བོད་དང་། ཡུ་གུར། ཧོང་ཀོང་བཅས་ཀྱི་སྒྱུ་རྩལ་བའི་འགྲེམས་སྟོན་དང་། རྒྱ་ནག་གི་རྒྱལ་མཚམས་བརྒལ་བའི་གཉའ་གནོན།

སིང་གར་པུར་རྟེན་གཞི་བྱས་པའི་སྦི་སྦི་སི་གསར་འགོད་པ་ Tessa Wong གིས་གནས་ཚུལ་སྤེལ།
ཚེ་རིང་དོན་གྲུབ་ཀྱིས་བོད་ཡིག་ཏུ་བསྒྱུར།
རྩོམ་ཁུངས། བོད་ཀྱི་དུས་བབ།

བདུན་ཕྲག་གསུམ་གྱི་གོང་དུ་འབར་མའི་སྒྱུུ་རྩལ་བ་སཱའི་རྒྱལ་ས་སྦེན་ཀོག་ཏུ་འབྱོར་ཡོད། དེ་ནི་ཁོང་དང་ཁོང་གི་བཟའ་ཟླས་ཐའི་ལེནྜ་ཡི་སྒྱུ་རྩལ་ཁང་གྲགས་ཆེ་ཤོས་ཤིག་གི་ནང་གོ་སྒྲིག་བྱས་པའི་སྒྱུ་རྩལ་གྱི་འགྲེམས་སྟོན་འགོ་འཛུགས་བྱེད་པར་ཡོང་བ་ཞིག་རེད།

ད་ལྟའི་ཆར་ཁྱོ་ཤུག་གཉིས་པོ་ནི་དབྱིན་ཡུལ་དུ་བྲོལ་བྱོལ་དུ་ཕྱིན་ཡོད་ཅིང་། དེར་ཁོང་གཉིས་ཀྱིས་སྐྱབས་བཅོལ་ཞུ་འཆར་ཡོད་འདུག ཁོང་གཉིས་ཀྱི་འགྲེམས་སྟོན་ནི་དབང་འཛིན་རིང་ལུགས་ཀྱི་གཉའ་གནོན་སྐོར་ཡིན་པས། དེས་རྒྱ་ནག་གཞུང་ལ་ཁོང་ཁྲོ་བསླངས་བའི་རྐྱེན་གྱིས་འགྲེམས་སྟོན་སྟངས་འཛིན་དང་བཀག་འགོག་བྱུང་ཡོད་པ་རེད།

ཁྱོ་ཤུག་གཉིས་པོས་ཐའི་ལེནྜ་ཉེན་རྟོག་པས་ཁོང་གཉིས་འཚོལ་ཞིབ་བྱེད་བཞིན་ཡོད་སྐོར་བརྗོད་ཀྱང་། ཉེན་རྟོག་པའི་མགྲིན་ཚབ་པ་ཞིག་གིས་གནས་ཚུལ་དེར་དང་ལེན་བྱས་མ་སོང་། འགྲོ་བ་མིའི་ཐོབ་ཐང་གི་རྒྱབ་སྐྱོར་བ་ཚོས་གནས་ཚུལ་དེ་ནི་རྒྱལ་མཚམས་བརྒལ་བའི་གཉའ་གནོན་གྱི་དཔེ་མཚོན་ཞིག་ཡིན་པའི་སྐྱོན་བརྗོད་བྱེད་བཞིན་ཡོད།

ཕྱི་ཟླ་ ༧ ཚེས་ ༢༦ ཉིན་སྦེན་ཀོག་གི་སྒྱུ་རྩལ་དང་རིག་གཞུང་ལྟེ་གནས་ཁང་དུ་དབུ་འབྱེད་བྱས་པའི་འགྲེམས་སྟོན་དེའི་ནང་རྒྱལ་ཁོངས་རྒྱ་ནག་དང་ཨུ་རུ་སུ། ཨི་རན་སོགས་ནས་ཡིན་པའི་བཙན་བྱོལ་དུ་གྱར་བའི་སྒྱུ་རྩལ་བ་རྣམས་ཀྱི་བརྩམས་ཆོས་འགྲེམས་སྟོན་བྱེད་བཞིན་ཡོད་པས། སའི་ཡིས་བརྗོད་ན་འགྲེམས་སྟོན་དེ་དབུ་འབྱེད་བྱས་ནས་དུས་ཐུང་ཞིག་གི་ནང་སྦེན་ཀོག་གྲོང་ཁྱེར་གྱི་ལས་བྱེད་ལྷན་བཅར་ཐོག་རྒྱ་ནག་གཞུང་ཚབ་ཀྱི་མི་སྣ་ཁག་ཅིག་འགྲེམས་སྟོན་ཁང་དུ་ཐེངས་མང་སླེབས་ཡོད་འདུག

འགྲེམས་སྟོན་གྱི་བརྗོད་གཞི་ནི་ངན་པ་ལག་སྦྲེལ་གྱི་ལྷན་ཚོགས། དབང་འཛིན་རིང་ལུགས་མཉམ་སྦྲེལ་གྱི་ཐོག་ནས་སྤེལ་བའི་གོ་ལའི་མ་ལག་གསལ་སྟོན། ཞེས་པ་དེ་ཡིན་ཞིང་། འགྲེམས་སྟོན་གྱི་གཞུང་འབྲེལ་འགྲེལ་བརྗོད་ལྟར་ན་དེས་དབང་འཛིན་རིང་ལུགས་ཀྱི་སྲིད་གཞུང་ཁག་གིས་ཕན་ཚུན་མཉམ་སྦྲེལ་བྱས་ཏེ་གཉའ་གནོན་གྱི་བྱ་བ་སྤེལ་བཞིན་ཡོད་པ་གསལ་སྟོན་བྱ་རྒྱུར་དམིགས་པ་ཞིག་ཡིན་འདུག

