དབུས་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གིས་རྒྱ་གར་ལྷོ་ཕྱོགས་དང་། བྱང་ཤར་ཁུལ། བྱང་ཕྱོགས་ཁུལ་བཅས་སུ་ཕྱི་ལོ་ ༢༠༢༥་་༢༠༢༦ ལོའི་བཙན་བྱོལ་བོད་མིའི་འོས་བསྡུ་ཆེན་མོའི་སྐོར་ལ་གོ་རྟོགས་སྤེལ་བཞིན་འདུག
བཙན་བྱོལ་བོད་མིའི་ཕྱི་ལོ་ ༢༠༢༥་་་༢༦ ལོའི་འོས་བསྡུ་ཆེན་མོའི་ལས་རིམ་ཟླ་འདིའི་ཕྱི་ཚེས་ ༧ ཉིན་ནས་དངོས་སུ་མགོ་འཛུགས་གནང་བའི་གསལ་བསྒྲགས་གནང་ཡོད་པ་ལྟར། འདི་ལོའི་ཕྱི་ཟླ་ ༡༠ ཚེས་ ༨ ནས་ཕྱི་ཟླ་ ༡༡ ཚེས་ ༨ བར་འོས་འཕེན་པའི་མིང་གཞུང་དེབ་འགོད་ཟིན་པ་གནང་རྒྱུ་དང་། འདི་ལོའི་ཕྱི་ཟླ་ ༡༡ ཚེས་ ༢༣ བར་བོད་མི་རང་ལོ་ ༡༨ ཧྲིལ་པོར་ལོན་པ་ཚོས་མིང་གཞུང་དེབ་འགོད་ཟིན་རྗེས། ཕྱི་ལོ་ ༢༠༢༦ ལོའི་ཟླ་ ༢ ཚེས་ ༡ ཉིན་སྔོན་འགྲོ་དང་། ཕྱི་ཟླ་ ༤ ཚེས་ ༢༦ ཉིན་དངོས་གཞིའི་འོས་འཕེན་རྒྱུ་ཡིན་སྟབས། དབུས་འོས་བསྡུ་ལས་ཁང་གི་འོས་བསྡུའི་གོ་རྟོགས་སྤེལ་ཆེད་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་དང་། འགན་འཛིན་ལས་འཕར་ཚེ་རིང་གཡུ་སྒྲོན་ལགས། འགན་འཛིན་ལས་འཕར་སྣང་ས་ཆོས་སྒྲོན་ལགས་བཅས་རྒྱ་གར་ལྷོ་ཕྱོགས་ཁུལ་དང་། རྒྱ་གར་བྱང་ཤར་ཁུལ། རྒྱ་གར་བྱང་ཕྱོགས་ཁུལ་བཅས་སུ་ས་གནས་ཆ་བགོས་ཀྱིས་གཞུང་འབྲེལ་ཕྱོགས་ཕེབས་གནང་བཞིན་འདུག་ལ། མུ་མཐུད་ནས་བཙན་བྱོལ་བོད་མིའི་གནས་ཡུལ་ཕྱི་རྒྱལ་ཁག་ཏུའང་གཞུང་འབྲེལ་སྐོར་སྐྱོད་གནང་སྟེ་འོས་བསྡུ་དང་འབྲེལ་བའི་གོ་རྟོགས་སྤེལ་གནང་འཆར་ཡོད་འདུག
སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་ཀྱིས་ཟླ་འདིའི་ཕྱི་ཚེས་ ༡༦ ནས་ ༢༢ བར་སྦེལ་ཀོབ་བདེ་སྐྱིད་སླར་གསོ་དང་། ལུགས་ཟུང་བསམ་གྲུབ་གླིང་། ཧོན་སུར་རབ་རྒྱས་གླིང། སེར་བྱེས་མཁས་སྙན་གྲྭ་ཚང་དང་། ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་། སྨད་རྒྱུད་གྲྭ་ཚང་། རྫོང་དཀར་ཆོས་སྡེ་གྲྭ་ཚང་། དེ་བཞིན་མོན་གྷོ་གཞིས་ཆགས། ཀོ་ལི་གྷལ་དོན་ལྡན་གླིང་བཅས་ལ་བཙན་བྱོལ་བོད་མིའི་ལས་འགན་དང་། ཕྱི་ལོ་ ༢༠༢༥་་༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོ་དང་འབྲེལ་བའི་འོས་བསྡུའི་སྒྲིག་གཞི་དང༌། ལས་རིམ། རྩ་འཛིན་ལམ་སྟོན་ཁག་ངོ་སྤྲོད་ཀྱིས་མང་ཚོགས་ལ་གོ་རྟོགས་གཏམ་བཤད་དང་དྲི་བར་ལན་འདེབས་གནང་འདུག
