བོད་མཐོ་སྒང་གི་ཁོར་ཡུག་ལ་གནོད་སྐྱོན་བཟོ་ཉེན་ཡོད་པར་ཞིབ་འཇུག་དགོས་པའི་ཁྲིམས་འཆར་བཏོན།

རྒྱ་ནག་གཞུང་གིས་བོད་མཐོ་སྒང་དུ་དམག་དོན་ལས་གཞི་རྒྱ་ཆེར་སྤེལ་བའི་རྐྱེན་གྱིས་རང་བྱུང་ཁོར་ཡུག་ལ་གནོད་སྐྱོན་བཟོ་ཉེན་ཡོད་པར་ཞིབ་འཇུག་སྙན་ཐོ་འདོན་སྤེལ་དགོས་པའི་ཁྲིམས་འཆར་བཏོན།

ཟླ་འདིའི་ཕྱི་ཚེས་ ༡༤ ཉིན་ཨ་རིའི་ནེ་ཝ་ཌ་ (Nevada) མངའ་སྡེའི་གྲོས་ཚོགས་གོང་མའི་འཐུས་མི་རྗེག་ཀི་རོ་སན་ (Jacky Rosen) མཆོག་གིས། ཨ་རིའི་རྒྱལ་སྲུང་ལྷན་ཁང་གི་ཕྱི་ལོ་ ༢༠༢༦ ལོའི་རྒྱལ་ཡོངས་འགོག་སྲུང་དབང་ཆའི་ཁྲིམས་ཡིག་ (National Defense Authorization Act) ཅེས་པར་བསྐྱར་བཅོས་ཁྲིམས་འཆར་བཏོན་པའི་ནང་། བོད་མཐོ་སྒང་དུ་རྒྱ་གཞུང་གིས་དམག་དོན་འཐབ་ཇུས་ཀྱི་ལས་གཞི་འདྲ་མིན་སྤེལ་བར་སེམས་འཚབ་བསྟན་ཡོད་པ་དང་སྦྲགས། འབྱུང་འགྱུར་ཉེན་ཁ་བྱུང་སྲིད་པས་ཞིབ་འཇུག་བྱས་ཏེ་སྙན་ཐོ་འདོན་སྤེལ་དགོས་པའི་ཁྲིམས་འཆར་བཏོན་ཡོད་འདུག

དོན་ཚན་སུམ་བཅུ་ཡོད་པའི་ཁྲིམས་འཆར་དེའི་ནང་། ཨ་རིའི་རྒྱལ་སྲུང་ལྷན་ཁང་གིས་རྒྱ་ནག་གཞུང་གིས་བོད་མཐོ་སྒང་དུ་དམག་དོན་འཐབ་ཇུས་སྣ་ཚོགས་སྤེལ་བཞིན་པ་དེས་རང་བྱུང་ཁོར་ཡུག་ལ་གནོད་སྐྱོན་བཞིན་ཡོད་སྐོར་དང་། རྒྱ་ནག་གཞུང་གིས་བོད་ཀྱི་རང་བྱུང་ཁོར་ཡུག་ལས་གཏེར་ཁ་རིགས་སྔོག་འདོན་བྱས་ཏེ་འབག་བཙོག་གཏོར་བཤིག་ཐེབས་ཀྱི་ཡོད་པ་དང་། དེ་བཞིན་བོད་ནང་ཆུ་རགས་གསར་རྒྱག་གི་ལས་གཞི་རྒྱ་ཆེན་པོ་སྤེལ་ཏེ་ཆུའི་ཐོན་ཁུངས་སོགས་ལ་ཚོད་འཛིན་བྱས་དང་བྱེད་མུས་ཡིན་པའི་རྐྱེན་གྱིས་ཉེན་ཁ་བྱུང་སྲིད་པའི་ཐོག་ལ་ཞིབ་འཇུག་ཚད་ལྡན་གནང་སྟེ་སྙན་ཐོ་འདོན་དགོས་སྐོར་གསུངས་འདུག

