དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་ལས་ཉིན་ལྔ་བའི་སྟེང་སྐར་རྟགས་ཅན་གྱི་དྲི་བ་དང་འབྲེལ་ནས་བོད་རྒྱ་འབྲེལ་མོལ་དང་གཏན་འཇགས་ཐབས་བྱུས་ཚོགས་ཆུང་། སྒོ་རྒྱབ་ཀྱི་འབྲེལ་མོལ་སོགས་ཀྱི་གནས་སྟངས་སྐོར་ལ་གླེང་སློང་གནང་སོང་།
དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་ལྔ་བའི་ཐོག བོད་མི་མང་སྤྱི་འཐུས་བསྟན་འཛིན་འཇིགས་བྲལ་ལགས་ཀྱིས་སྐར་རྟགས་ཅན་གྱི་དྲི་བ་ཨང་ ༣ པའི་ནང་། བོད་མིའི་སྒྲིག་འཛུགས་ཀྱི་འགན་འཁྲི་གཙོ་བོ་ཞིག་ནི་བོད་རྒྱའི་དཀའ་རྙོག་སེལ་ཐབས་དེ་ཡིན་པར་དེའི་ཐོག་ལོ་མང་ཐབས་བྱུས་སྣ་མང་གནང་ཡོད། དཔེར་ན་ ༢༠༢༤ ལོར་བཀའ་ཤག་སྐབས་ ༡༦ པའི་སྲིད་སྐྱོང་གི་འགན་འཁྲིས་ཨ་རིའི་གྲོས་ཚོགས་སུ་བོད་དོན་ཁྲིམས་འཆར་ Resolve Tibet Act གཏན་འབེབས་གནང་ཡོད། དེའི་ནང་དོན་དུ་ལོ་རྒྱུས་ཐོག་བོད་རྒྱ་ནག་གི་ཆ་ཤས་ནམ་ཡང་མིན་པ་མ་ཟད་བོད་ཅེས་པ་ནི་ཆོལ་ཁ་གསུམ་ཡིན་པར་བསྐྱར་ནན་འཁོད་ཡོད་པ་དེར་བོད་རྒྱལ་ཁབ་གཙོ་བོ་གཞིར་བཞག་གི་ལས་དོན་གལ་ཆེན་ཞིག་ཆགས་ཡོད། དེ་ཙམ་མ་ཡིན་པའི་ ༢༠༠༢ ནས་འགོ་འཛུགས་ཀྱིས་བོད་རྒྱའི་དཀའ་རྙོག་སེལ་ཐབས་ཆེད་ད་བར་བོད་རྒྱ་འབྲེལ་མོལ་ཐེངས་དགུ་གནང་ཡོད། འོན་ཀྱང་ ༢༠༡༠ ནས་ད་བར་རྒྱ་ནག་གཞུང་གིས་ཟོལ་མེད་ཀྱི་ཁ་ཡ་མ་བྱས་པར་འབྲེལ་མོལ་སླར་གསོ་མེད་པར་ལོ་ ༡༥ ཕྱིན་ཡོད་ན་ཞེས་དང་། སྐར་རྟགས་ཅན་གྱི་དྲི་བའི་ཁྲོད། བཀའ་ཤག་ངོས་ནས་དེ་ལ་བསམ་ཚུལ་དང་གཟིགས་ཚུལ་གང་ཡོད་དམ་དང་། བཀའ་ཤག་སྐབས་ ༡༦ པའི་དུས་ཡུན་རྫོགས་ལ་ཉེ་བ་ཡིན་པར་བོད་རྒྱ་འབྲེལ་མོལ་ཐབས་བྱུས་ཚོགས་ཆུང་གི་ལས་དོན་གྱི་གནས་བབས་ད་ལྟ་ག་པར་ལ་སླེབས་ཡོད་དམ། རྒྱལ་སྤྱིའི་སྟེང་ཆབ་སྲིད་འཕོ་འགྱུར་རྐྱེན་པས་ད་ལམ་རྒྱལ་ཁབ་མང་པོས་རྒྱ་ནག་ལ་ལྟ་ཚུལ་དང་ཚོར་སྣང་སྔར་དང་མི་འདྲ་བའི་ཞན་པོ་ཆགས་ཡོད། དེ་ནི་རྒྱལ་སྤྱིའི་སྙན་གྲགས་ཅན་སྒྲིག་འཛུགས་ཀྱི་སྙན་ཐོ་ཁག་དང་། རྒྱལ་ཁབ་མཉམ་འབྲེལ་གྱིས་རྒྱ་ནག་ལ་གདོང་ལེན་ཆེད་འཛུགས་ཀྱི་ལས་གཞི་དང་སྒྲིག་འཛུགས་ཁག་ནས་མངོན་གསལ་མཚོན་ཐུབ། རྒྱལ་སྤྱིའི་ཆབ་སྲིད་འཕོ་འགྱུར་དུས་ཀྱི་འགྱུར་བ་གཞིར་བཞག་གི་ད་ཆ་བོད་མིའི་སྒྲིག་འཛུགས་ངོས་ནས་ཀྱང་བོད་རྒྱ་འབྲེལ་མོལ་དེ་ལ་འགྱུར་བཅོས་ཤིག་དགོས་པར་གཟིགས་ཀྱི་ཡོད་དམ་ཞེས་པ་བཅས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལན་འདེབས་ལྟར་ན། དྲི་བའི་ནང་བོད་དོན་ཁྲིམས་འཆར་ཞེས་འཁོད་པ་དེ་བོད་དོན་ཁྲིམས་ཡིག་ཡིན་དགོས། ད་ལྟའི་ཆར་རྒྱ་ནག་གི་འགོ་འཁྲིད་ཚོས་བོད་ཐོག་མཁྲེགས་འཛིན་གྱི་སྲིད་བྱུས་འཛིན་སྟངས་ལ་བལྟས་ན་རེ་བ་དེ་ཙམ་མ་མཐོང་ནའང་། སྒོ་རྒྱབ་ཀྱི་འབྲེལ་བ་འཇོག་བཞིན་ཡོད། མ་འོངས་རྒྱ་ནག་གི་འགོ་འཁྲིད་བསམ་ཤེས་ཅན་བྱུང་བའམ། རྒྱ་ནག་ནང་འགྱུར་བ་ཆེན་པོ་འགྲོ་བཞིན་པ་དང་། རྒྱལ་སྤྱིའི་ཆབ་སྲིད་འཁྲུག་པོའི་ཁྲོད་བོད་དོན་ཐབས་རྩོད་ལ་གོ་སྐབས་དང་གདོང་ལེན་ཇི་ཡོད་ཐབས་བྱུས་ལྡན་པའི་སྒོ་ནས་གོམ་པ་རྒྱབ་བཞིན་ཡོད་ཅེས་དང་། བོད་རྒྱ་འབྲེལ་མོལ་ཐབས་བྱུས་ཚོགས་ཆུང་དེ་གཏན་འཇགས་ཐབས་བྱུས་ཚོགས་ཆུང་ལ་བསྒྱུར་ཟིན་པ་ལྟར་གཏན་འཇགས་ཐབས་བྱུས་ཚོགས་ཆུང་ལ་གོ་དགོས་ན། ཚོགས་ཆུང་དེའི་ལས་དོན་དགོས་དམིགས་ལྟར་སྐབས་བསྟུན་ཞུ་སྒོ་ཁག་ཞུ་མུས་ཡིན། དེ་ལྷག་ལན་ཞུ་ཐབས་མ་མཆིས། དེ་བཞིན་བོད་རྒྱ་འབྲེལ་མོལ་དང་ཞི་མོལ་བརྒྱུད་བོད་རྒྱའི་དཀའ་རྙོག་གསལ་དགོས་ཀྱི་ཡོད་སྟབས། དྲི་བ་དང་པོའི་ལན་དུ་གསལ་བ་ལྟར་སྐབས་དུས་སོ་སོའི་གནས་སྟངས་ལ་བསྟུན་ནས་ཐབས་བྱུས་འགྱུར་བ་གཏོང་དགོས་པ་ཡོང་སྲིད་པ་བཅས་འཁོད་འདུག
