི་ཆར་རིམ་པ་དེར་བསླེབ་ཡོད་པ་མ་རེད། རྒྱ་ནག་གི་ཞིས་ཅིན་ཕིན་གྱི་སྲིད་གཞུང་གི་འོག་བོད་ནང་སྲིད་ཇུས་འཛིན་སྟངས་དང་ལས་འཆར་སྒྲིག་སྒྲིག་སྟངས་ལ་བལྟས་ཚེ། བོད་གཅིག་པོ་མིན་པར་གྲངས་ཉུང་མི་རིགས་རྣམས་ཀྱི་ངོ་བོ་རྩ་མེད་བཟོ་བཞིན་ཡོད། རྒྱ་གཞུང་གི་བསམ་བློའི་ནང་གྲངས་ཉུང་མི་རིགས་ཟེར་བ་མེད་པར་བཟོས་ཚེ། གྲངས་ཉུང་མི་རིགས་ཀྱི་གནད་དོན་ཟེར་བ་ཞིག་མེད་པའི་སྲིད་ཇུས་རྒྱ་ཆེན་པོ་དེའི་ཐོག་ནས་མི་རིགས་མཉམ་བསྲེས་དང་མི་སེར་སྤེལ་ཡུལ་གྱིི་སྲིད་ཇུས་སྤེལ་བཞིན་ཡོད། ད་ལྟའི་ཆར་བོད་ནང་རྒྱ་མི་རིགས་ཀྱི་གྲངས་འབོར་མང་དུ་འགྲོ་བཞིན་ཡོད་ཀྱང་། སྔོན་མ་ང་ཚོས་ཞེད་སྣང་བྱས་པ་བཞིན་བྱུང་མི་འདུག དེ་ཡང་གནས་སྟངས་མང་པོ་ཞིག་ཐོག་ནས་བྱུང་ཡོད་སྲིད། རྒྱ་མི་རིགས་ཀྱི་གྲངས་འབོར་ཡང་ཉུང་དུ་འགྲོ་བཞིན་ཡོད་པ་རེད། བོད་ནང་དུ་རྒྱ་ནག་གིས་མི་རིགས་མཉམ་བསྲེས་བྱེད་མུས་ཐོག བོད་ཀྱི་ཕྲུ་གུ་རྣམས་རྒྱ་རིགས་སུ་བསྒྱུར་བའི་སྲིད་ཇུས་ཤིག་འཛིན་བཞིན་ཡོད། རྒྱ་ནག་གཞུང་གིས་སྲིད་ཇུས་དེ་མུ་མཐུད་ནས་ལོ་ཉུ་ཤུ་དང་སུམ་ཅུ་རིང་ཕྱིན་ཚེ། བོད་ནང་ཉེན་ཁ་ཆེན་པོ་དང་དཀའ་ངལ་ཆེན་པོ་ཞིག་གི་གནས་སྟངས་འོག་ལྷུང་གི་ཡོད་ཅེས་གསུངས་སོང་།

སྲིད་སྐྱོང་མཆོག་གིས།  རྒྱ་ནག་གི་ཁྲིན་ཏུའུ་སོགས་ཀྱི་ས་གནས་ཁག་ཏུ་བོད་པ་མཉམ་འཛོམས་བྱུང་གི་ཡོད་ཀྱང་། བོད་པ་ཕན་ཚུན་ལ་སྐད་ཆ་བཤད་དུས་རྒྱ་སྐད་ཐོག་བཤད་ཀྱི་ཡོད་པ་གོ་ཡོང་གི་འདུག ཨ་མདོ་དང་ཁམས་གཉིས་རྒྱ་ནག་གི་ས་མཚམས་དང་ཐག་ཉེ་བོ་ཡིན་པས། བོད་པ་ཕན་ཚུན་སྐད་ཆ་གོ་བརྡ་འཕྲོད་ཀྱི་མེད་དུས་རྒྱ་སྐད་བཤད་ཀྱི་ཡོད་འདུག  ལྷ་ས་ཁུལ་གྱི་གཞོན་སྐྱེས་རྣམས་ཀྱིས་བོད་སྐད་མ་བཤད་པར་རྒྱ་སྐད་བཤད་ཀྱི་འདུག རྒྱ་ནག་གཞུང་གིས་སྲིད་ཇུས་ཤིག་གི་འོག་ནས་བོད་མི་ཡོངས་རྫོགས་རྒྱ་རིགས་སུ་བསྒྱུར་བར་རྒྱ་སྐད་བཤད་འཇུག་གི་ཡོད་པ་རེད། ང་ཚོ་བོད་མི་རྣམས་ཀྱིས་རང་ཉིད་ཀྱི་ཁྱིམ་དུ་བྱིས་པ་རྣམས་ལ་བོད་སྐད་བཤད་པར་དོ་སྣང་མ་བྱས་ཚེ། བོད་མི་རིགས་ཀྱི་སྐད་ཡིག་བརླག་པར་ཐེ་ཚོམ་མེད་པ་རེད། སྐད་བརྡ་རིག་པའི་མཁས་པ་རྣམས་ཀྱིས་བོད་མི་རིགས་ཀྱི་སྐད་ཡིག་ནི་འཛམ་གླིང་ནང་གི་སྐད་ཡིག་རྙིང་ཤོས་བཅོ་ལྔའི་ཁྲོད་ཀྱི་གཅིག་ཡིན་ཞེས་བཤད་ཀྱི་ཡོད། དེ་ཡང་སྐད་ཡིག་གཞན་དང་མ་འདྲ་བར་དུས་རབས་བརྒྱད་པ་ནས་བཅུ་གསུམ་བར་པ་ལི་དང་ལེགས་སྦྱར་ནང་ཡོད་པའི་ནང་བསྟན་གྱི་གཞུང་ལུགས་རྣམས་བོད་སྐད་ནང་བསྒྱུར་ཡོད། དེ་ནི་འཛམ་གླིང་གི་སྐད་ཡིག་གང་དུའང་་ཡོད་པ་མ་རེད། རྒྱ་ཡིག་དང་། ཉི་ཧོང་སྐད་ཡིག