མོན་གྱི་གཞོན་སྐྱེས་ཤེས་ཡོན་ཚོགས་ཆེན་ཐོག་༧སྐུའི་གོ་སྟོན་སྲུང་གཙི་འབྲེལ་ནས་ཆོས་དང་རིག་གཞུང་གཅིག་པ་ཡིན་པའི་བོད་དང་མོན་བར་གྱི་ལོ་རྒྱུས་སོགས་ཀྱི་སྐོར་ལ་བགྲོ་གླེང་གནང་གི་ཡོད་འདུག
ཕྱི་ཟླ་ ༡༠ ཚེས་ ༣ ནས་ ༥ བར་ཉིན་གྲངས་གསུམ་རིང་རྒྱ་གར་ཨ་རུ་ན་ཅལ་མངའ་སྡེ་མོན་རྟ་དབང་གི་སྤྱི་པའི་ཚོགས་ཁང་ཀ་ལ་དབང་པོའི་ནང་དུ། མོན་གྱི་གཞོན་སྐྱེས་ཤེས་ཡོན་ལྷན་ཚོགས་དང་རྒྱལ་སྤྱིའི་བོད་ཀྱི་མཐོ་རིམ་སློབ་མའི་ལྷན་ཚོགས་ཟུང་འབྲེལ་གྱི་གོ་སྒྲིག་འོག མོན་གྱི་གཞོན་སྐྱེས་ཤེས་ཡོན་ཚོགས་ཆེན་དང་པོ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྤྲུལ་སྐུ་བསྟན་འཛིན་འགྱུར་མེད་རིན་པོ་ཆེ་མཆོག་དང་། སློབ་དཔོན་རིགས་སྐྱ་ལྷ་འོད་རིན་པོ་ཆེ་མཆོག བོད་ཀྱི་མཐོ་རིམ་སློབ་མ་ ༣༥ ། དེ་བཞིན་མོན་རྟ་དབང་གི་མཐོ་སློབ་དང་དགོན་སྡེ་ཁག་ནས་གཞོན་སྐྱེས་ ༣༠༠ ལྷག་མཉམ་ཞུགས་གནང་འདུག
ཐེངས་འདིའི་ཚོགས་ཆེན་སྐོར་ལ་མོན་གྱི་གཞོན་སྐྱེས་ཤེས་ཡོན་ལྷན་ཚོགས་ཀྱི་ཚོགས་གཙོ་དབང་ཆེན་མགོན་པོ་ལགས་ཀྱིས་འདི་གའི་གསར་འགོད་པར། ཚོགས་འདུའི་དམིགས་ཡུལ་གཙོ་བོ་དེང་སང་མོན་གྱི་གཞོན་སྐྱེས་རྣམས་དེང་དུས་ཀྱི་ཤེས་ཡོན་ཐོག་སློབ་གཉེར་ཡག་པོ་ཐོན་བཞིན་ཡོད་ཀྱང་། སོ་སོའི་མི་རིགས་ཀྱི་ཆོས་དང་། རིག་གཞུང་། ལོ་རྒྱུས། ལེགས་བྱང་། ལྷག་པར་དུ་དམངས་སྲོལ་གྱི་རིག་གནས་དྲན་པ་བརྗེད་ཀྱི་ཡོད་པ་མ་ཟད། རིག་གནས་དེ་དག་ཡོད་མེད་ཀྱང་ཤེས་ཀྱི་མེད་མཁན་མང་པོ་ཡོད་པར་བརྟེན། མོན་གྱི་གཞོན་སྐྱེས་རྣམས་ལ་ཆོས་དང་རིག་གཞུང་ངོ་སྤྲོད་ཀྱི་གཞི་རྩ་ཞིག་ཆགས་ཡོད། དེ་བཞིན་རྒྱལ་སྤྱིའི་བོད་ཀྱི་སློབ་མའི་ལྷན་ཚོགས་ཀྱང་གདན་འདྲེན་ཞུས་ཏེ། ང་ཚོ་ཟུང་འབྲེལ་གྱི་ཐོག་ནས་ཚོགས་འདུ་འཚོག་བཞིན་ཡོད་ལ། ང་ཚོས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་སྲུང་གཙི་བྱས་ཡོད། སྤྱིར་བཏང་མོན་ནང་༧གོ་སྟོན་གྱི་མཛད་སྒོ་འདྲ་མིན་འཚོགས་འདུག