འདི་ལོའི་ཕྱི་ཟླ་ ༡༠ ཚེས་ ༡ ཉིན་ནས་བཟུང་བཀའ་སྤྱི་གཉིས་ཀྱི་འོས་བསྡུའི་ལས་རིམ་དངོས་སུ་དབུ་འཛུགས་གནང་སྟེ། དབུས་འོས་བསྡུའི་འགན་འཛིན་དང་འགན་འཛིན་ལས་འཕར་རྣམ་གཉིས་བཅས་ནས་འོས་བསྡུའི་སྒྲིག་གཞི་སོགས་གོ་རྟོགས་སྤེལ་སླད་ས་གནས་ཁག་ཏུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག
དེ་རིང་ཕྱི་ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་རང་དབང་ཅན་གྱི་སྡེ་ཚན་འོས་བསྡུ་ལྷན་ཁང་གིས་གསར་འགོད་གསལ་བསྒྲགས་ཤིག་སྤེལ་བའི་ནང་། ཕྱི་ལོ་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་གཉིས་ཀྱི་འོས་བསྡུ་ཆེན་མོ་སླེབས་ལ་ཉེ་བས། བར་ལམ་དབུས་འོས་བསྡུ་ལས་ཁང་ལ་འབྱུང་འགྱུར་སྲིད་སྤྱི་གཉིས་ཀྱི་འོས་བསྡུའི་ལས་རིམ་སོགས་ཀྱི་སྐོར་འདྲི་རྩད་ཞུ་མཁན་མི་ཉུང་བ་ཞིག་ཡོང་བཞིན་འདུག་པ་མ་ཟད། སྤྱི་ཚོགས་ནང་འོས་བསྡུ་ཆེན་མོ་དང་འབྲེལ་བའི་ཚོད་དཔག་གིས་གླེང་སློང་སོགས་ཀྱང་ཡོང་གི་ཡོད་པས། དབུས་འོས་བསྡུ་ལས་ཁང་གིས་མང་ཚོགས་ལ་མཁྱེན་རྟོགས་སླད་གསལ་བཤད་ཞུ་རྒྱུར།
བཙན་བྱོལ་བོད་མིའི་བཅའ་ཁྲིམས་དོན་ཚན་ ༩༧ དང་། འོས་བསྡུའི་སྒྲིག་གཞི་ལེའུ་ ༢ དོན་ཚན་ ༥ ནང་གསེས་ ༣ པའི་ནང་ “ སྲིད་སྐྱོང་དང་། སྤྱི་འཐུས་ཀྱི་འོས་བསྡུ་ནམ་དགོས་སྐབས་འོས་བསྡུའི་ལས་རིམ་འགོ་ཚུགས་པ་ནས་དངོས་གཞི་གྲུབ་འབྲས་གསལ་བསྒྲགས་མ་ཟིན་བར་གྱི་དུས་ཡུན་རིང་དབུས་འོས་བསྡུ་ལས་ཁང་དུ་འོས་བསྡུའི་འགན་འཛིན་ལས་འཕར་གཉིས་དགོས་པར་་་་” ཞེས་པའི་དགོངས་དོན་བཞིན། འོས་བསྡུའི་འགན་འཛིན་ལས་འཕར་གཉིས་ལས་འཁུར་དམ་འབུལ་ཞུས་པའི་ཉིན་ནས་འོས་བསྡུའི་ལས་རིམ་དངོས་སུ་འགོ་འཛུགས་རྒྱུའི་སྒྲིག་སྲོལ་ཡོད་པ་བཞིན། ཕྱི་ལོ་ ༢༠༢༥ ཟླ་ ༡༠ ཚེས་ ༡ ནས་འོས་བསྡུའི་འགན་འཛིན་ལས་འཕར་གཉིས་བསྐོ་གཞག་དང་ལས་འགན་ཐོག་དངོས་བཞུགས་ཐུབ་པའི་སྒྲིག་དོན་སྙན་སེང་ཞུས་ཟིན་པ་དང༌། ཕྱོགས་མཚུངས་འོས་བསྡུའི་འགན་འཛིན་ལས་འཕར་གཉིས་ནས་ལས་འགན་ཐོག་དངོས་སུ་བཞུགས་རྗེས་སྔོན་འགྲོ་དང་དངོས་གཞིའི་འོས་བསྡུའི་དུས་ཚེས་སོགས་ཀྱི་ལས་རིམ་ཞིབ་ཕྲ་གཏན་འབེབས་ཀྱིས་མང་ཚོགས་ལ་གསལ་བསྒྲགས་ཞུ་རྒྱུ་དང༌། དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང༌། འགན་འཛིན་ལས་འཕར་རྣམས་ནས་སྔར་ལམ་ལྟར་མང་ཚོགས་ལ་འོས་བསྡུའི་སྒྲིག་གཞི་སོགས་གོ་རྟོགས་སྤེལ་ཆེད་གཞུང་དོན་ཕྱོགས་བསྐྱོད་ཀྱི་ལས་རིམ་དེ་ཡང་འདི་ལོ་ཕྱི་ཟླ་ ༡༠ ཚེས་ ༡ རྗེས་ནས་འགོ་འཛུགས་ཞུ་རྒྱུ་ཡིན་པས། བོད་མི་མང་ཚོགས་ནས་སྤྱི་ཚོགས་ནང་འོས་བསྡུ་དང་འབྲེལ་བའི་ཁྱབ་གདལ་འགྲོ་བཞིན་པའི་འཁྱོག་བཤད་རིགས་ལ་བདག་སྤྲོད་མི་གནང་བའི་སྐུལ་ལྕག་ཞུ་རྒྱུ་ཡིན་ཞེས་འཁོད་ཡོད་འདུག
