བོད་མིའི་སྒྲིག་འཛུགས་ནས་༸གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༦ འཁོར་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྲུང་གཙི་ཞུས་སོང་བ་དང་། གཞུང་འབྲེལ་མཛད་སྒོ་འདིའི་སྟེང་འཛམ་གླིང་རྒྱལ་ཁབ་དྲུག་གི་གནད་ཡོད་མི་སྣ་ཕེབས་འདུག
དེ་རིང་ཕྱི་ཟླ་ ༡༢ ཚེས་ ༡༠ ཉིན་༸གོང་ས་རྒྱལ་བ་རིན་པོ་ཆེ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༦ འཁོར་བའི་གཞུང་འབྲེལ་མཛད་སྒོ་འཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཀྱི་ཚོགས་གཞོན་ལྕམ་ཇའེ་ཊི་ཀ་ (Jietka Sietlova) མཆོག་དང་ཨོ་སི་ཊོ་ལི་ཡའི་གྲོས་ཚོགས་འཐུས་མི་ལྕམ་བྷར་བྷ་ར་ (Barbara Pocock) མཆོག ཆི་ལིའི་གྲོས་ཚོགས་འཐུས་མི་ཝི་ལ་ཌོ་ (Vlado Mirosecvic) མཆོག དེ་བཞིན། ཧྥ་རན་སིའི་གྲོས་ཚོགས་འཐུས་མི་སྰ་མན་ཐ་ (Samantha Cazebonel) མཆོག ནེའུ་རྫི་ལན་ཌིའི་གྲོས་ཚོགས་འཐུས་མི་གྷེ་རེག (Greg Flemming) མཆོག་དང་ཧྥི་ཇི་གྲོས་ཚོགས་འཐུས་མི་ཝི་རན་ཌི་ར་ (Virendra Lal) མཆོག་བཅས་འཛམ་གླིང་རྒྱལ་ཁབ་དྲུག་གི་གནད་ཡོད་མི་སྣ་ཕེབས་ནས་གསུང་བཤད་མདོ་བསྡུས་རེ་གནང་སོང་ལ། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་ལྷན་ཁང་ཁག་གི་དྲུང་ཆེ་རྣམ་པ་དང་སྲི་ཞུའི་ལས་བྱེད་རྣམ་པ། དེ་བཞིན། བཞུགས་སྒར་ཉེ་འཁྲིས་ཀྱི་སློབ་གྲྭ་ཁག་གི་སློབ་མ་རྣམས་པ་དང་དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག
མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དཀོན་མཆོག་ཚེ་རིང་ལགས་ཀྱིས་ཕྱོགས་སྒྲིག་གནང་བའི་རེ་སྒུག་གི་འབོད་པ་ཞེས་པའི་དཔེ་དེབ་ཅིག་དབུ་འབྱེད་དང་། འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྤྱི་ཚོགས་འཕྲོད་བསྟེན་དང་འབྲེལ་བའི་ཞབས་ལོ་ ༢༥ འཁོར་བའི་ལས་བྱེད་དྲུག་ལ་ལེགས་མཚོན་བྱ་དགའ་གནང་སོང་། དེ་བཞིན། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྤྱི་འཐུས་ལྷན་ཚོགས་ནས་དཔར་སྐྲུན་ཞུས་པའི་བཙན་བྱོལ་བོད་མིའི་མང་གཙོའི་འཕེལ་རིམ་བྱིས་པའི་ཤེས་ཚད་དང་འཚམ་པའི་སྒྲུང་གཏམ་བརྙན་རིས་ངོ་སྤྲོད་སྙིང་བསྡུས་ཞེས་པ་དབུ་འབྱེད་གནང་སོང་།
