ཞིང་གཤེགས་དམ་པ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་ལགས་སུ་སྙིང་སྟོབས་གཟེངས་རྟགས་ཕུལ།

ཞིང་གཤེགས་དམ་པ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་ལགས་སུ་ཕྱི་ལོ་ ༢༠༢༥ ལོའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་ཕུལ།

ལོ་རེའི་ཕྱི་ཟླ་ ༡༠ ཚེས་ ༡༣ ཉིན་རྒྱ་ནག་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱའི་བཙོན་ཁང་དུ་སྐུ་དཀྲོངས་པའི་ཉིན་མོར་སྲུང་གཙི་གནང་གི་ཡོད་པ་དང་བསྟུན། དེ་རིང་བཞུགས་སྒར་དུ་རྒྱལ་སྤྱིའི་བོད་ཀྱི་འབྲེལ་མཐུད་ལས་ཁང་གི་མཐུན་འགྱུར་དང་། བོད་ཀྱི་གཞོན་ནུ་ལྷན་ཚོགས་དང་བོད་ཀྱི་བུད་མེད་ལྷན་ཚོགས། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱི་གོ་སྒྲིག་འོག ཞིང་གཤེགས་དམ་པ་ཁོང་ལ་རྗེས་དྲན་གྱི་མཛད་སྒོ་ཞིག་འཚོགས་སོང་བ་དང་། མཛད་སྒོའི་ཐོག་འདི་ལོའི་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དེ། ཞིང་གཤེགས་དམ་པ་མཆོག་སྤྲུལ་ཧཱུྃ་ཀར་རྡོ་རྗེ་རིན་པོ་ཆེ་ལགས་སུ་ཕུལ་སོང་།

དེ་ཡང་སྔ་དྲོ་ཆུ་ཚོད་ ༡༡ སྟེང་དྷ་ས་ས་གནས་མགོ་འཛིན་གྱི་ཚོགས་ཁང་དུ། བོད་ཀྱི་གཞུང་འབྲེལ་མིན་པའི་ཚོགས་པ་ལྔ་ཡི་གོ་སྒྲིག་འོག ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་དཀྲོངས་ནས་ལོ་ངོ་བཅུ་འཁོར་བའི་རྗེས་དྲན་མཛད་སྒོ་ཞིག་འཚོགས་ཤིང་། མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་བདེ་སྲུང་བཀའ་སློབ་རྒྱ་རི་རྒྱལ་མ་མཆོག་ཕེབས་ཏེ་དམ་པ་ཁོང་གི་སྐུ་ཚེ་མཛད་འཕྲིན་དང་འབྲེལ་བའི་གསུང་བཤད་གནང་སོང་ལ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་གི་ཁང་གི་སྤྱི་ཁྱབ་རྩོམ་སྒྲིག་པ་འཇུ་བསྟན་སྐྱོང་ལགས་ཀྱིས་ཧཱུྃ་ཀར་རྡོ་རྗེ་རིན་པོ་ཆེ་ལགས་ཀྱི་སྐུ་འཁོར་ནང་མིའི་ཚབ་ཏུ་སྙིང་སྟོབས་གཟེངས་རྟགས་འབུལ་ལེན་བྱས་ཡོད།

བོད་ཀྱི་གཞུང་འབྲེལ་མིན་པའི་ཚོགས་པ་ལྔ་ཡིས། མི་ལོ་བཅུའི་ཡར་སྔོན་དུ། རྒྱའི་བཙོན་ཁང་དུ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་སྐུ་གཤེགས་པ་ནི་འཇིག་རྟེན་འདིར་རེ་བ་དང་འཚེ་མེད་ཞི་བའི་སྒྲོན་མེ་ཞིག་གཏན་དུ་བོར་བརླག་ཏུ་བཏང་བ་ཡིན། རིན་པོ་ཆེས་མི་ལོ་བཅུ་གསུམ་རིང་རྒྱའི་བཙོན་ཁང་དུ་ནག་ཉེས་གང་ཡང་མེད་པར་དཀའ་སྡུག་མྱངས་ཡོད། ཁོང་གློ་བུར་རྐྱེན་འདས་སུ་ཕྱིན་པ་དེས་རྒྱ་ནག་གཞུང་གིས་བོད་ལ་དྲག་པོའི་གཉའ་གནོན་དང་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་མུས་ཡིན་པ་མཚོན་གྱི་ཡོད།

