༸གོང་ས་རྒྱལ་བ་རིན་པོ་ཆེ་མཆོག་ནས་ཧི་མ་ཅལ་མངའ་སྡེའི་ནང་རང་བྱུང་གོད་ཆག་གི་དབང་གིས་རྐྱེན་འདས་སུ་གྱུར་བ་རྣམས་ལ་ཐུགས་སྨོན་དང་གནོད་འཚེ་ཐེབས་མཁན་རྣམས་ལ་ངལ་སེལ་ཆེད་ཞལ་འདེབས་གནང་རྒྱུ་ཡིན་འདུག
Photo Credit: OHHDL
འདས་པའི་ཟླ་ཤས་རིང་རྒྱ་གར་ཧི་མ་ཅལ་མངའ་སྡེ་གཙོས་རྒྱ་གར་བྱང་ཕྱོགས་ཀྱི་མངའ་སྡེ་ཁག་ཅིག་གི་ནང་ཆར་ཞོད་ཀྱི་དབང་གིས། མི་རྒྱུ་གཉིས་ལ་རང་བྱུང་གོད་ཆག་གི་གནོད་འཚེ་ཡང་ཡང་ཐེབས་ཡོད་སྟབས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་རྒྱལ་བའི་ཕོ་བྲང་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སི་ཝིན་དྷར་སིང་སུ་ཀུ་(Sukhwinder Singh Sukhu) མཆོག་གི་མཚན་ཐོག་ཏུ་གདུང་སེམས་མཉམ་སྐྱེད་ཀྱི་གསུང་འཕྲིན་ཞིག་སྩལ་ཏེ། རང་བྱུང་གོད་ཆག་གི་ཁྲོད་ནས་རྐྱེན་འདས་དང་གནོད་འཚེ་ཐེབས་མཁན་ལ་ཐུགས་སྨོན་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། ངོས་རང་གིས་ཁྱེད་དང་ཁྱེད་ཀྱི་ནང་མི། རང་བྱུང་གོད་ཆག་གི་རྐྱེན་གྱིས་རྐྱེན་འདས་དང་གནོད་འཚེ་ཐེབས་མཁན་ཀུན་ལ་བསྔོ་སྨོན་བྱེད་ཀྱི་ཡོད། ངོས་ནས་མངའ་སྡེ་གཞུང་དང་འབྲེལ་ཡོད་ལས་ཁུངས་ཚང་མས་ཛ་དྲག་གི་མྱུར་སྐྱོབ་དང་བསྐྱར་གསོའི་ལས་དོན་གཉེར་མུས་ཡིན་པ་ཤེས་ཀྱི་ཡོད། མངའ་སྡེ་གཞུང་གི་མི་མང་ལ་གདུང་སེམས་མཉམ་སྐྱེད་དང་སེམས་འདུན་མཚོན་སླད། ངོས་ནས་ཏཱ་ལའི་བླ་མ་ཡིད་ཆེས་དགེ་རྩ་ཚོགས་པར་ངལ་སེལ་གྱི་སླད་ཞལ་འདེབས་ཤིག་དབུལ་དགོས་པའི་རེ་སྐུལ་ཞུས་ཡོད། ཅེས་གསུངས་འདུག
ཡང་༧གོང་ས་རྒྱལ་བ་རིན་པོ་ཆེ་མཆོག་ནས། ཁྱེད་རང་གིས་མཁྱེན་གསལ་བཞིན། དྷ་རམ་ས་ལ་ནི་འདས་པའི་མི་ལོ་དྲུག་ཅུ་རེ་ལྔ་ལྷག་ངོས་ཀྱི་གཞིས་ཁྱིམ་དུ་གྱུར་ཡོད་ཅིང་། ངོས་ནས་རྒྱུན་དུ་མངའ་སྡེའི་བློན་ཆེན་མཆོག་ང་ཚོའི་བློན་ཆེན་དུ་བརྩིས་ནས་འབྲེལ་འདྲིས་བྱེད་མུས་ཡིན་ལ། ངོས་ནས་སྤྱི་ཁྱབ་བློན་ཆེན་མཆོག་གི་མཛའ་བརྩེ་དང་ཧི་མ་ཅལ་མངའ་སྡེའི་མི་མང་གིས་མི་ལོ་འདི་དག་གི་རིང་ལ་ངོས་དང་ངོས་ཀྱི་རྗེས་འབྲངས་བོད་མི་རྣམས་ལ་མཐུན་རྐྱེན་སྦྱོར་སྤྲོད་གནང་བར་བསྔགས་བརྗོད་ཞུ་ཡི་ཡོད། ཅེས་གསུངས་འདུག
འདི་ལོའི་ཆར་དུས་སྐབས་ཧི་མ་ཅལ་མངའ་སྡེ་གཅིག་པུའི་ནང་ཆར་ཞོད་ཀྱི་དབང་གིས། རི་ཉིལ་གྲངས་ ༡༣༥ དང་། ཆུ་ལོག་གྲངས་ ༩༥། ཆུ་ཐོག་ (cloudburst) གྲངས་ ༤༥ བྱུང་ནས། ལ་ཧོལ། སྤི་ཏེ། མན་ཌི། ཀང་ར་སོགས་སུ་གོད་ཆག་ཆེན་པོ་བྱུང་བའི་མུར། ཉུང་མཐར་མི་གྲངས་ ༣༦༦ རྐྱེན་འདས་སུ་གྱུར་ཡོད་པ་མ་ཟད། ད་ལྟའང་མི་གྲངས་ ༤༡ གར་སོང་ཆ་མེད་དུ་གྱུར་འདུག རང་བྱུང་གོད་ཆག་གི་དབང་གིས་ཁང་པ་བརྡིབས་པ་དང་། ལམ་བརྡིབས་པ། ཟམ་ཆད་པ། གློག་དང་དྲ་ལམ་སོགས་ཆད་པའི་དབང་གིས་ཉུང་མཐར་ཧིན་སྒོར་ས་ཡ་ ༤༠༧༩ ལྷག་གི་གྱོང་གུད་ཐེབས་ཡོད་འདུག་ལ། ད་ལྟའང་ཧི་མ་ཅལ་ནང་ཁུལ་དང་མངའ་སྡེ་གཞན་དུ་བགྲོད་པའི་གཞུང་ལམ་མང་དག་ཅིག་ཆད་ནས་འགྲིམ་འགྲུལ་ཐད་དཀའ་ངལ་མི་ཉུང་བ་ཞིག་འཕྲད་མུས་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