སཱའི་ཡིས་བརྗོད་ན་རྒྱ་ནག་གཞུང་གི་ལས་བྱེད་ཀྱིས་བོད་དང་། ཡུ་གུར། ཧོང་ཀོང་བཅས་ཀྱི་སྒྱུ་རྩལ་བའི་བརྩམས་ཆོས་ལ་དགག་བྱ་བྱས་ཡོད་ཅིང་། ཐོག་མའི་ཆར་འགྲེམས་སྟོན་དེ་རྦད་དེ་སྒོ་བརྒྱབ་དགོས་པའི་དགོས་འདུན་ཀྱང་བཏོན་ཡོད་འདུག དེ་ལྟར་ནའང་སྒྱུ་རྩལ་ལྟེ་གནས་ཁང་གིས་གྲོས་མོལ་གྱི་ལམ་ནས་ཕན་ཚུན་འགྲིག་འཇགས་བྱེད་ཐུབ་པ་བྱུང་ཡོད་པ་དང་། དེ་ཡང་ཕོག་ཐུག་འགྲོ་གཞིའི་སྒྱུ་རྩལ་བརྩམས་ཆོས་དང་བརྩམས་ཆོས་ཀྱི་ཆ་ཤས་ཁག་ཅིག་གི་ཕྱིར་འདོན་བྱས་རྗེས་སུ་གཞི་ནས་འགྲེམས་སྟོན་དེ་མུ་མཐུད་དེ་སྐྱོང་དུ་བཅུག་ཡོད་འདུག

བདུན་ཕྲག་འདིའི་ནང་སྦེན་ཀོག་གི་འགྲེམས་སྟོན་དེར་ལྟ་སྐོར་དུ་བསྐྱོད་པའི་སྦི་སྦིེ་སི་ཡི་གསར་འགོད་པ་ཞིག་གིས་སྒྱུ་རྩལ་བརྩམས་ཆོས་ཀྱི་འགྲེལ་བརྗོད་ནང་གསལ་བའི་སྒྱུ་རྩལ་བ་ཁག་ཅིག་གི་མིང་ལ་བཀྲག་རྩི་ནག་པོ་བྱུགས་ཏེ་ནག་སུབ་བཏང་ཡོད་པ་མཐོང་འདུག དེ་བཞིན་བོད་དང་ཧོང་ཀོང་། ཤིང་ཅང་བཅས་ཀྱི་ཡུལ་མིང་འཁོད་ཡོད་པ་དེ་དག་ཀྱང་མི་མངོན་པ་བཟོ་ཆེད་དུ་སྒྱུ་རྩལ་བའི་ཕ་ཡུལ་དང་འབྲེལ་བའི་བརྗོད་ཚིག་ཁག་ཅིག་ཀྱང་ནག་སུབ་བཏང་ཡོད་འདུག

དགག་བྱའི་འོག་ཚུད་ཡོད་པའི་སྒྱུ་རྩལ་བརྩམས་ཆོས་མང་ཆེ་བ་ནི་བོད་རིགས་སྒྱུ་རྩལ་བ་བསྟན་འཛིན་མི་འགྱུར་དཔལ་སྒྲོན་ལགས་ཀྱི་བརྩམས་ཆོས་ཡིན་པ་དང་། སྒྱུ་རྩལ་བ་ཁོང་གིས་བཟོ་སྐྲུན་ཞུས་པའི་གློག་བརྙན་ཁག་ཅིག་བརྙན་འཕྲིན་གྱི་ཐོག་ནས་སྟོན་འཆར་ཡོད་འདུག་པའི་ནང་གློག་བརྙན་གཅིག་ནི་༸གོང་ས་ཏཱ་ལའི་བླ་མ་མཆོག་གི་སྐོར་ཡིན་འདུག ཡིན་ནའང་འགྲེམས་སྟོན་སྐབས་བརྙན་འཕྲིན་གྱི་གློག་སྒོ་བཀག་ཡོད་འདུག དེ་བཞིན་བོད་དང་ཡུ་གུར་གྱི་རྒྱལ་དར་དང་། བཙན་བྱོལ་ནང་ཡོད་པའི་བོད་མིའི་ཁྱིམ་ཚང་ཞིག་གི་སྐོར་གྱི་བརྩམས་སྒྲུང་། རྒྱ་ནག་དང་ཨི་ཛི་རལ། ཤིང་ཅང་བཅས་ཀྱི་སྐོར་འཁོད་པའི་སྦྲག་ཡིག་ཤོག་བྱང་ཞིག་བཅས་ཀྱང་ཕྱིར་འདོན་བྱས་ཡོད་འདུག

སྒྱུ་རྩལ་ལས་ཁང་གི་ལས་བྱེད་ཅིག་གིས་སྦི་སྦི་སི་ལ་བརྗོད་གསལ་ལྟར་ན་ཉིན་ཤས་གོང་འགྲེམས་སྟོན་དེའི་ཐོག་སྟངས་འཛིན་དང་བཀག་འགོག་བྱུང་ཡོད་པའི་གནས་ཚུལ་དེ་དྲྭ་ཐོག་ཏུ་ཁྱབ་པའི་རྗེས་སུ་འགྲེམས་སྟོན་དེར་ལྟ་སྐོར་དུ་ཡོང་མཁན་གྱི་མི་གྲངས་མང་དུ་ཕྱིན་ཡོད་འདུག སྒྱུ་རྩལ་ལྟེ་གནས་ཁང་གི་འབྲེལ་ཡོད་འཛིན་སྐྱོང་ངོས་ནས་སྦི་སྦི་སི་ཡི་དྲི་བ་ཁག་ལ་ལན་འདེབས་གང་ཡང་བྱས་མ་བྱུང་།