དེ་ཡང་བཙན་བྱོལ་བོད་མིའི་བཅའ་ཁྲིམས་ལེའུ་བརྒྱད་པ། དོན་ཚན་ (༩༧) ནང་གསེས་ (༢) པའི་ “ཀ” ནང་། “སྲིད་སྐྱོང་དང༌། སྤྱི་འཐུས་ཀྱི་འོས་བསྡུ་ནམ་དགོས་སྐབས་འོས་བསྡུའི་ལས་རིམ་གསལ་བསྒྲགས་བྱས་པ་ནས་དངོས་གཞིའི་གྲུབ་འབྲས་གསལ་བསྒྲགས་མ་ཟིན་བར་གྱི་དུས་ཡུན་རིང་དབུས་འོས་བསྡུ་ལས་ཁང་ལ་འོས་བསྡུའི་འགན་འཛིན་ལས་འཕར་གཉིས་དགོས་པར། ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་བཅས་ནས་སྐབས་དེའི་འོས་མི་འདེམས་སྒྲུག་ཁོ་ནའི་ཆེད་མི་འགྲོ་གསུམ་དམིགས་འཛུགས་བྱས་པའི་ཚོགས་ཆུང་དེས་ཉིས་ལྡབ་ལས་མ་ཉུང་བའི་འོས་འཆར་ཕུལ་བར་སྤྱི་འཐུས་ལྷན་ཚོགས་སུ་འོས་བསྡུ་བྱས་ཏེ་མང་མོས་སུ་ཐོབ་ལ་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་དུ་འོས་ཐོན་བྱུང་བར་ངོས་འཛིན་བྱ་རྒྱུ། ཡང་ན་ཚོགས་ཆུང་དེས་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དང༌། རྩིས་ཞིབ་སྤྱི་ཁྱབ་གཉིས་ལ་ཞོར་ལྕོགས་སུ་རྒྱབ་གཉེར་གནང་ན་སྤྱི་འཐུས་ལྷན་ཚོགས་སུ་མང་མོས་ཐག་གཅོད་བྱུང་ཚེ་དེ་དོན་བྱེད་འཐུས།” དང་། “ཁ” ཡི་དགོངས་དོན། “གལ་ཏེ་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་གྲོས་ཚོགས་མ་འཚོགས་པའི་སྐབས་བསྐོ་གཞག་བྱེད་དགོས་བྱུང་ཚེ། གོང་གསལ་འདེམས་སྒྲུག་ཚོགས་ཆུང་གིས་འཆར་འབུལ་ཞུས་པའི་ནང་ནས་སྤྱི་འཐུས་རྒྱུན་ལས་ཀྱི་རྩ་འབོར་གསུམ་ཆ་གཉིས་ཡན་གྱི་མོས་མཐུན་ཐོག་བསྐོ་གཞག་བྱེད་དགོས།” ཞེས་གསལ་འདུག
ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ནང་འཛམ་གླིང་རྒྱལ་ཁབ་ ༢༦ ནས་མི་གྲངས་ ༨༣༠༨༠ ཡིས་མིང་གཞུང་དེབ་འགོད་གནང་ཡོད་པ་དང་། སྲིད་སྐྱོང་གི་དངོས་གཞིའི་འོས་འཕེན་མཁན་མི་གྲངས་ ༦༣༩༩༡ བྱུང་བའི་ཁྲོད་འོས་ཤོག་ ༦༠༤ རྩིས་མེད་དུ་ཕྱིན་པ་དང་། ཆ་སྙོམས་འོས་འཕེན་པའི་བརྒྱ་ཆ་ ༧༢།༢ ཆགས་ཡོད་པ་རེད་ལ། དེ་ནི་འདས་པའི་སྔོན་འགྲོ་དང་དངོས་གཞིའི་འོས་བསྡུའི་ལས་རིམ་ཁག་གི་ནང་ཆ་ཤས་ལེན་མཁན་གྱི་གྲངས་འབོར་མཐོ་ཤོས་དེ་ཆགས་ཡོད་འདུག དེ་བཞིན་འཛམ་གླིང་གི་རྒྱལ་ཁབ་ ༢༦ ནང་ས་གནས་འོས་བསྡུ་ལས་ཁང་གྲངས་ ༥༨ འོག་འོས་བསྡུ་བྱ་ཡུལ་སྡེ་ཚན་གྲངས་ ༣༠༦ ནང་། དབུས་སའི་འོས་བསྡུའི་ཚོགས་མི་དང་གཟུ་དཔང་། ལས་བྱེད་བཅས་ཁྱོན་མི་གྲངས་ ༢༠༡༤ ནས་ལས་བསྡུའི་ལས་དོན་ཐོག་འགན་འཁུར་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
