༸གོང་ས་མཆོག་ནས་ཆོས་སྲིད་ལུགས་གཉིས་ཀྱི་ཐུགས་འགན་བཞེས་ཏེ་ལོ་ངོ་ ༧༥ འཁོར་བའི་གཞུང་འབྲེལ་དུས་དྲན་མཛད་སྒོ་འཚོགས།

༧གོང་ས་མཆོག་ལ་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་ཁག་བདུན་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་གི་སློབ་ཟུར་བཅས་ཀྱིས་ཐུན་མོང་ཐོག་བཀའ་དྲིན་རྗེས་དྲན་གྱི་གཟེངས་རྟགས་འབུལ་ལམ་ཞུས་སོང་།

དེ་རིང་ཕྱི་ཟླ་ ༡༡ ཚེས་ ༡༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་རྒྱལ་བ་རིན་པོ་ཆེ་མཆོག་ནས་ཆོས་སྲིད་ལུགས་གཉིས་ཀྱི་ཐུགས་འགན་ཡོངས་སུ་བཞེས་ཏེ་མི་ངོ་ ༧༥ འཁོར་བའི་དུས་དྲན་སྲུང་གཙིའི་གཞུང་འབྲེལ་མཛད་སྒོ་འཚོགས་སོང་། མཛད་སྒོའི་ཐོག་༧གོང་ས་མཆོག་དབུ་བཞུགས་ཐོག སྐུ་མགྲོན་གཙོ་བོར་ཅེག་སྤྱི་མཐུན་རྒྱལ་ཁབ་ཀྱི་རྒྱ་གར་གཞུང་ཚབ་ལྕམ་ཨལ་སི་ཀ་ཛི་གྷོ་བ་ (Eliska Zigova) མཆོག བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་སྲི་ཞུའི་ལས་བྱེད་རྣམ་པ། དེ་བཞིན་དྷ་ས་ཁུལ་གྱི་སེར་སྐྱ་མི་མང་དང་སློབ་ཕྲུག་སོགས་འཛོམས་འདུག་ལ། སྐབས་དེར་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་(CST)ཁག་བདུན་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་གི་སློབ་ཟུར་བཅས་ཀྱིས་༸གོང་ས་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་ཤིག་འབུལ་ལམ་ཞུས་སོང་ལ། དེ་བཞིན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་ལགས་ཀྱིས་བརྩམས་པའི་བོད་ཀྱི་ལོ་རྒྱུས་བརྗོད་པ་དང་འབྲེལ་༸རྒྱལ་བའི་མཛད་པ་སྐོར་གླེང་བ་ཞེས་པའི་དེབ་ཅིག་དབུ་འབྱེད་གནང་བྱུང་།

སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། བོད་གངས་ཅན་གྱི་ལྗོངས་འདིར་བོད་རྗེ་ཐོག་མ་གཉའ་ཁྲི་བཙན་པོ་ཕྱི་ལོ་སྔོན་གྱི་ ༡༢༧ ལོར་ཕེབས་པ་ནས་རིམ་གྱིས་གངས་ལྗོངས་ས་མཐོར་གཅིག་གྱུར་གྱི་སྲིད་དབང་བཙུགས་ཏེ། ཆོས་རྒྱལ་མེས་དབོན་རྣམ་གསུམ་གྱི་སྐབས་སུ་མངའ་ཐང་རྩེ་མོར་སོན་ཏེ་སུམ་གཉིས་ས་ཡི་དཀྱིལ་འཁོར་ལ་མངའ་བསྒྱུར་མཛད་ཅིང་། རྒྱ་གར་གྱི་གུབ་ཏའི་ཡི་གེར་དཔེ་བླངས་ནས་བོད་ཡིག་གསར་བཟོ་དང་། དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་བོད་ཡུལ་དུ་དྲངས་ཏེ་དཔལ་ཡོན་གྱི་འོད་སྣང་ཁྱབ་སྤེལ་མཛད་ཁར། རྒྱ་ནག་གི་རྒྱལ་ས་ཁྲང་ཨན་དུ་དམག་དྲངས་ཏེ་རྒྱའི་གོང་མ་ཁྲི་ལས་ཕབ་མྱོང་ཡོད་ལ། དུས་རབས་དགུ་པའི་ནང་བོད་སིལ་བུར་ཐོར་ཏེ་མངའ་ཐང་ཉམས་ཆག་བྱུང་ནའང་། མངའ་ཁོངས་གཞན་ལ་ཤོར་རིགས་མེད་པ་དཔེར་ན། ཕྱི་ལོ་ ༡༢༠༦ ལོར་བྷག་ཏིཡར་ཁིལ་ཇི་ཡིས་རྒྱ་གར་བྱང་ཤར་ནས་བོད་ལ་དམག་དྲངས་པར་བོད་མི་ཚོས་དམག་སྣེ་བཟློག་སྟེ་སྲུང་སྐྱོབ་ཚད་ལྡན་བྱེད་ཐུབ་པ་བྱུང་ཡོད་ལ། འགྲོ་མགོན་ཆོས་རྒྱལ་འཕགས་པ་ནས་དགའ་ལྡན་ཕོ་བྲང་བར། བོད་ཀྱིས་རྒྱ་ནག་དབང་བསྒྱུར་བྱེད་མཁན་སོག་པོ་དང་མཱིང་། མན་ཇུ་དབར་མཆོད་ཡོན་གྱི་འབྲེལ་བ་བཙུགས་ཤིང་། བོད་ཀྱི་ཆབ་སྲིད་དབུ་ཁྲིད་དང་། བླ་ཆེན་རྣམ་པས་རྒྱ་ནག་གི་དབང་འཛིན་གོང་མ་རིམ་བྱོན་དང་། མཐོ་རིམ་དབུ་ཁྲིད། མངའ་འབངས་བཅས་པར་ཆོས་ཀྱི་འཁོར་ལོ་རྒྱ་ཆེར་བསྐོར་ཞིང་། ནང་པའི་བསླབ་བྱས་རྒྱ་ནག་གི་དབང་འཛིན་པ་ཚོར་བཟང་པོའི་ཤུགས་རྐྱེན་ཧ་ཅང་ཆེན་པོ་ཐོན་ཡོད། དུས་རབས་ ༢༠ པའི་འགོ་སྟོད་དུ། ཁ་ཆེ་དམག་ཤེད་ཅན་མཱ་པུ་ཧྥང་གིས་ཨ་མདོ་ཕྱོགས་དང་།  མན་ཇུའི་དམག་དཔོན་ཀྲའོ་ཨེར་ཧྥེང་གིས་ཁམས་ཕྱོགས། ཨིན་ཇིས་དབུས་ཕྱོགས་སུ་བཙན་འཛུལ་བྱས་ཏེ། བོད་ཀྱི་མངའ་ཐང་ཐ་ཞན་གྱི་གནས་སུ་ལྷུང་། ཕྱི་ལོ་ ༡༩༡༡ ལོར་རྒྱ་ནག་གོ་མིང་ཏང་གིས་སྲིད་དབང་བཟུང་རྗེས། མདོ་སྟོད་སྨད་ཀྱི་ས་སྡེ་མང་པོ་རིམ་ཟས་བྱས་པ་མ་ཟད། བོད་གཞུང་དང་ས་མཚམས་ཀྱི་དྲག་པོའི་གདོང་ཐུག་ཐེངས་མང་བྱུང་ཡོད།