ཡིན་ནའང་སྦི་སྦི་སི་ཡིས་ཤེས་རྟོགས་བྱུང་བ་ལྟར་ན་གློག་འཕྲིན་ཞིག་གི་ནང་སྒྱུ་རྩལ་ལྟེ་གནས་ཁང་དེས་བརྗོད་གསལ་དུ་ཁོང་ཚོར་”འགྲེམས་སྟོན་དེས་རྒྱ་ནག་དང་ཐའི་ལེནྜ་དབར་གྱི་རྒྱལ་འབྲེལ་ཐབས་བྱུས་ཀྱི་དཀའ་ངལ་བཟོ་ཉེན་ཡོད་པའི་ཉེན་བརྡ་བཏང་”ཡོད་འདུག གློག་འཕྲིན་དེའི་ནང་ད་དུང་ཐའི་ལེནྜ་ཡི་ཕྱི་སྲིད་བློན་ཆེན་ལས་ཁུངས་དང་སྦེན་ཀོག་གྲོང་ཁྱེར་སྲིད་གཞུང་བརྒྱུད་དེ་”རྒྱ་ནག་གཞུང་ཚབ་ཁང་གིས་གནོན་ཤུགས་སྤྲད་པ་ལ་བརྟེན་ནས་”ཁོང་ཚོས་འགྲེམས་སྟོན་ལ་བཅོས་སྒྲིག་བྱས་པ་ཞིག་ཡིན་པ་དང་། ཐའི་ལེནྜ་ཡི་ཕྱི་སྲིད་བློན་ཆེན་ལས་ཁུངས་དང་སྦེན་ཀོག་གྲོང་ཁྱེར་སྲིད་གཞུང་ནི་སྒྱུ་རྩལ་ལྟེ་གནང་ཁང་དེའི་རྒྱབ་སྐྱོར་བ་གཙོ་བོ་དེ་ཡིན་ཚུལ་འཁོད་འདུག

རྒྱ་ནག་གཞུང་ཚབ་ཁང་གིས་སྦི་སྦི་སི་ཡི་དྲི་བ་ཁག་ཅིག་ལ་ལན་འདེབས་ཀྱི་ཚུལ་དུ་སྤེལ་བའི་བསྒྲགས་གཏམ་ཞིག་གི་ནང་འགྲེམས་སྟོན་དེས་ཡོངས་གྲགས་ཀྱི་སྒོ་ནས་བོད་དང་། ཡུ་གུར། ཧོང་ཀོང་བཅས་ཀྱི་རང་བཙན་གྱི་ལས་དོན་ཁྱབ་སྤེལ་བྱེད་བཞིན་ཡོད་པའི་ཉེས་འཛུགས་བྱས་ཡོད་པ་དང་། ཐའི་ལེནྜ་གཞུང་གིས་”དུས་ཐོག་ཏུ་བཀག་འགོག་”བྱས་པ་དེས་”འཁྱོག་བཤད་ཀྱི་བསམ་ཚུལ”དེ་ཚོའི་རིགས་ལ་”རྒྱལ་སྤྱིའི་ཐོག་འགྲེམས་བསྒྲགས་བྱ་རྒྱུའི་ཁྲོམ་རྭ་མེད་ལ་དགའ་མོས་བྱེད་མཁན་ཡང་མེད་པ་”གསལ་སྟོན་བྱས་ཡོད་ཚུལ་བརྗོད་འདུག བསྒྲགས་གཏམ་དེའི་ནང་ད་དུང་འགྲེམས་སྟོན་དེས་“དོན་དངོས་ལ་ཁྱད་གསོད་དང་།་་་་་་ རྒྱ་ནག་གིས་བོད་དང་ཤིང་ཅང་། ཧོང་ཀོང་བཅས་ཀྱི་ཐོག་བཟུང་བའི་སྲིད་བྱུས་ལ་ཁྱོག་བཤད། རྒྱ་ནག་གི་དོ་ཁུར་བྱ་ཡུལ་གཙོ་བ་རྣམས་དང་ཆབ་སྲིད་ཀྱི་ཆེ་མཐོང་ལ་གནོད་སྐྱོན་གཏོང་བཞིན་ཡོད་པ་དང་།“ “སྐྱེ་བོ་སུས་་རིག་གཞུང་དང་སྒྱུ་རྩལ་གྱི་བྱ་གཞག་བརྗེ་ལེན་ལ་ཁ་གཡར་ནས་རྒྱ་ནག་གི་རྒྱལ་ནང་གི་གནད་དོན་ལ་ཐེ་བྱུས་དང་ཆབ་སྲིད་ལྐོག་གཡོའི་ལས་དོན་སྤེལ་ཐབས་བྱས་དེ་ལ་རྒྱ་ནག་གཞུང་གིས་ངོ་རྒོལ་བྱེད་ཀྱི་ཡོད།” ཅེས་བརྗོད་འདུག

ཡིན་ནའང་བསྒྲགས་གཏམ་དེའི་ནང་རྒྱ་ནག་གཞུང་གི་ལས་བྱེད་པས་ཐའི་ལེནྜ་དབང་འཛིན་པ་དང་སྒྱུ་རྩལ་ལྟེ་གནས་ཁང་ལ་གནོན་ཤུགས་སྤྲད་ཡོད་པའི་བསྙོན་འཛུགས་ཐད་གསལ་བཤད་གང་ཡང་བྱས་མི་འདུག

