རྩོམ་པ་པོ། ཡེ་ཤེས་ཟླ་བ། ༡༠༨ ཞི་བདེའི་ལྟེ་གནས་ཁང་གི་ཉམས་ཞིབ་པ།
རྩོམ་ཁུངས། བོད་ཀྱི་དུས་བབ།
ང་རང་སྟེས་དབང་གིས་གསར་འགོད་པའི་ལས་ལ་ཞུགས་རྒྱུའི་བསྐལ་བ་བྱུང་རྗེས། དུས་རྒྱུན་དུ་རྒྱལ་སྤྱིའི་གསར་འགྱུར་དང་སྒོས་སུ་བོད་ཕྱི་ནང་གི་གནས་ཚུལ་ལ་ལྟ་ཀློག་གང་འཚམས་བྱས་དང་བྱེད་མུས་ཁར། འདི་ལོའི་ཕྱི་ཟླ་ ༡༠ པའི་ཚེས་ ༦ ནས་ ༨ བར་ཉིན་གསུམ་རིང་། ས་རྰ་བོད་ཀྱི་མཐོ་རིམ་སློབ་གཉེར་ཁང་དུ་ས་རྰ་བོད་ཀྱི་གཞོན་ནུའི་གོ་སྒྲིག་འོག ཡུལ་ཕྱོགས་སོ་སོའི་གསར་འགྱུར་མེ་ལོང་ཞེས་པའི་བརྗོད་གཞིའི་ཐོག་བོད་རིག་པའི་ཚོགས་འདུ་ཞིག་གཙོ་སྐྱོང་གནང་བར། རང་ཉིད་ཚོགས་བཅར་བའི་ངོ་བོའི་ཐོག་བཅར་རྒྱུ་བྱུང་། དེའི་སྐབས་གདན་ཞུས་མཁས་དབང་དང་ཉམས་ཞིབ་པ་ཚོས། ཡུལ་ཕྱོགས་སོ་སོའི་གསར་འགྱུར་མེ་ལོང་དབུ་འཛུགས་གནང་མཁན་སྐུ་ཞབས་བྷ་བུ་མཐར་ཕྱིན་གྱི་མཛད་རྗེས་དང་གསར་ཁང་དེ་ཉིད་ཀྱི་སྐོར་ཉམས་ཞིབ་ཀྱིས་གཏམ་བཤད་གནང་སྐབས། རང་ཉིད་ལ་སྔར་མེད་ཀྱི་ཚོར་བ་དྲག་པོ་ཞིག་དང་བློ་སྐྱེད་གང་མང་ཞིག་བྱུང་བ་རྣམས། སྐུ་ཞབས་བྷ་བུ་མཐར་ཕྱིན་གྱིས་དབུ་འཛུགས་གནང་བའི་ཡུལ་ཕྱོགས་སོ་སོའི་གསར་འགྱུར་མེ་ལོང་ལོ་ ༡༠༠ འཁོར་བའི་རྗེས་དྲན་གྱི་ཚུལ་དུ། ཚིག་སྦྱོར་དང་རྩོམ་འགྲོས་མི་ལེགས་ཀྱང་དམ་པ་ཁོང་ལ་ཐུགས་རྗེ་ལེགས་འབུལ་ཆེད་དུ་བྲིས་པ་ལགས་ན། མཁྱེན་རྒྱ་ཆེ་བའི་ཀློག་པ་པོ་རྣམས་ཀྱིས་བཟོད་སྲན་ཡོང་བར་རེ།
ཡུལ་ཕྱོགས་སོ་སོའི་གསར་འགྱུར་མེ་ལོང་སྤྱི་ཁོག་མདོར་ཙམ་གླེང་བ།