རྒྱ་ནག་གིས་བོད་ལ་ཁྲིམས་འགལ་གྱིས་བཙན་འཛུལ་བྱས་ཏེ་དྲག་གནོན་ཤུགས་ཆེན་བྱེད་བཞིན་པའི་ཛ་དྲག་གི་གནས་སྟངས་འོག་ནས་བསྟན་འཛིན་བདེ་ལེགས་རིན་པོ་ཆེས་སྐུ་ཚེ་ཧྲིལ་པོ་བོད་ཀྱི་སྐད་ཡིག་རིག་གཞུང་ཉར་ཚགས་བྱེད་པའི་ཐད་བློས་བཏང་ཡོད་ལ། ཁོང་ནི་རྒྱ་ནག་དམར་ཤོག་ཚོགས་པས་ཁ་གཏད་ཀྱི་ཉེན་ཁ་ཞིག་ཏུ་མཐོང་ནས་མི་ཆོས་ལས་འདས་པའི་བརྙས་བཅོས་དང་འཇིགས་སྐུལ། ཁྲིམས་ཆད་སོགས་བཅད་ཡོད། འོན་ཀྱང་། ཁོང་གིས་བོད་མི་མང་གི་རང་དབང་དང་དྲང་བདེན་གྱི་ཆེད་དུ་བདམས་པའི་བློ་སྟོབས་ལ་འགྱུར་བ་མེད་པར་གནས་པ་དེས་ང་ཚོ་ཚང་མར་སེམས་ཤུགས་སྐྱེད་མུས་ཡིན། ཞེས་བརྗོད་འདུག

སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་དེ། ཕྱི་ལོ་ ༢༠༡༦ ལོར་ཐོག་མར་ཕུལ་དགོས་བཙུགས་པ་དང་། གཟེངས་རྟགས་དེ་ནི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་ཆེད་ཕྱག་ལས་གནང་མཁན་གྱི་ཚོགས་སྡེ་བོད་དང་བོད་དོན་རྒྱབ་སྐྱོར་བ་བཅས་ལ་ཕུལ་སྲོལ་ཡོད་པ་ལྟར། ཕྱི་ལོ་ ༢༠༢༤ ལོའི་སྙིང་སྟོབས་གཟེངས་རྟགས་དེ་ཁམས་སྡེ་དགེའི་མི་མང་ལ་ཕུལ། ཕྱི་ལོ་ ༢༠༢༣ ལོའི་གཟེངས་རྟགས་བོད་ཀྱི་ཆབ་སྲིད་བཙོན་པ་རྡོ་རྗེ་བཀྲ་ཤིས་དང་མགོན་པོ་སྐྱིད་གཉིས་ལ་ཕུལ། ཕྱི་ལོ་ ༢༠༢༢ ལོར་ཨ་ཉག་སེང་སྒྲ། ཕྱི་ལོ་ ༢༠༡༩ ལོར་པཎ་ཆེན་ཆུང་སྲིད་རིན་པོ་ཆེ་མཆོག ཕྱི་ལོ་ ༢༠༡༨ ལོར་འཇིགས་བྲལ་གློག་བརྙན་བཟོ་བསྐྲུན་མཁན་དང་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་དང་དོན་འགྲུབ་དབང་ཆེན་གཉིས། ཕྱི་ལོ་ ༢༠༡༧ ལོར་བོད་ཀྱི་སྐད་ཡིག་སྲུང་སྐྱོབ་ལས་འགུལ་བ་བཀྲ་ཤིས་དབང་ཕྱུག་ལགས་སུ་གཟེངས་རྟགས་དེ་ཕུལ་འདུག་ལ། སྙིང་སྟོབས་གཟེངས་རྟགས་ཐོག་མ་སྟེ། ཕྱི་ལོ་ ༢༠༡༦ ལོའི་གཟེངས་རྟགས་དེ་བོད་ཀྱི་ཆབ་སྲིད་བཙོན་པ་ཡེ་ཤེས་ཆོས་སྒྲོན་ལགས་སུ་ཕུལ་ཡོད་འདུག

གསར་འགོད་པ། སྐལ་བཟང་སྦྱིན་པ།