བོད་ནང་བྱིས་པ་རྣམས་རྒྱ་སྐད་བཤད་མཁན་ཆགས་པ་དང་བཙན་བྱོལ་ནང་བོད་སྐད་ལ་དོ་སྣང་མ་བྱས་ན་འགྲིག་གི་མ་རེད།

སྲིད་སྐྱོང་མཆོག་གིས་བོད་ཀྱི་སློབ་གྲྭ་ཁག་གིས་ཧི་མ་ལ་ཡ་རི་རྒྱུད་ཀྱི་སློབ་ཕྲུག་མང་པོ་སློབ་སྦྱོང་གིས་ཕན་ཐོགས་ཡོད་པས། མ་འོངས་པར་ཁྱེད་ཚོ་རང་མགོ་ཐོན་པའི་ཚེ་བོད་དོན་ཐོག་རྒྱབ་སྐྱོར་བྱ་རྒྱུ་གལ་ཆེན་པོ་རེད་ཅེས་གསུངས་སོང་།

ཁ་སང་ཕྱི་ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་སྦིར་བོད་ཚོགས་དང་སྡེ་དགེ་བོད་མིའི་གཞིས་ཆགས་སུ་ཕེབས་ཏེ། པདྨ་ཨེ་ཝམ་ཆོས་སྒར་འགྱུར་མེད་གླིང་དགོན་པ་དང་། རྙིང་མ་དགོན་པ། འབྲི་རུ་ས་སྐྱ་དགོན་པ། ལས་ཁུངས་ཁག་དང་གཞིས་་ཆགས་ནང་གཟིགས་ཞིབ་གནང་ཡོད་ཅིང་། དེ་བཞིན་སུ་ཇཱ་བོད་ཁྱིམ་གྱི་ཕུན་ཚོགས་སྡེ་བཞིའི་ཚོགས་ཁང་དུ་དགེ་ལས་སློབ་ཕྲུག་རྣམས་ལ་གསུང་བཤད་གནང་ཡོད་འདུག སྐབས་དེར་སྲིད་སྐྱོང་མཆོག་གིས། བོད་ཀྱི་སྐད་ཡིག་ནི་འཛམ་གླིང་གི་སྐད་ཡིག་རྙིང་ཤོས་ ༡༥ གྲས་ཀྱི་གཅིག་ཡིན་ཟེར་གྱི་ཡོད་པ་རེད། དེ་ཡང་ལེགས་སྦྱར་གཞུང་དང་པཱ་ལིའི་གཞུང་ནང་ཡོད་པའི་ནང་ཆོས་ཡོངས་རྫོགས་བོད་ཀྱི་སྐད་ཡིག་ནང་བསྒྱུར་ཡོད། དེང་སང་ནང་ཆོས་ཀྱི་གཞུང་ཆ་ཚང་ཞིག་ལ་ལྟ་དགོས་ཚེ། བོད་སྐད་ནང་མ་གཏོགས་སྐད་ཡིག་གཞན་པའི་ནང་མེད་པ་རེད། དེའི་སྐོར་ལ་༧གོང་ས་རྒྱལ་བ་རིན་པོ་ཆེ་མཆོག་གཙོས་བསྟན་བདག་བླ་ཆེན་རྣམ་པས་བཀའ་གནང་ཡོད། ང་ཚོར་སྐད་ཡིག་རྩ་ཆེན་པོ་ཞིག་ཡོད་ཀྱང་སྐད་ཡིག་བེད་སྤྱོད་བྱེད་མཁན་མེད་ཚེ་ཤི་འགྲོ་ཡི་ཡོད་པ་རེད། རྗེས་མ་བོད་ཀྱི་སྐད་ཡིག་བེད་སྤྱོད་གཏོང་མཁན་མེད་ཚེ་ལེགས་སྦྱར་དང་ལ་ཌིན་སྐད་ཡིག་བཞིན་ཆགས་འགྲོ་བ་རེད། མི་དཀྱུས་མ་ཚོས་བེད་སྤྱོད་གཏོང་རྒྱུ་མེད་པར་མཁས་པ་རྣམས་ཀྱིས་སློབ་སྦྱོང་བྱེད་ས་ཞིག་ཏུ་འགྱུར་རྒྱུའི་ཉེན་ཁ་ཡོད་པ་རེད། བཙན་བྱོལ་ནང་རང་དབང་ཐོག་ནས་བོད་ཀྱི་སྐད་ཡིག་སློབ་སྦྱོང་བྱེད་པའི་རང་དབང་ཡོད་ཀྱང་། བོད་ནང་གི་སློབ་གྲྭ་ཁག་ཏུ་བོད་ཡིག་སློབ་སྦྱོང་བྱ་རྒྱུ་མེད་པ་བཟོ་བཞིན་ཡོད། བོད་མི་ས་ཡ་བདུན་ལྷག་ཡོད་པའི་བོད་པའི་སྤྱི་ཚོགས་ཁྲོད་དུ་རྒྱ་གཞུང་གིས་མུ་མཐུད་སྲིད་ཇུས་དེ་ལག་བསྟར་བྱས་ཚེ། བོད་ཀྱི་གཞོན་སྐྱེས་རྣམས་ཀྱིས་བོད་སྐད་བཤད་མི་ཤེས་པའི་གནས་སྟངས་ཤིག་ཆགས་འགྲོ་བཞིན་ཡོད་པ་རེད། ཅེས་དང་།  བོད་ནང་བྱིས་པ་རྣམས་རྒྱ་སྐད་བཤད་མཁན་ཆགས་པ་དང་། བཙན་བྱོལ་ནང་དུ་བོད་སྐད་ལ་དོ་སྣང་མ་སྤྲད་ཚེ། སྐད་ཡིག་རྩ་ཆེན་དང་གལ་ཆེན་རེད་ཅི་ཙམ་བཤད་ཀྱང་བེད་སྤྱོད་མ་བྱས་ཚེ་འགྲིག་ཡོད་པ་མ་རེད། ཅེས་གསུངས་སོང་།

