སྲིད་སྐྱོང་མཆོག་གི་དྷ་རམ་ས་ལ་སོགས་ཧི་མ་ཅལ་ནང་གཞུང་འབྲེལ་གཟིགས་སྐོར་གྲུབ་ཀྱི་ཡོད་འདུག

སྲིད་སྐྱོང་མཆོག་གིས་བོད་མིའི་སྒྲིག་འཛུགས་འོག་དེབ་སྐྱེལ་བྱས་པའི་སྒྲིག་འཛུགས་ཁག་གིས་ས་ཆ་བདག་ཉར་ཡག་པོ་བྱས་ན་བོད་པའི་འཐབ་རྩོད་རྒྱུན་གནས་ཐུབ་པར་ཕན་ཐོགས་སྐོར་ལམ་སྟོན་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དྷ་ས་ཁུལ་དུ་གཞུང་འབྲེལ་འཚམས་གཟིགས་ཐེངས་གཉིས་པ་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༢༩ ཉིན་སྲིད་སྐྱོང་མཆོག་གིས་ས་རཱ་བོད་ཀྱི་མཐོ་རིམ་སློབ་གཉེར་ཁང་དང་།   དྷ་ས་ས་གནས་མགོ་འཛིན་ལས་ཁུངས་བཅས་སུ་འཚམས་གཟིགས་གནང་ཡོད་པ་དང་།  ཁ་སང་ཕྱི་ཚེས་ ༢༨ ཉིན་གྱི་སྔ་དྲོར་སྲིད་སྐྱོང་མཆོག་གིས་སྙིང་སྟོབས་གླིང་དབང་སྐྱོན་གཅེས་སྐྱོང་ཁང་དང་། ཇོ་ནང་དགོན། འཆི་མེད་དགའ་ཚལ་གླིང་། སྒྲོལ་མ་གླིང་བཙུན་དགོན། ནོར་གླིང་སྔོན་འགྲོའི་སློབ་གྲྭ་དང་བྱིས་བཅོལ་ཁང་བཅས་སུ་འཚམས་གཟིགས་དང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་སེར་སྐྱ་མི་མང་ལ་གསུང་བཤད་གནང་ཡོད་འདུག

སྐབས་དེར་སྲིད་སྐྱོང་མཆོག་གིས་སྒྲིག་འཛུགས་གང་འདྲ་ཞིག་ཡིན་རུང་རྒྱ་གར་གྱི་ཁྲིམས་དང་སྒྲིག་གཞི་གཞིར་བཟུང་སྲུང་བརྩི་བྱེད་དགོས་རྒྱུ་གལ་ཆེན་པོ་ཡིན་པ་དང་། དེ་དག་ལག་བསྟར་མ་གནང་ཚེ་མ་འོངས་པར་སྒོ་བརྒྱག་དགོས་པའི་གནས་སྟངས་སོགས་དཀའ་ངལ་འཕྲད་ངེས་རེད། དེར་བརྟེན་བོད་མིའི་སྒྲིག་འཛུགས་ཀྱི་ངོས་ནས་ཀྱང་རྒྱ་གར་གྱི་སྒྲིག་ཁྲིམས་གཞིར་བཟུང་འགྲོ་བཞིན་ཡོད།  ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ལྟ་བུར་མཚོན་ན་དེབ་སྐྱེལ་ཟིན་པའི་སྒྲིག་འཛུགས་ཤིག་ཡིན་པས་དེབ་སྐྱེལ་གྱི་ཁྲིམས་སྒྲིག་དང་། རྒྱ་གར་གྱི་ཡུལ་ཁྲིམས་ལྟར་འགྲོ་རྒྱུ་གལ་ཆེན་པོ་ཡིན། དེ་བཞིན་ཕྱི་རྒྱལ་རོགས་དངུལ་ལེན་རྒྱུའི་ལག་འཁྱེར་མེད་པ་ཡིན་ན། མ་འོངས་རོགས་དངུལ་གནང་མཁན་ཡོད་ནའང་ལེན་ས་མེད་པའི་དཀའ་ངལ་འཕྲད་ཀྱི་ཡོད་པས་དེ་དག་ལ་དོ་སྣང་གནང་དགོས་སྐོར་གསུངས་འདུག

