ཧི་མ་ཅལ་གྱི་བྷུན་ཏར་བོད་མིའི་གཞིས་ཆགས་ཀྱི་གཞིས་མི་བསྟན་འཛིན་ཆོས་མཚོ་མ་བུ་གཉིས་བྷུན་ཏར་ཟམ་ཆེན་ནས་མཆོངས་ཏེ་རང་ཤི་བརྒྱབ་ཡོད་པ་དང་ད་ལྟའང་ཕུང་པོ་རྙེད་མི་འདུག
བསྟན་འཛིན་ཆོས་མཚོ་ཞེས་པའི་ཨ་མ་ཞིག་གིས་རང་ལོ་ ༣ ཙམ་སོན་པའི་བྱིས་པ་དང་ལྷན་དུ་རྒྱུག་ཆུར་མཆོངས་ནས་རང་ཤི་བརྒྱབ་འདུག ༢༠༢༥།༨།༢༦ གསང་བའི་བརྙན་ཆས་ཀྱི་པར་བཤུས།
ཉིན་འདི་ཚོར་ཧི་མ་ཅལ་གྱི་མ་ན་ལི་སོགས་རི་རྒྱུད་ཁུལ་མང་པོ་ཞིག་ཏུ་རྒྱུག་ཆུ་རྒྱས་ནས་ཆུ་ལོག་ས་རུད་ཀྱི་གནོད་འཚེ་ཐེབས་མུས་ཡིན་པ་དང་། ཁ་སང་ཕྱི་ཚེས་ ༢༦ ཉིན་བྷུན་ཏར་བོད་མིའི་གཞིས་ཆགས་ཀྱི་གཞིས་མི་བསྟན་འཛིན་ཆོས་མཚོ་མ་བུ་གཉིས་བྷུན་ཏར་ཟམ་ཆེན་ནས་རྒྱུག་ཆུར་མཆོངས་ཏེ། ད་ལྟའང་ཕུང་པོ་རྙེད་མི་འདུག དབུས་ནང་སྲིད་ལས་ཁུངས་ཀྱིས་བཀོད་མངགས་བཞིན་ས་གནས་མགོ་འཛིན་གྱིས་གནད་དོན་དེ་ས་གནས་ཉེན་རྟོག་ལས་ཁུངས་སུ་ཞུས་ཡོད་འདུག ཡིན་ནའང་། མོས་རང་ཤི་བརྒྱག་དགོས་པའི་རྒྱུ་རྐྱེན་སོགས་ཀྱི་ཐད་ལ་གསལ་ཁ་གང་ཡང་མི་འདུག
གནད་དོན་དེའི་ཐད་བྷུན་ཏར་བོད་མིའི་གཞིས་ཆགས་ཀྱི་བརྒྱ་དཔོན་བྱམས་པ་ཚུལ་ཁྲིམས་ལགས་ཀྱིས་འདི་གའི་གསར་འགོད་པར། བསྟན་འཛིན་ཆོས་མཚོ་ལགས་ལྟ་བུར་མཚོན་ན། ནམ་རྒྱུན་ནས་མི་གཞན་ལ་འབྲེལ་ལམ་འཛུགས་རྒྱུ་དཔེ་ཉུང་ཉུང་རེད་ལ། མོ་རང་གཅིག་པུར་ཁང་པའི་ནང་བསྡད་འདུག་གི་རེད། མཛད་སྒོ་དང་ཁ་ལག་མཉམ་ཟ་རེ་བྱེད་དུས་མ་གཏོགས་འབྲེལ་འདྲིས་མེད་པར་གཅིག་པུར་སྡོད་ཀྱི་ཡོད་པས། ངས་ནམ་རྒྱུན་ནས་མི་ལ་རེ་མི་དགོས་པ་དང་ལམ་ལ་འགྲོ་མི་དགོས་པ་མེད་པས། མི་དང་མི་ལ་འབྲེལ་ལམ་འཛུགས་དགོས་རེད་ཅེས་ཡང་ཡང་བསླབ་བྱ་རྒྱག་མྱོང་། ངས་བལྟས་པ་ཡིན་ན། ཁོང་མོའི་དཀའ་ངལ་ཆེ་ཤོས་ནི་ཁོང་མོ་ཨ་མ་ཁེར་རྐྱང་ཞིག་ཡིན་པའི་ཁར། ཕྲུ་གུ་ཞིག་ཀྱང་གསོ་དགོས་པས་དངུལ་གྱི་ཡོངས་ཁུངས་མེད་པས་དཔལ་འབྱོར་གྱི་དཀའ་ངལ་ཡོད་ཀྱང་། ས་གནས་གཞིས་ཆགས་ཀྱི་སྤྱི་མི་དང་བརྒྱ་དཔོན་སོགས་ལ་དཀའ་ངལ་ཡོད་སྐོར་གྱི་སྐད་ཆ་ཚིག་གཅིག་ཀྱང་མི་བཤད་པ་མ་ཟད། ཁོང་མོའི་གྲོང་རོགས་ཚོས་དཀའ་ངལ་ཡོད་ན་བཤད་ཤོག་ལབ་ཡོད་ནའང་། དཀའ་ངལ་མེད་ལབ་ནས་སུའང་རོགས་པ་བྱ་རོགས་ཞེས་མི་བཤད་པར། མི་ལ་འབྲེལ་བ་མི་བྱེད་པའི་ཁར་དཀའ་ངལ་ཁོག་ཏུ་བཅུག་ནས་བསྡད་ཙང་ཡིན་རྒྱུ་རེད་སེམས་ཀྱི་འདུག ཅེས་བརྗོད་བྱུང་།
