༸གོང་ས་རྒྱལ་བ་རིན་པོ་ཆེ་མཆོག་ནས་ལྕམ་སྐུ་ཁེ་ཐི་རི་ནེ་ཁོ་ནོ་ལིས་ (Catherine Connolly) ལགས་ཨེ་རི་ལན་ཌིའི་སྲིད་འཛིན་དུ་བདམས་ཐོན་བྱུང་བར་འཚམས་འཕྲིན་སྩལ།
༸གོང་ས་རྒྱལ་བ་རིན་པོ་ཆེ་མཆོག་གིས་འཚམས་འཕྲིན་སྩལ་བའི་ནང་། འཛམ་གླིང་ནང་གདོང་ལེན་བྱེད་དགོས་པའི་གཉན་འཕྲང་གི་དུས་སྐབས་འདིར། ཁྱེད་ཀྱིས་ལོ་མང་པོའི་རིང་སྤྱི་ཚོགས་ཞབས་ཞུ་བསྒྲུབས་པའི་ཉམས་མྱོང་གིས་གདོང་ལེན་བྱེད་པར་ཕན་ཐོགས་ཆེན་པོ་ཡོང་ངེས་རེད། ཅེས་དང་། ཁྱེད་ཀྱི་འོས་བསྡུའི་རྒྱལ་ཁ་ནི་ཁྱེད་རང་གི་མི་ཚེའི་གྲུབ་འབྲས་ཆེ་ཤོས་ཤིག་ཡིན་ལ། ཁྱེད་ཀྱི་རྒྱལ་ཁབ་ཀྱིས་བུད་མེད་སྲིད་འཛིན་ཞིག་བསྐྱར་དུ་འོས་འདེམས་བྱས་པར་ངོས་རང་དགའ་སྤྲོ་ཆེན་པོ་བྱུང་། ཁྱེད་ཀྱིས་མཁྱེན་གསལ་ལྟར། སྙིང་རྗེའི་སྐོར་ལ་བུད་མེད་རྣམས་ནི་མི་གཞན་པའི་ཐོག་ཚོར་བ་སྐྱེན་པོ་ཡོད་པ་ཚན་རིག་གི་དཔང་རྟགས་བྱས་ཡོད་པར་བརྟེན། ངོས་ཀྱིས་ང་ཚོའི་མགོ་ཁྲིད་མང་ཆེ་ཤོས་བུད་མེད་ཡིན་ཚེ། འཛམ་གླིང་འདིར་བསམ་ཤེས་ཆེ་བ་དང་ཞི་བདེ་ལྡན་པའི་་གནས་ཤིག་ཏུ་འགྱུར་བར་ཡིད་ཆེས་བྱེད་ཀྱི་ཡོད།
ཁྱེད་ནས་འཛམ་གླིང་ཁྱོན་ཡོངས་སུ་བདེ་སྐྱིད་སྲ་བརྟན་དུ་གཏོང་བར་འགོག་རྐྱེན་འཕྲད་པའི་དཀའ་ངལ་ལ་གདོང་ལེན་དང་གོ་སྐབས་འཛིན་ཐུབ་པའི་སྨོན་འདུན་ཡོད། མ་འོངས་པར་དཀའ་ངལ་ལས་རྣམ་པར་རྒྱལ་སྟེ་ཨེ་རི་ལན་ཌིའི་མི་མང་གི་རེ་བ་དང་འདུན་པ་ལེགས་འགྲུབ་ཡོང་བའི་སྨོན་འདུན་ཡོད། ཅེས་གསུངས་འདུག
ཁེ་ཐི་རི་ནེ་ཁོ་ནོ་ལིས་ (Catherine Connolly) ལགས་ནི་ཕྱི་ལོ་ ༡༩༥༧ ལོར་གྷལ་ཝ་གྲོང་ཁྱེར་གྱི་ཤན་ཌ་ལར་ས་གནས་སུ་སྐྱེས་ཡོད་ཅིང་། ཁོང་མོ་ནི་སྤུན་མཆེད་བཅུ་བཞི་ཡོད་པའི་ནང་གི་དགུ་པ་དེ་ཡིན་འདུག ཁོང་མོའི་ཨ་ཕ་ནི་གྷལ་ཝེ་ཡི་ཧུག་གར་གྲུ་ཁའི་གྲུ་གཟིངས་བཟོ་མཁན་གྱི་ཤིང་བཟོ་བ་ཞིག་ཡིན་པ་དང་། ཁོང་མོ་ལོ་དགུ་ཡིན་པའི་སྐབས་སུ་ཨ་མ་འདས་གྲོངས་སུ་ཕྱིན་འདུག