ཕྱི་ལོ་ ༡༩༤༩ ལོར་རྒྱ་ནག་གུང་ཁྲན་གྱིས་སྲིད་དབང་བཙུགས་རྗེས། མདོ་སྟོད་སྨད་ཀྱི་ས་སྡེ་མང་པོ་བཙན་བཟུང་བྱས་པའི་ཐོག་ད་དུང་ཕྱི་ལོ་ ༡༩༥༠ ཟླ་ ༡༠ ནང་ལམ་ཁག་གསུམ་ནས་ཆབ་མདོར་བཙན་འཛུལ་གྱིས། བོད་ཀྱི་གཙོ་ཤུགས་དམག་དཔུང་ཕམ་ཉེས་ཤོར་ཏེ་བོད་ལ་དྲག་པོའི་འགོག་སྲུང་གི་ནུས་པ་མེད་པར་གྱུར་ཅིང། རྒྱལ་སྤྱིའི་སྤྱི་ཚོགས་ནས་སེམས་ཁུར་བྱེད་མཁན་མེད་པ་སོགས་ཀྱིས་བོད་ཀྱི་སྣོད་བཅུད་གཉིས་ཀ་དངོས་གནས་ཆགས་འཇིག་གི་སོ་མཚམས་སུ་བསྐྱལ་ཡོད་པའི་སྐབས་དེར། དགུང་ལོ་ ༡༥ ལས་སོན་མེད་པའི་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཐུགས་སྟོབས་གོ་ཆ་བཙན་པར་བགོས་ཏེ། རྒྱ་གཞུང་ལ་མེས་འཚིགས་མེེ་གཏུགས་ཀྱིས། བཙན་གནོན་འོག་ཏུ་བཞག་པའི་གྲོས་མཐུན་དོན་ཚན་བཅུ་བདུན་གྱི་རྨང་གཞི་སྟེང་ལོ་ངོ་བརྒྱད་ལྷག་རིང་ཆབ་འབངས་གངས་ཅན་པ་རྣམས་ཀླ་ཀློའི་དཔུང་ཚོགས་ཀྱི་གོ་མཚོན་འོག་ནས་ཚེ་སྲོག་སྐྱོབ་ཐབས་དང་།  བོད་ཀྱི་ཐུན་མིན་ཆོས་དང་རིག་གཞུང་གཅེས་སྐྱོང་ཡོང་བའི་ཐབས་ཤེས་ལུ་གུ་རྒྱུད་དུ་བསྟེན་གནང་ཡོད་ནའང་། རྒྱ་གཞུང་གིས་གྲོས་དོན་རྩིས་མེད་རྡོག་རོལ་གཏོང་རྐྱང་བྱས་པར་བརྟེན། བཙན་བྱོལ་དུ་མི་ཕེབས་ཀ་མེད་བྱུང་།

རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་མ་ཐག་ཏུ་གྲོས་མཐུན་དོན་ཚན་བཅུ་བདུན་རྩིས་མེད་ཀྱི་གསལ་བསྒྲགས་གནང་བ་དང་ཆབས་ཅིག །བརྒྱ་ཕྲག་སྔ་མའི་ལོ་རབས་བདུན་ཅུ་ནས་བཟུང་དབུ་མའི་ལམ་གྱི་འཇུག་ངོགས་ནས་བོད་རྒྱའི་དཀའ་རྙོག་སེལ་བའི་སྲིད་ཇུས་གཏན་འབེབས་གནང་སྟེ་བོད་མིའི་སྒྲིག་འཛུགས་ནས་རྒྱུན་འཁྱོངས་ཞུ་བཞིན་པ་དང་། ༸མགོན་པོ་མཆོག་གིས་ད་བར་ཉིན་མཚན་དུས་དྲུག་ཏུ་མཛད་ཁུར་རྣམ་བཞིས་མཚོན་པའི་བྱང་ཆུབ་སེམས་དཔའ་ཆེན་པོའི་རྣམ་ཐར་བདག་གིར་བཞེས་བཞིན་པའི་བཀའ་དྲིན་ནི། དུས་མཐའི་བར་དུ་གཞལ་དཀའ་ལ། ལྕེ་བརྒྱར་སྤྲུལ་ཀྱང་བརྗོད་ཀྱིས་མི་ལང་ཞེས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ཕྱི་ཟླ་ ༤ ཚེས་ ་ ༡༨ ཉིན་ཏེ་ཛི་པུར་དུ་རྒྱལ་སྤྱིའི་གསར་འགོད་པ་རྣམས་ལ་བོད་རང་བཙན་གཙང་མའི་རྒྱལ་ཁབ་ལ་རྒྱ་དམར་ནས་བཙན་འཛུལ་བྱས་པ་དང་། གྲོས་མཐུན་དོན་ཚན་ ༡༧ ཟེར་བ་ཁས་ལེན་གནང་རྒྱུ་མིན་པ་སོགས་ཡོངས་བསྒྲགས་གནང་། དེ་ནས་མ་སུ་རིར་བཞུགས་སྒར་མཛད་ཅིང་བཙན་བྱོལ་བོད་གཞུང་དང་། ལྷན་ཁང་འགའ་ཤས་གསར་འཛུགས་གནང་། དེ་རྗེས་བཞུགས་གནས་རྡ་རམ་ས་ལར་གནས་སྤོས་གནང་ཞིང་རིམ་པས་ཆོས་སྒར། གཞིས་སྒར། སློབ་གྲྭ། དེ་བཞི དེ་བཞིན་ཤེས་ཡོན་དང་། རིག་གཞུང༌། ལག་ཤེས་སོགས་ཀྱི་བསྟི་གནས་གསར་འཛུགས་བསྐྱངས། ༸གོང་ས་མཆོག་གིས་རིང་མོ་ཞིག་ནས་དགོངས་པ་ཡོད་པ་ལྟར་ཐོག་མར་ཕྱི་ལོ་ ༡༩༦༠ ལོར་ཆོས་ལུགས་ཆོལ་གསུམ་དང་བཅས་པའི་འཐུས་མི་མང་ཚོགས་ཀྱིས་འོས་འདེམས་བྱས་པའི་བོད་མི་མང་སྤྱི་འཐུས་ལྷན་ཚོགས་གསར་འཛུགས་བསྐྱངས་ཤིང་རིམ་པས་བོད་གཞུང་དེ་ཉིད་དེང་རབས་མང་གཙོའི་འགྲོ་ལུགས་ཤིག་ཏུ་བསྒྱུར་གནང་མཛད། རྒྱ་ནག་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག མི་རིགས། ཁོར་ཡུག་དང་བཅས་པ་རྩ་མེད་བཟོ་རྒྱུའི་སྲིད་བྱུས་འཇམ་རྩུབ་སྣ་ཚོགས་ཀྱི་སྒོ་ནས་ལག་བསྟར་བྱེད་བཞིན་ཡོད་ཀྱང་། བཙན་བྱོལ་ནང་གཙོ་བོ་༧གོང་ས་ས་མཆོག་གི་མཁྱེན་བརྩེ་ནུས་པའི་བློའི་བླ་ན་མེད་པའི་ཐུགས་བསྐྱེད་མཛད་འཕྲིན་ལ་བརྟེན་ནས་བོད་ཀྱི་ཆོས་དང༌།  རིག་གཞུང༌། སྐད་ཡིག ་སོགས་སྲུང་སྐྱོབ་དང་སླར་གསོ་གནང་ཞིང་། ད་བར་བོད་ཀྱི་ཆོས་དང་། རིག་ངག་གཞུང་། ཚན་རིག་དང་ནང་ཆོས་དབར་བགྲོ་གླེང་། འགྲོ་བ་མི་གཅིག་གྱུར་གྱི་འདུ་ཤེས། དེ་ཡང་བྱམས་བརྩེ་གོང་འཕེལ་གྱིས་སེམས་ནང་ཞི་བདེ་དང་ཡིད་ཆེས་ཡོང་དགོས་པ་སོགས་ཀྱི་ལམ་སྟོན་མཛད་ནས་འཛམ་གླིང་ནང་མི་མང་ས་ཡ་མང་པོར་ཕན་ཐོགས་བྱུང་ཞིང་། ནང་ཆོས་ལ་དད་མོས་ཡོད་མཁན་རྣམས་ལ་དམ་པའི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་བ་དང་། འཛམ་གླིང་གང་སར་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ གནང་བ་སོགས་ཆོས་སྲིད་ཀྱི་མཛད་འཕྲིན་རླབས་ཆེན་བསྐྱངས་ཡོད་།