སྐར་རྟགས་ཅན་གྱི་དྲི་བ་དང་འབྲེལ་ནས་སྤྱི་འཐུས་ཁག་ཅིག་གིས་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་དེར་ནུས་པ་ཡོད་མེད་དང་། བོད་རྒྱ་འབྲེལ་མོལ་གྱི་འགན་དེ་དགའ་ལྡན་ཕོ་བྲང་དང་བཀའ་ཤག་གཉིས་ཀྱི་ནང་ནས་གང་གིས་འཁུར་གྱི་ཡོད་མེད། བོད་རྒྱ་འབྲེལ་མོལ་གྱི་སྒོ་རྒྱབ་ཀྱི་འབྲེལ་བ་ག་འདྲ་ཡིན་མིན། བོད་རྒྱ་འབྲེལ་མོལ་དང་ཐབས་བྱུས་གཏན་འཇགས་ཚོགས་ཆུང་གཉིས་ལ་ཁྱད་པར་ཡོད་མེད་བཅས་ཀྱི་ཐོག་འཕྲོས་དོན་དྲི་བ་བཏོན་པར་སྲིད་སྐྱོང་མཆོག་ནས། བོད་རྒྱ་ཞི་མོལ་དངོས་སུ་བྱུང་བའི་སྐབས་སུ་གོམ་པ་གང་འདྲ་རྒྱག་དགོས་མིན་གྱི་གནས་སྟངས་ཤིག་ཆགས་ཡོང་གི་རེད། དེའི་བར་དུ། ཕྱི་ལོ་ ༢༠༠༢ ནས་བོད་མིའི་སྒྲིག་འཛུགས་ཀྱི་ལས་དོན་མཇུག་སྐྱོང་མུ་མཐུད་གནས་བསྡད་ཡོད། བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་དེ་ནུས་མེད་གཏོང་མིན་གྱི་སྐད་ཆ་ད་ལྟ་བསླེབ་ཀྱི་མེད། སྐབས་དེ་དུས་ང་ཚོས་གནས་སྟངས་ལ་བལྟས་ཏེ་བལྟ་དགོས་རྒྱུ་ཞིག་རེད། ད་ལྟ་བོད་རྒྱ་འབྲེལ་མོལ་གྱི་འབྲེལ་བ་སླར་གསོ་ཡོང་མ་ཡོང་གི་གནས་སྟངས་ཐོག་༸གོང་ས་རྒྱལ་བ་རིན་པོ་ཆེ་མཆོག་ལ་སྙན་སེང་ཞུས་པའི་ལམ་སྟོན་བཞིན་གོམ་པ་རྒྱག་བཞིན་ཡོད། ད་ལྟའི་ཆར་མི་འགྲོ་སུ་འགྲོ་དགོས་མིན་ཐད་སྲིད་སྐྱོང་གིས་འགན་འཁུར་བཞིན་ཡོད། གལ་སྲིད་བོད་རྒྱ་ཞི་མོལ་དངོས་སུ་མགོ་བཙུགས་ཐུབ་པའི་གནས་སྟངས་བྱུང་ཚེ། སྐབས་དེར་སྐུ་ཚབ་དང་དམིགས་བསལ་སྐུ་ཚབ་ཀྱི་མཚན་གནས་གང་དགོས་ཡང་། ༸གོང་ས་མཆོག་ནས་བསྐོ་བཞག་གནང་རྒྱུ་རེད། གཏན་འཇགས་ཐབས་བྱུས་ཚོགས་ཆུང་ནང་དུ་དགའ་ལྡན་ཕོ་བྲང་གི་འཐུས་མི་ཡོད་པ་རེད། ༸གོང་ས་མཆོག་ལ་སྙན་སེང་ཞུ་སྐབས་སྲིད་སྐྱོང་དང་འབྲེལ་ཡོད་གཉིས་བཅར་གྱི་ཡོད། ༸གོང་ས་མཆོག་ནས་བཀའ་གང་གནང་བ་བཀའ་དྲུང་ཡིག་ཚང་དུ་ཉར་གྱི་ཡོད། དེའི་ཐོག་གཏན་འཇགས་ཐབས་བྱུང་ཚོགས་ཆུང་གིས་བགྲོ་གླེང་བྱེད་བཞིན་ཡོད། བོད་རྒྱ་འབྲེལ་མོལ་གྱི་སྒོ་རྒྱབ་ཀྱི་འབྲེལ་བའི་ཐོག་ང་ཚོས་ཧ་ཅང་གཟབ་གཟབ་བྱེད་བཞིན་ཡོད། རིམ་པ་ཁ་ཤས་ཤིག་བརྒྱུད་ནས་འགྲོ་བཞིན་ཡོད། སྒོ་རྒྱབ་ཀྱི་འབྲེལ་བ་གང་ཡོད་ཀྱང་སྲིད་སྐྱོང་གི་བཀའ་འཁྲོལ་འོག་འགྲོ་བཞིན་ཡོད། བཀའ་འཁྲོལ་མེད་པའི་སྒོ་རྒྱབ་གང་ལའང་ངོས་འཛིན་བྱེད་ཀྱི་མེད། སྒོ་རྒྱབ་ཀྱི་འབྲེལ་བའི་ཉེན་ཁ་དང་གཟབ་གཟབ་བྱེད་དགོས་སར་གྲོས་བསྡུར་རིམ་པ་མང་པོ་བྱེད་བཞིན་ཡོད་ལ། རྒྱལ་སྤྱི་དང་རྒྱ་ནག་ནང་གི་མངོན་གསལ་ཡོད་མེད་ཀྱི་གནས་སྟངས་ཚང་མའི་ཐོག་བསམ་བློ་བཏང་ནས་བགྲོ་གླེང་བྱེད་ཀྱི་ཡོད། བོད་རྒྱ་འབྲེལ་མོལ་དང་གཏན་འཇགས་ཐབས་བྱུས་ཚོགས་ཆུང་གཉིས་ལ་གྲུབ་ཆའི་ཐོག་ནས་ཁྱད་པར་ཡོད་ལ། བོད་རྒྱ་འབྲེལ་མོལ་ཚོགས་ཆུང་གིས་བོད་རྒྱ་འབྲེལ་མོལ་རྐྱང་བའི་ཐོག་ལས་ཀ་བྱེད་དགོས་པ་རེད། གཏན་འཇགས་ཐབས་བྱུས་ཚོགས་ཆུང་གིས་བོད་རྒྱ་འབྲེལ་མོལ་དང་འབྲེལ་བའི་ཐོག་བོད་མིའི་སྒྲིག་འཛུགས་ཀྱི་ཡིག་ཆ་སོགས་གྲ་སྒྲིག་བྱེད་བཞིན་ཡོད། བོད་རྒྱ་འབྲེལ་མོལ་ཐོག་ཐད་ཀར་འབྲེལ་བ་མེད་ཀྱང་ཐབས་བྱུས་ཐོག་ལས་ཀ་བྱེད་བཞིན་ཡོད། མ་འོངས་བར་གཏན་འཇགས་ཐབས་བྱུས་ཚོགས་ཆུང་ཤུགས་ཆེ་རུ་གཏོང་དགོས་པའི་གནས་བབ་འདུག ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