འགྲེམས་སྟོན་དེའི་གོ་སྒྲིག་པ་དང་འགྲེམས་སྟོན་ནང་ཞུགས་མཁན་གྱི་སྒྱུ་རྩལ་བ་ཚོས་རྒྱ་ནག་གི་ཉེས་འཛུགས་ལ་ངོས་ལེན་བྱེད་ཀྱི་མེད་པ་རེད།

བསྟན་འཛིན་མི་འགྱུར་དཔལ་སྒྲོན་ལགས་ཀྱིས་ཁོ་རང་གི་གློག་བརྙན་ནང་”སེམས་གཏིང་ནས་བརྗོད་པའི་གཏམ་བརྒྱུད་རྣམས་གསལ་སྟོན་དང་། རྒྱལ་སྤྱིའི་གདུང་སེམས་མཉམ་སྐྱེད་ཀྱི་བརྡ་ལན་ཞིག་བཏང་ཡོད་པ་དང་།” སྟངས་འཛིན་དངབཀག་འགོག་དེ་ནི་རྒྱ་ནག་གཞུང་གིས་”འཛམ་གླིང་གི་ས་ཕྱོགས་གང་སར་ཡོད་པའི་བོད་མི་རྣམས་ལ་བཙན་གནོན་བྱ་རྒྱུ་དང་མེད་པ་བཟོ་རྒྱུའི་ལས་འགུལ་”གྱི་ཆ་ཤས་ཤིག་ཡིན་པ་བརྗོད་བྱུང་།

“ངས་མི་མང་གི་མངོན་འདོད་ལ་རྒྱབ་སྐྱོར་བྱེད་ཀྱི་ཡོད་ནའང་། ༼སྒྱུ་རྩལ་བརྩམས་ཆོས་དེའི་ནང་༽ རང་བཙན་གསལ་བྱེད་ཀྱི་མཚོན་རྟགས་དང་ཁྱབ་བསྒྲགས་རིགས་གང་ཡང་མེད།” ཅེས་ཁེ་ལཱ་རཱ་ཁྲུན་གྱིས་བརྗོད། ཁོང་ནི་འགྲེམས་སྟོན་དེར་ཞུགས་མཁན་གྱི་ཧོང་ཀོང་གི་སྒྱུ་རྩལ་བ་ཞིག་ཡིན་ཞིང་ཁོང་གི་མིང་ཡང་ནག་སུབ་བཏང་ཡོད་པ་རེད། ཡིན་ནའང་ཁོང་གིས་སྤེལ་བའི་དབྱིན་ཡུལ་ནང་རྒྱ་ནག་གིས་བྱ་ར་བྱེད་ཚུལ་ཐོག་གི་བརྩམས་ཆོས་ལ་བཀག་འགོག་གང་ཡང་བྱུང་མེད་པ་རེད་འདུག

སཱའི་ཡིས་རྒྱ་ནག་ལས་རང་བཙན་མ་ཡིན་པར། “ང་ཚོས་སྨྲ་བརྗོད་རང་དབང་དང་། རང་ཐག་རང་གཅོད། རང་གི་ངོ་བོ་ངོས་འཛིན་་་་་་་་་་་ སོགས་འགྲོ་བ་མིའི་གཞི་རྩའི་ཐོབ་ཐང་ཁྱབ་སྤེལ་བྱེད་བཞིན་ཡོད།” ཅེས་དང་། “ང་ཚོའི་འགྲེམས་སྟོན་དེས་དབང་འཛིན་རིང་ལུགས་ལ་འགོག་རྒོལ་བྱེད་མཁན་གྱི་སྒྱུ་རྩལ་བ་རྣམས་ལ་སྡིངས་ཆ་ཞིག་སྤྲོད་ཀྱི་ཡོད། དེ་དག་ནི་རྒྱུན་དུ་རང་ཉིད་ཀྱི་རྒྱལ་ཁབ་ནང་སྒྲོག་ཏུ་མ་བཅུག་པའི་འབོད་སྒྲ་ཞིག་ཆགས་ཡོད། རྒྱ་ནག་དམར་ཤོག་ཚོགས་པས་འགྲེམས་སྟོན་དེ་སྒོ་བརྒྱབ་ཏུ་འཇུག་ཐབས་བྱེད་བཞིན་པའི་དངོས་དོན་དེས་སྒྱུ་རྩལ་བ་ཚོས་གསལ་སྟོན་བྱེད་བཞིན་པའི་གནད་དོན་རྣམས་ར་སྤྲོད་བྱེད་པ་ཞིག་ཆགས་ཡོད།”ཅེས་བརྗོད།

ང་གཉིས་འཐོན་དགོས་པ་གསལ་རྟོགས་བྱུང་།

སཱའི་དང་ཁོ་རང་གི་བཟའ་ཟླས་ཐའི་ལེནྜ་ནས་འཐོན་རྒྱུའི་ཐག་གཅོད་བྱས། དེ་ནི་ཁོང་གཉིས་ལ་དེ་སྔ་འབར་མ་འབོད་པའི་ད་ལྟའི་མཱའི་མར་ཡུལ་དུ་ཕྱིར་སློག་བྱེད་མི་ཡོང་ངམ་སྙམ་པའི་སེམས་འཁྲལ་བྱུང་ཡོད་ཅིང་། སཱའི་ཡིས་མཱའི་མར་གྱི་དམག་མིའི་གྱེན་ལོག་སྲིད་གཞུང་ལ་ངོ་རྒོལ་གྱི་ལས་འགུལ་སྤེལ་བའི་རྐྱེན་གྱིས་མཱའི་མར་རུ་སླེབས་ཚེ་ཁོ་རང་ལ་སྡུག་སྦྱོང་གཏོང་ངེས་ཡིན་པའི་ཡིད་ཆེས་ཀྱང་བྱེད་ཀྱི་ཡོད་པས་རེད།

