མོན་རྟ་དབང་རྫོང་ཡོངས་ཀྱི་སློབ་ཕྲུག་མཐུན་ཚོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་ཞི་བདེ་ཡོང་ཐབས་དང་། ཆོས་ལུགས་མཐུན་འབྲེལ། རྒྱ་གར་གྱི་དཔལ་ནཱ་ལནྡཱའི་གནའ་བོའི་ཤེས་རིག་སྲུང་སྐྱོབ་སོགས་ཀྱི་རླབས་ཆེན་གྱི་མཛད་པ་བསྐྱངས་དང་སྐྱོང་མུས་ཡིན་པས། རྒྱ་གར་གྱི་གཟེངས་རྟགས་མཐོ་ཤོས་བྷ་ར་ཏི་རཱ་ཏ་ན་དབུལ་དགོས་པའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༢༣ ཉིན་རྟ་དབང་རྫོང་ཡོངས་ཀྱི་སློབ་ཕྲུག་མཐུན་ཚོགས་ཀྱི་གོ་སྒྲིག་འོག རྟ་དབང་དགའ་ལྡན་ལྷ་རྩེ་རྣམ་རྒྱལ་དགོན་གྱི་ཅམ་ལེང་ནས་བྷུ་དྷ་སྐྱེས་ཚལ་བར་གོམ་བགྲོད་ཀྱི་ལས་འགུལ་ཞིག་སྤེལ་ཏེ། རྒྱ་གར་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་གཟེངས་རྟགས་མཐོ་ཤོས་བྷ་ར་ཏི་རཱ་ཏ་ན་དབུལ་དགོས་པའི་དགོས་འདུན་བཏོན་འདུག་ལ། གོམ་བགྲོད་ལས་འགུལ་དེའི་ཁྲོད་ཁུལ་དེའི་དགེ་འདུན་པ་དང་། སློབ་མ། ཚོགས་པ་ཁག་གི་སྐུ་ཚབ། ཡུལ་མི་སོགས་ཀྱིས་མཉམ་ཞུགས་གནང་འདུག
མོན་རྟ་དབང་ཝི་ནི་ལེན་སི་(MON TAWANG VIGILANCE) ཚོགས་པའི་ངོ་དེབ་ཏུ་སྤེལ་བའི་གནས་ཚུལ་ལྟར་ན། འདུ་འཛོམས་དེའི་ཐོག་མར་རྟ་དབང་རྫོང་ཡོངས་ཀྱི་སློབ་ཕྲུག་མཐུན་ཚོགས་ཀྱི་དྲུང་ཆེ་སངས་དོན་གྲུབ་ལགས་དང་དྲུང་ཆེ་ཟུར་པ་སྨིན་གྲུབ་ཚེ་རིང་ལགས་སོགས་ཀྱིས་གཏམ་བཤད་གནང་བའི་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་ནས་ད་བར་འཛམ་གླིང་ཞི་བདེ་ཡོང་ཐབས་དང་། ཆོས་ལུགས་མཐུན་འབྲེལ། རྒྱ་གར་གྱི་དཔལ་ནཱ་ལནྡཱའི་གནའ་བོའི་ཤེས་རིག་སྲུང་སྐྱོབ་སོགས་ཀྱི་རླབས་ཆེན་གྱི་མཛད་པ་ཁག་བསྐྱངས་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ལ་ནོར་བྷེལ་ཞི་བདེའི་གཟེངས་རྟགས་ཕུལ་ཡོད་ཅིང་། ༧མགོན་པོ་གང་ཉིད་ཀྱིས་རྒྱུན་དུ་ནས་ངོས་རང་”རྒྱ་གར་གྱི་བུ” ཡིན་ཞེས་གསུང་གི་ཡོད་པ་མ་ཟད། འདས་པའི་མི་ལོ་དྲུག་ཅུ་ལྷག་གི་རིང་རྒྱ་གར་བ་རྣམས་ལ་བྱམས་བརྩེ་དང་འཚེ་མེད་ཞི་བདེ་སོགས་གོང་འཕེལ་གཏོང་ཐབས་སུ་མཛད་འཕྲིན་བསྐྱངས་དང་སྐྱོང་མུས་ཡིན་སྐོར་སོགས་གསལ་འདུག