དེ་བཞིན་ཟླ་འདིའི་ཕྱི་ཚེས་ ༢༣ ནས་ ༢༦ བར་རྒྱ་གར་ལྷོ་ཕྱོགས་མེ་སོར་ཁྱབ་ཁོངས་སུ་སློབ་གཉེར་གནང་བཞིན་པའི་སློབ་ཕྲུག་གྲངས་ ༥༠ ཙམ་དང་། སྦེང་ལོར་ཏཱ་ལའི་བླ་མ་མཐོ་སློབ་ཀྱི་དགེ་ལས་སློབ་ཕྲུག་གྲངས་ ༡༥༠ དང་ཁྱབ་ཁོངས་མི་མང་། དེ་བཞིན་ཨོ་ཌི་ཤ་ཕུན་ཚོགས་གླིང་བཅས་སུ་འོས་བསྡུ་དང་འབྲེལ་བའི་གཏམ་བཤད་དང་དྲི་བར་ལན་འདེབས་གནང་འདུག
ཟླ་འདིའི་ཕྱི་ཚེས་ ༡༦ ནས་ ༢༧ བར་རྒྱ་གར་བྱང་ཤར་ཁུལ་གྱི་ཀ་སྦུག་དང་། བསུ་ན་མདའ་བཀྲ་ཤིས་གླིང་། རྡོ་རྗེ་གླིང་། སྒང་ཏོག། ར་ཝང་ལ་ཀུན་ཕན་གླིང་བཅས་བོད་མིའི་གཞིས་ཆགས་ཁག་ཏུ། དབུས་འོས་བསྡུ་ལས་ཁང་གི་འགན་འཛིན་ལས་འཕར་ཚེ་རིང་གཡུ་སྒྲོན་ལགས་ཀྱིས་དམངས་གཙོའི་ལམ་ནས་མི་མང་གིས་འོས་འཕེན་པའི་ལས་འགན་དང་རང་དབང་སྐོར་ངོ་སྤྲོད་དང་། མི་མང་གིས་འོས་བསྡུའི་ནང་མཉམ་ཞུགས་བྱེད་དགོས་པའི་གལ་གནད་དང་། འོས་བསྡུའི་བརྒྱུད་རིམ་ཁྲོད་དྲང་བདེན་དང་ཕྱི་གསལ་ནང་གསལ་བྱ་དགོས་སྐོར་གཏམ་བཤད་གནང་ཡོད་འདུག ཟླ་འདིའི་ཕྱི་ཚེས་ ༡༦ ནས་ ༡༩ བར་ཤིས་ལོང་དང་། མེའོ་ཆོས་འཕེལ་གླིང། ཏི་ཛུ་དར་རྒྱས་གླིང་བཅས་སུ་ས་གནས་མི་མང་ལ་འོས་བསྡུའི་སྒྲིག་གཞི་དང་། ལས་རིམ། དེ་བཞིན་རྩ་འཛིན་ཁག་ངོ་སྤྲོད་གནང་བ་མ་ཟད། ས་གནས་འོས་བསྡུའི་ཚོགས་མི་རྣམས་དང་ཐུག་འཕྲད་གནང་སྟེ་འོས་བསྡུ་དང་འབྲེལ་བའི་ལམ་སྟོན་གྱི་དྲི་བར་ལན་འདེབས་གསལ་བཤད་གནང་འདུག
དེ་བཞིན་ཟླ་འདིའི་ཕྱི་ཚེས་ ༡༥ ནས་ ༢༢ བར་སིམ་ལ་དང་། ཌོ་ལན་ཇི་བོན་གཞིས། ཀུམ་རའོ། ས་ཊོན། སྤུ་རུ་ཝ་ལ། སྤོན་ཊ། སེ་ལ་ཀུའི་བོད་ཁྱིམ། གླིང་ཚང་། དོན་གྲུབ་གླིང་། ཚེ་རིང་དོན་ལྡན། བདེ་སྐྱིད་གླིང་། རཱ་ཇི་སྤུར་བུད་མེད་མཉམ་ལས་བཟོ་གྲྭ་བཅས་སུ། དབུས་འོས་བསྡུ་ལས་ཁང་གི་འགན་འཛིན་ལས་འཕར་སྣང་ས་ཆོས་སྒྲོན་ལགས་ཀྱིས་བཙན་བྱོལ་བོད་མིའི་དམངས་གཙོའི་འཕེལ་རིམ་དང་། འོས་བསྡུ་ཆེན་མོའི་ནང་བོད་མི་ཆ་ཤས་གང་མང་ལེན་དགོས་པའི་གལ་གནད་དང་། འོས་བསྡུའི་སྒྲིག་གཞིའི་དགོངས་དོན། འོས་འཕེན་པའི་མིང་གཞུང་དེབ་འགོད་བྱེད་ཕྱོགས། འོས་འཕེན་སྟངས་དང་གསང་རྒྱ། འོས་ཤོག་གྲངས་བཤེར་སྐབས་འོས་རྩིས་མེད་དུ་གཏོང་ཕྱོགས། འོས་བསྡུའི་ལས་དོན་ལ་འགལ་རྐྱེན་བྱེད་པོར་ཉེས་ཆད་སོགས་ཀྱི་སྐོར་གཏམ་བཤད་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
