དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་ཉི་ཧོང་གི་བུད་མེད་སྲིད་བློན་ཐོག་མ་ལྕམ་སྐུ་ས་ནའེ་ཊ་ཀའེ་ཆི་ (Sanae Takaichi) ལགས་སུ་འཚམས་འཕྲིན་སྩལ།
༸གོང་ས་རྒྱལ་བ་རིན་པོ་ཆེ་མཆོག་ནས་འཚམས་འཕྲིན་སྩལ་བའི་ནང་། འཛམ་གླིང་ནང་གདོང་ལེན་བྱེད་དགོས་པའི་གཉན་འཕྲང་གི་དུས་སྐབས་འདིར། ཁྱེད་ཀྱིས་ལོ་ངོ་བཅུ་ཕྲག་འགའི་རིང་སྤྱི་ཚོགས་ཞབས་འདེགས་ཞུས་པའི་ཉམས་མྱོང་གིས་ཉི་ཧོང་གི་ལོ་རྒྱུས་སུ་གལ་གནད་ཆེ་བའི་དུས་སྐབས་འདི་སྣེ་ཁྲིད་བྱེད་པར་ཕན་ཐོགས་ཆེན་པོ་ཡོང་བར་ཐེ་ཚོམ་མེད། ཅེས་དང་། རྡུལ་ཕྲན་མཚོན་ཆའི་འཇབ་རྒོལ་རྐྱེན་གྱིས་དཀའ་སྡུག་ཚད་མེད་མྱངས་ཡོད་པར་བརྟེན། ཉི་ཧོང་གིས་འཛམ་གླིང་ནང་ཞི་བདེ་བསྐྲུན་པར་སྣེ་ཁྲིད་ཀྱིས་འབད་བརྩོན་བྱས་ཡོད་ལ། དེ་ནི་རྡུལ་ཕྲན་མཚོན་ཆ་རྩ་མེད་གཏོང་བའི་བྱ་གཞག་རླབས་ཆེན་ཞིག་ཡིན། ལྷག་པར་དུ་འཛམ་གླིང་གི་ས་ཁུང་མང་པོར་ངེས་གཏན་མེད་པ་དང་འགྱུར་བ་ཆེན་པོ་འབྱུང་བཞིན་པའི་དུས་སྐབས་འདིར། གྲོས་མོལ་དང་ཕྱི་འབྲེལ་གྱི་ཐོག་ནས་དཀའ་ངལ་སེལ་ཐབས་ཀྱི་འབད་བརྩོན་བྱ་རྒྱུ་གལ་འགངས་ཆེན་པོ་རེད། ཅེས་གསུངས།
༸མགོན་པོ་མཆོག་གིས། ཁྱེད་རང་ལ་ཉི་ཧོང་གི་སྲིད་བློན་གྱི་འོས་བསྡུའི་རྒྱལ་ཁ་ཐོབ་པའི་སྒེར་གྱི་ལེགས་འགྲུབ་ཙམ་དུ་མ་ཟད། ཉི་ཧོང་གིས་ཁྱེད་རང་བུད་མེད་སྲིད་བློན་ཐོག་མར་བདམས་པར་ངོས་རང་དགའ་པོ་བྱུང་། ངོས་ནས་ཐོག་མར་ངོས་རང་གི་བརྩེ་བའི་ཨ་མ་ལགས་ནས་སྦྱངས་པའི་ཁྱད་ཆོས་ནི། བུད་མེད་རྣམས་གཞན་གྱི་ཚོར་སྣང་ལ་བྱམས་བརྩེ་ཆེ་བ་དང་ཚོར་སྣང་སྐྱེན་པོ་ཡོད་པར་ཡིད་ཆེས་བྱེད་ཀྱི་ཡོད། དེ་བཞིན་བྱམས་བརྩེའི་ཐོག་ཚན་རིག་གིས་དཔྱད་ཞིབ་བྱས་པ་བརྒྱུད། བུད་མེད་རྣམས་གཞན་གྱི་ན་ཟུག་ལ་ཚོར་བ་སྐྱེན་པོ་དང་ཚོར་སྣང་ཆེ་བ་ཡོད་པའི་དཔང་རྟགས་