དེ་བཞིན་ཟླ་འདིའི་ཕྱི་ཚེས་ ༢༠ ཉིན་སྐུའི་གོ་སྟོན་དང་བསྟུན། ས་སྦུག་ས་གནས་གཞོན་ནུའི་རྒྱུན་ལས་བསྟན་འཛིན་འཇམ་དཔལ་ལགས་ཀྱིས། ཁུལ་དེའི་གྲམ་བཱར་ནས་དུར་བིན་དགོན་པ་བར་སྤྱི་ལེ་ལྔ་ལྷག་ལ་རྐྱང་ཕྱག་འཚལ་ནས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་བྷ་ར་ཏི་རཱ་ཏ་ན་གཟེངས་རྟགས་དབུལ་དགོས་པའི་ལས་འགུལ་ཞིག་སྤེལ་ཡོད་འདུག འདི་ལོར་ ༧གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ལ་ཕེབས་པའི་སྐུའི་གོ་སྟོན་སྲུང་གཙི་དང་བསྟུན། རྒྱ་གར་གྲོས་ཚོགས་འཐུས་མིའི་བོད་དོན་གླེང་སྟེགས་ཚོགས་པས་བོད་དོན་རྒྱབ་སྐྱོར་དང་༧གོང་ས་རྒྱལ་བ་རིན་པོ་ཆེ་མཆོག་གིས་འཚེ་མེད་ཞི་བའི་ལམ་ནས་ཤར་བསྐྱོད་གནངས་དང་གནང་མུས་ཡིན་སྟབས། རྒྱ་གར་གྱི་ཆེས་མཐོའི་གཟེངས་རྟགས་བྷ་ར་ཏི་རཱ་ཏ་ན་ཞེས་པ་དབུལ་དགོས་པའི་འབོད་སྐུལ་སླད་མཚན་རྟགས་བསྡུ་རུབ་གནང་མུས་ཡིན་འདུག
ཕྱི་ལོ་ ༢༠༢༢ ཟླ་ ༨ པའི་ནང་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ ༢༠ ཡིས་མགྲིན་གཅིག་གི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་བྷ་ར་ཏི་རཱ་ཏ་ན་ (Bharat Ratna) དབུལ་དགོས་པའི་དགོས་འདུན་ཆེད་བཏོན་གནང་ཡོད་པ་མ་ཟད། རྒྱ་གར་གྱི་བྷི་རྗེ་པི་ (BJP) ཆབ་སྲིད་ཚོགས་པའི་སྣེ་ཁྲིད་པ་རྒན་གྲས་དང་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་གཙོས། ཧི་མ་ལ་ཡའི་རིགས་རྒྱུད་ཀྱི་གཞུང་དང་གཞུང་འབྲེལ་མ་ཡིན་པའི་ཚོགས་ཁག་དང་། གནད་ཡོད་མི་སྣ་བཅས་ཀྱིས་གསར་འགོད་གསལ་བསྒྲགས་དང་ཁག་ཅིག་གི་གྲོས་ཆོད་གཏན་འབེབས་བྱས་ཏེ་འབོད་སྐུལ་ཞུས་འདུག
བྷ་ར་ཏི་རཱ་ཏ་ན་ཞེས་པའི་གཟེངས་རྟགས་དེ། ཕྱི་ལོ་ ༡༩༩༠ ལོར་ལྷོ་ཨ་ཧྥི་རི་ཀའི་སྲིད་འཛིན་ཟུར་པ་དང་ནོ་སྦེལ་ཞི་བདེའི་གཟེངས་རྟགས་བཞེས་མཁན་མཱན་ཌེལ་ལཱ་ (Nelson Mandela) དང་། ཕྱི་ལོ་ ༡༩༨༧ ལོའི་རྒྱ་གར་རང་བཙན་འཐབ་རྩོད་པ་ཁཱན་ཨབ་དུལ་གྷ་ཕར་ཁཱན (Khan Abdul Ghaffar Khan)། དེ་བཞིན་ཕྱི་ལོ་ ༡༩༨༠ ལོའི་ཡི་ཤུ་ཨ་མ་ཊི་རེ་སཱ་མཆོག་དང་། སྲིད་བློན་དམ་པ་ནེ་རུ་མཆོག་བཅས་མི་སྣ་གྲགས་ཅན་ ༥༣ ཙམ་ལ་ཕུལ་འདུག་ལ། དེ་ནི་རྒྱ་གར་སྤྱི་མཐུན་རྒྱལ་ཁབ་ཀྱི་གཟེངས་རྟགས་མཐོ་ཤོས་ཤིག་དང་། དམིགས་བསལ་ཞབས་ཞུ་བ་དང་ཆེས་མཐོའི་བྱ་གཞག་སྒྲུབ་མཁན། ཕོ་མོ་དང་མི་རིགས་དབྱེ་འབྱེད་མེད་པར་བྱ་བཞག་སྒྲུབ་མཁན། རིག་གཞུང་དང་ཚན་རིག་ཐོག་ལ་བྱས་རྗེས་ཅན། མི་མང་ཞབས་འདེགས་ཞུ་མཁན་དག་ལ་འབུལ་སྲོལ་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
