སྲིད་སྐྱོང་སྤེན་པ་ཚེ་རིང་མཆོག་གིས་མང་གཙོའི་ལུང་པའི་ནང་མི་སྒེར་གྱི་བསམ་ཚུལ་བརྗོད་པའི་རང་དབང་ཡོད་པ་བཞིན་མི་སྒེར་གྱི་བསམ་ཚུལ་ལ་བཀའ་ཤག་དང་གཏན་འཇགས་ཐབས་ཇུས་ཚོགས་ཆུང་ནས་འགན་འཁུར་དགོས་ཀྱི་མེད་སྐོར་གསུངས་སོང་།
དེ་རིང་ཕྱི་ཚེས་ ༡༣ ཉིན་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་བཞི་པའི་སྟེང་། གཏན་འཇགས་ཐབས་ཇུས་ཚོགས་ཆུང་དང་འབྲེལ་ནས་སྐར་རྟགས་ཅན་གྱི་དྲི་བ་ཨང་ ༢ པའི་ཐོག་དྲི་བ་དྲིས་ལན་གནང་ཡོད་ཅིང་། སྐབས་དེར་སྤྱི་འཐུས་ཟླ་བ་ཚེ་རིང་ལགས་ཀྱིས་དེ་འབྲེལ་འཕྲོས་དོན་དྲི་བ་དྲིས་སོང་།
དེ་འབྲེལ་སྤྱི་འཐུས་ཟླ་བ་ཚེ་རིང་ལགས་ཀྱིས་སྐར་རྟགས་ཅན་གྱི་དྲི་བ་གཉིས་པ་དང་འབྲེལ་ནས་འཕྲོས་དོན་དྲི་བ་དྲིས་པར་སྲིད་སྐྱོང་སྤེན་པ་ཚེ་རིང་མཆོག་གིས་ལན་འདེབས་གནང་བ་ལྟར་ན། བོད་རྒྱ་གྲོས་མོལ་སྐུ་ཚབ་ཚོགས་ཆུང་གི་ཚོགས་མི་དང་གཏན་འཇགས་ཐབས་ཇུས་ཚོགས་ཆུང་གི་ཚོགས་མི་འབའ་བ་སྐལ་བཟང་རྒྱལ་མཚན་ལགས། མགྲོན་འབོད་ཞུས་པ་ལྟར་སྒེར་ངོས་ནས་ཕེབས་ཏེ། མང་གཙོའི་ལུང་པ་ཚང་མའི་ནང་སྒེར་གྱི་དགོངས་ཚུལ་གསུང་བའི་རང་དབང་ཡོད་པ་དང་། དེ་ལ་བརྟེན་ནས། ཁོང་གིས་གསུངས་པའི་བཀའ་མོལ་ལ་བཀའ་ཤག་ངོས་ནས་བསམ་ཚུལ་གང་ཡང་ཞུ་རྒྱུ་མེད་ཅིང་། ལྷག་པར་དུ། ཁོང་སྒེར་གྱིས་གསུངས་པའི་བཀའ་མོལ་ལ་བཀའ་ཤག་དང་གཏན་འཇགས་ཐབས་ཇུས་ཚོགས་ཆུང་གིས་འགན་འཁུར་དགོས་པའི་གནད་འགོག་མཐོང་མེད་སྐོར་གསལ་འདུག
མང་ཚོགས་ལ་གསུངས་པ་ནང་བཞིན་གཏན་འཇགས་ཐབས་ཇུས་ཚོགས་ཆུང་ནང་ལ་ལམ་སྟོན་དེ་འདྲ་གནང་ཡོད་མེད་དང་འབྲེལ་ནས་སྲིད་སྐྱོང་སྤེན་པ་ཚེ་རིང་མཆོག་གིས། ལམ་སྟོན་དེ་འདྲ་རྩ་བ་ནས་མེད་པས། མི་སྒེར་གྱི་དགོངས་ཚུལ་རེད། འོན་ཀྱང་། གཏན་འཇགས་ཐབས་ཇུས་ཚོགས་ཆུང་ནང་ཁོང་སྒེར་གྱི་དགོངས་