ཨོ་གླིང་སིད་ཎི་གྲོང་ཁྱེར་གྱི་རྒྱ་ནག་གཞུང་ཚབ་པས་གནས་མཁར་གསར་གྱི་གྲོང་ཁྱེར་སྤྱི་ཁྱབ་པ་སྐུ་ཞབས་རོ་སི་ཁེ་རེ་ཇི་ལགས་སུ་ས་གནས་ཀྱི་བོད་མི་དང་ཐའེ་ཝན་གྱི་མི་ཚོར་རོགས་རམ་བྱ་རྒྱུ་མེད་པའི་ངན་སྐུལ་བྱས་པར་གྲོང་ཁྱེར་སྤྱི་ཁྱབ་པས་ཁོང་ཧ་ལས་དགོས་བྱུང་སྐོར་གསུངས་འདུག
Newcastle Lord Mayor Ross Kerridge and Chinese Consul General Wang Yu.
ཁ་སང་ཨོ་གླིང་གི་གསར་འགྱུར་བརྒྱུད་ལམ་དུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༧ ཉིན་ཨོ་གླིང་གནས་མཁར་གསར་གྲོང་ཁྱེར་དུ། རྒྱ་ནག་གི་ཝང་ཡུས་(Wang Yu) ཟེར་བས་མགོ་ཁྲིད་པའི་རྒྱ་ནག་གི་སྐུ་ཚབ་ཚོགས་ཆུང་ཞིག་ཆེད་དུ་གྲོང་ཁྱེར་དེར་ཡོང་ནས། ཕྱོགས་གཉིས་ཀྱི་ཚོང་དོན་དང་རྡུལ་ཕྲན་མཚོན་ཆའི་ལས་དོན་སོགས་ཀྱི་སྐོར་གླེང་མོལ་བྱེད་སྐབས། གནས་མཁར་གསར་གྲོང་ཁྱེར་གྱི་སྤྱི་ཁྱབ་པ་སྐུ་ཞབས་རོ་སི་ཁེ་རེ་སི་ལགས་ལ་བོད་མི་དང་ཐའེ་ཝན་གྱི་མི་ཚོར་རོགས་རམ་མཐུན་རྐྱེན་སྦྱོར་རྒྱུ་མེད་སྐོར་སྐུལ་འདེད་བཏང་ཡོད་འདུག་ལ། ཕྱིས་སུ་གྲོང་ཁྱེར་སྤྱི་ཁྱབ་པ་སྐུ་ཞབས་རོ་སི་ཁེ་རེ་ཇི་ (Cr Ross Kerridge) ལགས་ཀྱིས་སྐད་ཆ་དེས་ཁོང་ཧ་ལས་སུ་བཅུག་ཡོད་སྐོར་གསུངས་འདུག
ཟླ་འདིའི་ཕྱི་ཚེས་ ༢༣ ཉིན་ཨོ་གླིང་གནས་མཁར་གསར་གྱི་གྲོང་ཁྱེར་སྤྱི་ཁྱབ་པ་སྐུ་ཞབས་རོ་སི་ལགས་སྒེར་གྱི་ངོ་དེབ་ཏུ། བདུན་སྔ་མའི་རེས་གཟའ་ཕུར་བུའི་ཉིན་ངས་ཉེ་ལམ་གསར་དུ་བསྐོས་པའི་སིད་ཎི་རྒྱ་ནག་གཞུང་ཚབ་པ་དང་ཐུག་འཕྲད་བྱས་པ་ཡིན། དེ་ནི་ཁོང་གནས་མཁར་གསར་དུ་ཡོང་ཐེངས་དང་པོ་དང་། ང་རང་ཐུག་ཐེངས་དང་པོ་ཡིན། སྐབས་དེར་ཁོས་རྒྱ་ནག་གི་བོད་དོན་ལ་བཟུང་པའི་ལངས་ཕྱོགས་དང་། ཐའེ་ཝན་སོགས་ཀྱི་སྐོར་སྐད་ཆ་བཤད་སྐབས་ཡ་མཚན་ཅན་ཞིག་ཏུ་མཐོང་སོང་། ཞེས་གསུངས་འདུག་ལ། ཆབ་སྲིད་དཔྱད་བརྗོད་པ་ཁག་ཅིག་གིས། རྒྱ་ནག་གཞུང་གིས་ཨོ་གླིང་དབུས་གཞུང་ལ་འབྲེལ་འདྲིས་མ་བྱས་པར་ཐད་ཀར་གནས་མཁར་གྲོང་ཁྱེར་མཚོ་འོག་ཏུ་བཀོལ་བའི་མཚོ་གྲུའི་དམག་དོན་གྱི་ལྟེ་གནས་ཤིག་ཏུ་བསྒྱུར་རྒྱུའི་བསམ་ཚུལ་བཏོན་པ་ནི། ཨོ་གླིང་ནང་སྲིད་ཀྱི་ལས་དོན་ལ་རྩིས་འཇོག་མ་བྱས་པའི་ཁར། ཚོང་དོན་ལ་ཁ་གཡར་ནས་དམག་དོན་གྱི་ནུས་པ་སྐྱེད་ཐབས་ལ་འབད་མུས་ཡིན་པའི་ཚོད་དཔག་བྱེད་ཀྱིན་ཡོད་འདུག
གནད་དོན་དེ་དང་འབྲེལ་ནས་ཨོ་གླིང་གནས་མཁར་གསར་བོད་རིགས་མཐུན་ཚོགས་ཀྱི་ཚོགས་གཙོ་ཀླུ་འབུམ་ཐར་ལགས་ཀྱིས་འདི་གའི་གསར་འགོད་པར། ཨོ་གླིང་སིད་ཎི་གྲོང་ཁྱེར་གྱི་རྒྱ་ནག་གཞུང་ཚབ་པ་ཝང་ཡུས་ཟེར་བ་གནས་མཁར་གསར་ཁུལ་དུ་ལྟ་སྐོར་ལ་ཡོང་སྐབས་ས་གནས་སྤྱི་ཁྱབ་ལགས་དང་ཐུག་འཕྲད་བྱས་ཏེ། ས་གནས་འདིར་བོད་མི་དང་ཐའེ་ཝན་གྱི་མི་སེར་ཡོད་མེད་སྐད་ཆ་དྲིས་ནས། བོད་མི་དང་ཐའེ་ཝན་མི་སེར་ལ་རོགས་པ་བྱ་རྒྱུ་ཡོད་མ་རེད་ཅེས་བཤད་པའི་གནས་ཚུལ་ཞིག་བྱུང་འདུག་ལ། གནས་ཚུལ་དེ་ད་ལྟ་ཨོ་གླིང་གི་གསར་འགྱུར་བརྒྱུད་ལམ་ཁག་དང་། དེ་རིང་གི་ཚགས་པར་དག་ཏུའང་འཐོན་མུས་ཡིན་འདུག རྒྱ་ནག་གཞུང་གིས་དངོས་ཤུགས་བརྒྱུད་གསུམ་ནས་བོད་པ་དང་། ཡུ་གུར་བ། ཐའེ་ཝན་སོགས་ཀྱི་སྤྱི་ཚོགས་ལ་དཀའ་ངལ་བཟོ་རྒྱུར་ཐབས་ཤེས་བྱས་ནས་རྒྱལ་མཚམས་ལས་བརྒལ་ཏེ་མནར་གཅོད་ཅིག་གཏོང་བཞིན་ཡོད་པ་མ་ཟད། གཞུང་གི་དཔོན་རིགས་རྣམས་ལའང་བོད་པར་རྒྱབ་སྐྱོར་བྱ་རྒྱུ་མེད་ལུགས་ཀྱི་བཙན་བཀའ་ཞིག་གཏོང་གིན་འདུག ཅེས་དང་། ད་ལྟ་འབྱུང་མུས་ཡིན་པའི་གནས་ཚུལ་དེ་དག་ལ་རྒྱུས་ལོན་བྱས་ནས་ཨོ་གླིང་སྐུ་ཚབ་དོན་གཅོད་ཁང་དང་། རྒྱལ་ཡོངས་བོད་རིགས་སྤྱི་མཐུན་ཚོགས་པར་གནས་ཚུལ་ཞུས་ཡོད་པ་མ་ཟད། མུ་མཐུད་དུ་ཞིབ་འཇུག་བྱས་དང་བྱེད་མུས་ཡིན་སྐོར་བརྗོད་བྱུང་།
གྲོང་ཁྱེར་སྤྱི་ཁྱབ་པ་སྐུ་ཞབས་རོ་སི་ཁེ་རེ་ཇི་ལགས་སྐུའི་གོ་སྟོན་གྱི་མཛད་སྒོར་བཅར་སྐབས། པར་ཀླུ་འབུམ་ཐར་གྱིས་འདི་གར་མཁོ་སྤྲོད་གནང་།