དེའི་རྗེས་སྲིད་སྐྱོང་སྤེན་པ་ཚེ་རིང་མཆོག་གིས་༸གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༦ འཁོར་བའི་བཀའ་ཤག་གི་གསུང་བཤད་གནང་སྐབས། དེ་རིང་ང་ཚོས་དུས་སྟོན་འདིར་རྗེས་དྲན་བྱེད་པའི་དགོས་དམིགས་གཙོ་བོ་ནི། འཛམ་གླིང་འདིར་འཁྲུག་རྩོད་དང་། སྡང་འཁོན། འཇིགས་དངངས་ཀྱི་སྨག་རུམ་སྟུག་པོས་གཡོག་བཞིན་པའི་སྐབས་འདིར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བདེའི་རིག་པའི་གཞུང་ལུགས་ཀྱིས། ངེད་ཅག་འགྲོ་བ་ཡོངས་ལ་བྱམས་བརྩེ་དང་། ཤེས་རབ། འགན་ཁུར་ལ་བརྟེན་ནས་དོན་དམ་གྱི་ཞི་བདེའི་ལམ་བུ་ལག་ལེན་བསྟར་རུང་ཞིག་བསྟན་གནང་ཡོད་པ་འདིར་སློབ་གཉེར་དང་། ཉམས་ལེན་ལ་འབད་བརྩོན་ཞུ་རྒྱུ་དེ་ཡིན་པ་སྨོས་ག་ལ་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བདེའི་རིག་པའི་གཞུང་ལུགས་ཀྱིས། འགྲོ་བ་མི་རྣམས་ཕན་ཚུན་རྟེན་ཅིང་འབྲེལ་བའི་སྤྱི་ཚོགས་ཤིག་ཡིན་པས། འཛམ་གླིང་ཞི་བདེ་ཡོང་བར་སྐྱེ་བོ་སོ་སོས་འཇིག་རྟེན་ཀུན་ཁྱབ་ཀྱི་འགན་འཁྲིའི་བསམ་བློས་མི་གཞན་དང་རང་བྱུང་ཁོར་ཡུག་ལ་བཟང་སྤྱོད་ཀྱི་འགན་ཁུར་ལེན་ཐུབ་མིན་ལ་རག་ལས་པར་དགོངས་ཀྱི་ཡོད་ཅིང་། དེ་བས་ནང་སེམས་ཀྱི་ཞི་བདེ་དང་། སྤྱི་ཚོགས་ཀྱི་ཞི་བདེ། འཛམ་གླིང་གི་ཞི་བདེ་བཅས་ཀྱི་རིམ་པ་གསུམ་གྱི་གྲུབ་ཆ་བཏོན་ཏེ། འཛམ་གླིང་ཞི་བདེའི་འགོ་འཛུགས་ས་ནི་མི་སྒེར་གྱི་བྱམས་བརྩེ་དང་། བཟང་སྤྱོད། འཇིག་རྟེན་ཀུན་ཁྱབ་འགན་ཁུར་གྱི་འདུ་ཤེས་སྐྱེད་སྲིང་གིས། སྤྱི་ཚོགས་ལ་ཞི་བདེའི་རྨང་གཞི་བསྐྲུན་རྒྱུ་དང་། སྤྱི་ཚོགས་ཁྱོན་ཡོངས་ལ་འགྲོ་བ་མི་རྣམས་གཅིག་གྱུར་གྱི་འདུ་ཤེས་གོ་རྟོགས་དང་། སློབ་གསོ་ལམ་ལུགས་ནང་དུ་སྤྱི་སེམས་བཟང་གསུམ་གྱི་ (SEE-Learning) སློབ་གཉེར་འཛུགས་སྐྱོང་ལ་སྐུལ་འདེད། རྒྱལ་སྤྱིའི་འགལ་ཟླ་དང་རྩོད་རྙོག་སེལ་བར་འཚེ་བ་མེད་པ་དང་གྲོས་མོལ་གྱི་ཐབས་ལམ་གཞི་འཛིན་དགོས་གལ་ནན་གསུང་གནང་བཞིན་པ་མ་ཟད། སྐྱེ་ཁམས་སྲུང་སྐྱོབ་ནི་འཛམ་གླིང་ཞི་བདེའི་གནད་དོན་གཙོ་བོ་ཞིག་ཏུ་བརྩིས་གནང་ཡོད་པས། ཁོང་གི་ཞི་བདེའི་རིག་པའི་གཞུང་ལུགས་ཀྱིས་དེང་རབས་ཀྱི་འཛམ་གླིང་འདིར་འཚེ་བ་དང་འགལ་ཟླའི་ཁྲོད་དུ་ཞི་འཇམ་དང་རྒྱུ་མཚན་ལྡན་པའི་འདེམས་ཀ་ཞིག་མཁོ་སྤྲོད་མཛད་ཡོད་ཅིང་། དེའི་དཔེ་མཚོན་གསོན་པོ་ཞིག་ནི། བོད་མི་ས་ཡ་གཅིག་དང་འབུམ་གཉིས་ལྷག་དུས་མིན་རྐྱེན་འདས་སུ་བཏང་བ་དང་། བོད་མི་རིགས་རྩ་མེད་ཀྱི་སྲིད་ཇུས་གཅིག་མཇུག་གཉིས་མཐུད་དུ་བརྩམས་དང་རྩོམ་བཞིན་པའི་རྒྱ་དམར་གཞུང་ལའང་འཚེ་མེད་ཞི་བའི་རྩ་དོན་བརྟན་བཟུང་ཐོག་བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་ཇུས་རྒྱུན་འཁྱོངས་གནང་བཞིན་པར་བོད་མིའི་སྒྲིག་འཛུགས་དང་བཙན་བྱོལ་བོད་མིས་ཉམས་ལེན་ཞུ་བཞིན་པ་འདི་ཡིན།
འདི་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་གོ་སྟོན་དང་བསྟུན་ཏེ་རྒྱལ་སྤྱིའི་ཁྱོན་ལ་བྱམས་བརྩེའི་ལོ་འཁོར་སྲུང་བརྩི་ཞུ་བཞིན་པའི་དགོས་དམིགས་ཀྱང་། ༸མགོན་པོ་གང་ཉིད་ཀྱི་ཞི་བདེའི་རིག་པའི་གཞུང་ལུགས་ཀྱི་གཞི་མ་བྱམས་བརྩེའི་བསྟན་བཅོས་སྐུལ་སྤེལ་གྱི་ཆེད་དུ་ཡིན་ལ། བྱམས་བརྩེ་ནི་ཁོང་ཁྲོ་དང་འཇིགས་སྐྲག་གི་གཉེན་པོ་ཡིན་པས། ཞི་བདེའི་ཚོར་བའི་འཕྲུལ་འཁོར་མ་ལག་ཡིན་ཞིང་། བྱམས་བརྩེ་ནི་རྟེན་ཅིང་འབྲེལ་བའི་དོན་དངོས་ལས་བྱུང་བ་ཡིན་པས་ཞི་བདེའི་བཟང་སྤྱོད་ཀྱི་རྨང་གཞི་ཡིན་པ། བྱམས་བརྩེ་ཡིས་ཕན་ཚུན་གྲོས་མོལ་དང་རྒྱུས་ལོན། ཞི་འདུམ་ལ་ཕན་གྲོགས་བྱེད་པས། འཚེ་མེད་ཞི་བའི་སྒུལ་ཤུགས་ཡིན་པ། བྱམས་བརྩེ་ནི་ཆོས་ལུགས་དང་སྐད་ཡིག །མི་རིགས་ཀྱི་མཚམས་ལས་བརྒལ་ཡོད་པས། གོ་ལའི་བཟང་སྤྱོད་ཀྱི་སྙིང་པོ་ཡིན་ལ། འདི་ནི་ནང་པའི་གཞུང་ལུགས་ཀྱི་གོ་དོན་ལ་དེང་སང་གསར་འགྲེལ་བྱས་པ་ཙམ་ཞིག་མ་ཡིན་པར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་པོའི་ཉམས་མྱོང་གི་བསླབ་བྱ་དང་། ཞི་བདེའི་རིག་པའི་གཞུང་ལུགས་ཀྱི་ཉིང་བཅུད་ཡིན་པས། རྒྱལ་སྤྱིའི་ཞི་བདེ་ཞིབ་འཇུག་གི་རྒྱུ་ཆ་རྩ་འགངས་ཆེན་པོ་འདི་འཛམ་གླིང་ཧྲིལ་པོར་དར་སྤེལ་ཡོང་རེ་བཅངས་པ་དོན་སྨིན་རྒྱ་ཆེར་འབྱུང་བའི་སྨོན་འདུན་ཡོད། ཅེས་གསུངས་སོང་།
