བོད་མིའི་དེབ་སྐྱེལ་ཚོགས་པ་ཁག་ལ་རྒྱ་གར་གཞུང་གི་ཁྲིམས་སྒྲིག་གོ་རྟོགས་ཟབ་སྦྱོང་འཚོགས།

དཔལ་འབྱོར་ལས་ཁུངས་ཀྱི་ཁྲིམས་སྒྲིག་གོ་རྟོགས་དང་ལམ་སྟོན་ཚན་པའི་འགན་འཛིན་བསྟན་འཛིན་དབང་རྒྱལ་ལགས་ཀྱིས་བོད་པའི་དེབ་སྐྱེལ་ཡོད་པའི་ཚོགས་པ་ཚང་མ་རྒྱ་གར་ཁྲིམས་སྒྲིག་བཞིན་རྒྱུན་གནས་ཐུབ་པའི་འབད་བརྩོན་ཞུ་བཞིན་ཡོད་སྐོར་འགྲེལ་བརྗོད་གནང་བྱུང་།

ཟླ་འདིའི་ཕྱི་ཚེས་ ༣ དང་ ༤ ཉིན་གྲངས་གཉིས་རིང་དྷ་ས་བོད་ཀྱི་འཛིན་སྐྱོང་སྦྱོང་བརྡར་བསྟི་གནས་ཁང་དུ། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཞིབ་འཇུག་དང་སློབ་སྟོན་ཚན་པའི་གོ་སྒྲིག་འོག བོད་མིའི་དེབ་སྐྱེལ་ཚོགས་པ་ཁག་ལ་རྒྱ་གར་གཞུང་གི་ཁྲིམས་སྒྲིག་གོ་རྟོགས་ཟབ་སྦྱོང་ཐེངས་གསུམ་པ་འཚོགས་ཡོད་ཅིང་། དབུ་འབྱེད་མཛད་སྒོའི་ཐོག་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་དང་། དཔལ་འབྱོར་ལས་ཁུངས་ཀྱི་ཁྲིམས་སྒྲིག་གོ་རྟོགས་དང་ལམ་སྟོན་ཚན་པའི་འགན་འཛིན་བསྟན་འཛིན་དབང་རྒྱལ་ལགས། དེ་བཞིན་དྷ་རམ་ས་ལ་དང་། བཀྲ་ཤིས་ལྗོངས། སྦིར་བོད་མིའི་གཞིས་ཆགས་གསུམ་ནས་ཚོགས་བཅར་བ་ ༣༠ མཉམ་ཞུགས་གནང་འདུག

ཐེངས་འདིའི་ཟབ་སྦྱོང་གི་གལ་གནད་སྐོར་ལ་དཔལ་འབྱོར་ལས་ཁུངས་ཀྱི་སྡེ་ཚན་འགན་འཛིན་བསྟན་འཛིན་དབང་རྒྱལ་ལགས་ཀྱིས་འདི་གའི་གསར་འགོད་པར། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱིས་རྒྱ་གར་གཞུང་གི་ཕྱི་དངུལ་ལེན་བེད་ཆོག་པའི་ཁྲིམས་ (Foreign Contribution Regulation Act) དང། འབབ་ཁྲལ། དེ་བཞིན་ཚོགས་པ་དང་ཐེབས་རྩ་བཅས་ཀྱི་དེབ་སྐྱེལ་བྱེད་ཕྱོགས་ཐོག་ལ་རྒྱ་གར་ཁྲིམས་སྒྲིག་དང་འབྲེལ་བའི་ཐོག་ནས་ཟབ་སྦྱོང་ཞིག་སྤྲོད་ཀྱི་ཡོད་པ་རེད། སྤྱིར་བོད་པའི་སྤྱི་ཚོགས་ནང་དུ་དེབ་སྐྱེལ་ཚོགས་པ་གྲངས་ ༢༠༠ ཡོད་ཅིང་། དེའི་ཁྲོད་དུ་ཕྱི་དངུལ་ལེན་བེད་ཆོག་པའི་ཡིག་ཆ་ཡོད་པའི་ཚོགས་པ་གྲངས་ ༡༢༠ ལྷག་འདུག རྒྱ་གར་གྱི་ཁྲིམས་སྒྲིག་ལག་བསྟར་བྱེད་ཕྱོགས་ཀྱི་ལས་དོན་ཟབ་སྦྱོང་སྤྲད་ཚེ་གོ་རྟོགས་ཡོང་གི་ཡོད་པ་རེད། ད་ལྟའི་ཆར་བོད་མིའི་སྤྱི་ཚོགས་ནང་རྒྱ་གར་གྱི་ཕྱི་དངུལ་ལེན་བདེ་ཆོག་པའི་དེབ་སྐྱེལ་ཡིག་ཆ་ཡོད་ཀྱང་། ཁྲིམས་སྒྲིག་གི་འགྲོ་ལུགས་མ་ཤེས་པའི་རྐྱེན་གྱིས་དེབ་སྐྱེལ་བྱས་པའི་ཡིག་ཆ་མེད་པ་ཆགས་ཚེ། ཕྱི་དངུལ་ལེན་མི་ཐུབ་པའི་དཀའ་ངལ་མང་པོ་ཞིག་འཕྲད་ཀྱི་ཡོད། དེ་ལ་དམིགས་ནས་དཔལ་འབྱོར་ལས་ཁུངས་ཀྱིས་བརྗོད་གཞི་འདིའི་ཐོག་ཏུ་ཟབ་སྦྱོང་ཐེངས་གསུམ་སྤྲད་ཚར་ཡོད། ཅེས་འགྲེལ་བརྗོད་གནང་བྱུང་།

ཡང་ཁོང་གིས། ད་ལྟའི་ཆར་བོད་མིའི་སྤྱི་ཚོགས་ཁྲོད་ཀྱི་དེབ་སྐྱེལ་བྱས་ཡོད་པའི་ཚོགས་པ་མང་ཤོས་ལ་རྒྱ་གར་ཁྲིམས་སྒྲིག་གི་གོ་རྟོགས་མེད་པས་དཀའ་ངལ་མང་པོ་ཞིག་འཕྲད་ཀྱི་འདུག དཔལ་འབྱོར་ལས་ཁུངས་ཀྱིས་རྒྱ་གར་གཞུང་གི་ཕྱི་དངུལ་ལེན་བེད་ཁྲིམས་སྒྲིག་མི་སྣ་ཆེད་དུ་སྐད་བཏང་སྟེ་ཟབ་སྦྱོང་སྤྲོད་ཀྱི་ཡོད། ཟབ་སྦྱོང་སྤྲོད་མཁན་རྣམས་རྒྱ་གར་གྱི་ཁྲིམས་སྒྲིག་ཐོག་ཁྱད་ལས་པ་རེད། རྒྱ་གར་གྱི་ཁྲིམས་སྒྲིག་དང་འབྲེལ་བའི་གནད་དོན་གང་ཡིན་ཡང་སློབ་སྦྱོང་བྱེད་ཐུབ་ཀྱི་ཡོད་པས། ཚོགས་པ་ཁག་གིས་ཀྱང་དམིགས་བསལ་དོ་སྣང་བྱེད་ཀྱི་འདུག སྔོན་མ་ཕྱི་རྒྱལ་གྱི་རོགས་ཚོགས་ཁག་བརྒྱུད་ཟབ་སྦྱོང་མང་ཆེ་ཤོས་སྤྲོད་བཞིན་ཡོད། དེང་སྐབས་རོགས་དངུལ་མེད་ཀྱང་བོད་མིའི་སྒྲིག་འཛུགས་ཀྱིས་གལ་ཆེན་དོན་ཆེན་དུ་གཟིགས་ཏེ། བོད་པའི་དེབ་སྐྱེལ་ཡོད་པའི་ཚོགས་པ་ཚང་མ་རྒྱ་གར་ཁྲིམས་སྒྲིག་བཞིན་རྒྱུན་གནས་ཐུབ་པའི་འབད་བརྩོན་ཞུ་བཞིན་ཡོད་པ་རེད། ཚོགས་པ་ཁག་ལ་ཕན་ཐོགས་པའི་ཆེད་དུ་ཧ་ཅང་གལ་ཆེན་པོ་ཆགས་ཡོད། ཅེས་འགྲེལ་བརྗོད་གནང་བྱུང་།