ཀྱང་ཡོད། དེར་བརྟེན་ངོས་ནས་བུད་མེད་ཀྱི་མགོ་ཁྲིད་མང་བ་ཡོད་ཚེ། འཛམ་གླིང་འདིར་བསམ་ཤེས་ཆེ་བ་དང་ཞི་བདེ་ལྡན་པ་ཞིག་ཏུ་འགྱུར་རྒྱུའི་ཡིད་ཆེས་བརྟན་པོ་ཡོད། ཁྱེད་ནས་ཉི་ཧོང་དང་འཛམ་གླིང་ཁྱོན་ཡོངས་སུ་བདེ་སྐྱིད་སྲ་བརྟན་དུ་གཏོང་བར་འགོག་རྐྱེན་འཕྲད་པའི་དཀའ་ངལ་ལ་གདོང་ལེན་དང་གོ་སྐབས་འཛིན་ཐུབ་པའི་སྨོན་འདུན་ཡོད། ཅེས་གསུངས།
ལྕམ་སྐུ་ས་ནའེ་ཊ་ཀའེ་ཆི་ལགས་ནི་ཕྱི་ལོ་ ༡༩༦༡ ཟླ་ ༣ ཚེས་ ༧ ཉིན་ཉི་ཧོང་གི་ནཱ་རཱ་ཁུལ་ (Nara) དུ་ཡོད་པའི་ཡཱ་མ་ཏོ་ཀོ་རི་ཡཱ་མ་ (Yamatokōriyama) གྲོང་ཁྱེར་དུ་སྐྱེས་ཤིང་། ནཱ་རཱ་ཁུལ་གྱི་ཨུ་ནེ་བྷི་མཐོ་རིམ་སློབ་གྲྭ་ (Nara Prefectural Unebi High School) ནས་འབྲིང་རིམ་སློབ་སྦྱོང་བྱས་པ་དང་། ཀོ་བྷེ་གཙུག་ལག་སློབ་གཉེར་ཁང་ (Kobe University) ནས་ཚོང་རིག་གི་ཉེ་བའི་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༨༩ ཟླ་ ༣ པའི་ནང་ཉི་ཧོང་གི་ཨ་ས་ཧི་རླུང་འཕྲིན་ཁང་ (TV Asahi) དུ་གསར་འགོད་མདོ་འཛིན་པའི་ཕྱག་ལས་གནང་བ་མ་ཟད། ཕྱི་ལོ་ ༡༩༩༠ ཟླ་ ༡༡ ནང་ཧྥུ་ཇི་རླུང་འཕྲིན་ཁང་ (Fuji Television) གི་མདོ་འཛིན་པའི་ལས་གནས་གཉེར། ཕྱི་ལོ་ ༡༩༩༣ ནས་ ༢༠༠༣ བར་ཉི་ཧོང་གི་གྲོས་ཚོགས་འོག་མའི་འཐུས་མི་དང་། ནང་སྲིད་དང་བརྡ་འཕྲིན་བློན་ཆེན་གྱི་ཕྱག་ལས་གནང་། ཕྱི་ལོ་ ༢༠༢༢ ནས་ ༢༠༢༤ བར་དཔལ་འབྱོར་བདེ་འཇགས་བློན་ཆེན་གྱི་འགན་འཁུར་བཞེས། ཟླ་འདིའི་ཕྱི་ཚེས་ ༤ ཉིན་གུ་ཡངས་དམངས་གཙོ་སྲིད་དོན་ཚོགས་པའི་ཚོགས་གཙོར་བདམས། ཟླ་འདིའི་ཕྱི་ཚེས་ ༢༡ ཉིན་ཉི་ཧོང་གྲོས་ཚོགས་གོང་འོག་གཉིས་ཀྱིས་ལྕམ་སྐུ་ས་ནའེ་ཊ་ཀའེ་ཆི་ལགས་རྒྱལ་ཁབ་ཀྱི་བུད་མེད་སྲིད་བློན་ཐོག་མར་འོས་འདེམས་བྱས།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