ཡང་དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པ་དང་བསྟུན་སྲིད་སྐྱོང་མཆོག་གིས། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་པས། འཛམ་གླིང་ཁྱོན་དུ་འགྲོ་བ་མིའི་ལྷན་སྐྱེས་ཀྱི་ཐོབ་ཐང་ལོངས་སུ་སྤྱོད་སྐལ་མ་ཐོབ་པ་རྣམས་ལ་གདུང་སེམས་མཉམ་བསྐྱེད་དང་། འགྲོ་བ་མིའི་ཐོབ་ཐང་འཕྲོག་མཁན་རྣམས་ལ་བླང་དོར་གྱི་མིག་ཐོབ་ཅིང་། བྱམས་བརྩེའི་གོ་རྟོགས་རྙེད་པའི་བྱིན་མཐུ་ལ་བརྟེན་ནས་འགྲོ་བ་མི་རེའི་ཚེ་སྲོག་ལ་བརྩི་བཀུར་དང་། འགྲོ་བ་མི་རེའི་སྐད་ངག་ལ་ཉན་འཇོག འགྲོ་བ་མི་རེའི་མངོན་འདོད་ལ་སྲུང་བརྩི་ཞུ་བའི་ང་ཚོ་ཐུན་མོང་གི་དམིགས་འདུན་ཐོག་གོམ་པ་མདུན་སྤོ་བྱེད་ཐུབ་པའི་སྨོན་ལམ་འདེབས་ཀྱི་ཡོད། ལྷག་པར་དུ་ཞེ་སྡང་དང་འདོད་རྔམ། གཏི་མུག་གི་བྲན་འོག་ཏུ་ཚུད་པའི་རྒྱ་ནག་གུང་ཁྲན་སྲིད་གཞུང་གིས་སྤྱི་པའི་ཐོན་ཁུངས་ཡོངས་རྫོགས་བཀོལ་སྤྱོད་བྱས་ཏེ། བོད་མི་རིགས་ཀྱི་ངོ་བོ་རྩ་མེད་དང་། བོད་ཀྱི་རང་བྱུང་ཁོར་ཡུག་གཏོར་བཤིག་གཏོང་བའི་བརླང་སྤྱོད་དེ་རིགས་བྱམས་བརྩེ་དང་སྙིང་རྗེ། ཤེས་རབ་ཀྱི་གྲོགས་དང་འཕྲད་དེ། མགྱོགས་ནས་མྱུར་དུ་མཚམས་འཇོག་གིས། བོད་རྒྱ་གཉིས་སྨན་དབུ་མའི་ལམ་གྱི་འཇུག་ངོགས་ནས་བོད་རྒྱའི་གནད་དོན་ཞི་འགྲིག་གི་ཐབས་ལམ་ལ་མངོན་དུ་ཕྱོགས་པའི་རེ་སྨོན་བྱེད་བཞིན་ཡོད། ཅེས་གསུངས་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དུས་ཆེན་དང་འབྲེལ་བའི་གསུང་བཤད་གནང་སྐབས། ྋགོང་ས་མཆོག་ནས་ནོ་སྦེལ་ཞི་བདེའི་གཟེངས་རྟགས་འབུལ་བཞེས་སྐབས་ཀྱི་གསུང་བཤད་གནང་བའི་ནང་། “ངོས་རང་ནང་པའི་གྲྭ་པ་ཞིག་ཡིན་པའི་ཆ་ནས་སེམས་ཅན་སྡུག་བསྔལ་གྱིས་མནར་བ་རྣམས་ལྟ་ཅི་སྨོས། འགྲོ་བ་མིའི་ཁྱིམ་ཚང་གི་ནང་མི་ཡོད་དོ་ཅོག་ལ་སེམས་འཁུར་བྱེད་ཀྱི་ཡོད། སྡུག་བསྔལ་ཡོངས་རྫོགས་རྨོངས་པའི་རྐྱེན་ལས་བྱུང་བར་ང་ཡིད་ཆེས་ཡོད་ཅིང