དེ་བཞིན་༸གོང་ས་མཆོག་གིས་དཀའ་བ་བརྒྱ་ཕྲག་ལྷུར་བཞེས་མཛད་དེ་བོད་དོན་དེ་བོད་དོན་བདེན་མཐའ་གསལ་ཐབས་སོགས་ལ་གནས་ཡུལ་རྒྱ་གར་གཞུང་དང༌། རྒྱལ་སྤྱིའི་ནང་འབྲེལ་ལལམ་གནང་བས་ཕྱི་ལོ་ ༡༩༥༩ དང༌། ༡༩༦༡།༡༩༦༥ ལོ་སོ་སོར་མཉམ་འབྲེལ་རྒྱལ་ཚོགས་ནང་བོད་དོན་སྐོར་གྱི་གྲོས་ཆོད་བཞག་ཐུབ་པ་དང་།  དེ་རྗེས་ཕྱི་ལོ་ ༡༩༦༧ ལོར་ཐོག་མར་ཉི་འོང་རྒྱལ་ཁབ་ཏུ་ཆིབས་བསྒྱུར་བསྐྱངས་པ་ནས་རིམ་པས་ཡུ་རོབ་དང་། ལྷོ་བྱང་ཨ་མེ་རི་ཀ  ཨ་ཕི་རི་ཀ་བཅས་འཛམ གླིང་རྒྱལ་ཁབ་ཕལ་མོ་ཆེ་ནང་ཆིབས་བསྒྱུར་ཐེངས་མང་བསྐྱངས་ཏེ། རྒྱལ་ཁབ་སོ་སོའི་དབུ་འཁྲིད་སོགས་དཔོན་རིགས་ཁག་ལ་མཇལ་འཕྲད་གནང་ཞིང༌། ཨ་རིའི་གྲོས་ཚོགས་ནས་བོད་དོན་ཐོག་ཁྲིམས་ཡིག་སྔ་རྗེས་བཞག་ཐུབ་པ་བྱུང་བ་དང༌། དེ་བཞིན་ཡུ་རོབ་གྲོས་ཚོགས་དང་། རྒྱལ་ཁབ་མང་པོའི་གཞུང་དང་གྲོས་ཚོགས་སོགས་ནས་བོད་དོན་ཐོག་གྲོས་ཆོད་སྔ་རྗེས་མང་བོ་བཞག་ཐུབ་ཅིང་། ལྷག་པར་དུ་རྒྱ་ནག་གཞུང་དང་འབྲེལ་བ་བསྐྱར་གསོ་གནང་སྟེ་ྋགོང་ས་མཆོག་གིས་རྒྱ་གཞུང་མཉམ་གཉིས་ཕན་གྱི་དགོངས་པ་བཞེས་ཤིང་བཙན་བྱོལ་བོད་མིའི་སྐུ་ཚབ་བོད་ནང་གཟིགས་སྐོར་སྔ་རྗེས་ཕེབས་ཐུབ་པ་བྱུང་བ་དང་། གཞིས་བྱེས་གཉིས་ཀྱི་བོད་མི་རྣམས་ཕར་ཚུར་འགྲོ་འོང་ཐུབ་པ་བྱུང་ཞིང་། དེ་བཞིན་ཕྱི་ལོ་ ༢༠༠༢ ནས་བོད་རྒྱ་གཉིས་དབར་འབྲེལ་མོལ་ཐེངས་དགུ་ཙམ་གནང་ཡང་། རྒྱ་ནག་གཞུང་གི་དཔོན་རིགས་ཚོའི་དོགས་པ་རྣམ་རྟོག་གིས་བོད་རྒྱའི་དཀའ་རྙོག་སེལ་བའི་བཟང་ཕྱོགས་སུ་མདུན་བསྐྱོད་བྱུང་ཐུབ་མེད། དེ་རིང་བརྗོད་འདོད་པ་ཞིག་ལ་༸གོང་ས་མཆོག་སྐུ་འཚོ་བཞུགས་རིང་བོད་རྒྱའི་དཀའ་རྙོག་སེལ་ཐབས་དགོས་པ་རྒྱ་གཞུང་གི་དཔོན་རིགས་རྣམས་ལ་སྐུལ་མ་བྱ་རྒྱུ་ཡིན།

༸གོང་ས་མཆོག་གིས་བོད་ཀྱི་བདེན་པའི་འཐབ་རྩོད་འཚེ་མེད་ཞི་བའི་ལམ་ལ་བསྟེན་པ་དང་། འཛམ་གླིང་ཡུལ་གྲུ་གང་སར་བྱམས་བརྩེའི་ལམ་སྟོན་གནང་ཞིང་། ཞི་བདེའི་སྣེ་འཁྲིད་མཛད་པ་སོགས་ལ་བརྟེན་མིང་དོན་མཚུངས་པའི་བྱམས་བརྩེའི་བདག་ཉིད་དང་། འཛམ་གླིང་ཞི་བདེའི་དེད་དཔོན་གྱི་མཚན་སྙན་ཡོངས་གྲགས་སུ་ཐོབ་པ་བྱུང་ཞིང༌། ཕྱི་ལོ་ ༡༩༨༩ ལོར་འཛམ་གླིང་ཐོག་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་སོགས་ཁྱོན་གཟེངས་རྟགས་དང་ཆེ་བསྟོད་སྟོང་ཕྲག་ལ་ཉེ་བར་འབུལ་བཞེས་མཛད་ཡོད་ཅིང་། མགོན་པོ་གང་ཉིད་ཀྱི་ཐུགས་བསྐྱེད་དམ་བཅའ་བཞིའི་མཛད་པར་འཛམ་གླིང་ཡུལ་གྲུ་གང་ས་ནས་དགའ་མོས་དང་། ལག་བསྟར་ཞུ་བཞིན་ཡོད་པ་སོགས་ནི་ཆེས་བླ་ན་མེད་པའི་རླབས་ཆེན་གྱི་ཆོལ་གསུམ་དང་བཅས་པའི་བོད་མི་རྩམ་ཟན་པ་གངས་ཅན་ལྗོངས་ཀྱི་ཆོས་ལུགས་ཆོལ་གསུམ་ཡོངས་རྫོགས་རྡོག་རྩ་གཅིག་ཏུ་སྒྲིལ་ཐུབ་ནས་བོད་ཀྱི་གནད་དོན་འཛམ་གླིང་གང་སར་ཁྱབ་ཐུབ་པ་སོགས་ནི་ྋགོང་ས་ མཆོག་གི་མཛད་འཕྲིན་དང་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཞིག་ཆགས་ཡོད་པས། དེ་རིང་གི་གོ་སྐབས་འདི་བརྒྱུད་ནས་བོད་མི་ཡོངས་ཀྱི་ཚབ་ཞུས་ཏེ་མགོན་པོ་མཆོག་ལ་བཀའ་དྲིན་བླ་མེད་དུ་ཆེ་ཞུ། ཞེས་གསུངས་སོང་།

ཅེག་སྤྱི་མཐུན་རྒྱལ་ཁབ་ཀྱི་རྒྱ་གར་གཞུང་ཚབ་མ་ལྕམ་ཨལ་སི་ཀ་ཛི་གྷོ་བ་ (Eliska Zigova) ལགས་ཀྱིས། དེ་རིང་ང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་རྒྱལ་ཁབ་ཆེན་པོའི་རྒྱལ་སྲིད་ཆོས་སྲིད་ལུགས་གཉིས་ཀྱི་ཐུགས་འགན་ཡོངས་སུ་བཞེས་ཏེ་མི་ལོ་ ༧༥ འཁོར་བའི་དམིགས་བསལ་གྱི་ཉིན་མོར་བཅར་རྒྱུ་བྱུང་བར་དགའ་སྤྲོ་ཚད་མེད་བྱུང་། ངས་གཏམ་བཤད་མ་བྱེད་པའི་གོང་དུ། ངས་འགན་ཁུར་གྱི་འདུ་ཤེས་ཟེར་ན་ཅི་ཞིག་ལ་ཟེར་གྱི་ཡོད་མེད་དང་། ང་ཚོ་འགྲོ་བ་མི་ལ་མཚོན་ན་འགན་ཁུར་གྱི་འདུ་ཤེས་ཟེར་བ་དེ་གང་འདྲ་ཞིག་ལ་གོ་དགོས་མིན་ཐད་མདོར་ཙམ་ཞུ་འདོད་བྱུང་། ངས་ང་ཚོ་འགྲོ་བ་མི་ཞིག་ལ་མཚོན་ན་འགན་ཁུར་གྱི་འདུ་ཤེས་ལྡན་པའི་རླབས་ཆེན་གྱི་མགོ་ཁྲིད་ཅིག་དགོས་པར་ཚང་མས་རྒྱབ་སྐྱོར་བྱེད་པའི་ཡིད་ཆེས་ཡོད། དཔེར་ན་ནང་མི་ཞིག་ལ་མཚོན་ན། ཕ་མ་གཉིས་ཀྱིས་བུ་ཕྲུག་ལ་གཅེས་སྐྱོང་བྱས་ཚེ། ཕ་མ་གཉིས་ཀྱི་འགན་ཁུར་གྱི་འདུ་ཤེས་ལྡན་པའི་ལམ་སྟོན་དང་། བརྩེ་འདང་སོགས་ལས་བུ་ཕྲུག་རྣམས་ཡར་རྒྱས་གོང་འཕེལ་གྱི་ལམ་སྣེ་རུ་འདྲེན་ནུས། དེ་བཞིན་སློབ་གྲྭ་ཞིག་ལ་མཚོན་ནའང་། འགན་ཁུར་གྱི་