ཚུལ་ཡོད། འདིར་ང་ཚོར་གཏན་འཇགས་ཐབས་ཇུས་ཚོགས་ཆུང་གི་སློབ་སྟོན་པའི་ངོ་བོའི་ཐོག་ནས་འབྲེལ་བ་བཏགས་ཡོང་གི་ཡོད་པ་རེད། སློབ་སྟོན་པའི་ནང་ལ་བསམ་ཚུལ་འདྲ་མིན་ཡོང་ཆོག་གི་རེད། ང་ཚོ་ཚོགས་ཆུང་འཚོག་སྐབས་ཚང་མས་ངས་ལབ་ཚད་འགྲིག་གི་འདུག་གསུང་མཁན་རྐྱང་རྐྱང་ཡིན་ན། ཚོགས་ཆུང་དགོས་ཀྱི་མི་འདུག་པཱ། མི་གཅིག་གིས་ཐག་བཅད་པ་ཡིན་ནའང་འགྲིག་གི་རེད་བཱ། བསམ་ཚུལ་མི་འདྲ་བ་ཡོང་གི་ཡོད་པ་རེད། ཡིན་ནའང་ག་རེར་བདག་པོ་རྒྱག་དགོས་ཀྱི་འདུག་དང་མི་འདུག ཐག་ག་རེ་གཅོད་དགོས་ཀྱི་ཡོད་པ་དེ་དག་འགན་ཡོད་མཁན་གྱིས་ཐག་གཅོད་ཀྱི་ཡོད་པ་རེད། འདི་བརྒྱུད་རིམ་ཞིག་གིས་ཐག་གཅོད་ཀྱི་ཡོད་པ་མ་གཏོགས་གང་ཟག་ལ་ཐག་གཅོད་རྒྱུའི་དབང་ཚད་མེད་པ་རེད། སྤྱི་ཚོགས་ནང་ལ་བོད་མིའི་སྒྲིག་འཛུགས་ཀྱི་སློབ་སྟོན་པའི་འགན་འཁུར་ནས་སྒེར་གྱི་བསམ་ཚུལ་བཤད་ཆོག་མིན་བཤད་ཚེ། སྒེར་གྱི་བསམ་ཚུལ་བཤད་ཆོག་གི་རེད། མང་གཙོ་རེད། བཤད་ཆོག་གི་རེད། ཚོགས་འདུ་སོགས་ཀྱི་སྔོན་ནས་བཤད་དུས་ནས་བཟུང་སྤྱི་བའི་འགན་ཞིག་ཡོད་པ་རེད། འདི་ངའི་སྒེར་གྱི་བསམ་ཚུལ་ཡོད་ཟེར་ནས་ཕལ་ཆེར་གསུངས་ཡོད་ཀྱི་རེད། ང་སྤྱིར་བཏང་གིས་ཚང་མ་ཉན་རྒྱུའི་དུས་ཚོད་རག་གི་མི་འདུག དེར་བརྟེན་ང་ཚོས་ངོས་འཛིན་ཞུ་སྟངས་དེ་འདྲ་ཡིན། ཞེས་བཀའ་ལན་གནང་སོང་།
རྒྱ་ནག་གི་མཁྲེགས་འཛིན་སྲིད་ཇུས་ཀྱི་འོག་བོད་མིའི་སྒྲིག་འཛུགས་ནས་རྒྱ་ནག་དང་ལྷན་དུ་འབྲེལ་མོལ་འདོར་དགོས་མིན་སྐོར་ལ་སྲིད་སྐྱོང་མཆོག་གིས། ངས་གྲོས་ཚོགས་ནང་དུ་ཐེངས་མང་ཞུས་ཡོད། ད་ལྟ་ང་ཚོར་སྒོ་རྒྱབ་ཀྱི་འབྲེལ་བ་ཞིག་འགྲོ་ཡི་ཡོད་ཀྱང་རེ་བ་ཆེན་པོ་མེད་ཅེས་ཞུས་དང་ཞུ་མུས་ཡིན། ཞེས་དང་། བོད་མིའི་སྒྲིག་འཛུགས་ཀྱི་ངོས་ནས་རྒྱ་ནག་དང་ལྷན་དུ་འབྲེལ་བ་མུ་མཐུད་ནས་འཇོག་དགོས་པ་དེ་གནད་འགག་ཆེན་པོ་ཡིན་པ་དང་། མ་འོངས་པར་གོ་སྐབས་ག་དུས་ཡོང་གྲབས་ཡོད་མེད་གཏན་འཁེལ་མེད་སྟབས། ད་ལྟ་བར་དུ་འབྲེལ་བ་བཞག་པ་དང་། ད་ལྟའི་རྒྱ་ནག་གི་སྲིད་གཞུང་མཉམ་དུ་རེ་བ་དོར་དགོས་ཀྱི་རེད་ཟེར་བ་ནི་བོད་མིའི་སྒྲིག་འཛུགས་ཀྱི་ལངས་ཕྱོགས་མིན་པ་དང་། གལ་སྲིད་རེ་བ་འདོར་དགོས་ཀྱི་ཡོད་ན་རྒྱ་ནག་དང་ལྷན་དུ་འབྲེལ་བ་བྱ་རྒྱུ་སོགས་ཆ་ཚང་མཚམས་འཇོག་རྒྱུ་ལས་མེད་སྐོར་སོགས་གསུངས་སོང་།
སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འཇགས་ཐབས་ཇུས་ཚོགས་ཆུང་དང་འབྲེལ་ནས་སྐར་རྟགས་ཅན་གྱི་དྲི་བ་ཨང་ ༢ པའི་ཁྲོད་དྲི་བ་བཞི་ཡོད་པ་ནི། གོང་གསལ་གསུང་བཤད་དེར་བཀའ་ཤག་ནས་ཐུགས་སྣང་བྱུང་ཡོད་དང་མེད། གལ་ཏེ་བྱུང་ཡོད་ཚེ་དགོངས་ཚུལ་ཇི་ཡོད་དང་། སློབ་སྟོན་པས་གོང་དུ་གསུངས་པའི་གནད་དོན་དེ་དག་གཏན་འཇགས་ཐབས་བྱུས་ཚོགས་འདུའི་སྐབས་ལམ་སྟོན་གནང་བ་བྱུང་ཡོད་དང་མེད། བཀའ་ཤག་དང་ཚོགས་ཆུང་གི་སློབ་སྟོན་པས་གསུངས་པའི་དབུ་མའི་ལམ་གྱི་སྲིད་བྱུས་ཟིན་དགོས་པའི་རྒྱུ་མཚན་དག་གཅིག་འགྱུར་ཡིན་ནམ། ཡང་ན་ཐ་དད་ཡིན་མིན་གསལ་བཤད་ཡོང་བ། སློབ་སྟོན་པས་གསུངས་མོལ་དེས་མང་ཚོགས་མགོ་བོ་རྨོངས་གཞིར་མི་འགྱུར་རམ་ཞེས་བཀའ་འདྲི་ཞུས་ཡོད་འདུག
སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་གྲོས་ཚོགས་ཚོགས་དུས་ ༡༠ པའི་སྐར་རྟགས་ཅན་གྱི་དྲི་བ་ཨང་ ༢ པའི་ལན། གཏན་འཇགས་ཐབས་བྱུས་ཚོགས་ཆུང་གི་སློབ་སྟོན་པ་ཞིག་ནས་བོད་ཀྱི་མ་འོངས་མདུན་ལམ་འཚོལ་ཞིབ་ཅེས་པ་གཅིག་ལ་གསུང་བཤད་གནང་བའི་ནང་། “ད་ལྟ་རྒྱ་ནག་དམར་པོའི་སྲིད་གཞུང་མཁྲེགས་འཛིན་ཅན་དེའི་མཉམ་དུ་མིང་དང་དོན་མཚུངས་པའི་འབྲེལ་བ་ཞིག་དང་ཞི་མོལ་ཞིག་དང་ཞི་འགྲིགས་ཤིག་ཡོང་ཡས་གི་རེ་བ་རྩ་བ་ནས་མི་འདུག་བསམ་གྱི་འདུག