དེ་དང་འབྲེལ་ནས་ཨ་རིའི་གྲོས་ཚོགས་གོང་མའི་འཐུས་མི་རྗེག་ཀི་རོ་སན་མཆོག་གིས། ང་ཚོའི་རྒྱལ་ཁབ་ཀྱི་བདེ་འཇགས་ཐད་ཤུགས་སྣོན་རྒྱག་རྒྱུ་དང་། དམག་དོན་དང་དམག་དཔུང་གི་ནུས་པ་རྒྱ་སྐྱེད་གཏོང་བར་དམག་མི་རྣམས་ལ་ཐོན་ཁུངས་ཡོད་ཚད་མཁོ་སྤྲོད་ཐུབ་པ་བྱ་རྒྱུ་གལ་ཆེན་ཡིན་ལ། ནེ་ཝ་ཌ་མངའ་སྡེའི་ཡུལ་མི་རྣམས་ཀྱི་བདེ་འཇགས་ནི་གལ་འགངས་ཆེ་ཤོས་ཤིག་ཡིན་ཞིང་། བསྐྱར་བཅོས་ཁྲིམས་ཡིག་ནང་ནེ་ཝ་ཌ་མངའ་སྡེའི་བདེ་འཇགས་གལ་ཆེན་ཡིན་པར་རྒྱབ་སྐྱོར་ཡོད་པའི་དོན་ཚན་ཁག་ཅིག་ཚུད་ཡོད་ལ། འབྲེལ་ལམ་སྲ་བརྟན། ནེ་ཝ་ཌའི་མི་མང་གི་བདེ་འཇགས་སོགས་ལ་རྒྱབ་སྐྱོར་ཡོད། ཅེས་གསུངས་འདུག

བསྐྱར་བཅོས་ཁྲིམས་འཆར་དེའི་ནང་། ཐད་འཕུར་གནམ་གྲུའི་ལས་མི་རྣམས་ཀྱིས་དམག་དོན་བྱ་འགུལ་སྤེལ་བར་འགོག་རྐྱེན་ཆེན་པོ་བཟོ་མཁན་རྩ་མེད་གཏོང་དགོས། དེ་ཡང་མཁའ་དམག་གནམ་གྲུའི་ཁ་ལོ་བ་ (Pilot) ཡི་སྡེ་ཁག་ཅིག་གིས་ཁི་རི་ཆི་མཁའ་དམག་གནམ་ཐང་ (Creech Air Force Base) དུ་དམག་གི་སྦྱོང་བརྡར་བྱེད་མུས་ཡིན་པ་ལྟ་བུར་ཆ་བཞག་ན། དམག་སྦྱོང་དང་དམག་ཤུགས་རྒྱ་སྐྱེད་གཏོང་སླད་དམག་མིའི་གླ་ཕོགས་བརྒྱ་ཆ་ ༣།༨ སྤར་ཏེ་དམག་མི་གང་མང་བསྡུ་རུབ་བྱེད་པའི་ལས་གཞིར་རྒྱབ་སྐྱོར་བྱེད་ཀྱི་ཡོད་ལ། དམག་ཁུངས་ནས་ཕྱིར་ཐོན་རྗེས་དམིགས་བསལ་དགོས་མཁོ་ཅན་ལ་འཕྲོད་བསྟེན་གྱི་ལྟ་སྐྱོང་ཐད་མུ་མཐུད་དུ་རོགས་སྐྱོར་བྱ་རྒྱུ་སོགས་ལ་རྒྱབ་སྐྱོར་བྱེད་བཞིན་ཡོད། མངའ་སྡེའི་ནང་རྟེན་གཞི་བྱས་པའི་ (Yucca Mountain) དུ་རྒྱལ་སྲུང་སླད་རྡུལ་ཕྲན་མཚོན་ཆའི་གད་སྙིགས་སོགས་ཁོར་ཡུག་ལ་གནོད་པའི་རྒྱུ་ཆ་ཁག་ལ་དཔལ་འབྱོར་གྱི་མཐུན་རྐྱེན་སྦྱོར་གྱི་མེད་སྐོར་གསལ་འདུག