ཡིན་ནའང་། ༧གོང་ས་མཆོག་གི་དགོངས་གཞིའི་ཐོག་ཤེས་རིག་གི་ལམ་ནས་སྲུང་གཙི་ཞུས་པ་ཞེ་དྲགས་མཐོང་མ་སོང་པས། ང་ཚོ་ཟུང་འབྲེལ་གྱི་ཐོག་ནས་༧སྐུའི་གོ་སྟོན་སྲུང་གཙི་ཞུ་རྒྱུ་བྱས་པ་རེད། འདི་ནི་བོད་དང་ཧི་མ་ལ་ཡ་གཉིས་ཕ་མེས་ཡང་མེས་ནས་ཆོས་དང་རིག་གཞུང་སོགས་ཀྱི་རྒྱུད་གཅིག་པ་ཡིན་དུས། ང་ཚོའི་འབྲེལ་ལམ་སྔར་ལས་དམ་ཟབ་གཏོང་སླད་ཡིན། དེ་བཞིན་གཞོན་སྐྱེས་ནང་ཁུལ་དུ་ཚོགས་འདུ་ཚོགས་ཏེ་བསམ་ཚུལ་བརྗེ་རེས་བྱེད་པ་ཧ་ཅང་ཉུང་ཉུང་མཐོང་གི་འདུག ད་ལན་མོན་པའི་ངོས་ནས་རྒྱལ་སྤྱིའི་བོད་ཀྱི་མཐོ་རིམ་སློབ་མ་རྣམས་དང་ལྷན་ཏུ་ཤེས་ཡོན་བརྗེ་ལེན་དང་༧གོ་སྟོན་སྲུང་གཙིའི་ཐོག་ནས་འཚོག་གི་ཡོད། ཚོགས་ཆེན་ནང་མོན་སྐད་དང་བོད་སྐད་ཀྱི་ཐོག་ནས་ཚོགས་འདུ་ཁ་ཁ་འཚོག་གི་ཡོད། དེ་ནི་མོན་ནང་དུ་མཚོན་ན་ཚོགས་འདུ་དམིགས་བསལ་ཞིག་ཆགས་ཡོད། ཅེས་འགྲེལ་བརྗོད་གནང་བྱུང་།
ཡང་ཁོང་གིས་ཐེངས་འདིའི་ཚོགས་ཆེན་གྱི་གལ་གནད་སྐོར་ལ། བོད་དང་མོན་གཉིས་ཀྱི་གནའ་བོའི་ལོ་རྒྱུས་གཅིག་པ་ཡིན་པ་དང་། ཆོས་དང་རིག་གཞུང་། དེ་བཞིན་བླ་མ་གཅིག་གི་སློབ་མ་སོགས་གཅིག་པ་ཡིན་ཡང་། ནམ་རྒྱུན་བོད་པ་དང་མོན་པ་ཞེས་ཁ་ཁར་བསྡད་ཡོད་པས། ང་ཚོའི་གཞོན་སྐྱེས་རྣམས་ཀྱིས་ནང་ཁུལ་གྱི་བསམ་ཚུལ་བརྗེ་ལེན་བྱ་རྒྱུ་དང་། ལྷག་པར་དུ་ང་ཚོ་ཚང་མ་༧གོང་ས་རྒྱལ་བ་རིན་པོ་ཆེ་མཆོག་གི་སློབ་མ་གཅིག་པ་ཡིན་དུས། ང་ཚོ་ཟུང་འབྲེལ་གྱི་ཐོག་ནས་འདི་འདྲའི་སྡིངས་ཆ་ཞིག་དགོས་ཀྱི་འདུག ད་ལྟ་བར་དུ་འདི་འདྲ་བྱུང་མི་འདུག