རྒྱ་གར་གྱི་སྲིད་འཛིན་གཞོན་པ་གསར་པར་འཚམས་འདྲི་མཛད། 

༧གོང་ས་རྒྱལ་བ་རིན་པོ་ཆེ་མཆོག་གིས་གསར་དུ་འདེམས་ཐོན་བྱུང་བའི་རྒྱ་གར་སྲིད་འཛིན་གཞོན་པ་གསར་པ་སྐུ་ཞབས་རཱ་དྷ་རི་ཤི་ནན་མཆོག་ལ་འཚམས་འདྲི་མཛད། 

དེ་རིང་བཞུགས་སྒར་རྒྱལ་བའི་ཕོ་བྲང་ནས་༧གོང་ས་རྒྱལ་བ་རིན་པོ་ཆེ་མཆོག་གིས། སྐུ་ཞབས་རཱ་དྷ་རི་ཤི་ནན་(C. P. Radhakrishnan)མཆོག་གི་མཚན་ཐོག་ཏུ་གསུང་འཕྲིན་ཞིག་སྩལ་ཏེ། ཁོང་ཉིད་རྒྱ་གར་སྲིད་འཛིན་གཞོན་པར་བསྐོ་གཞག་བྱུང་བར་འཚམས་འདྲི་མཛད་པ་དང་སྦྲགས། ཁོང་གི་མི་མང་གི་དོན་དུ་ལས་དོན་ལམ་ལྷོང་དང་བྱ་བ་ལམ་འགྲོ་ཡོང་བའི་སྨོན་འདུན་ཞུས་འདུག 

༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ཁྲོད། ཕྱི་ལོ་ ༡༩༥༩ ལོར་ངོས་རང་བཙན་གྱིས་རྒྱ་གར་ལ་བཙན་བྱོལ་དུ་ཡོང་རྗེས། ངོས་དང་ངོས་ཀྱི་རྗེས་འབྲངས་བོད་མི་རྣམས་ཀྱིས་རྒྱ་གར་གྱི་མཐུན་རྐྱེན་སྦྱོར་སྤྲོད་བྱས་པར་མྱོང་རོལ་བྱེད་ཀྱི་ཡོད་པས། དེ་ནི་བཀའ་དྲིན་ཧ་ཅང་ཆེན་པོ་ཡིན། ངོས་རང་རྒྱ་གར་གཞུང་གི་ཆེས་རྒྱུན་རིང་ཤོས་ཀྱི་མགྲོན་པོ་ཞིག་ཡིན་སྟབས། རྒྱ་གར་རྒྱལ་ཡོངས་སུ་འགྲོ་སྐྱོད་སྐབས། སྤྱི་ཚོགས་འདྲ་མིན་གྱི་མི་སྣ་ཐུག་འཕྲད་བྱ་རྒྱུའི་གོ་སྐབས་བྱུང་། ཞེས་དང་། འདས་པའི་མི་ལོ་སྟོང་ཕྲག་ལྷག་ནས་རྒྱ་གར་ལ་བྱམས་དང་སྙིང་རྗེའི་རྣམ་གཞག་ཁྱད་པར་བ་ཞིག་ཡོད་ལ། དེང་སྐབས་འཛམ་གླིང་སྤྱི་ཡོངས་སུ་རྣམ་གཞག་དེ་དག་དར་ཁྱབ་ཇེ་ཆེར་འགྲོ་མུས་ཡིན་པའི་ཁར། དེར་མི་སྒེར་བར་དང་འཛམ་གླིང་ཁྱོན་ཡོངས་སུ་ཞི་བདེ་དར་སྤེལ་གཏོང་བའི་ནུས་མཐུ་ལྡན། ལྷག་པར་རྒྱ་གར་ནི་ཚོགས་སྡེ་སྣ་མང་ལྷན་སྡོད་བྱས་ཏེ་ཆོས་ལུགས་མཐུན་འབྲེལ་ལྡན་པའི་གཞིས་ཁྱིམ་ཞིག་ཡིན།  ཞེས་གསུངས་འདུག 