དེ་བཞིན་སྲིད་སྐྱོང་མཆོག་གིས། དེང་སང་འདིར་ཨ་རུ་ན་ཅལ་དང་། ལ་དྭགས། འབྲས་ལྗོངས། སྦི་ཏི་སོགས་ཧི་མ་ལ་ཡ་ནས་ཡིན་པའི་སློབ་ཕྲུག་ཡོད་པ་རེད། ང་ཚོ་ཚང་མ་མི་རིགས་དང་། སྐད་ཡིག  རིག་གཞུང་། ཆོས་ལུགས་གཅིག་པ་རེད། ཡིན་ནའང་རྒྱལ་ཁབ་མི་འདྲ་བ་ཆགས་བསྡད་ཡོད། ༧གོང་ས་རྒྱལ་བ་རིན་པོ་ཆ་མཆོག་ནས་མ་འོངས་པའི་བོད་བརྒྱུད་ནང་བསྟན་གྱི་བདག་འཛིན་བྱེད་པར་ཧི་མ་ལ་ཡ་རི་རྒྱུད་ཀྱི་མི་རྣམས་ལ་འགན་ཡོད་པ་བཀའ་གནང་ཡོད་དུས། སློབ་གྲྭ་ཁག་གི་ནང་དུའང་༧མགོན་པོ་གང་ཉིད་མཆོག་གི་དགོངས་པ་གཞིར་བཟུང་བཞིན། ད་ལྟའི་ཆར་སློབ་གྲྭ་འདིར་ཧི་མ་ལ་ཡའི་སློབ་ཕྲུག་གྲངས་ ༣༢༨  ཡོད། ཁྱེད་ཚོའི་སློབ་སྦྱོང་བྱེད་འདོད་ཀྱི་འདུན་པའི་ཐོག་ནས་སློབ་གྲྭར་ཞུགས་ཡོད་པ་དང་། བོད་ཕྲུག་ཁྱིམ་སྡེའི་ངོས་ནས་ཁྱེད་ཚོར་སློབ་སྦྱོང་སྤྲད་དེ་ཕན་ཐོགས་བྱུང་ཡོད་པ་རེད། མ་འོངས་པར་ཁྱེད་ཚོ་རང་མགོ་ཐོན་པའི་ཚེ་བོད་དོན་ཐོག་རྒྱབ་སྐྱོར་བྱ་རྒྱུ་གལ་ཆེན་པོ་རེད། ཅེས་དང་། བོད་པར་ནང་ཆོས་ལ་བརྟེན་པའི་རིག་གཞུང་ཞིག་ཡོད་པ་དང་། དེ་ཡང་འཛམ་གླིང་གི་ཞི་བདེའི་སྤེལ་ཐུབ་པའི་ནུས་པ་ཡོད་པས། ང་ཚོས་སྲུང་སྐྱོང་བྱེད་འོས་པའི་རིག་གཞུང་ཆགས་ཡོད། ཅེས་སོགས་གསུངས་སོང་། དེ་བཞིན་བོད་ཀྱི་ཐུན་མོང་མ་ཡིན་པའི་ཁོར་ཡུག་གི་གནས་བབ་དང་། ཁྱིམ་མཚེས་རྒྱལ་ཁབ་ཁག་དང་འབྲེལ་བའི་གལ་གནད་རང་བཞིན་སོགས་བརྙན་རས་བརྒྱུད་ནས་འགྲེལ་བརྗོད་གནང་བ་དང་། གཞན་བོད་རྒྱའི་དཀའ་རྙོག་སེལ་ཐབས་དང་། རྒྱ་གཞུང་གི་ཆབ་སྲིད་འགྱུར་བར་གདོང་ལེན་བྱེད་ཕྱོགས། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན་ནས་འགྱུར་བ་གཏོང་དགོས་རིགས་སོགས་ཀྱི་ཐོག་དྲི་བ་དྲིས་ལན་གནང་སོང་།