འདི་ལོར་འཛམ་གླིང་ས་ཕྱོགས་གང་སར་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་པའི་སྐུའི་འཁྲུངས་སྐར་དང་བསྟུན། གནས་མཁར་གསར་གྲོང་ཁྱེར་སྤྱི་ཁྱབ་པ་སྐུ་ཞབས་རོ་སི་ལགས་འདི་ལོའི་གནས་མཁར་གསར་ས་གནས་ཀྱི་༧སྐུའི་འཁྲུངས་སྐར་སྲུང་གཙིའི་མཛད་སྒོའི་སྐུ་མགྲོན་གཙོ་བོར་ཕེབས་ཏེ། ཨོ་གླིང་གི་རྒྱལ་ཁབ་དེ་རང་དབང་དང་དམངས་གཙོའི་རྒྱལ་ཁབ་ཅིག་དང་། འཛམ་གླིང་གི་སྣ་མང་རིག་གཞུང་ཅན་གྱི་རྒྱལ་ཁབ་ཆེ་ཤོས་ཤིག་ཡིན་པ་མ་ཟད། ཨོ་གླིང་གཞུང་གིས་མི་རིགས་རང་རང་གི་རིག་གཞུང་དང་ཡིག་སྐད་སོགས་གཅེས་སྐྱོང་བྱ་རྒྱུར་རོགས་འདེགས་གནང་མུས་ཡིན་པའི་སྐོར་དང་། ཕྱི་ལོ་ ༡༩༨༩ ལོར་༧གོང་ས་རྒྱལ་བ་རིན་པོ་ཆེ་མཆོག་ལ་ནོར་བྷེལ་ཞི་བདེའི་གཟེངས་རྟགས་ཕུལ་ཡོད་པ་མ་ཟད། ༧མགོན་པོ་གང་ཉིད་ཀྱིས་ད་བར་བྱམས་སྙིང་རྗེ་དང་། འཚེ་བ་མེད་པའི་ཐད་ལ་ལམ་སྟོན་གནང་གི་ཡོད་པས། སྐུ་ཞབས་ཁོང་ཉིད་ཀྱང་༧གོང་ས་རྒྱལ་བ་་རིན་པོ་ཆེ་མཆོག་ལ་གུས་བརྩི་ཆེན་པོ་ཡོད་སྐོར་སོགས་གསུངས་ཡོད་འདུག
རྒྱ་ནག་གཞུང་གིས་ཆབ་སྲིད་ཙམ་མིན་པར་རྒྱལ་ཁབ་གཞན་དང་ཚོང་དོན་གྱི་འབྲེལ་ལམ་འཛུགས་སྐབས། རྒྱལ་ཁབ་སོ་སོར་གནས་སྡོད་བྱེད་མུས་ཡིན་པའི་བོད་མིའི་བདེ་དོན་དང་། འཚོ་བ་སོགས་ལ་ཐེ་ཇུས་བྱས་ཏེ། རྒྱལ་མཚམས་ལས་བརྒལ་ནས་བོད་མི་རྣམས་ཀྱི་ཉིན་རེའི་འཚོ་བ་དང་། འགྲོ་འདུག་སོགས་ལ་མྱུལ་ཞིབ་བྱེད་ཀྱི་ཡོད་པའི་གནས་ཚུལ་རིམ་པར་ཐོན་ཡོད་ལ། ཕྱི་ལོ ༢༠༢༣ ལོའི་ཨ་རིའི་རང་དབང་ཁང་པའི་སྙན་ཐོ་ལྟར་ན། རྒྱ་ནག་གཞུང་གིས་ཕྱི་རྒྱལ་ཁག་ཏུ་ཡོད་པའི་བོད་མི་གཙོས་སྐྱབས་བཅོལ་བ་དག་གི་བདེ་འཇགས་དང་། འཚོ་གནས་སོགས་ཀྱི་ཐད་ལ་ལྟ་རྟོག་དང་སོ་མྱུལ་བྱེད་ཀྱི་ཡོད་པ་མ་ཟད། ལྐོག་རྔན་སྤྲད་ནས་སྐྱབས་བཅོལ་མི་མང་དམར་གསོད་གཏོང་བ་དང་འཇིགས་སྐུལ་བྱས་པའི་གནད་དོན་མང་པོ་ཞིག་བྱུང་དང་འབྱུང་མུས་ཡིན་འདུག་ལ། རྒྱ་ནག་ནི་འདས་པའི་མི་ལོ་བཅུའི་ནང་རྒྱལ་མཚམས་ལས་བརྒལ་ནས་དྲག་གནོན་བྱེད་མཁན་ཚབས་ཆེ་ཤོས་ཀྱི་རྒྱལ་ཁབ་ཏུ་གྱུར་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
