༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཨ་མི་རི་ཁའི་རྒྱལ་ཁབ་ཝི་ནེ་རྫོ་ལའི་དམངས་གཙོའི་འཐབ་རྩོད་པ་ལྕམ་མཱ་རི་ཡ་ལགས་སུ་འདི་ལོའི་ནོ་སྦེལ་ཞི་བདེའི་གཟེངས་རྟགས་ཐོབ་པར་འཚམས་འདྲི་མཛད།
ཟླ་འདིའི་ཕྱི་ཚེས་ ༡༠ ཉིན་ཝི་ནེ་རྫོ་ལའི་དམངས་གཙོའི་ཐོབ་ཐང་འཐབ་རྩོད་པ་ལྕམ་མཱ་རི་ཡ་ལགས་སུ་ཕྱི་ལོ་ ༢༠༢༥ ལོའི་ནོ་སྦེལ་ཞི་བདེའི་གཟེངས་རྟགས་ཐོབ་ཡོད་པ་ལྟར། ཟླ་འདིའི་ཕྱི་ཚེས་ ༡༡ ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་ཕོ་བྲང་ནས་ཁོང་མོར་འཚམས་འདྲི་མཛད་འདུག་ཅིང་། ཝི་ནེ་རྫོ་ལའི་དམངས་གཙོའི་ཐོབ་ཐང་འཐབ་རྩོད་པ་ལྕམ་མཱ་རི་ཡ་ཁོ་རི་ནཱ་མཱ་ཆཱ་ཌོ་ (Maria Corina Machado) ལགས་ཀྱིས། ཝི་ནེ་རྫོ་ལའི་མི་མང་ལ་དམངས་གཙོའི་ཐོབ་ཐང་འཕེལ་རྒྱས་སུ་གཏོང་བར་འབད་བརྩོན་གནང་བ་དང་། ཡུལ་དེའི་ནང་ཞི་བདེ་དང་དྲང་བདེན་གྱི་སྤྱི་ཚོགས་ཤིག་བསྐྲུན་ཐབས་གནང་མུས་ཡིན་སྟབས། ཁོང་གི་ལས་དོན་ལམ་ལྷོངས་ཡོང་བའི་ཐུགས་སྨོན་མཛད་འདུག
༸མགོན་པོ་གང་ཉིད་མཆོག་གི་འཚམས་འཕྲིན་ནང་། སྐུ་ཉིད་ནས་དམངས་གཙོ་ཡར་རྒྱས་གཏོང་བའི་ཆོད་སེམས་བརྟན་པོར་བཟུང་བ་དང་། བློ་སྟོབས་ཆེན་པོས་གཞན་ཕན་བསྒྲུབས་ཡོད་པ་གསལ་འདོན་གནང་ཡོད།
ཁྱེད་རང་གི་མིག་དཔེ་དེས་ང་ཚོར་བསྐྱར་དུ་དམངས་གཙོ་དང་རང་དབང་སྲུང་སྐྱོབ་བྱེད་པའི་ཆེད་དུ་སྐད་ཆ་བཤད་དགོས་པའི་དྲན་སྐུལ་བྱས་ཡོད།
ཁྱེད་རང་གིས་མི་རྣམས་ཐུན་མོང་གི་འཐབ་རྩོད་ཅིག་ཆེད་དུ་མཉམ་བསྡུ་བྱས་པ་དེས་མཐུན་སྒྲིལ་དང་་ཞི་བདེ་མངོན་འགྱུར་ཐུབ་པའི་རེ་བ་བསྟན་ཡོད། ཅེས་གསུངས།
ལྕམ་མཱ་རི་ཡ་ལགས་ནི་ཕྱི་ལོ་ ༡༩༦༧ ལོར་ཝི་ནེ་རྫོ་ལ་རྒྱལ་ཁབ་ཀྱི་ཁཱ་རཱ་ཁཱ་སི་རུ་སྐྱེས་ཡོད་ཅིང་། ཁོང་མོས་ཨིན་ཌི་རི་གཙུག་ལག་སློབ་གླིང་(Andrés Bello Catholic University) ནས་འཕྲུལ་རིག་ཐོག་ཉེ་བའི་གཙུག་ལག་རབ་འབྱམས་ཀྱི་སློབ་གཉེར་གནང་ཡོད་པ་དང་། དཔལ་འབྱོར་གཙུག་ལག་སློབ་གླིང་(Instituto de Estudios Superiores de Administración)ནས་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༩༢ ལོར་ཨ་ཌི་ནི་ཡ་ཐེབས་རྩ་(Atenea Foundation) ཞེས་པ་ཞིག་བཙུགས་ཏེ་དྭ་ཕྲུག་རྣམས་ལ་རོགས་སྐྱོབ་བྱས། ཕྱི་ལོ་ ༢༠༠༢ ལོར་རྒྱལ་སྤྱིའི་མཉམ་འབྲེལ་ཆབ་སྲིད་ཚོགས་པའི་ནང་དུ་ཞུགས། ཕྱི་ལོ་ ༢༠༡༢ ལོར་ཝེ་ནི་ཛུ་ལཱའི་སྲིད་འཛིན་གྱི་འོས་མིར་ལངས་ཡོད་ཀྱང་ཐོབ་མི་འདུག ཕྱི་ལོ་ ༢༠༡༤ ལོར་ཝེ་ནི་ཛུ་ལཱའི་སྲིད་གཞུང་ལ་ངོ་རྒོལ་བྱེད་མཁན་ཁྲོད་མགོ་ཁྲིད་པ་གཙོ་བོ་ཞིག་ཡིན་པ་དང་། ཕྱི་ལོ་ ༢༠༡༡ ནས་ ༢༠༡༤ ཝེ་ནི་ཛུ་ལཱ་གྲོས་ཚོགས་འཐུས་མིར་བདམས་འདུག ཕྱི་ལོ་ ༢༠༢༤ ལོར་ཁ་གཏད་ཆབ་སྲིད་ཚོགས་པའི་སྲིད་འཛིན་འོས་མི་འགོག་ཆེད་འོས་མིར་ལངས་ཡོད་ཀྱང་ཐོབ་མེད་པ་རེད།
གསར་འགོད་པ། སྐལ་བཟང་སྦྱིན་པ།
