རྒྱ་གཞུང་གིས་བོད་མདོ་སྨད་གཙང་དགོན་པའི་ལོ་ན་བཅོ་བརྒྱད་མན་གྱི་དགེ་འདུན་པ་ཡོངས་དགོན་པ་ནས་ཕྱིར་ཕུད་བཏང་ཡོད་པ་དང་དགོན་པའི་གྲྭ་བ་ཡོངས་དང་མགོ་འཁྲིད་གྲྭ་ཤེར་བཟང་རྒྱ་མཚོ་ལགས་སུ་བཟོད་དཀའ་བའི་སུན་གཙེར་དང་གཉའ་གནོན་བྱས་སྟབས། རྒྱ་གཞུང་ལ་ངོ་རྒོལ་གྱིས་རང་སྲོག་བློས་བཏང་འདུག
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། འདི་ལོའི་༸གོང་ས་རྒྱལ་བ་རིན་པོ་ཆེ་མཆོག་གི་༸སྐུའི་འཁྲུངས་སྐར་མ་བསླེབས་པའི་ཉིན་འགའི་སྔོན་ནས། རྒྱ་གཞུང་གི་ཉེན་རྟོག་པས་གཙང་དགོན་པར་དམ་དྲག་ཤུགས་ཆེན་བྱས་ཏེ། དགོན་པའི་ནང་གི་གྲྭ་ཤག་རེ་རེ་བཞིན་སྔོག་བཤེར་བྱས་ཡོད་པ་དང་། སྐབས་དེར་གྲྭ་ཤག་ཁག་ཅིག་ནས་༸གོང་ས་མཆོག་གི་སྐུ་པར་ཉེན་རྟོག་པའི་ལག་ཏུ་ཚུད་ཡོད་སྟབས། ཉེན་རྟོག་པས་དགོན་པའི་དགེ་འདུན་པ་ཡོངས་རྫོགས་དགོན་པར་བཀའ་འགུག་བྱས་ནས་དགོན་པར་བཀག་སྐྱིལ་ལྟ་བུ་བྱས་ཏེ་དགེ་འདུན་པ་རྣམས་ཀྱི་འགྲོ་འདུག་གི་རང་དབང་ལ་བཀག་སྡོམ་ཤུགས་ཆེར་བྱས་པ་དང་། ལོ་བཅོ་བརྒྱད་འོག་གི་གྲྭ་གཞོན་ཡོངས་རྫོགས་དགོན་པ་ནས་ཕྱིར་ཕུད་བཏང་ཡོད་འདུག
༸གོང་ས་མཆོག་གི་འཁྲུངས་སྐར་རྗེས་ཕྱི་ཟླ་ ༧ ཚེས་ ༢༠ ཉིན་ནས་བསྐྱར་དུ་དགོན་པའི་གྲྭ་ཤག་ཁག་ཏུ་ཉིན་རེ་བཞིན་སྔོག་བཤེར་ཐེངས་མང་བྱས། དགེ་འདུན་པ་རྣམས་ལ་ཉིན་རྟག་པར་ཆབ་སྲིད་སྐོར་གྱི་ཚོགས་འདུ་བསྐོངས་ནས་དགོན་པའི་ནམ་རྒྱུན་གྱི་ཆོས་ཕྱོགས་ཀྱི་མཛད་རིམ་མཐའ་དག་རྩིས་མེད་སྣང་ཆུང་དང་ཁྱད་གསོད་ཀྱིས་དགེ་འདུན་པར་མནར་གཅོད་དང་ཁོང་ཁྲོ་སློང་ཐབས་བྱས་འདུག་ལ། ༸གོང་ས་མཆོག་གི་འཁྲུངས་སྐར་གྱི་སྐབས་དེར། དགོན་པའི་ལྷ་སྡེའི་ཁོངས་གཏོགས་ཀྱི་འབྲོག་སྡེ་ཁག་ཏུ་གནའ་སྔ་མོ་ནས་བོད་ཟླ་ལྔ་པ་དང་དྲུག་པར་དགེ་འདུན་པ་གདན་འདྲེན་གྱིས་སྡེ་བའི་ཞབས་རིམ་འཚོགས་པའི་སྲོལ་རྒྱུན་ཡོད་པ་དག་ལའང་དགེ་འདུན་པ་ཕེབས་མ་བཅུག་པས་མི་མང་གི་ཆོས་དད་རང་དབང་དང་སྲོལ་རྒྱུན་གོམས་སྲོལ་སོགས་ལ་རྩིས་མེད་རྡོག་རོལ་བཏང་ཡོད་འདུག་ལ། དགོན་པའི་གྲྭ་པ་ཡོངས་ཀྱི་འགྲོ་འདུག་གི་རང་དབང་སོགས་ལ་དམ་དྲག་བྱས་དང་བྱེད་མུས་ཡིན་འདུག
དགེ་འདུན་པ་ཡོངས་དང་ལྷག་པར་དུ་དགོན་པའི་མགོ་ཁྲིད་ཁག་ལ་གནོན་ཤུགས་བཟོད་དཀའ་བ་སྤྲད་པར་བརྟེན། ཕྱི་ཟླ་ ༨ ཚེས་ ༡༨ ཉིན་གྱི་ཕྱི་དྲོ་ཙམ་ལ་དགོན་པའི་དོ་དམ་ལྷན་ཁང་གི་མགོ་ཁྲིད་གཙོ་བོ་གྲྭ་ཤེར་བཟང་རྒྱ་མཚོ་ལགས་ཀྱིས་དགོན་པའི་ཚོང་ཁང་གི་ཐོག་ཁང་ནས་རྒྱ་ནག་གི་སུན་གཙེར་དང་གཉའ་གནོན། ཐུབ་ཚོད་སོགས་ལ་ངོ་རྒོལ་གྱིས་རང་སྲོག་བཏང་བློས་ཡོད་འདུག
དགེ་འདུན་པ་ཤེར་བཟང་རྒྱ་མཚོ་ལགས་ནི་ད་ལྟ་དགུང་ལོ་ ༥༢ ཡིན་ཞིང་། དགོན་པ་དེར་རྨ་ལྷོ། མཚོ་ལྷོ། མགོ་ལོག་བཅས་ཁུལ་གསུམ་གྱི་གྲྭ་པ་བཞུགས་ཡོད་པ་ལས་རྨ་ལྷོ་སོག་རྫོང་ཁོངས་གཏོགས་ཀྱི་ཨ་རིག་སྡེ་བའི་མི་ཡིན་པ་དང་། ཡང་དགོན་པར་གྲྭ་ཚང་ཁག་ལྔ་ཡོད་པའི་ནང་ནས་རྒྱུད་པ་གྲྭ་ཚང་གི་ཁོངས་གཏོགས་ཡིན་འདུག ཁོང་ནི་དགོན་པར་གྲྭ་པ་གྲངས་གཅིག་སྟོང་ཡས་མས་བཞུགས་ཡོད་པ་ལས་ཤེས་ཡོན་དང་ཀུན་སྤྱོད་གང་ཐད་ནས་གྲྭ་པ་རྩེ་ཕུད་ཀྱི་གྲས་ཤིག་ཡིན་འདུག
ད་ལྟའི་ཆར་དགོན་པ་དང་མི་མང་གཉིས་ཆར་དམ་དྲག་ཤུགས་ཆེར་བཏང་བའི་རྐྱེན་གྱིས་གནས་ཚུལ་ཁ་གསལ་དང་པར་རིས་སོགས་གང་ཡང་རག་གི་མི་འདུག
གསར་འགོད་པ། སྐལ་བཟང་སྦྱིན་པ།