ཉིན་རྒྱབ་སྲིད་སྐྱོང་མཆོག་གིས་གོ་པལ་པུར་བོད་ཁྱིམ་དང་། ཅ་མུན་ཌ་བོད་མིའི་ཚོང་པའི་སྡོད་གནས་སྤྲིན་ཆེན་བསམ་གྲུབ་གླིང་། རྒྱུད་སྟོད་དགོན་པ་བཅས་སུ་འཚམས་གཟིགས་གནང་ཡོད་པ་དང་། གོ་པལ་པུར་བོད་ཕྲུག་ཁྱིམ་སྡེའི་ཚོགས་ཁང་དུ་དགེ་ལས་སློབ་ཕྲུག་ཡོངས་ལ་བརྙན་རིས་བརྒྱུད་ནས་བོད་མཐོ་སྒང་གི་གལ་གནད་ཐོག་གསུང་བཤད་གནང་འདུག སྐབས་དེར་སྲིད་སྐྱོང་མཆོག་གིས་ས་ཆའི་ཆགས་བབ་ཐོག་ནས་བོད་ཀྱི་གལ་གནད་དང་། བོད་ཀྱི་ཁོར་ཡུག་གི་གལ་གནད། བོད་ཀྱི་རིག་གཞུང་དེ་ནང་ཆོས་ལ་བརྟེན་པ་ཞིག་དང་། ལྷག་པར་དུ་བྱམས་སྙིང་རྗེ་དང་འཚེ་བ་མེད་པ་ལ་བརྟེན་ཡོད་པས་འཛམ་གླིང་སྟེང་ཞི་བདེ་སྤེལ་ཐུབ་པའི་ནུས་པ་ཡོད་པའི་སྐོར་དང་། དེ་བཞིན་བོད་རྒྱའི་དཀའ་རྙོག་སེལ་ཐབས་དང་། རྒྱ་གཞུང་གི་ཆབ་སྲིད་འགྱུར་བར་གདོང་ལེན་བྱེད་ཕྱོགས། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན་ནས་འགྱུར་བ་གཏོང་དགོས་རིགས་སོགས་ཀྱི་ཐོག་དྲི་བ་དྲིས་ལན་གནང་འདུག

ཕྱི་ཚེས་ ༢༧ ཉིན་གྱི་སྔ་དྲོར་སྲིད་སྐྱོང་མཆོག་གིས་དྷ་ས་འགྲོ་ཕན་བོད་ཀྱི་སྨན་རྩིས་ཁང་གི་སྡེ་ཚན་ཁག་ལ་གཟིགས་ཞིབ་ཀྱིས་ནད་བཅོས་ཉམས་ཞིབ་སྡེ་ཚན་ཡིག་ཚང་དང་། སེམས་ཁམས་འཕྲོད་བསྟེན་སྡེ་ཚན། སྨན་སྦྱོར་སྡེ་ཚན་གྱི་གཙང་བཟོ་ཁང་བཅས་དབུ་འབྱེད་གནང་ཡོད་པ་དང་། དེའི་རྗེས་འགྲོ་ཕན་བོད་ཀྱི་སྨན་རྩིས་ཁང་མཐོ་སློབ་ཀྱི་ཚོགས་ཁང་དུ་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད་འདུག སྐབས་དེར་སྲིད་སྐྱོང་མཆོག་གིས་སྨན་རྩིས་ཁང་གི་འགན་འཛིན་ལྷན་ཚོགས་ཀྱི་ཚོགས་འདུ་བརྒྱུད་ཚོགས་པའི་རྩ་འཛིན་དང་བླང་དོར་སྒྲིག་གཞི། བཀོད་སྒྲིག སྔོན་རྩིས་སྟངས་འཛིན་བཅས་ཀྱི་ཁྲིམས་དང་སྒྲིག་གཞི་ཁག་གཏན་འབེབས་གནང་ཡོད་པའི་སྐོར་དང་། བོད་མིའི་སྒྲིག་འཛུགས་འོག་དེབ་སྐྱེལ་བྱས་པའི་སྒྲིག་འཛུགས་ཁག་གིས་ས་ཆ་བདག་ཉར་ཡག་པོ་བྱས་ན་འཐབ་རྩོད་རྒྱུན་གནས་ཐུབ་པར་ཕན་ཐོགས་པའི་སྐོར། ནང་སྲིད་ལས་ཁུངས་ཀྱི་གཞིས་སྤོ་ལས་གཞི་དང་ཆོས་རིག་ལས་ཁུངས་ཀྱི་གྲངས་འཛིན་དཔེ་མཛོད་ཀྱི་ལས་གཞིའི་སྐོར་སོགས་གསུངས་འདུག