སྐུ་ཞབས་བྷ་བུ་མཐར་ཕྱིན་ལགས་ནི་ཕྱི་ལོ་ ༡༨༩༠ ཟླ་བ་ ༤ ཚེས་ ༤ ཉིན་རྒྱ་གར་ཧི་མ་ཅལ་མངའ་སྡེའི་ཁོངས་གཏོགས་ཁུ་ནུར་འཁྲུངས་ཤིང་། ཕྱི་ལོ་ ༡༩༡༧ ལོར་ཀ་སྦུག་ཏུ་གནས་སྤོར་དང་། ཕྱི་ལོ་ ༡༩༢༥ ཟླ་བ་ ༡༠ ནང་ཡུལ་ཕྱོགས་སོ་སོའི་གསར་འགྱུར་མེ་ལོང་གི་གསར་ཤོག་དེ་ཉིད་དབུ་འཛུགས་གནང་ཡོད་པ་ཉམས་ཞིབ་པ་ཚོས་ཡོངས་གྲགས་སུ་ངོས་འཛིན་ཞིང་། ཕྱི་ལོ་ ༡༩༦༣ ལོར་མཚམས་འཇོག་གནང་སྟེ་ལོ་ ༣༨ ནང་གསར་ཤོག་འདོན་ཐེངས་ ༢༨ ལྷག་གནང་འདུག ཕྱི་ལོ་ ༡༩༢༥ ཟླ་བ ༡༠ ནས་ཕྱི་ལོ་ ༢༠༢༥ ཟླ་བ་ ༡༠ བར་ལོ་བརྒྱ་ཏག་ཏག་འཁོར་གྱི་ཡོད་འདུག དམ་པ་ཁོང་གིས་ཡུལ་ཕྱོགས་སོ་སོའི་གསར་འགྱུར་མེ་ལོང་འདོན་སྤེལ་གནང་བའི་དུས་ཡུན་དེའི་ཁྲོད། བོད་དུ་༧རྒྱལ་མཆོག་སྐུ་ཕྲེང་ ༡༣ པ་དང་རྒྱ་གར་ནང་༧རྒྱལ་མཆོག་སྐུ་ཕྲེང་ ༡༤ པ་རྣམ་གཉིས་ལ་མཇལ་བཅར་ཞུས་པ་མ་ཟད། བོད་དུ་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་གཙོས་སྐབས་དེའི་སྤྱི་ཚོགས་ཀྱི་གནས་སྟངས་མང་པོའི་སྐོར་གསར་ཤོག་བརྒྱུད་གོ་རྟོགས་སྤེལ་ཡོད་པ་རེད་འདུག་ལ། ལྷག་པར་དུ་བོད་ཀྱི་ཆབ་དཔལ་རིག་གསུམ་གྱི་གནས་སྟངས་ཕྱི་ལ་ངོ་སྤྲོད་དང་། སྐབས་དེའི་ཆབ་སྲིད་ཀྱི་གལ་ཆེའི་གནས་སྟངས་སོགས་གསར་ཤོག་ཏུ་བཀོད་དེ་ལོ་རྒྱུས་ཀྱི་དཔང་ཡིག་ཏུ་གྱུར་ཐུབ་པ་བྱུང་འདུག རང་ཉིད་གོང་ཞུས་ཚོགས་འདུའི་ཐོག་ཡུལ་ཕྱོགས་སོ་སོའི་གསར་འགྱུར་མེ་ལོང་བརྒྱུད་གལ་ཆེའི་གནད་དོན་མང་དག་ཅིག་ཡོད་པ་ལས། དེང་གི་དུས་སུ་ཁ་ཚ་དགོས་གཏུགས་ཀྱི་གནད་དོན་གཉིས་དྲན་ཤེས་དང་ཟིན་ཐོར་གཞིགས་ཏེ་བཀོད་རྒྱུ་ཡིན།
ལོ་རྒྱུས་རང་བཞིན་ལྡན་པའི་གསར་འགྱུར་ཁག་ཅིག
སྤྱིར་ཡུལ་ཕྱོགས་སོ་སོའི་གསར་འགྱུར་མེ་ལོང་ནང་། ཉེ་རབས་བོད་ཀྱི་ལོ་རྒྱུས་མང་དག་ཅིག་བཀོད་ཡོད་ཀྱང་། རང་ཉིད་ནས་དུས་ཀྱི་དགོས་མཁོར་དམིགས་ཏེ་༧རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་ངོས་འཛིན་མཛད་ཕྱོགས་ཀྱི་གནས་ཚུལ་བཀོད་པ་རྣམས་འདིར་ཞུ་འདོད་བྱུང་། དེ་ཡང་ཚོགས་འདུའི་ཐོག་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་འཇམ་དབྱངས་དོན་གྲུབ་ལགས་ཀྱིས། ཕྱི་ལོ་ ༡༩༣༥ ནས་ ༡༩༤༥ བར་ཡུལ་ཕྱོགས་སོ་སོའི་གསར་འགྱུར་མེ་ལོང་ནང་༧རྒྱལ་མཆོག་སྐུ་ཕྲེང་བཅུ་བཞི་པའི་སྐོར་གནས་ཚུལ་བཀོད་པ་ཁག་ལ་ཞིབ་འཇུག་གིས་གཏམ་བཤད་གནང་བའི་ཁྲོད། དུས་ཡུན་དེའི་ནང་༧རྒྱལ་མཆོག་སྐུ་ཕྲེང་བཅུ་བཞི་པ་དང་འབྲེལ་བའི་གནས་ཚུལ་ཁག་བཞི་བཀོད་ཡོད་པ་ལས། སྐབས་མཚམས་སུ་བརྗོད་འདོད་པ་ནི་རྒྱལ་ཚབ་ར་སྒྲེང་རིན་པོ་ཆེས། ལྷ་མོའི་བླ་མཚོར་མཚོ་མཇལ་དུ་གཟིགས་པ་རྣམས། བྷ་བུ་མཐར་ཕྱིན་ལགས་སུ་སྤྲིངས་ཡིག་གི་ཚུལ་དུ་སྤྲིངས་ཏེ་ཡུལ་ཕྱོགས་སོ་སོའི་གསར་འགྱུར་མེ་ལོང་སྟེང་ཕྱི་ལོ་ ༡༩༣༦ ཟླ་བ་ ༧ ཚེས་ ༩ ཉིན་སྤེལ་ཡོད་པ་རེད་འདུག རྣམ་པ་ཚོས་གཤམ་གྱི་གསར་ཤོག་གི་ངོ་བཤུས་སྟེང་ནས། རྒྱལ་ཚབ་ར་སྒྲེང་རིན་པོ་ཆེས་མཚོ་མཇལ་དུ་གང་གཟིགས་པ་རྣམས་བཀླག་ཐུབ།
གཞན་ཡང་དུས་ཡུན་དེའི་ནང་༧རྒྱལ་མཆོག་སྐུ་ཕྲེང་བཅུ་བཞི་པ་དང་འབྲེལ་བའི་གསར་འགྱུར་གཞན་གསུམ་བཀོད་པ་ནི། ཡང་སྲིད་ངོས་འཛིན་མཛད་པའི་གནས་ཚུལ། ཡང་སྲིད་ངོས་འཛིན་མཛད་རྗེས་ལྷ་སར་གདན་ཞུས་མཛད་པའི་གནས་ཚུལ་དང་། ཕྱི་ལོ་ ༡༩༤༠ ཙམ་ནང་༧གོང་ས་མཆོག་རྒྱ་གར་དུ་ཆིབས་བསྒྱུར་བསྐྱང་རྒྱུའི་གནས་ཚུལ་ཡོད་སྐོར་སོགས་བཀོད་པ་རེད་འདུག གནས་ཚུལ་དེ་བཞི་ལས་གོང་དུ་རྒྱལ་ཚབ་ར་སྒྲེང་རིན་པོ་ཆེས་མཚོ་མཇལ་གྱི་གནས་ཚུལ་དེ་ནི། དེང་གི་སྙིགས་མའི་དུས་སུ་ཆོས་ལ་དད་མེད་རྒྱ་ནག་དམར་ཤོག་གིས། མ་འོངས་པར་༧སྐུའི་ཡང་སྲིད་ཐད་སྐུ་དབང་ཡོད་མདོག་བྱེད་བཞིན་པ་དེར། ལོ་རྒྱུས་ཀྱི་བདེན་དཔང་ལྡན་པའི་ཐོག་བོད་བརྒྱུད་ནང་བསྟན་གྱི་སྲོལ་བཟང་བཞིན། དགག་ལེན་དང་གོ་རྟོགས་དབེན་པ་རྣམས་ལ་དཔྱད་གཞིའི་ཚུལ་དུ་ཕན་རླབས་ཆེ་བར་སྣང་། ལྷག་པར་དུ་སྐབས་དེའི་ཡང་སྲིད་རྩད་གཅོད་ཁོངས་མི་བཞི་ཡོད་པ་ལས། ཀུན་རྩེ་བསོད་ནམས་དབང་འདུས་ཀྱིས་ལྗགས་རྩོམ་གནང་བའི་༼རང་མྱོང་མ་བཅོས་ལྷུག་པར་བཀོད་པའི་གཏམ་རྣ་བའི་བདུད་རྩི།༽ཞེས་པ་ལས་གཞན་མཐོང་ཐོས་སུ་མ་གྱུར། སོང་ཙང་། གོང་དུ་ཡུལ་ཕྱོགས་སོ་སོའི་གསར་འགྱུར་མེ་ལོང་སྟེང་རྒྱལ་ཚབ་ར་སྒྲེང་རིན་པོ་ཆེས་མཚོ་མཇལ་སྐོར་གང་གསུངས་པ་རྣམས་ནི་ལོ་རྒྱུས་ཀྱི་བདེན་དཔང་གལ་ཆེན་ཞིག་ཡིན་པར་གདོན་མི་ཟ།
རྒྱ་ནག་གི་ཆབ་སྲིད་སྲིད་བྱུས་སྐོར་སྔ་རྗེས་བཀོད་པ།
དེང་གི་དུས་སུ་རྒྱ་ནག་གི་རྒྱ་སྐྱེད་རིང་ལུགས་སྐོར་རྒྱལ་སྤྱིའི་སྟེང་དང་ལྷག་པར་དུ་རྒྱ་གར་ནང་ཐུགས་སྣང་ཆེན་པོ་གནང་བཞིན་ཡོད་ལ། ཡོངས་གྲགས་སུ་མའོ་ཡིས་བོད་དེ་མཛུབ་མཐིལ་དང་། དེའི་མཛུབ་མོ་ལྔ་ནི། ལ་དྭགས། བལ་ཡུལ། འབྲས་ལྗོངས། འབྲུག་དང་ཨ་རུ་ན་ཅལ་རེད་ཅེས། ཉམས་ཞིབ་པ་མང་པོས་ཡིད་གཟབ་ཀྱི་ཚུལ་དུ་རྒྱ་གར་དང་གོང་འཁོད་རྒྱལ་ཁབ་དག་ལ་ཉེན་བརྡ་གཏོང་བཞིན་ཡོད། ཉམས་ཞིབ་པ་ཁག་ཅིག་གིས་བརྗོད་ན། མའོ་ཡིས་བོད་དེ་མཛུབ་མཐིལ་རེད་ཅེས་པའི་གནས་ལུགས་དེ་ཡིག་ཐོག་སོགས་སུ་གསལ་ཁ་མེད་སྐོར་དང་། དེ་མའོ་ཡིས་བཤད་ཡོད་མེད་སོགས་ཀྱི་སྐོར་བགྲོ་གླེང་ཡོང་བཞིན་འདུག་ཀྱང་། ཚོགས་འདུའི་སྟེང་ཀིརྟིའི་ནང་བསྟན་ཆེས་མཐོའི་སློབ་གཉེར་ཁང་གི་སློབ་དཔོན་ཨ་ལགས་རྗེ་སྤྲུལ་བློ་གྲོས་ཆོས་བཟང་ལགས་ཀྱིས། ༼གསར་འགྱུར་མེ་ལོང་དང་དགེ་སློང་རིག་འཛིན་དབང་པོའི་སྐོར།༽ ཞེས་པའི་བརྗོད་གཞིའི་སྐོར་གཏམ་བཤད་གནང་སྐབས། ཡུལ་ཕྱོགས་སོ་སོའི་གསར་འགྱུར་མེ་ལོང་ནང་། དགེ་སློང་རིག་འཛིན་དབང་པོ་ལགས་ཀྱིས་ཟུར་ཟའི་རི་མོ་ཞིག་བཀོད་འདུག་པ་དེས། གོང་ཞུས་མའོ་ཡིས་རྒྱ་སྐྱེད་རིང་ལུགས་ཀྱི་བསམ་བློ་དེ་ཚབ་མཚོན་ཐུབ་པ་འདུག་སྙམ།