འགྲེམས་སྟོན་འགོ་ཚུགས་ནས་ཉིན་གཉིས་ཀྱི་རྗེས་སུ་ཁྱོ་ཤུག་གཉིས་པོ་སྦེན་ཀོག་ཏུ་ཡོད་པའི་ཁོ་གཉིས་ཀྱི་སྡོད་ཁང་ཕྱོགས་སུ་སྐྱོད་བཞིན་པའི་སྐབས་ཐའི་ལེནྜ་ཉེན་རྟོག་པས་ཁོང་གཉིས་འཚོལ་ཞིབ་བྱེད་བཞིན་ཡོད་པ་ཤེས་རྟོགས་བྱུང་བ་རེད། སྦི་སྦི་སི་ཡིས་ཤེས་རྟོགས་བྱུང་བ་ལྟར་ན་ཁྱོ་ཤུག་གཉིས་པོར་སྒྱུ་རྩལ་ལས་ཁང་གི་ལས་བྱེད་ཀྱི་བརྡ་འཕྲིན་འབྱོར་བའི་ནང་ཉེན་རྟོག་པ་འགྲེམས་སྟོན་ཁང་དུ་སླེབས་ཡོད་པ་དང་། ཉེན་རྟོག་པས་ཁོང་གཉིས་ཀྱི་ཁ་པར་ཨང་གྲངས་བླངས་ཡོད་སྐོར་གྱི་ཉེན་བརྡ་བཏང་ཡོད་འདུག

སྐབས་དེར་”ང་གཉིས་རྒྱལ་ཁབ་དེ་ནས་འཐོན་དགོས་པ་གསལ་རྟོགས་བྱུང་།” ཞེས་སཱའི་ཡིས་བརྗོད།

ཁྱོ་ཤུག་གཉིས་པོས་དེ་མ་ཐག་དབྱིན་ཡུལ་དུ་སྐྱོད་མཁན་གྱི་གནམ་གྲུ་སྔ་ཤོས་ཀྱི་འཛིན་བྱང་ཉོ་སྒྲུབ་བྱས། “ང་གཉིས་ལ་སོ་སོའི་ཅ་ལག་རྣམས་བསྡུ་གསོག་བརྒྱབ་རྒྱུར་སྐར་མ་ཁ་ཤས་ལས་མེད། ངའི་བཟའ་ཟླ་ནི་འདར་གསིག་བརྒྱབ་ཀྱི་འདུག་པས་མོ་རང་གིས་ཅ་ལག་བསྡུ་གསོག་བརྒྱབ་ཐུབ་ཡག་མི་འདུག”ཅེས་སཱའི་ཡིས་བརྗོད།

ཁོང་གཉིས་ལ་བརྡ་འཕྲིན་དེ་འབྱོར་བའི་རྗེས་ཀྱི་ཆུ་ཚོད་ཁ་ཤས་ཤིག་གི་ནང་ཁོ་གཉིས་རྒྱལ་ཁབ་དེ་ནས་ཐོན་ཕྱིན་པ་རེད།

ཐའི་ལེནྜ་ཡི་རྒྱལ་ནང་ཉེན་རྟོག་པའི་མགྲིན་ཚབ་པ་ཨ་ཆཱ་ཡོང་ཀ་རིའི་ཐོང་གིས་ཁོང་རང་ལ་ཉེན་རྟོག་པས་སཱའི་འཚོལ་ཞིབ་བྱེད་བཞིན་ཡོད་པའི་གནས་ཚུལ་རིགས་གང་ཡང་འབྱོར་མེད་པ་དང་། ཉེས་འཛུགས་དེ་ནི་ཁ་གསལ་པོ་མེད་པས་ར་སྤྲོད་བྱེད་དཀའ་བ་ཡིན་པ་དང་། “གནས་ཚུལ་ཁ་གསལ་པོ་ཞིག་མ་བྱུང་བར་ང་ཚོས་དེའི་ཐོག་ལ་གསལ་བཤད་བྱེད་ཐུབ་ཐབས་མེད། གལ་སྲིད་དཔང་རྟགས་གང་འཚམ་ཞིག་རག་པ་ཡིན་ན་ང་ཚོས་གནས་ཚུལ་དེ་དངོས་གནས་བྱུང་ཡོད་མེད་ཐོག་གསལ་བཤད་བྱེད་ཐུབ་ངེས་རེད་” ཅེས་བརྗོད།

མཱའི་མར་ཡུལ་གྱི་སྲིད་དབང་དམག་མིས་བཙན་འཕྲོག་བྱུང་རྗེས་ཕྱི་ལོ་ ༢༠༢༡ ལོར་ཁྱོ་ཤུག་གཉིས་པོ་རང་ཁྱིམ་བཞག་ནས་བྲོས་བྱོལ་དུ་སོང་ཡོད་པ་རེད། སཱའི་ཡི་པཱ་ལགས་ནི་ལྕམ་ཨན་སཱན་སུ་སྐྱིད་ཀྱི་དེ་སྔའི་མང་གཙོ་ཚོགས་པའི་ཚོགས་མི་ཞིག་དང་། མཱའི་མར་གྱི་མངའ་སྡེ་ཆེ་ཤོས་ཧྲན་གྱི་སྤྱི་ཁྱབ་བློན་ཆེན་ཟུར་པ་ལཱིན་ཧཱ་ཏུ་ཞུ་བ་དེ་ཡིན་པ་རེད། སཱའི་ཡི་ཨ་མ་ལགས་ནི་ཟླ་བ་འགའ་ཞིག་གི་རིང་བཟང་བཙོན་འོག་བཞག་ཡོད་ཅིང་། ད་ལྟ་ཡིན་ནའང་དམ་བསྒྲགས་ཆེ་བའི་ལྟ་ཞིབ་འོག་གནས་མུས་ཡིན་པ་རེད།

སཱའི་ཡིས་ཁོང་གི་པཱ་ལགས་ཀྱི་སྟེང་དུ་འགེལ་བའི་ནག་ཉེས་རྣམས་རྫུན་བཟོ་བྱས་པ་ཞིག་ཡིན་པ་དང་། ཁོང་གི་པཱ་ལགས་ནི་ཆབ་སྲིད་ཀྱི་བཙོན་པ་ཞིག་ཡིན་ཚུལ་ཡུན་རིང་ནས་བརྗོད་བཞིན་ཡོད་ལ། ཁོང་གིས་དམག་མིའི་གྱེན་ལོག་སྲིད་གཞུང་ལ་སྐྱོན་འཛུགས་བྱས་པ་དང་ལྷན་དུ་པཱ་ལགས་བཙོན་གྲོལ་ཐོབ་ཐབས་སུ་ལས་འགུལ་ཤུགས་ཆེ་སྤེལ་བཞིན་ཡོད།

ཁྱོ་ཤུག་གཉིས་པོ་བྲོས་འབྱོལ་དུ་སོང་རྗེས་མཐར་ཐའི་ལེནྜ་ལ་གནས་སྡོད་བྱས་ཏེ་སྦེན་ཀོག་གྲོང་ཁྱེར་དུ་ཁོ་གཉིས་ཀྱི་སྒྱ་རྩལ་འགྲེམས་སྟོན་གྱི་བྱ་གཞག་གཉེར་རྒྱུའི་ཐག་གཅོད་བྱས་པ་རེད། དེ་ནི་སྦེན་ཀོག་ཏུ་འབར་མའི་མི་ཚོགས་མང་པོ་ཡོད་པ་དང་། ད་དུང་ “ཐའི་ལེནྜ་ཡིས་མཱའི་མར་ནང་ཞི་བདེ་དང་བརྟན་ལྷིང་ཁྱབ་སྤེལ་གཏོང་རྒྱུའི་ཐོག་ལ་གལ་འགངས་ཆེ་བའི་བྱེད་སྒོ་ཡང་སྤེལ་བཞིན་ཡོད། ཐའེ་ལེནྜ་ནི་བདེ་འཇགས་ལྡན་པའི་ས་ཆ་ཞིག་རེད།” ཅེས་སཱའི་ཡིས་བརྗོད།

ཡིན་ནའང་ད་ཆ་ཁོས་དེ་ལྟར་ཚོར་གྱི་མེད་པ་རེད། “ཕྱི་རྒྱལ་གྱི་སྟོབས་ཤུགས་ཤིག་གིས་སྒྱུ་རྩལ་གང་སྟོན་དགོས་མིན་ཐོག་བཀོད་པ་བཏང་ཐུབ་དུས། དེས་རིག་གཞུང་གི་མངའ་དབང་ཉམས་དམས་སུ་གཏོང་གི་ཡོད་པ་རེད།” ཅེས་དང་། “ང་གཉིས་ཀྱི་ལས་འགུལ་གྱི་རྐྱེན་པས། དབང་འཛིན་རིང་ལུགས་ཀྱི་སྲིད་གཞུང་ཁག་གི་ང་གཉིས་ལ་སྡང་ཟུག་བྱ་རྒྱུ་ཤུགས་ཆེ་རུ་ཕྱིན་སོང་། ང་དང་ངའི་གཟའ་ཟླ་གཉིས་པོ་དབྱིན་ཡུལ་དུ་སྐྱབས་བཅོལ་ཞུ་རྒྱུ་ལས་གཞན་གྱི་གདམ་ག་གང་ཡང་ལྷག་མ་སོང་།” ཞེས་ཁོང་གིས་བརྗོད།

དབྱིན་ཡུལ་གྲོས་ཚོགས་ཀྱི་འགྲོ་བ་མིའི་ཐོབ་ཐང་གི་ཟུང་འབྲེལ་ཚོགས་ཆུང་གི་ཚོགས་གཙོ་དང་ལི་ཝར་པུལ་གྲོང་ཁྱེར་གྱི་མི་རྗེ་ཨལ་ཀྲོན་མཆོག་གིས་སྦི་སྦི་སི་ལ་བརྗོད་རྒྱུར་སཱའི་ཡི་གནད་དོན་དེས་རྒྱ་ནག་གི་རྒྱལ་མཚམས་བརྒལ་བའི་གཉའ་གནོན་བྱ་རྒྱུའི་ལས་འགུལ་དེ་རྒྱ་ཆེར་ཁྱབ་ཡོད་པའི་དཔེ་མཚོན་ཞིག་ཆགས་ཡོད་པ་དང་། ཁོང་གིས་སཱའི་ཞུ་སྐུལ་བྱེད་དོན་བཞིན་སཱའི་ལ་སྐྱབས་བཅོལ་གྱི་གནས་བབས་ཤིག་སྤྲོད་རྒྱུར་རྒྱབ་སྐྱོར་བྱ་རྒྱུ་ཡིན་པ་བརྗོད་བྱུང་།

