བོད་ཀྱི་ཁོར་ཡུག་སྲུང་སྐྱོབ་པ་དང་ལྐོག་ཟ་རུལ་སུངས་ཐེར་འདོན་པ་ཨ་ཉག་སེང་སྒྲ་ལགས་ཀྱི་བཙོན་འཇུག་དུས་ཡུན་ལོ་ ༧ ཚང་གི་ཡོད་ཀྱང་བཙོན་ཁང་ནང་ཁྲིམས་འགལ་བྱས་ཡོད་ལུགས་ཀྱི་ནག་ཉེས་བཙུགས་ཏེ་དུས་ཡུན་ཕར་འགྱངས་བྱས་འདུག
བོད་གནས་ལྟ་ཞིབ་ཁང་གིས་དེ་འབྲེལ་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༩ པའི་ནང་ཨ་ཉག་སེང་སྒྲ་ལགས་ཀྱི་བཙོན་འཇུག་གི་དུས་ཡུན་ལོ་ ༩ ཚང་གི་ཡོད་ཀྱང་། བཙོན་ཁང་ནང་ཁྲིམས་འགལ་བྱས་ལུགས་ཀྱི་ནག་ཉེས་བཙུགས་ཏེ་ཕྱི་ལོ་ ༢༠༢༦ ཕྱི་ཟླ་ ༢ པ་བར་ཀློད་གྲོལ་གཏོང་རྒྱུ་མིན་ལུགས་བརྗོད་ཡོད་འདུག
ཟླ་འདིའི་ཟླ་དཀྱིལ་ཙམ་ལ་ཨ་ཉག་སེང་སྒྲ་ལགས་ཀྱི་ནང་མི་ཚོར་སྐར་མ་ཁ་ཤས་རིང་ཐུག་འཕྲད་བྱེད་དུ་བཅུག་ཡོད་པ་དང་། སྐབས་དེར་ཁོང་གི་སྐུ་གཟུགས་ཧ་ཅང་ཞན་པོ་ཆགས་ཡོད་པ་དངོས་སུ་མཐོང་ཡོད་སྟབས། ཁྱིམ་མི་ཚོས་ཁོང་གི་འཕྲོད་བསྟེན་གནས་སྟངས་ཐོག་སེམས་འཚབ་ཆེན་པོ་གནང་བཞིན་ཡོད་འདུག
བཙོན་འཇུག་དུས་ཡུན་ཕར་འགྱངས་བྱེད་དགོས་དོན་གསལ་པོ་བརྗོད་མེད་ཀྱང་། ཨ་ཉག་སེང་སྒྲ་ལགས་ལ་ནག་ཉེས་བཙུགས་པ་རྣམས་ཁས་ལེན་བྱས་མེད་པ་མ་ཟད། བཙོན་ཁང་དུ་ཉེས་མེད་ཉེས་འཛུགས་བྱས་པར་ངོ་རྒོལ་ཐེངས་མང་བྱས་ཡོད་པ་སོགས་ཀྱིས་དུས་ཡུན་ཕར་འགྱངས་བྱས་ཡོད་སྲིད་པའི་ཚོད་དཔག་བྱེད་ཀྱི་འདུག
བོད་མགོ་ལོག་ཁུལ་དགའ་བདེ་རྫོང་རྐྱང་ཆད་ཡུལ་ཚོ་ནས་ཡིན་པའི་ཁོར་ཡུག་སྲུང་སྐྱོབ་ལས་འགུལ་བ་དང་ལྐོག་ཟ་རུལ་སུངས་ཐེར་འདོན་པ་ཨ་ཉག་སེང་སྒྲ་ལགས་ཀྱིས། ས་གནས་སྲིད་གཞུང་གི་དཔོན་རིགས་ཚོས་དབང་ཆ་ལོག་སྤྱོད་དང་ལྐོག་ཟ་རུལ་སུངས། ཁྲིམས་འགལ་གྱིས་རང་བྱུང་གཏེར་ཁ་སྔོག་འདོན་དང་རྩ་ཆེའི་རི་སྐྱེས་སེམས་ཅན་རྔོན་པ་སོགས་ལ་ངོ་རྒོལ་གྱི་ལས་འགུལ་སྤེལ་ནས་ས་གནས་འབྲོག་པ་མང་ཚོགས་ཀྱིས་ཁོང་ལ་རྒྱབ་སྐྱོར་དང་དགའ་མགུ་ཡི་རངས་ཤུགས་ཆེན་བྱས་རྗེས། ཕྱི་ལོ་ ༢༠༡༤ ལོར་རྒྱ་ནག་གཞུང་གིས་ཨ་ཉག་སེང་སྒྲས་ཁྲིམས་འགལ་བྱས་ཡོད་ཚུལ་བརྗོད་དེ་འཛིན་བཟུང་གིས་ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཐག་བཅད་དེ། ཕྱི་ལོ་ ༢༠༡༦ ཟླ་ ༡༠ ཚེས་ ༡༨ ཉིན་ཟི་ལིང་ཏུང་ཁྲན་ (东川) བཙོན་ཁང་ནས་ཀློད་གྲོལ་བཏང་།
ཕྱི་ལོ་ ༢༠༡༨ ལོར་སྤྱི་ཚོགས་དཀྲུག་རྐྱེན་བཟོས་པའི་ཉེས་མིང་འོག་ཁོང་བསྐྱར་དུ་འཛིན་བཟུང་བྱས་ཡོད་པ་དང་། ཁོང་གི་བཟའ་ཟླ་གཡང་སྐྱིད་དང་ཁྲིམས་རྩོད་པ་ལིན་ཆི་ལི་སོགས་ཀྱིས་ཁྲིམས་གཏུག་རིམ་པ་བྱས་ཡོད་ནའང་། ཕྱི་ལོ་ ༢༠༡༩ ལོའི་ཟླ་ ༡༢ ཚེས་ ༦ ཉིན་ཁོང་ལ་སྤྱི་ཚོགས་དཀྲུག་རྐྱེན་བསླངས་བ་དང་སྤྱི་ཚོགས་སྒྲིག་གཞིར་གཏོར་བཤིག་བཏང་བའི་འདུ་འཛོམས་བྱས་པ་སོགས་ཀྱི་ཉེས་མིང་འོག་ལོ་ ༧ བཙོན་འཇུག་ཁྲིམས་ཆད་བཅད་ཡོད་པ་དང་། ཁོང་དང་ཁོང་གི་ཁྲིམས་རྩོད་པས་ཐེངས་གསུམ་ལ་མཐོ་རིམ་ཁྲིམས་ཁང་དུ་ཞུ་གཏུག་བྱས་ཡོད་ཀྱང་གྲུབ་འབྲས་ཐོན་མེད་པ་རེད། ཕྱི་ལོ་ ༢༠༢༠ ལོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཆེད་མཁས་པ་དགུ་ཡིས་ཨ་ཉག་སེང་སྒྲ་ལགས་ཀྱི་ཉེས་འཛུགས་གུ་ཡངས་གཏོང་དགོས་པའི་རེ་སྐུལ་བྱས་ཡོད་ནའང་རྒྱ་ནག་གཞུང་གིས་ཉན་འཇོག་བྱས་མེད་པ་རེད།