རྒྱལ་སྤྱིའི་བོད་ཀྱི་སློབ་མའི་ཚོགས་ཆེན་ཚོགས་སྟངས་དང་གཅིག་པ་ཡིན་དུས། ང་ཚོ་ཟུང་འབྲེལ་གྱིས་ཚོགས་འདུ་འཚོགས་པ་དམིགས་བསལ་གལ་ཆེན་རེད། དེ་ཡང་ལོ་རྒྱུས་དང་། ཆོས་ཕྱོགས། སྤྱི་ཚོགས་ཀྱི་ཐོག་ནས་བལྟས་ན་འདི་ཧ་ཅང་གལ་ཆེན་པོ་རེད། རྒྱལ་སྤྱིའི་བོད་ཀྱི་སློབ་མའི་ཚོགས་ཆེན་ཐེངས་བཅུ་བདུན་འཚོགས་ཟིན་པ་རེད། ང་ཚོས་བོད་ཀྱི་མཐོ་རིམ་སློབ་མ་རྣམས་ལ་དཔེ་བལྟ་བའི་ཆེད་དུ། དེ་རིང་གི་༧སྐུའི་གོ་སྟོན་མཛད་སྒོ་ཞིག་བོད་ཀྱི་མཐོ་རིམ་སློབ་མའི་ལྷན་ཚོགས་ལ་གཙོ་སྐྱོང་བྱེད་དུ་བཅུག་ཡོད། ཅེས་འགྲེལ་བརྗོད་གནང་བྱུང་།
ཐེངས་འདིའི་ཚོགས་ཆེན་ཐོག་ཨ་རུ་ན་ཅལ་དང་བོད་བར་གྱི་གནས་སྤོ་དང་ཚོང་ལམ་ངོ་སྤྲོད། དགའ་ལྡན་ཕོ་བྲང་གི་སྲིད་དབང་དར་ནས་ཕྱི་ལོ་ ༡༩༥༩ བར་གྱི་བོད་དང་ཧི་མ་ལ་ཡའི་མི་རིགས་སྤྱི་དང་ཡང་སྒོས་མོན་པའི་བར་གྱི་ཆབ་སྲིད་འབྲེལ་ལམ་སྐོར། མོན་བོད་བར་གྱི་སྒྱུ་རྩལ་འབྲེལ་ལམ་སྐོར། ཞི་ཅིན་ཕིན་གྱི་དུས་རབས་གསར་པའི་བོད་སྐྱོང་ཐབས་ཇུས་ཟེར་བ་དེས་བོད་དང་རྒྱ་གར་གྱི་ས་མཚམས་ཁུལ་དུ་ཤུགས་རྐྱེན་ཇི་ཡོད། མོན་ཡུལ་དུ་བྷོ་ཊའི་གལ་གནད་དང་རྒྱ་གར་རྩ་ཁྲིམས་དོན་ཚན་དྲུག་པར་ཚུད་དགོས་པའི་དགོས་དམིགས། གནའ་སྔ་མོའི་དུས་ཀྱི་མོན་ཞེས་པའི་ཐ་སྙད་ཀྱི་ཁྱབ་ཁོངས་དང་མིང་ཐོགས་ཚུལ། མོན་གྱི་ཆང་ས་དང་གཉེན་སྒྲིག་གི་རིག་གནས། དཱ་ཧུང་མཐོ་སློབ་དེ་མོན་གྱི་ཆོས་དང་རིག་གཞུང་སྲུང་སྐྱོབ་ཐད་གལ་ཆེ་ཚུལ། དེང་དུས་ཀྱི་སྤྱི་ཚོགས་དང་མཐུན་པའི་ནང་ཆོས་ཉམས་ལེན་བྱེད་ཚུལ། མོན་གྱི་གནའ་བོའི་གཞས་ཚིག་དང་རོལ་དབྱངས་སོགས་ཀྱི་བརྗོད་གཞིའི་ཐོག་གཏམ་བཤད་དང་བགྲོ་གླེང་གནང་གི་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