ཡང་ཁོང་གིས། ད་ལྟ་ས་གནས་སྤྱི་མི་དང་བརྒྱ་དཔོན་སོགས་ཀྱིས་ཞིབ་འཇུག་བྱས་པ་བརྒྱུད། ཁོང་མོ་གཞིས་ཆགས་ནང་མི་མཐུན་ས་དང་། མི་འགྲིག་ས། དེ་བཞིན་འཁོན་འཛིན་ཡོད་ས་གང་ཡང་མི་འདུག་ལ། དགའ་རོགས་སོགས་ཡོང་ནས་རྙོག་གྲ་རིགས་ནི་གང་ཡང་བྱུང་མ་སོང་། ཁོང་མོ་རྒྱུན་དུ་ནས་ཞོགས་པ་ཆུ་ཚོད་དྲུག་པ་བདུན་པ་ཙམ་ནས་ཕྲུ་གུ་འཁྲིད་ནས་འཆམ་འཆམ་ལ་འགྲོ་ཡི་འདུག ད་ལན་ཚུར་གཞིས་ཆགས་ནང་ཡོང་སྐབས་གཙང་པོའི་ནང་མཆོངས་འདུག ཁོང་མོར་དཔལ་འབྱོར་གྱི་དཀའ་ངལ་ཡོད་ཀྱང་འབྲེལ་ཡོད་སོགས་ལ་གང་ཡང་ལབ་ཀྱི་མི་འདུག ཅེས་བརྗོད་བྱུང་།
རང་ལོ་ ༣༧ ཡིན་པའི་བསྟན་འཛིན་ཆོས་མཚོ་ལགས་བོད་ནས་བཙན་བྱོལ་དུ་ཡོང་སྟེ་དྷ་སྟེང་བོད་ཁྱིམ་དུ་ཕྱིན་ཡོད་ཅིང་། དེ་སྔོན་བྷུན་ཏར་བོད་མིའི་གཞིས་ཆགས་ཀྱི་སྨན་ཞབས་པ་ཟུར་པ་ཞིག་ཡིན་འདུག མོའི་བུ་དེ་ལོ་ན་གསུམ་ཙམ་ལས་སོན་མེད་པ་རེད།
གཞན་ཡང་། ཀུ་ལུ་མ་ན་ལི་ཁུལ་དུ་ཆུའི་འཇིག་པ་འབྱུང་མུས་ཡིན་པའི་གནད་དོན་དང་འབྲེལ་ནས་ས་གནས་བོད་མི་ཞིག་གིས་འདི་གའི་གསར་འགོད་པར། དེ་རིང་ཕྱི་ཚེས་ ༢༧ ཉིན་ཀུ་ལུ་མ་ན་ལི་བོད་མིའི་གཞིས་ཆགས་ཁུལ་གྱི་འགྲམ་དུ་རྒྱུག་པའི་གཙང་པོ་ཇེ་ཆུང་ཡིན་པ་མ་ཟད། གནམ་གཤིས་ཀྱང་ཡག་པོ་ཡོད་ཀྱང་། ཀུ་ལི་མ་ན་ལི་གཡུ་ལོ་བཀོད་ཀྱི་གཞིས་ཆགས་ཀྱི་སློབ་གྲྭའི་ར་བའི་རྩིག་པ་བརྡིབས་ཡོད་པ་མ་ཟད། དེ་སྔ་དབུས་བོད་མིའི་སྒྲིག་འཛུགས་ཀྱིས་མཐུན་བསྒྱུར་བྱས་པའི་ཨར་འདམ་གྱིས་བཟོས་པའི་ཆུ་རགས་ཀྱི་དབང་གིས། དེ་རིང་བར་ཆུས་འཇིག་ཉེན་ཆེར་བྱུང་མེད་སྐོར་བརྗོད་བྱུང་ནའང་། འདི་ག་གསར་ཁང་ལ་འབྱོར་བའི་བརྙན་ཐུང་ཞིག་གི་ཁྲོད། དྷོ་བྷི་བོད་མིའི་གཞིས་ཆགས་ནང་ཆུ་ལོག་རྒྱུག་ནས་འཕྲུལ་རྟ་སོགས་ཆུས་འཁྱེར་གྱི་འདུག ཡིན་ནའང་། འདི་གའི་གསར་འགོད་པས་དྷོ་དྷི་བོད་མིའི་གཞིས་ཆགས་ཀྱི་ས་གནས་མགོ་འཛིན་སོགས་ལ་འབྲེལ་བ་བྱས་ཀྱང་དྲ་ལམ་ཆད་ནས་མཐུད་ཐུབ་མ་སོང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
