༧གོང་ས་རྒྱལ་བ་རིན་པོ་ཆེ་མཆོག་ནས་བལ་ཡུལ་གྱི་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་ཞིབ་པ་ཟུར་པ་སུ་ཤཱི་ལ་ཀཱར་ཀི་ལགས་བལ་ཡུལ་གྱི་བར་བརྒལ་སྲིད་བློན་དུ་འོས་འདེམས་བྱུང་བར་འཚམས་འདྲི་མཛད།
ཟླ་འདིའི་ཕྱི་ཚེས་ ༡༢ ཉིན་བལ་ཡུལ་གྱི་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་ཞིབ་པ་ཟུར་པ་སུ་ཤཱི་ལ་ཀཱར་ཀི་(Sushila Karki) ལགས་བལ་ཡུལ་གྱི་བར་བརྒལ་སྲིད་བློན་དུ་འོས་འདེམས་བྱུང་ཡོད་པ་ལྟར། དེ་རིང་ཕྱི་ཚེས་ ༡༣ ཉིན་ ༸གོང་ས་རྒྱལ་བ་རིན་པོ་ཆེ་མཆོག་ནས་ཁོང་མོའི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་སྩལ་ཏེ། ཁོང་མོ་བལ་ཡུལ་གྱི་སྲིད་བློན་དུ་བསྐོ་གཞག་བྱུང་བར་འཚམས་འདྲི་མཛད་པ་དང་སྦྲགས། ཁོང་མོས་བལ་ཡུལ་མི་མང་གི་རེ་འདུན་དོན་འགྲུབ་ཡོང་བའི་སྨོན་འདུན་ཞུས་འདུག
༸གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་། ཁྱེད་ཀྱིས་མཁྱེན་གསལ་ལྟར་ལོ་རྒྱུས་ཐོག་བལ་བོད་གཉིས་ཀྱི་མི་མང་རྣམས་ལ་འབྲེལ་ལམ་དམ་ཟབ་ཡོད། ཕྱི་ལོ་ ༡༩༥༩ ལོ་ནས་བཟུང་བོད་པ་རྣམས་བཙན་བྱོལ་དུ་གྱར་དགོས་བྱས་རྗེས། བལ་ཡུལ་གཞུང་དང་མི་མང་གིས་བོད་མི་སྐྱབས་བཅོལ་བའི་སྡོད་གནས་ཆེད་མཐུན་སྦྱོར་གནང་བར་ངོས་ཀྱིས་བཀའ་དྲིན་ཤིན་ཏུ་ཆེ་ཞུ་རྒྱུ་ཡིན། བལ་ཡུལ་ནང་གནས་སྡོད་བོད་མི་ཉུང་ཉུང་ཞིག་ལས་མེད་ཀྱང་། ངོས་ཀྱིས་བལ་ཡུལ་གྱི་དཔལ་འབྱོར་འཕེལ་རྒྱས་ཐད་ཕན་གྲོགས་ཡོང་གི་ཡོད་པའི་ཡིད་ཆེས་བྱེད་ཀྱི་ཡོད། ལོ་མང་པོའི་རིང་བལ་ཡུལ་ནང་འཚོ་གནས་ཀྱི་ཐོག་ཏུ་ཡར་རྒྱས་དང་གོང་འཕེལ་ཆེན་པོ་བྱུང་ཡོད་ལ། འཚོ་བའི་ཐོག་ཏུ་དཀའ་ངལ་ཡོད་པའི་དབུལ་ཕོངས་དང་དགོས་མཁོ་ཅན་རྣམས་ཡར་རྒྱས་འགྲོ་ཐུབ་ཚེ་དོན་དང་མཐུན་པའི་གྲུབ་འབྲས་ཤིག་རེད།
གསུང་འཕྲིན་གྱི་མཇུག་ཏུ་༸མགོན་པོ་གང་ཉིད་མཆོག་ནས། བལ་ཡུལ་སྲིད་བློན་གསར་བས་གཉན་འཕྲང་གི་དུས་སྐབས་འདིར་བལ་ཡུལ་མི་མང་གི་རེ་བ་དང་མངོན་འདུན་མཐའ་དག་ལེགས་འགྲུབ་ཡོང་བའི་ཐུགས་རེ་གནང་འདུག
ཤཱི་ལ་ཀཱར་ཀི་ལགས་ནི་ཕྱི་ལོ་ ༡༩༥༢ ལོའི་ཟླ་ ༦ ཚེས་ ༧ ཉིན་བལ་ཡུལ་ཤཱིན་ཀཱར་པུར་ (Shankarpu) ཏུ་སྐྱེས་ཤིང་། ཕྱི་ལོ་ ༡༩༧༢ ལོར་ཌི་རི་བྷུ་ཝན་གཙུག་ལག་སློབ་གཉེར་ཁང་(Tribhuvan University) ནས་ཉེ་བའི་གཙུག་ལག་རབ་འབྱམས་པའི་སློབ་གཉེར་བྱས། ཕྱི་ལོ་ ༡༩༧༥ ལོར་རྒྱ་གར་བྷ་ན་ར་སི་ཧིན་དྷུ་གཙུག་ལག་སློབ་གཉེར་ཁང་ནས་ཆབ་སྲིད་ཚན་རིག་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༧༨ ལོར་ཌི་རི་བྷུ་ཝན་གཙུག་ལག་སློབ་གཉེར་ཁང་ནས་ཁྲིམས་ལུགས་རིག་པའི་སློབ་གཉེར་བྱས། ཕྱི་ལོ་ ༡༩༩༠ ལོའི་མི་མང་ལས་འགུལ་ཁྲོད་མཉམ་ཞུགས་བྱས་རྐྱེན་བཙོན་ཁང་དུ་བཅུག་པ་དང་། རྗེས་སུ་ཁོང་མོས་ཀཱ་རཱ་ཞེས་པའི་བརྩམས་སྒྲུང་ཞིག་བྲིས། ཕྱི་ལོ་ ༢༠༠༩ ནས་བཟུང་བལ་ཡུལ་གྱི་ཆེས་མཐོའི་ཁྲིམས་ཁང་གི་ཁྲིམས་དཔོན་དུ་བསྐོ་གཞག་གནང་། ཕྱི་ལོ་ ༢༠༡༦ ནས་ ༢༠༡༧ བར་བལ་ཡུལ་གྱི་ཆེས་མཐོའི་ཁྲིམས་ཁང་གི་སྤྱི་ཁྱབ་ཁྲིམས་དཔོན་དུ་བསྐོ་བཞག་གནང་། ཉེ་སྔོན་བལ་ཡུལ་ནང་གཞོན་སྐྱེས་རྣམས་ཀྱིས་བལ་ཡུལ་ནང་གི་ལྐོག་ཟ་རུལ་སུངས་ལ་ངོ་རྒོལ་བྱས་རྐྱེན། སྲིད་བློན་ཤར་མ་ཨོ་ལིས་དགོངས་པ་ཞུས་ཡོད་པ་དང་། ཁ་སང་ཤཱི་ལ་ཀཱར་ཀི་ལགས་བལ་ཡུལ་གྱི་བར་བརྒལ་སྲིད་བློན་དུ་བསྐོ་བཞག་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