འདུ་ཤེས་རང་བཞིན་ལྡན་པའི་དགེ་རྒན་ཚད་ལྡན་ཞིག་གི་མཐུ་འོག་ནས། སློབ་སྦྱོང་ཡར་སྐྱེད་དང་སྦྱོང་འདུན་སྐྱེས། དེ་བས་རྒྱལ་ཁབ་དང་མངའ་སྡེ་ཞིག་ལ་མཚོན་ནའང་། འཐུས་མི་དང་འགན་ཁུར་གྱི་འདུ་ཤེས་ལྡན་པའི་མགོ་ཁྲིད་ཅིག་གིས་རྒྱལ་ཁབ་དང་མངའ་སྡེ་སོགས་སྣེ་འདྲེན་བྱ་རྒྱུ་ཧ་ཅང་གལ་གནད་ཆེན་པོ་རེད། དེ་ལས་ལྡོག་ནས་ང་ཚོ་ལ་མགོ་ཁྲིད་ཚད་ལྡན་ཞིག་མེད་ན། ང་ཚོའི་མིག་ལམ་དུ་མངོན་པ་བཞིན་དེང་སང་སྤྱི་ཚོགས་ཀྱི་གྲུ་ཟུར་རེ་རེར་ཡོད་པའི་འགན་ཁུར་གྱི་འདུ་ཤེས་ལྡན་པའི་མགོ་ཁྲིད་རྣམས་ལ་གྲུབ་འབྲས་མི་ཐོན་པའི་དུས་ཤིག་ཡིན་པ་ཇི་བཞིན་ཆགས་ཀྱི་རེད། དེའི་དབང་གིས་ང་ཚོས་དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་རྒྱལ་ཁབ་ཆེན་པོའི་རྒྱལ་སྲིད་ཆོས་སྲིད་ཀྱི་ལུགས་གཉིས་ཀྱི་ཐུགས་འགན་ཡོངས་སུ་བཞེས་ཏེ་མི་ལོ་ ༧༥ འཁོར་བའི་ལོ་རྒྱུས་རང་བཞིན་ལྡན་པའི་ཉིན་མོ་སྲུང་གཙི་བྱ་རྒྱུ་ཧ་ཅང་གལ་ཆེན་རེད། ཅེས་གསུངས་སོང་།

ཡང་ཁོང་མོས། ༧གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ལོ་ ༡༩༥༠ སྟེ་དགུང་ལོ་བཅོ་ལྔའི་སྟེང་། བོད་རྒྱལ་ཁབ་ཀྱི་གཉན་འཕྲང་ཅན་གྱི་དུས་སྐབས་དེར་ཆོས་སྲིད་ཀྱི་ཐུགས་འགན་བཞེས་པར་སེམས་འགུལ་ཆེན་པོ་ཐེབས་སོང་། ཁོང་གིས་ཆབ་སྲིད་ཀྱི་ཐུགས་འགན་བཞེས་ཏེ་མི་ལོ་དགུ་ཡི་རྗེས་སུ། རྒྱ་ནག་གཞུང་གིས་བཙན་འཛུལ་གྱི་དབང་གིས་བོད་མི་སྟོང་ཕྲག་མང་པོ་དང་ལྷན་དུ་རྒྱ་གར་ལ་བཙན་བྱོལ་དུ་ཕེབས་དགོས་བྱུང་། ཁོང་གིས་ཕྱི་ལོ་ ༡༩༦༠ ཙམ་ལ་བཙན་བྱོལ་དུ་འབྱོར་བའི་བོད་མི་རྣམས་ལ་སློབ་གྲྭ་དང་སྡོད་ཁང་སོགས་ཆེད་འཛུགས་གནང་སྟེ། དེང་སང་ཡང་བོད་ཕྲུག་ཆུང་ཆུང་རྣམས་ཀྱིས་སློབ་སྦྱོང་བྱེད་བཞིན་པ་ང་ཚོའི་མིག་གི་མཐོང་ཆོས་སུ་གྱུར་ཡོད། དེ་ནི་དངོས་གནས་དྲང་གནས་ཆེས་བསྔགས་པ་འོས་པ་ཞིག་རེད། ཅེས་དང་། ཡང་ཁོང་མོས་སེམས་ཚོར་ལྡན་པའི་ངང་ནས། ངས་དེ་རིང་འདི་ནས་བོད་མི་རིགས་ཀྱི་མ་འོངས་པའི་ཕུགས་འདུན་ཡངས་པ་དང་། ང་ཚོའི་དབུ་འཁྲིད་མཆོག་གི་སྐུ་ཚེ་ཡུན་རིང་བརྟན་པའི་སྨོན་ལམ་འདེབས། ངས་ང་ཚོ་ཟེར་དོན་ཡང་༧གོང་ས་རྒྱལ་བ་རིན་པོ་ཆེ་མཆོག་ནི་ཁྱེད་རང་ཚོ་གཅིག་པུའི་མིན་པར། ཁོང་ནི་ང་ཚོ་གོ་ལ་ཡོངས་ལ་དབང་བས་ཡིན། ཞེས་གསུངས་སོང་།

