བོད་ཀྱི་གཞས་པ་བསྟན་འཛིན་ཆོས་རྒྱལ་ལགས་ཀྱི་ཁ་བའི་མེ་ཏོག་ཅེས་པའི་འོད་སྡེར་ཨོ་གླིང་གི་ཨ་རེ་ཡ་གླུ་གཞས་སྒྱུ་རྩལ་གྱི་གཟེངས་རྟགས་ཀྱི་འོས་གཞིའི་ཁོངས་སུ་ཚུད་ཡོད་འདུག
ཨོ་སི་ཊོ་ལི་ཡའི་སྒྲ་ཕབ་བཟོ་ལས་མཐུན་ཚོགས་ཀྱི་ཕྱི་ལོ་ ༢༠༢༥ ལོའི་ཨ་རེ་ཡ་ (Aria) གླུ་གཞས་སྒྱུ་རྩལ་གཟེངས་རྟགས་ཀྱི་འོས་གཞིའི་ཁོངས་སུ། ཨོ་གླིང་དུ་གནས་སྡོད་བོད་ཀྱི་གཞས་པ་བསྟན་འཛིན་ཆོས་རྒྱལ་ལགས་ཀྱི་ཁ་བའི་མེ་ཏོག་ཅེས་པ་ཚུད་ཡོད་ཅིང་། ཁོང་གི་གླུ་གཞས་ཁ་བའི་མེ་ཏོག་ཅེས་པ་ནི་འཛམ་གླིང་རོལ་དབྱངས་ཆེ་བསྒྲིགས་ལེགས་ཤོས་ཀྱི་གཟེངས་རྟགས་ཁོངས་སུ་ཚུད་ཡོད་འདུག
དེ་འབྲེལ་ཨོ་གླིང་གི་ཨ་རེ་ཡ་གླུ་གཞས་སྒྱུ་རྩལ་གྱི་དྲ་བར་སྤེལ་བའི་གནས་ཚུལ་ལ་གཞིགས་ན། འདི་ལོའི་ཨ་རེ་ཡ་གླུ་གཞས་སྒྱུ་རྩལ་གྱི་གཟེངས་རྟགས་ཁོངས་སུ། ལོ་འཁོར་མོའི་གཞས་རྩེ་གྲ་དང་། སྒྱུ་རྩལ་བ་ཡག་ཤོས། མཉམ་གཞས་སྡེ་ཚན། བྱིས་པའི་གླུ་གཞས་ཀྱི་འོད་སྡེར། ཡུལ་ལུང་གི་གླུ་གཞས་ཆེད་བསྒྲིགས་ཡག་ཤོས། འཁྲབ་གཞས་དང་གློག་རྡུལ་འགྲེམས་སྤེལ་གྱི་གླུ་གཞས་ཡག་ཤོས། གཞས་མ་གཏམ། བརྙན་ཡག་ཤོས། འཛམ་གླིང་རོལ་དབྱངས་ཆེད་བསྒྲིགས་ཡག་ཤོས། སྲོལ་རྒྱུན་གྱི་ཆེད་བསྒྲགས་ལེགས་ཤོས་སོགས་ཁྱབ་ཁོངས་མི་འདྲ་བའི་གཟེངས་རྟགས་ ༢༨ འདུག་པ་དང་། བསྟན་འཛིན་ཆོས་རྒྱལ་ལགས་ཀྱི་བརྩམས་ཆོས་ཁ་བའི་མེ་ཏོག་ཅེས་པ་འཛམ་གླིང་རོལ་དབྱངས་ཆེ་བསྒྲིགས་ལེགས་ཤོས་ཀྱི་གཟེངས་རྟགས་ཁོངས་སུ་གཏོགས་ཀྱི་འདུག
འདི་གའི་གསར་འགོད་པས་བསྟན་འཛིན་ཆོས་རྒྱལ་ལགས་སུ་འབྲེལ་བ་གནང་ཐབས་བྱས་ཡིན་ཏེ་མཐུད་ཐུབ་མ་སོང་མོད། ཁ་སང་བསྟན་འཛིན་ཆོས་རྒྱལ་ཁོང་སྒེར་གྱི་ངོ་དེབ་སྟེང་ཟིན་བྲིས་ཤིག་སྤེལ་བའི་ནང་། ཕྱི་ལོ་ ༢༠༢༥ ལོའི་ཨ་རེ་ཡའི་འཛམ་གླིང་རོལ་དབྱངས་ཆེད་བསྒྲིགས་ལེགས་ཤོས་ཀྱི་ཁོངས་སུ་ཁ་བའི་མེ་ཏོག་ཚུད་པར་དགའ་སྤོབས་བྱུང་། ཁ་བའི་མེ་ཏོག་བོད་སྐད་དང་དབྱིན་སྐད་གཉིས་ཀྱི་ནང་དུ་ཡོད། ངའི་གྲོགས་པོ་དང་མཉམ་ལས་གནང་མཁན་མེ་ཐི་ཁོར་བྷེ་ (Matt Corby) དང་ཨེག་སི་ (Alex Henriksson)། རོ་བྷིན་(Rohin Jones) ཚུད་པའི་ང་ལ་རྒྱབ་སྐྱོར་གནང་མཁན་ཡོངས་ལ་བརྩེ་སེམས་དང་བཅས་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་འདུག
འཛམ་གླིང་རོལ་དབྱངས་ཆེད་བསྒྲིགས་ལེགས་ཤོས་ཀྱི་གཟེངས་རྟགས་ཁོངས་སུ་བོད་མི་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱི་ཁ་བའི་མེ་ཏོག་དང་། ཞི་མིའི་རྒྱལ་ཁམས་རོལ་དབྱངས་སྡེ་ཚན་(The Cat Empire) གྱི་དག་ཞིང་གི་བྱ། སྒྱུ་རྩལ་བ་ཇོ་སི་ཧྥི་ (Joseph Tawadros) ལགས་ཀྱི་བརྗེད་ཟིན་པའི་འགྲོ་བ་མིའི་ལམ་བུ། ཨོ་གླིང་གི་གདོད་མའི་སྒྱུ་རྩལ་བ་གྲགས་ཅན་འདས་པོ་གྷི་རོའུ་མོལ་(Gurrumul) ལགས་ཀྱི་མིང་ཐོག་ཏུ་ཡོད་པའི་རོལ་དབྱངས་སྒྱུ་རྩལ་ཁང་(Decca Australia & Skinnyfish / UMA) གཉིས་ཀྱི་རོལ་དབྱངས་ཚོགས་འདུ། མལ་བྷོ་ནེ་ཡའི་རོལ་དབྱངས་འཁྲབ་སྟོན་བཅས་རོལ་དབྱངས་ཆེ་བསྒྲིགས་ལྔ་འདུག་ལ། འདི་ལོའི་ཕྱི་ཟླ་ ༡༡ ཚེས་ ༡༩ ཉིན་གཟེངས་རྟགས་ཐོབ་མཁན་གྱི་མིང་གཞུང་ཡོངས་བསྒྲགས་བྱ་རྒྱུ་ཡིན་འདུག
ད་ལན་ནི་བསྟན་འཛིན་ཆོས་རྒྱལ་ལགས་ཀྱི་རོལ་དབྱངས་བརྩམས་ཆོས་ཁག་རྒྱལ་སྤྱིའི་རོལ་དབྱངས་གཟེངས་རྟགས་ཀྱི་ཁོངས་སུ་ཚུད་པ་ཐོག་མ་མིན་པར། ཕྱི་ལོ་ ༢༠༢༠ ལོར་ཁོང་གི་བརྩམས་ཆོས་བར་དོ་ཞེས་པ་རྒྱལ་སྤྱིའི་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་མྱོང་ལ། དེ་ནི་བོད་མི་ཞིག་སྒེར་བ་ཞིག་གི་རོལ་དབྱངས་སྒྱུ་རྩལ་གྱི་བརྩམས་ཆོས་གྷེ་རམ་མེ་ (Grammy) གཟེངས་རྟགས་ཀྱི་ཁོངས་སུ་ཚུད་པ་གཉིས་པ་དེ་ཡིན་ཞིང་། ཕྱི་ལོ་ ༢༠༠༡ ལོར་གླིང་བུ་བ་ངག་དབང་མཁས་མཆོག་ལགས་ཀྱི་གླུ་གཞས་རྒྱང་རིང་གི་ས་དེ་ན་ཞེས་པའང་ཚུད་ཡོད། འོན་ཀྱང་། བསྟན་འཛིན་ཆོས་རྒྱལ་དང་ངག་དབང་མཁས་མཆོག་གཉིས་ཀར་གཟེངས་རྟགས་ཐོབ་མི་འདུག ཕྱི་ལོ་ ༢༠༠༤ ལོར་༸དཔལ་ལྡན་སྟོད་རྒྱུད་གྲྭ་ཚང་གི་དགེ་འདུན་པ་བཞིའི་ཆོས་དབྱངས་གྷི་རམ་མེ་གཟེངས་རྟགས་ཀྱི་འོས་གཞིའི་ཁོངས་སུ་ཚུད་དེ་མཇུག་མཐར་བྱ་དགའ་ཡང་ཐོབ་མྱོང་འདུག
སྒྱུ་རྩལ་བ་བསྟན་འཛིན་ཆོས་རྒྱལ་ལགས་ནི་གཞས་པ་དང་རོལ་དབྱངས་བ། དབྱངས་རྩོམ་པ་པོ་བཅས་ཡིན་འདུག་ལ། རོལ་དབྱངས་ཆེད་བསྒྲིགས་གྲངས་ ༩ ཙམ་ཡོད་འདུག ཁོང་ནི་བོད་མངའ་རིས་ཁུལ་གྱི་ས་མ་འབྲོག་གི་གཞི་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཕྱི་ལོ་ ༡༩༧༠ དོན་གྲངས་ནང་རྒྱ་གར་ནང་བཙན་བྱོལ་དུ་སླེབས་ཏེ་བཞུགས་སྒར་དྷ་སའི་ཁུལ་གྱི་བོད་ཁྱིམ་སློབ་གྲྭའི་ནང་འཚར་ལོངས་བྱུང་ཡོད་པ་དང་། ཕྱི་ལོ་ ༡༩༩༧ ལོར་ཨོ་གླིང་དུ་གཞིས་སྤོས་བྱས་རྗེས་རྐྱང་གཞས་དང་ཕྱིའི་རོགས་ཚོགས་གཞན་དང་ལྷན་དུ་གླུ་གཞས་སྣ་ཚོགས་བཏང་དང་གཏོང་བཞིན་ཡོད་འདུག་ལ། ཨོ་གླིང་གྲོས་ཚོགས་སུ་བོད་དོན་ཞུ་གཏུགས་དང་ཨོ་གླིང་དུ་བོད་མིའི་གནད་ཡོད་མི་སྣ་གདན་འདྲེན་སོགས་ཞུས་ཏེ་བོད་དོན་ལས་འགུལ་སྤེལ་བ་སོགས་གནང་ཡོད་འདུག
གསར་འགོད་པ། སྐལ་བཟང་སྦྱིན་པ།