གོང་གི་ཟུར་ཟའི་རི་མོ་དེའི་ནང་མའོ་ལ་༼དམག་ཚེ་ལྟུངས།༽ ཞེས་བཏགས་འདུག་ལ། མའོ་ཡི་ཁའི་ནང་བོད་དེ་ཟོས་ཟིན་ཞིང་རིམ་གྱིས་ལ་དྭགས། བལ་ཡུལ། འབྲུག ཨ་སམ་སོགས་ཀྱི་ཕྱོགས་སུ་བཟའ་འདོད་ཡོད་པའི་རྣམ་པ་མངོན་འདུག
གཞན་ཡང་ཡུལ་ཕྱོགས་སོ་སོའི་གསར་འགྱུར་མེ་ལོང་ནང། རྒྱ་ནག་གིས་བོད་ལ་བཙན་འཛུལ་བྱས་པ་དང་། རྒྱ་དཀར་ནག་གཉིས་དབར་གྱི་ཆབ་སྲིད་འགྱུར་གྲོས་སོགས་ཀྱི་སྐོར་ཟུར་ཟའི་རི་མོ་མང་དག་ཅིག་བཀོད་འདུག་ལ། ཉམས་ཞིབ་པ་ཁག་ཅིག་གིས་བརྗོད་ན། ཕྱིས་སུ་གསར་ཁང་དེ་ཉིད་ལ་དཔལ་འབྱོར་གྱི་སྐུ་ངལ་འཕྲད་སྐབས། རྒྱ་ནག་གིས་ཉོ་རྩིས་བྱས་ཀྱང་། སྐུ་ཞབས་བྷ་བུ་མཐར་ཕྱིན་ལགས་ཀྱིས་ལྷག་བསམ་ཆེན་པོས་བཙོང་མེད་པའི་གནས་ཚུལ་ཡང་འདུག
མཇུག་གཏམ།
རང་ཉིད་ནས་འདིར་བྲིས་པའི་གནས་ཚུལ་རྣམས། བོད་ཀྱི་བཤད་སྲོལ་ལྟར་༼གཞན་ནས་བླངས་ཏེ་རང་གིར་ཡིན་བྱེད་པ། ། སེང་གེའི་ལྷག་མ་ཟ་བའི་ཝ་དང་མཚུངས། །༽ ཟེར་བ་བཞིན། རང་ངོས་ནས་ཉམས་ཞིབ་མཐིལ་ཕྱིན་པ་དང་ཡིག་རྙིང་འཚོལ་སྒྲུབ་སོགས་གང་ཡང་བྱས་མེད་པས། ཚོགས་འདུའི་ཐོག་མཁས་དབང་རྣམ་པ་དང་། ཉམས་ཞིབ་པ་ཚོས་སྐུ་ལས་བསྐྱོན་པའི་ཉེར་ལེན་ལ་བརྟེན། རང་ཉིད་ནས་གང་ཐོས་པ་དང་བློ་སྐྱེད་གསར་པ་གང་བྱུང་བ་རྣམས། ཡུལ་ཕྱོགས་སོ་སོའི་གསར་འགྱུར་མེ་ལོང་ལོ་ ༡༠༠ འཁོར་བའི་རྗེས་དྲན་གྱི་ཚུལ་དུ་བྲིས་པ་ལགས། སླར་ཡང་ཚིག་སྦྱོར་དང་རྩོམ་འགྲོས་སོགས་མི་ལེགས་པས། ལྷན་རྒྱས་ནས་སྙིང་རྗེ་ཆེན་པོས་བཟོད་སྲན་མཛོད་ཅིག