ལྕམ་སྐུ་མཆོག་ནས་ཁྲིམས་འཆར་བཏོན་པ་དེར་ཨ་རིར་རྟེན་གཞི་བྱས་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་སོགས་ཀྱིས་ཐུགས་རྗེ་ཆེ་ཞུས་འདུག་ལ། ཨ་རིའི་གཞུང་གི་ངོས་ནས་རྒྱ་གཞུང་གིས་བོད་ནང་གི་ཁོར་ཡུག་གཏོར་བཤིག་དང་ཆུ་རགས་གསར་རྒྱག་སོགས་ལས་གཞི་འདྲ་མིན་སྤེལ་བའི་རྐྱེན་གྱིས་འབྱུང་འགྱུར་བོད་ཀྱི་རྒྱལ་ཡོངས་བདེ་འཇགས་ལ་ཉེན་ཁ་ཚབས་ཆེན་བྱུང་རྒྱུའི་གནད་དོན་དེ་གལ་ཆེན་དུ་འཛིན་ནས་དེ་འབྲེལ་ཞིབ་འཇུག་གནང་དགོས་གལ་ཆེ་བའི་འབོད་སྐུལ་ཞུས་ཡོད་འདུག འདི་ལོའི་ཕྱི་ཟླ་ ༤ ནང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིར་གཞུང་འབྲེལ་ཕྱོགས་ཕེབས་གནང་བའི་སྐབས། ལྕམ་སྐུ་རྗེག་ཀི་རོ་སན་ (Jacky Rosen) དང་དངོས་སུ་མཇལ་འཕྲད་གནང་སྟེ། དེ་སྔ་ཁོང་མོས་བོད་དོན་འཐབ་རྩོད་དང་། དམིགས་བསལ་གྱིས་རྒྱ་ནག་གིས་བོད་ཀྱི་ཆུའི་ཐོན་ཁུངས་ལ་འཐབ་ཇུས་འདྲ་མིན་ལག་བསྟར་བྱས་ཏེ་ཚོད་འཛིན་བྱེད་བཞིན་པའི་སྐོར་ལ་སེམས་འཚབ་ཡོད་པ་གསལ་སྟོན་དང་། ཨ་རིའི་གཞུང་གི་ངོས་ནས་བོད་ནང་གི་དངོས་ཡོད་གནས་སྟངས་དང་། བོད་དོན་འཐབ་རྩོད་དེ་གལ་ཆེན་དུ་བཟུང་ནས་དེ་འབྲེལ་གླེང་སློང་ལྷུག་པོ་གནང་ཡོད་ཅིང་། བོད་ཀྱི་ས་ཁམས་ཆབ་སྲིད་ཀྱི་གལ་གནད་དང་ཁེ་ཕན་སོགས་ཀྱི་སྐོར་བསྐྱར་ནན་གནང་བར་ལྕམ་སྐུ་མཆོག་ལ་ཐུགས་རྗེ་ཆེ་ཞུས་ཡོད་འདུག

སྤྱིར་རྒྱལ་ཡོངས་འགོག་སྲུང་དབང་ཆའི་ཁྲིམས་ཡིག་ (NDAA) ཅེས་པ་དེ་ནི་ཨ་རིའི་རྒྱལ་སྲུང་ལྷན་ཁང་གི་ལོ་འཁོར་གཅིག་གི་འགྲོ་གྲོན་དང་འབྲེལ་ནས་གྲོས་ཚོགས་ཀྱིས་དབང་ཆ་སྤྲོད་པའི་ཁྲིམས་ཡིག་ཅིག་ཡིན་ཞིང་། ཁྲིམས་ཡིག་དེས་རྒྱལ་སྲུང་ལྷན་ཁང་དང་འབྲེལ་ཡོད་ལས་ཁུངས་ཁག་གི་བྱེད་སྒོ་གཞན་ཁག དེ་ཡང་ནུས་ཤུགས་ཐོན་ལས་ཁང་གིས་རྡུལ་ཕྲན་མཚོན་ཆ་དང་འབྲེལ་བའི་འགྲོ་གྲོན་དང་བྱེད་སྒོའི་སྔོན་རྩིས་ལ་དབང་ཆ་སྤྲོད་པ་ཙམ་དུ་མ་ཟད། དམག་དོན་གྱི་ལས་གཞི་དང་། དམག་མི། དངོས་ཟོག་ཚོང་འབྲེལ་བཅས་ཀྱི་སྲིད་ཇུས་གཏན་འབེབས་གནང་རྒྱུ། དེ་བཞིན་ཁྲིམས་མཐུན་གྱི་སྒྲོམ་གཞི་འདོན་སྤྲོད་བྱེད་ཀྱི་ཡོད་འདུག

བསྟན་འཛིན་ཉི་སྒྲོན་དང་། གསར་འགོད་པ་བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།