དབྱིན་ཡུལ་ལོན་ཌོན་གྱི་ཆོས་དཔོན་ལྕམ་སྐུ་ཌེམ་སཱ་རཱ་མུ་ལཱ་ལི་མཆོག་ཁན་ཊིར་བྷི་རའི་ཆོས་དཔོན་ཁྲི་རབས་ ༡༠༦ པར་མཚན་འདོན་གནང་བར་༧གོང་ས་རྒྱལ་བ་རིན་པོ་ཆེ་མཆོག་ནས་ཐུགས་སྨོན་དང་བཅས་འཚམས་འདྲི་མཛད་འདུག
ཟླ་འདིའི་ཕྱི་ཚེས་ ༤ ཉིན་༸གོང་ས་རྒྱལ་བ་རིན་པོ་ཆེ་མཆོག་ནས་ལོན་ཌོན་གྱི་ཡི་ཤུ་ཆོས་དཔོན་ལྕམ་སྐུ་ཌེམ་སཱ་རཱ་མུ་ལཱ་ལི་(Dame Sarah Mullally)མཆོག་སྐབས་རྗེས་མའི་ཁན་ཊིར་བྷ་རིའི་ཤུ་ཆོས་དཔོན་དུ་མཚན་འདོན་གནང་བར་འཚམས་འདྲི་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་དུ། ད་ལྟ་འཛམ་གླིང་སྤྱི་ལ་དཀའ་ངལ་མང་པོ་ཞིག་འཕྲད་བཞིན་ཡོད་ལ། གཞི་རྩའི་འགྲོ་བ་མིའི་ཐོབ་རིན་ཐང་གི་གནས་སྟངས་ཐད་གདོང་ལེན་བྱེད་པའི་དུས་ཚོད་ཅིག་ཆགས་ཡོད། ང་ཚོ་ཆོས་ལུགས་ཀྱི་དབུ་འཁྲིད་རྣམ་པར་མཚོན་ན་གནད་དོན་འདི་དག་ལ་ཀུན་གྱིས་བསྐྱར་དུ་དོ་སྣང་ཡོང་ཐབས་བྱེད་པར་དམིགས་བསལ་གྱི་འགན་འཁྲི་ཡོད་པ་ཞིག་ཏུ་ཡིད་ཆེས་བྱེད་ཀྱི་ཡོད། ཆོས་ལུགས་ཚང་མའི་བསླབ་བྱ་གུ་ཡངས་དང་བཟོད་སྒོམ། བྱམས་བརྩེ་བཅས་ཀྱི་ཐབས་ལམ་ལ་བརྟེན་ནས་ཁོང་ཚོ་གསོ་སྐྱོང་བྱེད་དགོས། འདི་དག་ནི་ང་ཚོས་གཞན་ལ་ཕན་འབྲས་ལྡན་པའི་སྒོ་ནས་མཉམ་སྤྱོད་བྱེད་ཐུབ་པའི་ལག་ལེན་གྱི་ཁྱད་ཆོས་ཡིན། ཞེས་གསུངས་འདུག
ཁྱེད་མ་འོངས་པར་ཨང་ལི་ཁན་ཆོས་ཁང་གི་བུད་མེད་དབུ་འཁྲིད་ཐོག་མ་དེ་ཆགས་རྒྱུ་ཡིན་པ་ཤེས་རྟོགས་བྱུང་ནས་ངོས་རང་ཧ་ཅང་དགའ་བོ་བྱུང་། ཁྱེད་ཀྱིས་མཁྱེན་གསལ་ལྟར་ཚན་རིག་གི་གྲུབ་དོན་དུ་བུད་མེད་ནི་གཞན་གྱི་ཚོར་བ་ལ་ཚོར་ཤེས་རྣོ་བ་ཡོད། དེར་བརྟེན་ང་ཚོའི་དབུ་འཁྲིད་ནང་བུད་མེད་མང་བ་ཡོད་པ་ཡིན་ན། འཛམ་གླིང་འདི་སྔར་ལས་བསམ་ཤེས་ཅན་དང་ཞི་བདེ་ལྡན་པ་ཞིག་ཡོང་བར་ངོས་རང་ཡིད་ཆེས་ཡོད། ཁྱེད་སྐབས་རྗེས་མའི་ཁན་ཊིར་བྷ་རིའི་ཆོས་དཔོན་དུ་མཚན་འདོན་གནང་བ་ནི་རེ་བའི་འོད་སྣང་ཞིག་རེད་ཅེས་ཕྱག་ལས་ལམ་ལྷོངས་ཡོང་བའི་ཐུགས་སྨོན་མཛད་འདུག
ལོན་ཌོན་གྱི་ཡི་ཤུ་ཆོས་དཔོན་ལྕམ་སྐུ་ཌེམ་སཱ་རཱ་མུ་ལཱ་ལི་མཆོག་ནི་དབྱིན་ཡུལ་གྱི་ཨང་ལི་ཁན་གྱི་ཆོས་འཆད་མཁན་ཞིག་ཡིན་ལ། ཕྱི་ལོ་ ༢༠༡༨ ནས་བཟུང་ལོན་ཌོན་གྱི་བུད་མེད་ཆོས་དཔོན་ཐོག་མ་དེ་ཆགས་པ་མ་ཟད། དབྱིན་ལན་ཆོས་ཁང་གི་ཆོས་དཔོན་ཁྱོན་ ༤༢ ནང་ནས་ ༢༦ དབྱིན་ཡུལ་གྲོས་ཚོགས་ཀྱི་ཆོས་དཔོན་དུ་བསྐོས་ཡོད་པ་རྣམས་ཀྱི་ནང་ནས་ཁོང་མོ་གཅིག་ཡིན་འདུག ཟླ་འདིའི་ཕྱི་ཚེས་ ༣ ཉིན་སྐབས་རྗེས་མའི་ཁན་ཊིར་བྷ་རིའི་ཡི་ཤུ་ཆོས་དཔོན་དུ་མཚན་འདོན་གནང་ཡོད་པ་ལྟར། ཕྱི་ལོ་ ༢༠༢༦ ཟླ་ ༡་ཚེས་ ༢༨ ཉིན་ཁན་ཊིར་བྷི་རའི་ཆོས་དཔོན་ཁྲི་རབས་ ༡༠༦ པའི་ཐུགས་འགན་བཞེས་རྒྱུ་ཡིན་པ་རེད།