ཁོང་གིས་ད་དུང་ “རྒྱལ་ཁབ་གཞན་ཞིག་གི་རིག་གཞུང་ལྟེ་གནས་ཁང་ཞིག་གི་ནང་སྤེལ་བའི་སྒྱུ་རྩལ་གྱི་འགྲེམས་སྟོན་ལ་གནོན་ཤུགས་སྤྲད་དེ་འགྲེམས་སྟོན་གང་བྱ་དགོས་མིན་ཐོག་སྟངས་འཛིན་བྱེད་པ་ནི་སྨྲ་བརྗོད་རང་དབང་ལ་ཧ་ལས་པའི་རྡོག་རོལ་ཆེན་པོ་ཞིག་བཏང་བ་ཞིག་ཡིན་པས། དེའི་ཐད་ཐེར་འདོན་དང་སྐྱོན་བརྗོད་ཤུགས་ཆེ་ཞིག་བྱ་དགོས་པ་རེད། གནས་ཚུལ་དེས་རྐྱེན་པས་སཱའི་ལ་འཇིགས་སྣང་འཕར་མ་ཞིག་བྱུང་སྟེ་རང་ཉིད་ཀྱི་བདེ་འཇགས་ཆེད་དུ་ཐའི་ལེནྜ་ནས་བྲོས་བྱོལ་དུ་འགྲོ་དགོས་བྱུང་བ་ནི་སེམས་ཚབ་སྐྱེ་གཞི་ཆེན་པོ་ཞིག་ཀྱང་ཆགས་ཡོད།” ཅེས་བརྗོད།

འགྲོ་བ་མིའི་ཐོབ་ཐང་གི་ཚོགས་པས་དོན་རྐྱེན་དེ་ནི་”འཇིགས་སྐུལ་”གྱི་གནད་དོན་ཞིག་ཡིན་པ་དང་། དེས་”སྒྱུ་རྩལ་བའི་སྨྲ་བརྗོད་ལ་བཙན་གནོན་བྱེད་པའི་མཉམ་འབྲེལ་གྱི་བྱ་སྤྱོད་སྤེལ་གྱི་ཡོད་པ་གསལ་སྟོན་བྱེད་བཞིན་ཡོད་”པ་བརྗོད། ཐའི་ལེནྜ་རུ་རྟེན་གཞི་བྱས་པའི་ལས་འགུལ་པ་གྲགས་ཅན་ཧྤིལ་རོ་སྦརྜ་སཱན་གྱིས་སྦེན་ཀོག་གྲོང་ཁྱེར་གཞུང་འཛིན་པས་རྒྱ་ནག་གཞུང་ལ་སྟངས་འཛིན་དང་བཀག་འགོག་བྱེད་དུ་བཅུག་པ་ནི་”ཧ་ལས་དགོས་པ་དང་དང་ལེན་བྱེད་དཀའ་བ་ཞིག་རེད་”ཅེས་བརྗོད།

སྦི་སྦི་སི་གསར་ཁང་གིས་ཐའི་ལེནྜ་ཡི་སྲིད་བློན་ལས་ཁུངས་ལ་བསམ་ཚུལ་དེ་དག་གི་ཐོག་ལ་ལན་འདེབས་ཤིག་གནང་རོགས་ཞེས་ཞུས་ཡོད།

རྒྱལ་མཚམས་བརྒལ་བའི་གཉའ་གནོན་ནི་སྤྱི་ཡོངས་ནས་སྲིད་གཞུང་ཞིག་གིས་རྒྱལ་ཁབ་གཞན་ཞིག་གི་ས་ཁོངས་སུ་སྐྱེ་བོ་ཞིག་ལ་སུན་གཙེར་དང་ལྟ་ཞིབ་བྱེད་པར་གོ་བ་རེད། ཉེ་བའི་ལོ་ཤས་ནང་རྒྱ་ནག་གི་རྒྱལ་མཚམས་བརྒལ་བའི་གཉའ་གནོན་གྱི་འཇིགས་སྣང་དེ་ཆེ་རུ་འགྲོ་བཞིན་ཡོད་པས། དེས་གནས་ཚང་རྒྱལ་ཁབ་ཁག་གིས་བྱ་སྤྱོད་དེ་རིགས་ཤེས་རྟོགས་ཡོད་མེད་དང་། ཐ་ན་ངན་སྦྲེལ་བྱེད་ཀྱི་ཡོད་མེད་ཐོག་ལ་དོགས་སློང་བྱེད་བཞིན་ཡོད་ལ། རྒྱ་ནག་དང་ཐའི་ལེནྜ་ཡུལ་གྱི་འབྲེལ་བའི་རང་བཞིན་ཐོག་ལ་རྟོག་ཞིབ་བྱེད་བཞིན་ཡོད་པ་རེད།

ཕྱི་ལོ་ ༢༠༡༥ ལོར་པེ་ཅིང་ལ་སྐྱོན་བརྗོད་བྱེད་པའི་དཔེ་དེབ་རིགས་འགྲེམས་ཚོང་བྱེད་པའི་ཧོང་ཀོང་གི་དཔེ་དེབ་ཚོང་ཁང་འགོ་འཛུགས་བྱེད་མཁན་སུད་ཌན་གྱི་མི་སེར་ཡིན་པ་གུ་མིང་ཧཱའེ་ཞུ་བ་ཐཱའི་ལེནྜ་ཡུལ་དུ་གུང་གསེང་གཏོང་བཞིན་པའི་སྐབས་གློ་བུར་དུ་གར་སོང་ཆ་མེད་དུ་གྱུར་པའི་ཡ་མཚན་ཅན་གྱི་གནས་ཚུལ་ཞིག་ཐོན་ཡོད། རྗེས་སུ་ཁོང་རྒྱ་ནག་སྐམ་ས་ཆེན་པོའི་ཉེན་རྟོག་པའི་བཀག་ཉར་ཁང་དུ་སླེབས་ཡོད་པས། འབྲེལ་ཡོད་གཞུང་འཛིན་པས་ཁོ་རང་སོ་སོ་རང་འགུལ་གྱི་སྒོ་ནས་རྒྱ་ནག་ཏུ་སླེབས་པ་ཞིག་ཡིན་ཚུལ་འགྲེལ་བརྗོད་བྱས་ཡོད་ཀྱང་། འགྲོ་བ་མིའི་ཐོབ་ཐང་གི་ཚོགས་པ་ཁག་གིས་ཁོང་ནི་རྒྱ་ནག་གི་ཉུལ་མས་བཙན་ཁྲིད་བྱས་པ་ཡིན་ཚུལ་བརྗོད་བཞིན་ཡོད།