ང་ཚོའི་ཕྱོགས་ནས་ད་ལྟའི་སྲིད་གཞུང་དེའི་མཉམ་དུ་གནད་དོན་དེ་འདྲ་ཞིག་ཡོང་རྒྱུ་ལ་རེ་བ་དེ་དོར་དགོས་ཀྱི་འདུག་”ཅེས་དང་། ཡང་ཁོང་གིས་ “དབུ་མའི་ལམ་གྱི་སྲིད་བྱུས་གཞི་བཞག་སའི་གནས་བབ་དེ་རྒྱ་ནག་གུང་གྲན་ཏང་གི་སྲིད་གཞུང་དེའི་དབང་སྒྱུར་དེ་མུ་མཐུད་དེ་གནས་ཀྱི་ཡོད་པ་ལ་གཞི་བཞག་ནས་དབུ་མའི་ལམ་གྱི་སྲིད་བྱུས་དེ་ཟིན་པ་རེད། གནས་བབ་གཞན་གྱི་ཐོག་ལ་ང་ཚོར་སྲིད་བྱུས་གང་ཡང་ཡོད་མ་རེད། གྲ་སྒྲིག་གང་ཡང་ཡོད་མ་རེད། དངོས་ཡོད་གནས་ཚུལ་ཐོག་ལ་བལྟས་པ་ཡིན་ན་རྒྱ་ནག་ནང་ལ་ཡིན་པ་ཡིན་ན་ཡང་འགྱུར་བ་འགྲོ་བཞིན་པ་དང་འགྲོ་སྲིད་པ་ཡིན་པ་དེ་གསལ་པོ་རེད། ང་ཚོ་ལ་གྲ་སྒྲིག་དང་འཆར་གཞི་གང་ཡང་མེད་པ་འདྲ་པོ་མཐོང་གི་འདུག” ཅེས་སོགས། ཞི་འགྲིག་གི་རྨང་གཞིའི་ཆོད་སེམས་དང་། དབུ་མའི་ལམ་གྱི་སྲིད་བྱུས་འཛིན་དགོས་དོན། མ་འོངས་བོད་ཀྱི་འཐབ་རྩོད་ཀྱི་གྲ་སྒྲིག་བཅས་ཀྱི་ཐད། ༸རྒྱལ་བའི་ལམ་སྟོན་དང་། བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས་དང་མི་འདྲ་བའི་འགྲེལ་བཤད་ཐད།
སྲིད་སྐྱོང་ལ་བཏང་མཁན་བྱུང་ཡང་སྒེར་གྱི་དགོངས་ཚུལ་ཡིན་ཙང་བསམ་ཚུལ་གང་ཡང་མ་བྱུང་བ་དང་། དོ་བདག་སྒེར་གྱིས་མཉམ་ཞུགས་གནང་བར་ལམ་སྟོན་ཡང་ཞུ་དགོས་དོན་མེད། དེ་བཞིན་བཀའ་ཤག་གིས་དབུ་མའི་ལམ་གྱི་སྲིད་ཇུས་འཛིན་དགོས་པའི་རྒྱུ་མཚན་རྣམས་ད་བར་ཡོངས་གྲགས་ཐོག་ཡིག་ངག་གཉིས་ནས་གསལ་བཤད་བྱས་ཟིན་པ་ཡིན་ཞིང་། བཀའ་ཤག་གི་ལངས་ཕྱོགས་དང་མ་མཐུན་པའི་རིགས་དྲི་བ་ནང་ནས་ཁ་གསལ་ཡིན་པ་མོས་མཐུན་མེད་ཅེས་དང་། མང་ཚོགས་ཀྱིས་བཀའ་ཤག་གི་གང་བཤད་པ་དེ་དག་ལའང་ཐུགས་སྣང་གནང་ན་མགོ་བོ་རྨོངས་མི་དགོས་པའི་གནས་སྟངས་ཡིན་པ་བཅས་འཁོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
