རྒྱ་གར་ན་གཞོན་བོད་རིག་པ་ཉམས་ཞིབ་པའི་ཚོགས་འདུ་ཐེངས་བདུན་པ་མཇུག་བསྡུས།

བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་ཞུས་པའི་རྒྱ་གར་ན་གཞོན་བོད་རིག་པ་ཉམས་ཞིབ་པའི་ཚོགས་འདུའི་ཐོག་རྒྱ་གར་གྱི་བོད་རིག་པའི་མཁས་དབང་མང་ཆེ་བ་གདན་འདྲེན་ཞུས་ཚར་ཡོད་འདུག

དེ་རིང་ཕྱི་ཟླ ༡༠ ཚེས ༨ ཉིན་དབུས་སྣེ་ལེན་ཁང་དུ་ཡོད་པའི་འཛིན་སྐྱོང་སྦྱོང་བརྡར་བསྟི་གནས་ཁང་དུ། ཉིན་གཉིས་རིང་གི་རྒྱ་གར་ན་གཞོན་བོད་རིག་པ་ཉམས་ཞིབ་པའི་ཚོགས་འདུ་ཐེངས་བདུན་པ་དབུ་འཛུགས་གནང་ཞིང་། དབུ་འབྱེད་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ལྡི་ལི་ནེ་རུ་གཙུག་ལག་སློབ་གཉེར་ཁང་གི་ལྷོ་ཤར་ཨེ་ཤ་ཡའི་སྡེ་ཚན་གྱི་སློབ་དཔོན་སྐུ་ཞབས་ཤྲི་ཀན་ཐི་ (Srikanth Kondapalli) ལགས། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས། རྒྱ་གར་གྱི་གཙུག་ལག་སློབ་གཉེར་ཁང་མི་འདྲ་བ་དང་འབུམ་རམས་པ་དང་འབུམ་རམས་སློབ་མ་སོགས་ཆེད་མཁས་པ་དང་ཉམས་ཞིབ་པ་ ༣༠ ལྷག་འཛོམས་ཡོད་འདུག