ལོ་འདིའི་གོང་དུ་མཉམ་འབྲེལ་རྒྱལ་ཚོགས་དང་། ཨ་རི། དབྱིན་ཡུལ་བཅས་ཀྱིས་སེམས་འཚབ་ཆེན་པོཡོད་པའི་རྣམ་འགྱུར་སྟོན་མིན་ལ་མ་ལྟོས་པར་ཉུང་མཐར་ཡུ་གུར་བ་མི་གྲངས་ ༤༠ ཐའི་ལེནྜ་ཡུལ་ནས་རྒྱ་ནག་ཏུ་ཕྱིར་སློག་བྱས་ཡོད། པེ་ཅིང་གིས་ཕྱིར་སློག་བྱས་པ་དེ་ནི་རྒྱ་ནག་དང་། ཐའི་ལེནྜ། རྒྱལ་སྤྱི་བཅས་ཀྱི་ཁྲིམས་ལུགས་གཞིར་བཟུང་ལག་བསྟར་བྱས་པ་ཡིན་ཚུལ་བརྗོད་ཡོད།

ཕྱིར་སློག་གི་གནས་ཚུལ་དེ་ནི་སཱའི་ཡིས་སྦེན་ཀོག་གི་སྒྱུ་རྩལ་དང་རིག་གཞུང་ལྟེ་གནས་ཁང་དུ་ཁོ་རང་གི་འགྲེམས་སྟོན་གོ་སྒྲིག་ཞུ་རྒྱུའི་འཆར་གཞི་འདིང་བཞིན་པའི་སྐབས་ལ་བྱུང་ཡོད། ཁོང་གིས་བརྗོད་ན་སྐབས་དེར་སེམས་འཚབ་བྱུང་ཡོད་ཀྱང་ལྟེ་གནས་ཁང་གིས་འགྲེམས་སྟོན་དེ་གང་ལྟར་མུ་མཐུད་མདུན་སྐྱོད་བྱ་རྒྱུའི་ཐག་གཅོད་བྱས་ཡོད་པ་རེད།

ད་ལྟའི་ཆར་སཱའི་དབྱིན་ཡུལ་དུ་གནས་ཡུལ་རིང་ཁོང་གིས་རང་ཉིད་ཀྱི་གོམ་སྟབས་རྗེས་མ་དེ་སྤོ་ཐབས་ཀྱི་བསམ་བློ་གཏོང་བཞིན་ཡོད། དེ་ནི་ཕྱི་ཟླ་བཅུ་པའི་ནང་སྦེན་ཀོག་གི་འགྲེམས་སྟོན་མཇུག་སྒྲིལ་མ་ཐག་ཁོང་དང་ཁོང་གི་བཟའ་ཟླ་གཉིས་པོས་རྒྱལ་ཁབ་གཞན་ཁག་ཏུ་སྟངས་འཛིན་དང་བཀག་འགོག་མེད་པའི་སྒྱ་རྩལ་འགྲེམས་སྟོན་བྱེད་འཆར་ཡོད་པ་རེད།

ཁོང་གི་བསམ་ཚུལ་ལ་རྒྱ་ནག་གི་སྟངས་འཛིན་དེས་ལྡོག་ཕྱོགས་ཀྱི་ནུས་པ་ཐོན་ཏེ་ཁོང་གཉིས་ཀྱི་སྒྱུ་རྩལ་འགྲེམས་སྟོན་གྱི་མིང་གྲགས་ཆེ་རུ་ཕྱིན་ནས། “ད་ཆ་འཛམ་གླིང་ནང་མི་མང་པོས་འགྲེམས་སྟོན་དེར་བལྟ་རྒྱུར་དགའ་མོས་བྱེད་བཞིན་ཡོད་”པ་དང་། འགྲེམས་སྟོན་དེའི་སྐོར་ལ་དྲ་ཐོག་ཏུའང་བགྲོ་གླེང་བྱེད་བཞིན་ཡོད་པ་རེད།

“ལས་འགུལ་དེ་ནི་ང་གཉིས་ཀྱིས་འགོ་བཙུགས་པ་ཞིག་མ་ཡིན་པར། རྒྱ་ནག་དམར་ཤོག་ཚོགས་པས་འགོ་འཛུགས་བྱས་པ་ཞིག་རེད། ང་གཉིས་ཀྱི་༼འགྲེམས་སྟོན་དེ་བརྒྱུད་ནས་༽རྨང་གཞི་བཏིང་བ་ཙམ་ལས། ལས་དོན་འཕྲོས་རྣམས་རྒྱ་ནག་གཞུང་གི་སྟངས་འཛིན་དེས་རྫས་ལུས་ཤིག་དང་འདྲ་བར་རང་བཞིན་ངང་སྐྱེ་སྲིང་བྱ་རྒྱུར་གསོས་བཏབ་ཡོད།”

དབྱིན་ཡིག་མ་རྩོམ་གྱི་དྲ་གནས་སྦྲེལ་ཐག https://www.bbc.com/news/articles/cj6yx71565jo