བཀའ་དྲིན་རྗེས་དྲན་གཟེངས་རྟགས་ཚོགས་ཆུང་གི་ཚོགས་གཙོ་བཀྲ་ཤིས་རྣམ་རྒྱལ་ལགས་ཀྱིས། དེ་རིང་ཉིན་མོ་འདི་ནི་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཆོས་སྲིད་ལུགས་གཉིས་ཀྱི་ཐུགས་འགན་བཞེས་ཏེ་མི་ལོ་ཧྲིལ་བོ་ ༧༥ འཁོར་བའི་དུས་ཚོད་ཁྱད་པར་ཅན་ཞིག་ཡིན་པ་དང་། དེ་ཡང་བོད་ཤར་ཕྱོགས་ནས་རྒྱ་ནག་གིས་དཔུང་འཇུག་བྱས་པ་དང་། བོད་ཀྱི་ཆབ་སྲིད་འཛིན་སྐྱོང་དང་བཅས་པ་ཨ་ཆད་འུ་ཐུག་གི་གནས་སྟངས་སུ་གྱུར་ནས། བོད་ཀྱི་ལྷ་སྡེ་མི་སྡེ་ཡོངས་ཀྱིས་གསོལ་བ་རྩེ་གཅིག་བཏབ་པར་བརྟེན། དགུང་གྲངས་ ༡༦ ལས་ཕེབས་མེད་ཀྱང་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་བདག་གི་བཞེས་པའི་ཉིན་མོ་སྟེ། བོད་ཀྱི་བྱུང་རབས་ནང་གལ་ཆེའི་དུས་ཚོད་ཅིག་ཆགས་ཡོད། དེར་བརྟེན་དེ་རིང་གི་ཉིན་མོ་འདིར་བོད་མི་ཡོངས་ནས་༸རྒྱལ་བའི་བཀའ་དྲིན་ཞུ་དགོས་པའི་དམིགས་བསལ་གྱི་ཉིན་མོ་གལ་ཆེན་ཞིག་ཡིན། ༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ལུགས་གཉིས་ཀྱི་ཐུགས་འགན་བཞེས་རྗེས། བོད་རྒྱ་གཉིས་ཞི་མཐུན་འགྲིག་འཇགས་ཡོང་ཐབས་སུ་གུ་ཡངས་དཔྱོད་ཤེས་ཀྱི་དགོངས་བཞེས་གནང་ཡོད་ཀྱང་། རྒྱ་ནག་དམར་པོའི་གཞུང་གིས་དེ་ལས་ལྡོག་སྟེ་བོད་ནང་ཛ་དྲག་དྲག་རྩུབ་ཀྱི་བྱེད་སྒོ་ཤུགས་ཆེར་བཏང་བར་བརྟེན། ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་ཆེན་མོ་བྱས་པ་དང་། བོད་ཀྱི་རྒྱལ་ས་ལྷ་སར་རྒྱ་དམར་གྱི་བྱེད་སྟངས་ཉིན་རེ་བཞིན་ཛ་དྲག་ཆེ་རུ་བཏང་བར་བརྟེན། ལྷ་ལྡན་དུ་མུ་མཐུད་བཞུགས་རྒྱུར་ཐུགས་འགན་སོས་ཐབས་བྲལ་ཏེ། རྒྱ་གར་ཕྱོགས་སུ་ཉེན་གཡོལ་དུ་ཆིབས་བསྒྱུར་བསྐྱངས་བ་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།