ཉིན་དེའི་ཉིན་རྒྱབ་སྲིད་སྐྱོང་མཆོག་གིས་སཾ་བྷོ་ཊ་སྤྱི་ཁྱབ་ཡིག་ཚང་དང་། དཔེ་སྟོན་སློབ་གྲྭ། ཤེས་རབ་དགའ་ཚལ་སློབ་གླིང་བཅས་སུ་འཚམས་གཟིགས་གནང་སྟེ། ཤེས་རབ་དགའ་ཚལ་སློབ་གླིང་གི་ཚོགས་ཁང་དུ་དགེ་ལས་སློབ་ཕྲུག་རྣམས་ལ་གསུང་བཤད་གནང་འདུག སྐབས་དེར་སྲིད་སྐྱོང་མཆོག་གིས། ཉེ་ལམ་རྒྱ་ནག་གི་དམག་སྲིད་ཏང་བཅས་ཀྱི་དབང་ཆ་འཛིན་མཁན་ཞི་ཅིན་ཕིན་དང་། རྒྱ་ནག་ཆབ་སྲིད་ལྷན་ཁང་གི་ཝང་ཧོང་ལིན་སོགས་མགོ་ཁྲིད་ཁག་ཅིག་བོད་རང་སྐྱོང་ལྗོངས་ཟེར་བ་བཙུགས་ནས་ལོ་ ༦༠ འཁོར་བའི་ཐོག་ཡོང་ཡོད་པ་རེད། ཁོང་ཚོས་དམིགས་ཡུལ་གཙོ་བོ་ནི་བོད་ནང་ཡར་རྒྱས་དང་འཛུགས་སྐྲུན་བྱས་ཡོད་པ་འཛམ་གླིང་དུ་ཁྱབ་བསྒྲགས་དང་། རྒྱལ་སྤྱིའི་ནང་བོད་དོན་ཐོག་ཐེ་གཏོགས་བྱ་མི་ཆོག་པའི་ཁྱབ་བསྒྲགས་ཆེད་རེད། འདི་ལོའི་གོ་སྟོན་སྲུང་གཙིའི་སྐབས་སུ་༧གོང་ས་༧རྒྱལ་བ་རིན་པོ་ཆེ་མཆོག་ནས། ༧སྐུའི་ཡང་སྲིད་རྒྱུན་མཐུད་ནས་ཕེབས་རྒྱུ་དང་དགའ་ལྡན་ཕོ་བྲང་གི་སྒྲིག་འཛུགས་མུ་མཐུད་དུ་གནས་རྒྱུ་ཡིན་པའི་བཀའ་སློབ་གནང་ཡོད་པས། རྒྱ་ནག་གཞུང་ལ་ཧ་ཅང་ཕོག་ཡོད་པ་རེད། ང་ཚོས་སྲོལ་རྒྱུན་ལྟར་བླ་མའི་བཀའ་དགོངས་བཞིན་ཐག་གཅོད་གནང་རྒྱུ་ལས། ཆོས་ཅི་ཡང་ཁས་མི་ལེན་པའི་གཞུང་ཞིག་གིས་ཐག་གཅོད་རྒྱུ་ཡོད་པ་མ་རེད། ཅེས་དང་། དེ་བཞིན་བཙན་བྱོལ་གྱི་དམངས་གཙོའི་འཕེལ་རིམ་དང་། བོད་ཀྱི་ལོ་རྒྱུས་ཀྱི་གལ་གནད་སོགས་ཀྱི་ཐོག་དྲི་བ་དྲིས་ལན་གནང་ཡོད་འདུག

དེ་བཞིན་ཕྱི་ཚེས་ ༢༦ ཉིན་སྲིད་སྐྱོང་མཆོག་གིས་དྷ་སྟེང་བོད་ཁྱིམ་སློབ་གྲྭ་དང་། བོད་ཀྱི་ཟློས་གར་ཚོགས་པ། དགེ་ལྡན་ཆོས་གླིང་བཙུན་དགོན། བྱམས་པ་གླིང་རྒན་གསོ་ཁང་། དྷ་ས་ཁྲོམ་ས་གསར་པར་འཚམས་གཟིགས་གནང་ཡོད་པ་དང་། ཉེ་ལམ་ཆར་ཞོད་ཀྱི་རྐྱེན་གྱིས་ས་རུད་འཕྲོ་བརླག་ཕྱིན་པའི་དྷ་སའི་གཞུང་ལམ་ཁག་ལ་གཟིགས་ཞིབ་གནང་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།