ཚོགས་སྡེ་གསུམ་གྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུས།

༸གོང་ས་མཆོག་ནས་འཛམ་གླིང་ནང་མཚོན་ཆ་དང་དབང་ཤུགས་ཀྱི་ཐོག་ནས་མགོ་ཁྲིད་བྱེད་མཁན་ཡོད་ཀྱང་། ༸རྒྱལ་བ་རིན་པོ་ཆེས་མགོ་ཁྲིད་ཅེས་པ་དད་པ་དང་མོས་པའི་ཐོག་ནས་མགོ་ཁྲིད་པ་ཞིག་ཡིན་ཞེས་བཀའ་སློབ་སྩལ་སོང་།

དེ་རིང་ཕྱི་ཚེས་ ༡༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཁའི་སྐྱིད་སྡུག་ཚོགས་པ་དང་། ཨི་ཐ་ཁའི་རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་། རྒྱལ་སྤྱིའི་བོད་ཀྱི་གཞོན་སྐྱེས་བཅས་ཀྱི་གོ་སྒྲིག་འོག ༸གོང་ས་རྒྱལ་བ་རིན་པོ་ཆེ་མཆོག་ལ་ཚེ་དཔག་མེད་དྭངས་བ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར་༸གོང་ས་རྒྱལ་བ་རིན་པོ་མཆོག་ནས། དེ་རིང་འདིར་ང་ཚོ་ཚང་མ་ལྷག་བསམ་དད་འདུན་རྩེ་གཅིག་ཐོག་ནས་འཛོམས་པ་རེད། ངོས་རང་ཆུང་ཆུང་སྐབས་ནས་༸རྒྱལ་བ་བསྟན་འཛིན་རྒྱ་མཚོ་ཞེས་ཡིད་ཆེས་དང་དགའ་མོས་བྱེད་པ་ཧ་ཅང་ཤུགས་ཆེན་པོ་རེད། གཙོ་བོ་སྐྱབས་རྗེ་རྟ་བྲག་རིན་པོ་ཆེ་དང་། གླིང་རིན་པོ་ཆེ། ཁྲི་བྱང་རིན་པོ་ཆེ་བཅས་ཀྱི་སྐུ་མདུན་ནས་དཔེ་ཆ་འཁྲིད་པ་དང་། མཚན་ཞབས་ཚོའི་མདུན་ནས་རྩོད་པ་སྦྱངས་པ་རེད།  ངོས་ཀྱིས་དགའ་ཞིང་སྤྲོ་བཞིན་སློབ་སྦྱོང་བྱས་པ་རེད། ང་ཚོ་བཙན་བྱོལ་བ་ཆགས་ཏེ་བསྡད་པའི་སྐབས་སུ། ནོར་བུ་གླིང་ཀ་ནས་དཔལ་ལྷ་མོ་དང་མགོན་པོ་ཕྱག་དྲུག་པར་གསོལ་བ་བཏབ་སྟེ་གསོན་བྲལ་བྱས་པ་རེད། མགོན་པོ་ཕྱག་དྲུག་པའི་སྣང་བ་དེ་ནམ་ཡང་མི་བརྗེད་པར་བསྡད་ཀྱི་འདུག ང་ཚོ་བཙན་བྱོལ་བ་ཆགས་ཏེ་ངོས་རང་རྒྱ་གར་དང་ཕྱི་རྒྱལ་གྱི་ས་ཁུལ་དུ་བསླེབས་པ་རེད། དེ་རིང་སྐབས་སུ་བབ་པ་བརྟན་བཞུགས་ཀྱི་གསོལ་འདེབས་ཤིག་བྱུང་བ་རེད། ཁྱེད་ཚོའི་ལྷག་བསམ་དང་སྙིང་སྟོབས་དངོས་གནས་འགྲན་ཟླ་བྲལ་བ་རེད། ཅེས་གསུངས།