ཐེག་དམན་གྱི་གཞུང་ལུགས་ནང་དུའང་དེ་འདྲ་ཡོད་པ་མ་རེད། ཅེས་དང་། སྐད་ཡིག་གལ་ཆེན་དང་རྩ་ཆེན་པོ་ཡིན་ཟེར་ནས་བཀོལ་སྤྱོད་མ་བྱས་ཚེ། མ་འོངས་བར་ལེགས་སྦྱར་དང་ལ་ཌིན་གྱི་སྐད་ཡིག་བཞིན་ཆགས་འགྲོ་ཡི་རེད། བོད་རིགས་རྣམས་ཀྱིས་ངེས་པར་དུ་བོད་ཀྱི་སྐད་ཡིག་སྦྱོང་དགོས་པ་དང་བཀོལ་སྤྱོད་བྱེད་རྒྱུ་མ་བརྗེད་པ་བྱ་དགོས། བོད་ནང་དུ་རྒྱ་གཞུང་གིས་དམ་དྲག་བྱེད་ཀྱི་ཡོད་པས།  བཙན་བྱོལ་ནང་གི་བོད་མི་རྣམས་ཀྱིས་བོད་ཀྱི་སྐད་ཡིག་ཐོག་ལྷག་པར་དུ་ཤུགས་རྒྱག་རྒྱུ་ཧ་ཅང་གནད་འགག་ཆེན་པོ་རེད། ཅེས་གསུངས་སོང་།

ཡང་སྲིད་སྐྱོང་མཆོག་གིས། བོད་ཀྱི་ཆབ་སྲིད་གནས་བབ་ཐོག་ད་དུང་མུ་མཐུད་དུ་དཀའ་ལས་མང་པོ་རྒྱག་དགོས།  ལམ་སེང་འགྲུབ་རྒྱུ་ཁག་པོ་ཡིན་ཡང་། རིམ་པ་བཞིན་འཐབ་ཇུས་ལྡན་པའི་སྒོ་ནས་ལས་ཀ་བྱ་རྒྱུ་གལ་ཆེན་པོ་རེད། ང་ཚོས་རྒྱལ་ཁབ་གཞན་པར་འབྲེལ་བ་བྱེད་སྐབས་སོ་སོའི་རྒྱལ་ཁབ་ཀྱི་ཁེ་ཕན་བཞག་སྟེ་བོད་ཀྱི་ཁེ་ཕན་དུས་ནམ་ཡང་བསྒྲུབ་རྒྱུ་མ་རེད། དེའི་དངོས་ཡོད་གནས་ཚུལ་ཤེས་དགོས་པ་རེད།ཅེས་དང་། འཛམ་གླིང་ནང་བོད་ཀྱི་གནས་སྟངས་གལ་གནད་ག་འདྲ་བརྩི་ཡི་ཡོད་མེད་ཀྱང་ཤེས་དགོས་པ་རེད། ད་ལྟའི་ཆར་འཛམ་གླིང་ནང་དམག་འཁྲུག་མང་པོ་བྱུང་བཞིན་པའི་སྐབས། འཚེ་བ་མེད་པའི་ལས་འགུལ་ཐོག་དོ་སྣང་བྱེད་མཁན་ཏོག་ཙམ་ཉུང་ཉུང་རེད། འཛམ་གླིང་ནང་དམག་འཁྲུག་རྒྱག་བཞིན་པའི་སྐབས་སུ་བོད་དོན་འཐབ་རྩོད་དེ་འཚེ་བ་མེད་པ་ཡིན་པའི་གལ་གནད་དང་། འཚེ་བ་མེད་པའི་ཐོག་ནས་མ་འོངས་བར་དཀའ་ངལ་སེལ་ཐུབ་པའི་འགྲེལ་བཤད་རྒྱག་ཐུབ་ཚེ། བཟང་སྤྱོད་ལ་དགའ་མོས་བྱེད་མཁན་རྣམས་ཀྱིས་བོད་དོན་རྒྱབ་སྐྱོར་བྱེད་པའི་རེ་བ་ཡོད་པ་རེད། རྒྱ་ཆེ་ས་ནས་བཤད་ན་བོད་ཀྱི་གནད་དོན་ནི་མི་རིགས་ཤིག་དང་རྒྱལ་ཁབ་ཅིག་གི་གནད་དོན་ཆགས་ཡོད་པ་མ་གཏོགས། འགྲོ་བ་མིའི་ཐོབ་ཐང་དང་། ཆོས་དད་རང་དབང་། གྲངས་ཉུང་མི་རིགས། སྐབས་རེར་གདོད་མའི་མི་རིགས་ཀྱི་གནད་དོན་གཅིག་པོ་བརྩིས་ཚེ། བོད་ཀྱི་གནད་དོན་ཧ་ཅང་ཆུང་ཆུང་ཞིག་ཆགས་འགྲོ་ཡི་ཡོད། འཛམ་གླིང་གི་ཆབ་སྲིད་འགྱུར་ལྡོག་ཁྲོད་ནས་བོད་ཀྱི་གནད་དོན་གང་འདྲ་ཆགས་ཀྱི་ཡོད་མེད་ལྟ་དགོས་རྒྱུ་གལ་ཆེན་པོ་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།