འདི་གའི་གསར་འགོད་པར་སྲིད་སྐྱོང་སྤེན་པ་ཚེ་རིང་མཆོག་གིས། ཚོགས་འདུ་འདི་ང་ཚོས་གལ་ཆེན་པོར་བརྩི་ཡི་ཡོད་པ་ལྟར། ལོ་འཆར་ཅན་བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་ཞུ་བཞིན་ཡོད་ལ། ད་རེས་ཚོགས་འདུ་ཐེངས་བདུན་པ་ཆགས་ཡོད། བོད་ཀྱི་སྲིད་བྱུས་ཉམས་ཞིབ་ཁང་གི་ངོས་ནས་བོད་ཀྱི་ཉམས་ཞིབ་པ་དག་གིས་བོད་ནང་གི་ཆབ་སྲིད་དང་ཆོས་ཕྱོགས། ཁོར་ཡུག་སོགས་ཀྱི་གནས་སྟངས་སྐོར་ལ་ཉམས་ཞིབ་བྱས་པའི་སྙན་ཐོ་དང་རྩོམ་ཡིག་གང་མང་འདོན་གྱི་ཡོད་ཀྱང་། རྒྱ་ཁྱབ་ཆེ་ཆུང་ཇི་ཙམ་འགྲོ་ཡི་ཡོད་མེད་ཀྱི་གནས་ཚུལ་མང་པོ་ཡོང་གི་ཡོད་ལ། གནས་ཚུལ་ཁག་ཅིག་སོ་སོའི་ཡུལ་མི་རང་གིས་བྲིས་ན་ནུས་པ་ཆེ་བ་ཡོང་གི་ཡོད་པར་བརྟེན། རྒྱ་གར་གྱི་ཉམས་ཞིབ་པ་དགུང་ལོ་ཆུང་བ་ཁག་ཅིག་དྷ་སར་གདན་འདྲེན་ཞུས་པ་དང་། ལོ་ཆུང་བ་རྣམས་ད་ལྟ་ཉམས་མྱོང་གསོག་བཞིན་པའི་གནས་སྟངས་སུ་ཡོད་པས། ང་ཚོས་འབྲེལ་བ་དེ་བཟོ་ཐུབ་ན་མ་འོངས་པར་ཁོང་ཚོ་མཁས་པར་གྱུར་བ་དང་རྩོམ་འབྲི་བའི་སྐབས་རང་བཞིན་གྱིས་འབྲེལ་བ་ཡོད་པ་ལྟ་བུ་ཞིག་རེད། རྒྱུ་མཚན་ནི་འཛམ་གླིང་འདི་མི་དང་མིའི་འབྲེལ་བའི་ཐོག་ནས་འགྲོ་ཡི་ཡོད་པར་བརྟེན། སྲིད་བྱུས་ཉམས་ཞིབ་ཁང་དང་། འཛམ་གླིང་གི་ཉམས་ཞིབ་ཀྱི་བསྟི་གནས་ཁང་གཞན་གྱི་མཁས་པ་རྣམས་དང་ལྷན་དུ་འབྲེལ་བ་བཟོ་དགོས་པ་དང་། ལྷག་པར་དུ་ད་ལྟ་ཚོགས་འདུ་འདི་ནི་རྒྱ་གར་ནང་འཚོག་མུས་ཡིན་པ་མ་ཟད། རིམ་པས་ང་ཚོའི་དམིགས་ཡུལ་དེ་རྒྱ་ཆེ་རུ་གཏོང་ཐུབ་པ་ཡིན་ན། རྒྱ་གར་གྱི་བྱང་ངོས་གཅིག་པོ་མིན་པར་རྒྱ་གར་རྒྱལ་ཡོངས་སུ་འཚོག་ཐུབ་རྒྱུ་དང་། དེ་སྔ་རྒྱ་གར་གྱི་བདེ་འཇགས་སྐོར་གླེང་སྐབས་ཧི་མ་ལ་ཡ་དང་། ས་མཚམས་ཀྱི་བདེ་འཇགས་སྐོར་གླེང་སློང་བྱས་པ་ལས་མཚོའི་བདེ་འཇགས་ཐད་གླེང་སློང་བྱེད་ཀྱི་མེད་པ་རེད། ཅེས་གསུངས།

ཡང་སྲིད་སྐྱོང་མཆོག་གིས། དེང་སང་མཚོ་ཁའི་བདེ་འཇགས་ (Maritime Security) སྐོར་ལ་གནས་ཚུལ་མང་པོ་འབྱུང་གི་ཡོད་པ་དང་། རྒྱ་གར་ལྷོ་ཕྱོགས་ནས་དེ་ཚོའི་ཐོག་ཉམས་ཞིབ་བྱེད་མཁན་མང་པོ་ཡོང་གི་ཡོད་པ་རེད། དེར་བརྟེན་ཉམས་ཞིབ་པ་དང་ཉམས་ཞིབ་པའི་བར་དང་། མཁས་པ་དང་མཁས་པ་ཕན་ཚུན་ཐུག་སྟེ་གནས་ཚུལ་གོ་བརྡ་སྤྲོད་རྒྱུ་དང་། ར་སྤྲོད་བྱ་རྒྱུ། དེ་བཞིན་ཕན་ཚུན་ཤེས་ཡོན་བརྗེ་ལེན་སོགས་བྱས་ནས་གནས་ཚུལ་མང་ཆེ་བ་ཤེས་ཚེ། ཉམས་ཞིབ་པས་རྩོམ་བྲིས་ཏེ་ཁྱབ་རྒྱ་ཆེ་བའི་གནས་ཚུལ་ཀློག་རྒྱུ་ཡོད་པར་རྨང་གཞི་བསྐྲུན་ཐུབ་ཀྱི་རེད། དེར་བརྟེན་ལོ་བདུན་རིང་ཚོགས་འདུ་འཚོགས་ཏེ་སྲིད་བྱུས་ཉམས་ཞིབ་ཁང་དང་རྒྱ་གར་ནང་ལོགས་ལ་ཉམས་ཞིབ་བྱེད་མཁན་གྱི་མཁས་པ་མང་པོ་ཞིག་དང་། ལྷག་པར་དུ་གཞོན་སྐྱེས་མཉམ་དུ་འབྲེལ་བ་དམ་ཟབ་ཡོང་རྒྱུ་དང་། མ་འོངས་པར་ཕུགས་རྒྱང་རིང་པོའི་ཐོག་ནས་བོད་ཀྱི་རྩ་དོན་ལ་རང་བཞིན་གྱིས་ཕན་ཐོགས་ཡོང་རྒྱུའི་དམིགས་ཡུལ་འཛིན་གྱི་ཡོད། ཅེས་གསུངས་བྱུང་།

བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ཀྱིས། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་རྒྱ་གར་ན་གཞོན་བོད་རིག་པ་ཉམས་ཞིབ་པའི་ཚོགས་འདུ་ཐེངས་བདུན་པ་འཚོག་བཞིན་ཡོད་པ་རེད། ཐེངས་བདུན་ནང་གནད་འགག་ཆེ་ཤོས་ནི་ད་ལྟའི་ཆར་རྒྱ་གར་ནང་ལོགས་སུ་བོད་རིག་པའི་ཐོག་མཁས་པ་ཞིག་ཡོད་ན། སྲིད་བྱུས་ཉམས་ཞིབ་ཁང་གི་ཚོགས་འདུར་མཉམ་ཞུགས་གནང་མ་མྱོང་བ་ཕལ་ཆེར་མེད། དེར་བརྟེན་ཤེས་ཡོན་བསྟི་གནས་ཁང་དང་ཉམས་ཞིབ་ཁང་ཞིག་ཡིན་ཕྱིན་བོད་པར་རྒྱུས་མངའ་ཡོད་མཁན་ཞིག་ཡོད་པས། མ་འོངས་པར་བོད་ཀྱི་ཆབ་སྲིད་དང་། རྒྱ་གར་གཞུང་གིས་བོད་ཐོག་ཆབ་སྲིད་འཛིན་སྟངས་ཐད་ཏན་ཏན་ཁྱད་པར་ཞིག་འགྲོ་ཡི་རེད་ལ། རྒྱལ་སྤྱིའི་ཐོག་བོད་ཀྱི་གནད་དོན་ལ་རྒྱ་གར་གྱི་མཁས་པ་མང་དུ་འགྲོ་རྒྱུའི་ཕན་ཐོགས་ཡོང་གི་རེད། དེ་བཞིན་ཁོང་ཚོས་དཔྱད་རྩོམ་དང་རྩོམ་ཡིག་ཅིག་བཏོན་ཚེ། རང་བཞིན་གྱིས་བོད་ཀྱི་རྩ་དོན་དེ་བོད་པ་ཙམ་མིན་པར་རྒྱ་གར་གྱི་མཁས་པ་ཚོས་ཤེས་རྒྱུ་དང་། དེའི་ཁ་ཕྱོགས་དེ་རྒྱ་ནག་གི་ཁ་ཕྱོགས་ནས་མ་ཡིན་པར་ང་ཚོ་བོད་པ་རང་གིས་ཁ་ཕྱོགས་བཏོན་པ་བརྒྱུད་ནས་འགྲོ་ཐུབ་རྒྱུའི་ཕན་ཐོགས་རྒྱ་ཆེན་པོ་ཡོང་གི་འདུག་ལ། འདས་པའི་ཉམས་མྱོང་གི་ཐོག་ནས་དགའ་འོས་པ་ཞིག་ཆགས་ཀྱི་འདུག ཅེས་འགྲེལ་བརྗོད་གནང་བྱུང་།

དེ་རིང་ཕྱི་ཚེས་ ༩ ཉིན་ལྡི་ལི་ནེ་རུ་གཙུག་ལག་སློབ་གཉེར་ཁང་གི་འབུམ་རམས་པ་དྷོ་དྷི་ཅན་དྷུ་ (Doddi Chandu) ལགས་ནས་རྒྱ་ནག་གིས་བོད་ཀྱི་ངོ་བོ་མེད་པར་བཟོ་ཐབས་བྱེད་བཞིན་པ། རྒྱལ་སྤྱིའི་དུས་དེབ་ཁག་གི་རྩོམ་ཡིག་ལ་ཞིབ་འཇུག་བྱས་པའི་སྐོར་དང་། རྡོ་རྗེ་གླིང་དུ་ཡོད་པའི་སེན་ཊི་ཇོ་སེབ་མཐོ་རིམ་སློབ་གཉེར་ཁང་ (St. Joseph’s College) གི་སློབ་དཔོན་གཞོན་པ་འབུམ་རམས་པ་པཱ་ཐིག་ (Dr. Pathik Roy) ལགས་ཀྱིས་བོད་མི་སྐྱབས་བཅོལ་བ་དང་ངོ་བོ་སྲུང་སྐྱོབ་ཀྱི་ཐབས་ཇུས་སྐོར། བྱང་བྷན་གྷལ་གཙུག་ལག་སློབ་གཉེར་ཁང་གི་སློབ་དཔོན་གཞོན་པ་འབུམ་རམས་པ་བྷ་རུན་ (Dr. Barun Roy) ལགས་ཀྱིས་ཕྱི་ལོ་ ༡༩༢༥ ནས་ ༡༩༦༣ བར་ཀ་ལིམ་སྦུག་ཏུ་པར་སྐྲུན་བྱས་པའི་ཡུལ་ཕྱོགས་སོ་སོའི་གསར་འགྱུར་མེ་ལོང་གི་གནས་ཚུལ་ལ་བལྟས་ནས། སྐབས་དེའི་བོད་ཀྱི་གསར་འགྱུར་གྱི་གལ་གནད་ལ་དབྱེ་ཞིབ། ར་རྗེ་སི་ཐན་དུ་ཡོད་པའི་ཨ་མི་ཏི་གཙུག་ལག་སློབ་གཉེར་ཁང་ (Amity University) གི་སློབ་དཔོན་གཞོན་པ་འབུམ་རམས་པ་ཝར་མ་ (Dr. Vibhanshu Verma) ལགས་ཀྱིས་དྲ་ལམ་གྱི་ངོ་བོ་དང་ཧིན་བོད་ཀྱི་འབྲེལ་ལམ་སྐོར། སྒང་ཏོག་ཏུ་ཡོད་པའི་མ་ནི་པལ་གཙུག་ལག་སློབ་གཉེར་ཁང་གི་སློབ་དཔོན་གཞོན་པ་བསྟན་འཛིན་ཉི་མ་བྷུ་ཊི་ཡ་ལགས་ཀྱིས་ཤར་ཕྱོགས་གསང་མྱུལ་དང་མི་རིགས་རིག་པ་བ་ས་ར་ཏི་ཅན་དྷ་ར་དྷ་སི་ (Sarat Chandra Das) དང་ཧི་མ་ལ་ཡའི་རི་རྒྱུད་ཀྱི་བོད་བརྒྱུད་ནང་བསྟན་སྐོར་སོགས་ཀྱི་ཐད་གཏམ་བཤད་གནང་།

གཞན་ཡང་། ད་ལན་གྱི་ཚོགས་འདུའི་ཐོག་བོད་ཀྱི་ཁོར་ཡུག་གི་གལ་གནད་དང་། བོད་ཀྱི་ཆོས་དང་རིག་གཞུང་། བོད་ཀྱི་ལོ་རྒྱུས། བོད་པའི་སྤྱི་ཚོགས། རྒྱལ་སྤྱིའི་ཆབ་སྲིད་དང་བོད། རྒྱ་གར་གྱི་ཆབ་སྲིད་དང་བོད། རྒྱ་གར་དང་བོད་ཀྱི་འབྲེལ་བ་སོགས་བརྗོད་གཞི་འདྲ་མིན་ཐོག་བགྲོ་གླེང་གནང་ཡོད་པ་རེད།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།