༸མགོན་པོ་གང་ཉིད་མཆོག་ནས། ཁྱེད་ཚོའི་སྙིང་སྟོབས་དང་ལྷག་བསམ་དྲངས་ཡོང་དུས། ངོས་རང་ལ་ཆ་བཞག་ན་ཕ་ཡུལ་ས་ཐག་རིང་པོ་ནས་སྐྱེས་ཏེ་ལྷ་སར་འབྱོར། དེ་ནས་རྩེ་ཕོ་བྲང་དང་ནོར་བུ་གླིང་ཁ་རུ་བསྡད་དེ། གང་ལྟར་རྒྱལ་དབང་གི་མིང་འཁྱེར་ནས་ཆོས་སྲིད་མཛད་སྒོ་མང་པོ་ཞིག་བྱས་ཡོད། དེ་དག་ཚང་མ་བསྟན་པའི་ཞབས་འདེགས་བསྒྲུབ་པ་ཆགས་ཡོད། ངོས་རང་མདོ་སྨད་ཀྱི་ས་ཁུལ་ཞིག་ནས་སྐྱེས་ཏེ་ཡར་ལྷ་སར་བསླེབས་པ་དང་། དེ་ནས་དཔེ་ཆ་བལྟས་པ་རེད། ཕར་ཕྱིན་དང་དབུ་མའི་རིགས་ལ་ཧ་ཅང་མང་པོ་བལྟས་ཡོད། མངོན་པ་མཛོད་ལ་དོ་སྣང་ཞེ་དྲགས་བྱས་མེད། རི་རབ་གླིང་བཞི་གླིང་ཕྲན་ཞེས་པ་ཡིད་ཆེས་ཀྱི་ཡོད་པ་མ་རེད། གཞན་དབུ་མ་དང་ཕར་ཕྱིན། ཚད་མ་བཅས་ཀྱི་གཞུང་ལ་སྤྲོ་བ་ཡོད་པ་བཞིན་དཔེ་ཆ་བལྟས་པ་རེད། བར་སྐབས་སྐྱིད་སྡུག་ལེགས་ཉེས་སྣ་ཚོགས་བྱུང་ཡོད་ཀྱང་། བོད་བསྟན་སྲིད་ཀྱི་ཞབས་འདེགས་དོན་དུ་ངོས་ཀྱི་སེམས་ཤུགས་ལ་འགྱུར་བ་ཁྱོན་ནས་མེད། རྒྱ་ནག་གི་ངོས་ནས་གནས་ཚུལ་གང་བསྟན་པ་དང་ཅི་ཞིག་བཤད་ཀྱང་། ངོས་རང་ལ་ལས་ཀྱི་བསྐོས་པ་ཞིག་རེད། དེང་སང་རྒྱ་ནག་ནང་དུ་ནང་ཆོས་ལ་དོ་སྣང་བྱེད་མཁན་དང་། ངོས་རང་ལ་དགའ་མོས་བྱེད་མཁན་ཇེ་མང་དུ་འགྲོ་བཞིན་འདུག བསྟན་པ་དང་བསྟན་པ་འཛིན་མཁན་ཚང་མས་བསམ་བློ་གུ་ཡངས་པོ་དང་རྒྱ་ཆེན་པོ་གཏོང་དགོས། ཞེས་གསུངས།

༸གོང་ས་མཆོག་ནས། དུས་སྙིགས་མ་ཆགས་བསྡད་ཀྱི་ཡོད་ལ། འཛམ་བུ་གླིང་ཧ་ཅང་འགྱུར་བ་ཆེན་པོ་འགྲོ་བཞིན་པ་བསྟུན་ནས། འཛམ་གླིང་ཤར་ནུབ་ལྷོ་བྱང་ནས་ཏཱ་ལའི་བླ་མ་ཞེས་དགའ་མོས་བྱེད་མཁན་ཧ་ཅང་མང་པོ་ཡོང་གི་འདུག ངོས་རང་གིས་ཆ་བཞག་ན་ལས་དང་སྨོན་ལམ་གྱི་གྲུབ་བསྡད་ཡོད་པ་རེད། ངོས་དང་ལས་འབྲེལ་ཡོད་པའི་བག་ཆགས་བཟང་པོ་འཇོག་ཐུབ་པ་དང་། དེ་ལ་བརྟེན་ནས་ཚེ་རབས་ནས་ཚེ་རབས་བྲལ་མེད་རྗེས་སུ་འཛིན་པའི་སྨོན་ལམ་ཁྱེད་ཚོས་རྒྱག་གི་ཡོད་ལ། ངོས་རང་གིས་ཀྱང་སྨོན་ལམ་རྒྱག་བཞིན་ཡོད། གང་ལྟར་ང་ཚོ་འཕྲལ་སེལ་འཛོམས་ཏེ་ཁ་གྱེས་བཞིན་ཡོད་ཀྱང་། རྩ་བའི་ང་ཚོའི་དད་པ་དང་ལྷག་བསམ་འགྱུར་བ་མེད་པ་ཞིག་རེད། ཚེ་རབས་ནས་ཚེ་རབས་དད་མོས་དེ་འགྱུར་བ་མེད་པ་ཞིག་ཆགས་བསྡད་ཡོད། དེ་རིང་དྷ་རམ་ས་ལར་འདིར་ངོས་རང་ལ་བརྟན་བཞུགས་ཀྱི་མཛད་སྒོ་ཞིག་འཚོགས་པ་རེད། ངོས་རང་གིས་སྨོན་ལམ་གང་ཡོང་བརྒྱབ་ཡོད། ད་དུང་མུ་མཐུད་དུ་ངོས་ཀྱི་ལུས་འབྲེལ་འདིའི་ཐོག་ནས་བོད་དང་བསྟན་འགྲོ་སྤྱིའི་དོན་དུ། ངོས་རང་མི་ཚེ་རིང་བོར་བསྡད་དེ་བོད་རྒྱ་ཆེའི་མི་མང་གཙོ་བོ་གྱུར་བའི་ངོས་ལ་དད་པ་དང་འདུན་པ་རྩེ་གཅིག་ཡོད་པ་མུ་མཐུད་ཕན་ཐོགས་ཡོང་བའི་སྨོན་ལམ་རྒྱག་གི་ཡོད། སེམས་ཤུགས་ཀྱང་སྐྱེ་བཞིན་ཡོད། རྒྱལ་བ་རིན་པོ་ཆེ་ཞེས་དགའ་མོས་བྱེད་མཁན་ནང་པ་གཅིག་པོ་རེད་མི་འདུག ངོས་རང་ལ་ཡི་ཤུ་ཆོས་པ་དང་། ཚན་རིག་པ། ཆོས་མེད་མཁན་མང་པོས་ཧ་ཅང་དགའ་མོས་བྱེད་ཀྱི་འདུག  དགའ་མོས་བྱེད་མཁན་ཚང་མས་ཇི་ལྟར་འདོད་པ་ཡོད་པ་བཞིན་ངོས་རང་མི་ཚེ་རིང་པོ་འཚོ་བའི་ཐོག་ནས་ཞབས་འདེགས་བསྒྲུབ་རྒྱུ་ཡིན། རྒྱ་ནག་ནང་དུ་ནང་ཆོས་ཤུགས་ཆེ་རུ་དར་བཞིན་འདུག བོད་གཙོས་ཏཱ་ལའི་བླ་མ་དང་འབྲེལ་བ་ཡོད་པའི་ས་ཁུལ་ཚང་མར་ཆོས་དད་ཇེ་ཟབ་ཏུ་འགྲོ་བ་དང་། ངོས་ཀྱིས་སངས་རྒྱས་བསྟན་པ་རིན་པོ་ཆེ་དངོས་ཡོད་གནས་ཚུལ་དང་མཐུན་པའི་ཐོག་ནས་ཞབས་འདེགས་བསྒྲུབ་པར་སྨོན་ལམ་རྒྱག་གི་ཡོད། ཁྱེད་ཚོས་ཀྱང་སྨོན་ལམ་རྒྱག་དགོས། ཞེས་གསུངས།

ཡང་༸གོང་ས་མཆོག་ནས། ང་ཚོས་སངས་རྒྱས་བཅོམ་ལྡན་འདས་ཀྱི་དགེ་སློང་གི་དུག་སློག་གྱོན་ཡོད་པ་རེད། དངོས་གནས་དྲང་གནས་བསྟན་པ་ལ་ཞབས་འདེགས་བསྒྲུབ་མཁན་དང་སྟོན་པའི་སྤྲུལ་བའི་མཆོད་པ་རེད། ངོས་ཀྱི་རྨི་ལམ་ལ་ཚོགས་ཁང་ཆེན་པོ་ཞིག་གི་དབུས་ལ་སྟོན་པ་ཐུབ་པའི་དབང་པོ་བཞུགས་འདུག ངོས་རང་གཟིགས་ཏེ་ཡར་ཤོག་གསུངས་སོང་། ངོས་རང་གིས་སྟོན་པ་ཐུབ་པའི་དབང་པོ་གུས་ཞབས་ཆེན་པོ་བྱས་ཏེ་ཕྱིན་པ་ཡིན། ངོས་རང་སྟོན་པའི་འཁྲིས་སུ་སྡོད་ཅེས་གསུངས་སོང་། སྟོན་པས་ངོས་ཀྱི་མགོ་ལ་བྱིལ་བྱིལ་བྱས་ཏེ་ཧ་ཅང་མཉེས་པོ་གནང་བྱུང་། ངོས་རང་གིས་སྟོན་པའི་ཞབས་འདེགས་བསྒྲུབ་ཀྱི་ཡོད་པའི་དད་པ་རྩེ་གཅིག་ཏུ་སྐྱེས། སྟོན་པའི་ཞབས་འདེགས་མུ་མཐུད་བསྒྲུབ་རྒྱུའི་སེམས་ཤུགས་བསྐྱེད་པ་ཡིན། འཛམ་གླིང་ནང་མཚོན་ཆ་དང་དབང་ཤུགས་ཀྱི་ཐོག་ནས་མགོ་ཁྲིད་བྱེད་མཁན་ཡོད་ཀྱང་། ༸རྒྱལ་བ་རིན་པོ་ཆེ་མགོ་ཁྲིད་ཅེས་པ་དད་པ་དང་མོས་པའི་ཐོག་ནས་མགོ་ཁྲིད་པ་ཞིག་རེད། ངོས་ཀྱིས་མེ་མདའ་དང་གྲི་འཁྱེར་ནས་མགོ་ཁྲིད་ཀྱི་ཡོད་པ་མ་རེད། ང་ཚོའི་དམིགས་ཡུལ་ནི་མི་མང་པོ་ཞིག་ལ་ཕན་ཐོགས་པའི་ལས་ཀ་བྱེད་བཞིན་ཡོད་པ་རེད། རྒྱ་གར་གཙོས་ཡུལ་གྲུ་མང་པོའི་ནང་ཏཱ་ལའི་བླ་མ་ཞེས་མིང་ཐོས་ནས་དགའ་མོས་ཧ་ཅང་མང་པོ་རེད། ངོས་ཀྱིས་བསྟན་པ་དང་འགྲོ་བའི་ཆེད་དུ་འགན་ཧུར་ཐག་འབད་ཐག་བྱེད་བཞིན་ཡོད། ཁྱེད་ཚོས་ཀྱང་ཧུར་ཐག་འབད་ཐག་གནང་ཤོག ངོས་ཀྱི་མི་ཚེ་ལོ་བརྒྱ་དང་སུམ་ཅུ་ལྷག་སྡོད་པའི་བསམ་པ་ཡོད་ལ། ངོས་ཀྱིས་དེ་ལྟར་བཤད་བཞིན་ཡོད། ངོས་རང་ལ་མོས་པ་བྱེད་མཁན་ནང་པ་ཙམ་མིན་པར་མང་པོ་ཡོད། ངོས་ཀྱི་ལུས་སེམས་འདིའི་ཐོག་ནས་འདོད་པ་སྐོང་བ་དང་ཡིད་ཚིམས་ཆེད་དུ། ཞོགས་པ་ཡར་ལངས་པ་ནས་བཟུང་སེམས་བསྐྱེད་ཀྱི་བསམ་བློ་གཏོང་བཞིན་ཡོད། ངོས་ཀྱིས་བསམ་དོན་ཆོས་བཞིན་འགྲུབ་པའི་སྨོན་ལམ་རྒྱག་བཞིན་ཡོད། ཁྱེད་ཚོས་ཀྱང་སྨོན་ལམ་མཚམས་སྦྱོར་གནང་ཤོག ཅེས་གསུངས།

དགའ་ལྡན་ཕོ་བྲང་གི་དྲ་རྒྱའི་སྟེང་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཤར་ཨེ་ཤི་ཡའི་ནང་པའི་རྒྱལ་ཁབ་ཁག་དང་ཀོ་རི་ཡའི་ནང་པ་རྣམས་ཀྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་ ༡༠ ཚེས་ ༣ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར། ༸གོང་ས་རྒྱལ་བ་རིན་པོ་ཆེ་མཆོག་ནས་ཆོས་འབྲེལ་བཀའ་དྲིན་སྩལ་རྒྱུ། ཕྱི་ཟླ་ ༡༠ ཚེས་ ༨ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ཨོ་སི་ཊི་ལི་ཡ་རྒྱལ་ཡོངས་བོད་རིགས་སྤྱི་མཐུན་ཚོགས་པ་དང་། ཡུ་རོབ་བོད་རིགས་ཚོགས་པ། བོད་ཀྱི་གཞོན་ནུ་ལྷན་ཚོགས་བཅས་ཀྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། དེ་བཞིན་ཕྱི་ཟླ་བ་ ༡༡ ཚེས་ ༡༧ ཉིན་༸གོང་ས་རྒྱལ་བ་རིན་པོ་ཆེ་མཆོག་ཐེག་ཆེན་ཆོས་གླིང་གཙུག་ལག་ཁང་དུ། དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་གྱི་གཏན་སློབ་(CST)ཁག་བདུན་གྱི་སློབ་མ་ཟུར་པ་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་བཅས་ནས་འཚོག་གཏན་འཁེལ་བའི་བཀའ་དྲིན་རྗེས་དྲན་གྱི་མཛད་སྒོར་ཆིབས་བསྒྱུར་བསྐྱང་རྒྱུ་ཡིན་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།