བོད་ཀྱི་སྐད་ཡིག་རིག་གཞུང་སྲུང་སྐྱོབ་ཐད་བྱས་རྗེས་ཆེ་བའི་འབུམ་རམས་པ་དགེ་བཤེས་བློ་བཟང་སྨོན་ལམ་ལགས་དང་འགྲོ་བ་མིའི་ཐོབ་ཐང་སྲུང་སྐྱོབ་པ་འབུམ་རམས་པ་ལྕམ་སོ་ཧྥི་རི་ཆར་ཌི་སོན་ལགས་རྣམ་གཉིས་ལ་ཕྱི་ལོ་ ༢༠༢༥ ལོའི་གངས་སེང་འགྲོ་བ་མིའི་ཐོབ་ཐང་གཟེངས་རྟགས་ཐོབ།
ཟླ་འདིའི་ཕྱི་ཚེས་ ༢༥ ཉིན་ཡུ་རོབ་འཇར་མན་རྒྱལ་ཁབ་ཀྱི་བྷར་ལིན་ (Berlin) གྲོང་ཁྱེར་དུ། རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་འགན་འཛིན་འབུམ་རམས་པ་དགེ་བཤེས་བློ་བཟང་སྨོན་ལམ་ལགས་དང་། འགྲོ་བ་མིའི་ཐོབ་ཐང་སྲུང་སྐྱོབ་པ་འབུམ་རམས་པ་ལྕམ་སོ་ཧྥི་རི་ཆར་ཌི་སོན་ (Dr. Sophie Richardson) ལགས་རྣམ་གཉིས་ལ་གངས་སེང་འགྲོ་བ་མིའི་ཐོབ་ཐང་ཞེས་པའི་གཟེངས་རྟགས་ཕུལ་འདུག
མཛད་སྒོའི་ཐོག་དམིགས་བསལ་སྐུ་མགྲོན་འཇར་མན་གྲོས་ཚོགས་འཐུས་མི་སྐུ་ཞབས་མའེ་ཁལ་ (Mr. Michael Brand) ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རི་ཆར་ཌི་གྷེར་ (Richard Gere) ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྤྱི་ཟུར་བསྟན་ཆོས་རྒྱ་མཚོ་ལགས། བྲག་གཡབ་སྐྱབས་མགོན་རིན་པོ་ཆེ། སྤྲུལ་སྐུ་ཐོས་བསམ་རིན་པོ་ཆེ། ས་གནས་བོད་རིགས་མཐུན་ཚོགས་ཀྱི་ཚོགས་མི། ཡུལ་དེར་གནས་སྡོད་བོད་མི། དེ་བཞིན་ཕྱི་རྒྱལ་གྱི་གཞུང་ཚབ་ཁག་ཅིག་བཅས་མཉམ་ཞུགས་གནང་ཡོད་འདུག
དགེ་བཤེས་བློ་བཟང་སྨོན་ལམ་ལགས་ཀྱིས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གསར་འཛུགས་གནང་སྟེ། སྨོན་ལམ་བོད་ཀྱི་ཚིག་མཛོད་ཆེན་མོ་དང་སྨོན་ལམ་མིས་བཟོས་རིག་ནུས་སོགས་ལོ་མང་པོའི་རིང་འཕྲུལ་རིག་དང་འབྲེལ་བའི་ཕྱག་ལས་འབུར་དུ་ཐོན་པ་གནང་བ་དང་། དམིགས་བསལ་གྱིས་བོད་ཀྱི་སྐད་ཡིག་སྲུང་སྐྱོབ་དང་དར་སྤེལ་ཆེད་ལས་གཞི་སྣ་ཚོགས་བརྩམས་དང་རྩོམ་བཞིན་པར་ཆེ་བསྟོད་ངོས་འཛིན་དུ་ཕུལ་བ་ཞིག་ཡིན་འདུག
དེ་བཞིན་འགྲོ་བ་མིའི་ཐོབ་ཐང་ལྟ་ཞིབ་ཁང་གི་རྒྱ་ནག་ཚན་པའི་འགན་འཛིན་ཟུར་པ་དང་། རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པའི་མཉམ་འབྲེལ་འགན་འཛིན་འབུམ་རམས་པ་ལྕམ་སོ་ཧྥི་ལགས་ཀྱིས་ལོ་བཅུ་ཕྲག་གཉིས་ལྷག་གི་རིང་རྒྱ་ནག་དང་བོད་ནང་གི་འགྲོ་བ་མིའི་ཐོང་ཐང་རྡོག་རོལ་བཏང་དང་གཏོང་བཞིན་པའི་གནད་དོན་གསལ་སྟོན་དང་ཞུ་གཏུག་བྱས་པར་ཆེ་བསྟོད་དུ་གཟེངས་རྟགས་དེ་ཕུལ་བ་ཞིག་ཡིན་འདུག ཁོང་མོ་ནི་ཤར་ཨེ་ཤ་ཡའི་འགྲོ་བ་མིའི་ཐོབ་ཐང་ཐད་གླེང་སློང་བྱེད་མཁན་གཙོ་བོ་ཞིག་ཡིན་པ་རེད།
རྒྱལ་སྤྱིའི་བོད་དོན་ལས་འགུལ་ཁང་གིས་གངས་སེང་འགྲོ་བ་མིའི་ཐོབ་ཐང་ཞེས་པའི་གཟེངས་རྟགས་དེ་བོད་དང་ཤར་ཊུར་ཀི་སི་ཐན། རྒྱ་ནག ལྷོ་སོག ཧོང་ཀོང་། ཐའེ་ཝན་བཅས་ཀྱི་འགྲོ་བ་མིའི་ཐོབ་ཐང་གཙོ་བོར་གྱུར་བའི་སྤྱི་ཚོགས་དང་། ཆབ་སྲིད། རིག་གཞུང་སྲུང་སྐྱོབ་དང་གོང་འཕེལ་གཏོང་རྒྱུའི་ཐད་སྐུ་ལས་བསྐྱོན་མཁན་གྱི་ཚོགས་སྒེར་ཁག་གི་ཆོད་སེམས་ལ་ཡི་རངས་བསྔགས་བརྗོད་ཞུ་བའི་ཆེད་དུ་འབུལ་སྲོལ་ཡོད་པ་རེད།
འདས་ལོའི་ཕྱི་ཟླ་ ༣ ཚེས་ ༡༦ ཉིན་ཨ་རིར་རྟེན་གཞི་བྱས་པའི་བོད་དོན་ལས་འགུལ་ལྟེ་གནས་ཁང་ (Tibet Action Institute) གི་ངེས་སྟོན་པ་བཀྲས་མཐོང་ལྷ་སྒྲོན་ལགས་དང་། ཧོང་ཀོང་རང་དབང་མཐུན་ཚོགས་ (Freedom for Hong Kong) གཉིས་ལ་གངས་སེང་འགྲོ་བ་མིའི་ཐོབ་ཐང་ཞེས་པའི་གཟེངས་རྟགས་ཐོབ་ཡོད་པ་རེད། ཕྱི་ལོ་ ༢༠༢༢ ཟླ་ ༡༠ ཚེས་ ༡༥ ཉིན་མི་རྒྱུད་རིག་པ་བ་དང་རྒྱ་ནག་སྐོར་གྱི་ཉམས་ཞིབ་པ་འབུམ་རམས་པ་ཨེ་ཌེ་རི་ཨན་ (Adrian Zenz) ལགས་དང་བོད་ཀྱི་གློག་བརྙན་དུས་སྟོན་ཞེས་པ་གཉིས་ལ་གངས་སེང་འགྲོ་བ་མིའི་ཐོབ་ཐང་ཞེས་པའི་གཟེངས་རྟགས་ཐོབ་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