སུ་ཇཱ་བོད་ཕྲུག་ཁྱིམ་སྡེ་ནི་ཐོག་མར་ཕྱི་ལོ་ ༡༩༨༦ ལོར་བཀའ་ཤག་གིས་བོད་ནས་ཡོང་བའི་ན་གཞོན་ཚོར་སློབ་སྦྱོང་གི་གོ་སྐབས་བསྐྲུན་ཆེད་་སློབ་ཕྲུག་ ༦༨ ཡོད་པའི་བོད་པའི་སློབ་གྲྭ་གསར་པ་ཞེས་པའི་མིང་ཐོག་གསར་འཛུགས་གནང་ཡོད་པ་དང་། ཕྱི་ལོ་ ༡༩༩༠ ལོར་བོད་ཕྲུག་ཁྱིམ་སྡེར་རྩིས་སྤྲོད་གནང་ཡོད་འདུག སློབ་གྲྭ་དེར་སློབ་ཕྲུག་ཆེས་མང་བའི་སྐབས་སུ་སློབ་ཕྲུག་གྲངས་ ༢༤༠༠ ལྷག་ཡོད་ཀྱང། ཕྱི་ལོ་ ༢༠༠༨ ལོར་བོད་ནང་ས་བྱིའི་ཞི་རྒོལ་ཆེན་མོ་བྱུང་བའི་རྗེས་སུ་བོད་ནས་ཡོང་མཁན་ཉུང་དུ་ཕྱིན་ཏེ། ད་ལྟའི་ཆར་སློབ་གྲྭ་ཁག་ཏུ་སློབ་ཕྲུག་དང་། དགོན་སྡེ་ཁག་ཏུ་གྲྭ་རྒྱུན་ཧ་ཅང་ཉུང་དུ་འགྲོ་བཞིན་ཡོད་པ་རེད།

མཛད་རིམ་ལྟར་ན། སྲིད་སྐྱོང་མཆོག་གིས་ཟླ་འདིའི་ཕྱི་ཚེས་ ༢༩  བར་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ཁྱབ་ཁོངས་མཚོ་པདྨ་དང་། མན་ཌི། སྤོན་ཊོ། ཀུལླུ་མ་ནཱ་ལཱི། དྷ་ས་བཅས་སུ་མུ་མཐུད་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།