མ་འོངས་པར་ཟབ་སྦྱོང་སྤྲོད་ཕྱོགས་སྐོར་ལ་ཁོང་གིས། དཔལ་འབྱོར་ལས་ཁུངས་ཀྱིས་བརྗོད་གཞི་འདིའི་ཐོག་ཟབ་སྦྱོང་བང་བསྒྲིགས་དང་སྒྲིག་བཞིན་པ་ཡིན། དེ་ཡང་ཕྱི་ལོགས་ཀྱི་ཚོགས་པ་གཅིག་པུ་མིན་པར་བོད་མིའི་སྒྲིག་འཛུགས་ནང་གི་ཚོགས་པ་དེབ་སྐྱེལ་བྱས་ཡོད་པ་ཁག་ཡོད། ད་ལྟ་དམིགས་བསལ་ཕྱི་དངུལ་ལེན་བེད་ཆོག་པའི་ཡིག་ཆ་ཡོད་པའི་ཚོགས་པ་ཁག་ལ་ཟབ་སྦྱོང་སྤྲད་པ་རེད། ལོ་རྗེས་མའི་ནང་རྒྱ་གར་གྱི་ཕྱི་དངུལ་ལེན་བེད་ཆོག་པའི་ཡིག་ཆ་མེད་པའི་ཚོགས་པ་ཁག་ལ་ཟབ་སྦྱོང་སྤྲོད་འཆར་ཡོད། ཟབ་སྦྱོང་གྲུབ་རྗེས་ཚོགས་བཅར་བ་རྣམས་ཀྱིས་དུས་རྒྱུན་གྱི་ལས་དོན་བྱེད་ཕྱོགས་ཐོག་ཁྱད་པར་ཆེན་པོ་བྱུང་བའི་བསམ་ཚུལ་འདུག ཅེས་འགྲེལ་བརྗོད་གནང་བྱུང་།

ཟབ་སྦྱོང་ཐོག་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་ཀྱིས། བོད་པའི་སྤྱི་ཚོགས་ཁྲོད་ཕྱི་རྒྱལ་གྱི་རོགས་ཚོགས་ཁག་གི་རོགས་དངུལ་ལེན་པར་ཕྱི་དངུལ་ལེན་བེད་ཡིག་ཆ་མེད་པའི་དཀའ་ངལ་དང་། བོད་པའི་ཚོགས་སྡེ་ཁག་ནས་རྒྱ་གར་གཞུང་གི་ཁྲིམས་མཐུན་གྱི་ཡིག་ཆ་དང་དཔང་ཡིག་ཉར་ཚགས་བྱ་དགོས་སྐོར། རྒྱ་གར་ཁྲིམས་སྒྲིག་དོན་ཚན་ཁག་སྲུང་གཙི་བྱ་དགོས་པའི་གལ་གནད། བོད་པའི་ཚོགས་སྡེ་ཁག་ལ་འཕྲད་བཞིན་པའི་དཀའ་ངལ་སེལ་ཐབས་སུ་འབད་བརྩོན་གནང་མུས་ཡིན་སྐོར་བརྗོད་འདུག དེ་བཞིན་རྒྱ་གར་ཕྱི་དངུལ་ལེན་བེད་ཁྲིམས་སྒྲིག་གི་སློབ་སྟོན་པ་སུ་ཇཱ་ཏཱ་ས་མལ་ལགས་ཀྱིས། ཕྱི་དངུལ་ལེན་བེད་ཁྲིམས་སྒྲིག་དང་། འབབ་ཁྲལ། རྒྱ་གར་དབུས་གཞུང་གི་དེབ་སྐྱེལ་ཚོགས་པའི་བཅའ་ཁྲིམས་སྐོར་ལ་གོ་རྟོགས་སྤེལ་འདུག

འདི་ལོའི་ཕྱི་ཟླ་ ༡༠ ཚེས་ ༢༩ དང་ ༣༠ ཉིན་གྲངས་གཉིས་རིང་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ། བོད་མིའི་དེབ་སྐྱེལ་ཚོགས་པ་ཁག་ལ་རྒྱ་གར་གཞུང་གི་ཁྲིམས་སྒྲིག་དང་འབྲེལ་བའི་ཞིབ་འཇུག་དང་སློབ་སྟོན་ཚན་པའི་ངོས་ནས་ཕྱི་དངུལ་ལེན་བེད་ཁྲིམས་སྒྲིག་ (FCRA) འོག་དེབ་སྐྱེལ་ཡོད་པའི་བོད་པའི་ཚོགས་སྡེ་ཁག་ལ་ཟབ་སྦྱོང་ཐེངས་དང་པོ་འཚོགས་ཡོད་པ་དང་། ཕྱི་ཟླ་ ༡༡ ཚེས་ ༡༢ དང་ ༡༣ ཉིན་གཉིས་རིང་དྷ་ས་བོད་ཀྱི་འཛིན་སྐྱོང་སྦྱོང་བརྡར་བསྟི་གནས་ཁང་དུ་བོད་མིའི་དེབ་སྐྱེལ་ཚོགས་པ་ཁག་ལ་རྒྱ་གར་གཞུང་གི་ཁྲིམས་སྒྲིག་གོ་རྟོགས་ཟབ་སྦྱོང་ཞིག་འཚོགས་ཡོད་པ་རེད།

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། བསྟན་འཛིན་ཕུར་བུ།