ཡང་༸མགོན་པོ་གང་ཉིད་ཀྱིས།  རྒྱ་གར་གྱི་གནའ་བོའི་ལྟ་གྲུབ་ཀྱི་ཆ་ཤས་སུ་གྱུར་བའི་བོད་བརྒྱུད་ནང་བསྟན་གྱི་སློབ་གཉེར་གྱིས། ངོས་ཀྱི་བསམ་བློ་གཏོང་ཕྱོགས་ལ་ཤུགས་རྐྱེན་ཐེབས་ཡོད་སྟབས། ངོས་རང་གིས་རྒྱུན་དུ་ངོས་རང་རྒྱ་གར་གྱི་བུ་ཞིག་ཏུ་ངོས་འཛིན་བྱེད་ཀྱི་ཡོད་ལ། བོད་ཀྱི་ནང་པའི་རིག་གནས་ནི་ནཱ་ལེནྡྲའི་གཙུག་ལག་སློབ་གྲྭ་ཆེན་མོའི་མཁས་གྲུབ་རྣམས་ཀྱིས་གསར་གཏོད་མཛད་པའི་རིགས་པ་དང་དཔྱད་ཞིབ་ཀྱི་སྲོལ་རྒྱུན་ལ་རྨང་བརྟན་པོར་བཙུགས་ཡོད། ཅེས་གསུངས་པ་དང་སྦྲགས། སྲིད་འཛིན་གཞོན་པ་ཁོང་གི་ལས་དོན་རྣམས་ལམ་ལྷོང་དང་མི་མང་གི་རེ་འབོད་བསྐོང་ཐུབ་པའི་སྨོན་ལམ་བཏབ་འདུག 

སྐུ་ཞབས་རཱ་དྷ་རི་ཤི་ནན་མཆོག་ནི་ཕྱི་ལོ་ ༡༩༥༧ ལོར་རྒྱ་གར་ལྷོ་རྒྱུད་ཀྱི་ཊ་མིན་ན་ཌུར་སྐྱེས། ཁོང་གིས་ཚོང་དོན་རིག་པའི་ཐོག་རིག་གནས་རབ་འབྱམས་པའི་ལག་ཁྱེར་བླངས། ཕྱི་ལོ་ ༡༩༧༤ ལོར་མངའ་སྡེ་གཞུང་གི་འགན་འཛིན་ལྷན་ཚོགས་སུ་བདམས། ཕྱི་ལོ་ ༡༩༨༠ ལོར་བྷི་ཇེ་བྷི་ཆབ་སྲིད་ཚོགས་པར་ཞུགས། ཕྱི་ལོ་ ༡༩༩༨ རྒྱ་གར་གྱི་གྲོས་ཚོགས་འོག་མའི་འཐུས་མིར་བདམས། རྒྱ་གར་གཞུང་གི་སྐུ་ཚབ་ཚོགས་ཆུང་གི་འཐུས་མི་བྱས་ཏེ་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་འགར་ཞུགས། ཕྱི་ལོ་ ༢༠༠༤ ནས་ ༢༠༠༦ བར་མངའ་སྡེ་སྲིད་གཞུང་གི་བྷི་ཇེ་པེ་ཆབ་སྲིད་ཚོགས་པའི་ཚོགས་གཙོ་གནང་བ་སོགས། ཕྱི་ལོ་ ༢༠༢༣ ལོར་སྲིད་བློན་མུ་དྷི་མཆོག་གིས་ཇར་ཀན་མངའ་སྡེ་དང་། ཕྱི་ལོ་ ༢༠༢༤ ལོར་མ་ཧ་རི་ཤི་ཊ་མངའ་སྡེའི་གཞུང་འཛིན་པར་བསྐོས།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།