ཕྱི་ལོ་ ༡༩༧༠ ལོར་ཁོ་མོས་ཤན་ཊ་ལར་ཊེ་ནི་སི་རྩེད་ཐང་བསྐྲུན་རྒྱུའི་ལས་འགུལ་གྱི་སྣེ་ཁྲིད་བྱས། ཕྱི་ལོ་ ༡༩༧༠ ལོའི་མཇུག་ཏུ་གྷལ་ཝེ་གཙུག་ལག་སློབ་གྲྭ་ཆེན་མོ་ནས་ (Galway) སེམས་ཁམས་རིག་པའི་ཐོག་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན། ཕྱི་ལོ་ ༡༩༨༡ ལོར་ལི་ཌི་གཙུག་ལག་སློབ་གྲྭ་ཆེན་མོ་ནས་སྨན་བཅོས་སེམས་ཁམས་རིག་པའི་གཙུག་ལས་རབ་འབྱམས་པའི་ཐོག་བསླབ་པ་མཐར་སོན་སྟེ་སེམས་ཁམས་རིག་པའི་ཐོག་སྨན་བཅོས་ཀྱི་ལས་ཀ་བྱས།
ཕྱི་ལོ་ ༡༩༨༩ ལོར་གྷལ་ཝེ་གཙུག་ལག་སློབ་གླིང་ནས་ཁྲིམས་ལུགས་རིག་པའི་ཐོག་བསླབ་པ་མཐར་སོན། ཕྱི་ལོ་ ༡༩༩༡ ལོར་ཁོང་མོ་ཁྲིམས་རྩོད་པ་ཞིག་ཏུ་གྱུར། ཕྱི་ལོ་ ༡༩༩༧ ལོའི་ངལ་རྩོལ་སྲིད་དོན་ཚོགས་པར་ཞུགས་ཏེ། ཕྱི་ལོ་ ༡༩༩༩ལོར་གྷལ་ཝེ་གྲོང་ཁྱེར་གྱི་ངལ་རྩོལ་སྲིད་དོན་ཚོགས་པའི་འཐུས་མི་རུ་འོས་འདེམས་བྱུང་། ཕྱི་ལོ་ ༢༠༠༧ ལོར་ངལ་རྩོལ་ཚོགས་པ་ནས་ཕྱིར་ཐོན་ཏེ། གྲོས་ཚོགས་འཐུས་མིར་འགྲན་ཞུགས་བྱས་ཀྱང་འོས་ཤོག་ ༢༠༠༠ ལྷག་ཙམ་ལས་ཐོབ་མེད། ཕྱི་ལོ་ ༢༠༡༦ ལོའི་གྷལ་ཝེ་ནུབ་ཁུལ་གྱི་གྲོས་ཚོགས་འཐུས་མིར་འོས་འདེམས་བྱུང་། གྲོས་ཚོགས་རྩིས་ཁྲའི་ཚོགས་ཆུང་དང་། ཨེ་རི་ལན་ཌི་སྐད་ཡིག གླིང་ཕྲན་གྱི་ཚོགས་ཆུང་གི་ཚོགས་གཙོ་བྱས་ཡོད་འདུག ཕྱི་ལོ་ ༢༠༢༠ ཁོང་མོ་ཐེངས་དང་པོའི་གྲོས་ཚོགས་འོག་མའི་ཚོགས་གཙོར་འོས་འདེམས་བྱུང་། འདི་ལོའི་ཕྱི་ཟླ་ ༧ པའི་ནང་ཁོང་མོས་སྲིད་འཛིན་འོས་མིར་ལངས་རྒྱུ་གསལ་བསྒྲགས་བྱས་ཡོད་པ་དང་། ཕྱི་ཟླ་ ༡༠ ཚེས་ ༢༥ ཉིན་ཁོང་མོར་འོས་ཤོག་བརྒྱ་ཆ་ ༦༣།༤ ཐོབ་ཡོད་འདུག དེ་ནི་ཨེ་རི་ལན་ཌི་སྲིད་འཛིན་འོས་འདེམས་ཁྲོད་བརྒྱ་ཆ་མཐོ་ཤོས་དེ་ཆགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