་། སྐྱེ་བོ་རྣམས་ཀྱིས་རང་ཉིད་གཅིག་པུའི་བདེ་སྐྱིད་དང་། འདོད་བློ་ཁེངས་པ་ཡོང་བའི་ཆེད་གཞན་དག་ལ་སྡུག་བསྔལ་བཟོ་གི་ཡོད་ན་ཡང་། བདེ་སྐྱིད་དངོས་འབྲེལ་ནི་ནང་སེམས་ཀྱི་བདེ་བ་དང་། ཆོག་ཤེས་ཀྱི་སྟེང་ནས་འབྱུང་དགོས། ཡིད་ཀྱི་བདེ་བ་དང་ཆོག་ཤེས་ནི་གཞན་ཕན་གྱི་ཀུན་སློང་དང་། བྱམས་པ། སྙིང་རྗེ་བཅས་གོང་སྤེལ་དང་། རྨོངས་པ། རང་གཅེས་འཛིན། འདོད་སེམས་བཅས་སྤོང་བའི་ཐོག་ནས་འབྱུང་དགོས།” ཞེས་དང་། “དེང་སྐབས་ང་ཚོར་འཕྲད་བཞིན་པའི་དཀའ་རྙོག་དཔེར་ན། དྲག་པོའི་འཐབ་རྩོད་དང་། རང་བཞིན་འབྱུང་ཁམས་གཏོར་བཤིག་དབུལ་ཕོངས། བཀྲེས་སྐོམས་ལ་སོགས་པ་ནི་འགྲོ་བ་མིས་བཟོས་པའི་དཀའ་ངལ་ཤ་སྟག་ཡིན་ཞིང་། དཀའ་རྙོག་དེ་རྣམས་འགྲོ་བ་མིས་འབད་བརྩོན་དང་། གོ་རྟོགས། སྤུན་ཟླའི་འདུ་ཤེས་བཅས་སྤེལ་བའི་སྒོ་ནས་སེལ་ཐུབ་ཀྱི་རེད། ང་ཚོ་ཕན་ཚུན་དབར་དང་འཛམ་གླིང་སྤྱིའི་འགན་ཁུར་ལེན་པའི་བསམ་བློ་སྤེལ་དགོས།” ཞེས་སོགས་བཀའ་སློབ་ཕེབས་ཡོད་པ་ལྟར། འཛམ་གླིང་འདིའི་ནང་མི་མཐོ་དམན་སུ་འདྲ་ཞིག་ཡིན་རུང་། སོ་སོས་འདོད་ཆུང་ཆོག་ཤེས་དང་། བྱམས་སྙིང་རྗེ། གཞན་གཅེས་འཛིན་སོགས་ཉམས་སུ་ལེན་ཐུབ་པ་ཡིན་ན་འཛམ་གླིང་འདི་རང་བཞིན་གྱིས་བདེ་སྐྱིད་ལྡན་པའི་ཁྱིམ་ཚང་ཞིག་ཏུ་འགྱུར་ཐུབ་པ་དང་། དཀའ་རྙོག་ཇི་འདྲ་ཞིག་འཕྲད་རུང་། འགྲོ་བ་མིའི་འདུ་ཤེས་ཀྱི་གོ་རྟོགས་དང་། ཕན་ཚུན་དབར་སྤུན་ཟླའི་འདུ་ཤེས་ཀྱི་སྒོ་ནས་བསམ་ཞིབ་དང་འགན་ཁུར་ལེན་པའི་བསམ་བློ་སྤེལ་རེས་བྱས་ཏེ་དམག་འཁྲུག་དང་གནོད་ཚེའི་དཀའ་ངལ་སེལ་ཐབས་བྱ་རྒྱུ་ཤིན་ཏུ་ནས་གལ་འགངས་ཆེ་བར་སོང་། གོ་སྐབས་འདི་བརྒྱུད་ནས་སྤྱི་ཚོགས་དང་། ལྷག་པར་དུ་རྒྱལ་ཁབ་ཁག་གི་ཆབ་སྲིད་འགོ་འཁྲིད་ཚོར་དེ་ལྟར་གནང་ཕྱོགས་ཡོང་བའི་འབོད་སྐུལ་ཞུ་རྒྱུ་ཡིན། ཕྱི་ལོ་ ༢༠༢༥ ལོའི་ནོ་སྦེལ་ཞི་བདེའི་གཟེངས་རྟགས་དེ་བཞིན་ཝེ་ནེ་ཛུ་ལའི་མི་མང་གི་མང་གཙོའི་ཐོབ་ཐང་གོང་འཕེལ་གཏོང་བར་འབད་བརྩོན་ལྷོད་མེད་གནང་མཁན་དང་། དྲང་བདེན་དང་ཞི་བདེའི་ངང་ནས་བཙན་དབང་རིང་ལུགས་དེ་མང་གཙོའི་རིང་ལུགས་སུ་བསྒྱུར་བར་འཐབ་རྩོད་གནང་མཁན་ལྕམ་སྐུ་མ་རི་ཡ་ཀོ་རི་ནཱ་མཱ་ཆ་དོ་ (Maria Corina Machado) མཆོག་ལ་ཐོབ་པའི་གསལ་བསྒྲགས་གནང་བ་བཞིན་དེ་རིང་དངོས་སུ་ཁོང་གིས་ཞི་བདེའི་གཟེངས་རྟགས་བཞེས་པར་བོད་མི་མང་སྤྱི་འཐུས་ལྷན་ཚོགས་ནས་འཚམས་འདྲི་དང་བཀྲ་ཤིས་སྨོན་འདུན་ཞུ་རྒྱུ་ཡིན། ཞེས་གསུངས་སོང་།
ཡང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་འབྲེལ་ནས་ཚོགས་གཙོ་མཆོག་གིས། ཕྱི་ལོ་ ༡༩༤༨ ཟླ་ ༡༢ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྒྱལ་ཡོངས་ཚོགས་ཆེན་ཐེངས་ ༣༡༧ པའི་ཐོག་གྲོས་ཆོད་ཨང་ ༤༢༣(V) སྣོལ་འཇོག་གནང་བའི་ཐོག་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་གཞི་གཏན་འབེབས་གསལ་བསྒྲགས་བྱས་པར་རྗེས་དྲན་ཞུ་ཕྱིར། ཕྱི་ལོ་ ༡༩༥༠ ནས་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་ཞུ་འགོ་བཙུགས་ཏེ་དེ་རིང་མི་ལོ་ཧྲིལ་པོ་ ༧༥ འཁོར་བཞིན་ཡོད། ཁྲིམས་གཞི་གཏན་འབེབས་གནང་བ་ནས་བཟུང་མི་ཚང་མ་ཐོག་མར་སྐྱེ་དུས་ནས་རང་དབང་ལྡན་ཞིང་ཆེ་མཐོང་དང་ཐོབ་ཐང་འདྲ་མཉམ་ཡོད་པའི་ཐོག རིགས་རུས་དང་། ཤ་མདོག ཕོ་མོ། སྐད་ཡིག ཆོས་ལུགས། ཆབ་སྲིད་དམ་བསམ་ཚུལ་གཞན། རྒྱལ་ཁབ་བམ་སྤྱི་ཚོགས་ཀྱི་འབྱུང་ཁུངས། རྒྱུ་ནོར། སྐྱེ་གནས་སམ་གནས་བབ་གཞན་བཅས་ཀྱི་ཐོག་ནས་དབྱེ་འབྱེད་མི་ཆོག་ཅིང་། འགྲོ་འདུག་སྤྱོད་གསུམ་དང་། སྨྲ་བརྗོད། འདུ་འཛོམས་སོགས་ཀྱི་རང་དབང་ནི་འགྲོ་བ་མིའི་གཞི་རྩའི་ཐོབ་ཐང་ཡིན་པས་སུས་ཀྱང་ཕོག་ཐུག་བྱེད་མི་ཆོག་པ་སོགས་གསལ་དོན་བཞིན། འཛམ་གླིང་རྒྱལ་ཁབ་ཕལ་མོ་ཆེའི་ནང་དེ་ལྟར་ལོངས་སྤྱོད་པའི་གོ་སྐབས་ཡོད་ན་ཡང་། བོད་ནང་ལ་ཆབ་སྲིད་དང་། ཆོས་དད། སྐད་ཡིག་སོགས་ཀྱི་རང་དབང་དང་ཐོབ་ཐང་ལྟ་ཞོག་འགྲོ་འདུག་སྤྱོད་གསུམ་གྱིས་མཚོན་གཞི་རྩའི་རང་དབང་དང་ཐོབ་ཐང་ཡེ་ནས་མེད་པའི་དཀའ་ངལ་འཕྲད་མུས་དང་། བོད་ནང་གི་དངོས་ཡོད་གནས་ཚུལ་རྟོགས་རྒྱུར་རྒྱ་གཞུང་གིས་བཀག་སྡོམ་དང་། གནས་ཚུལ་དངོས་བདེན་མིན་པར་འཁྱོག་བཤད་བྱེད་བཞིན་ཡོད་པར་བརྟེན་འཛམ་གླིང་མཉམ་འབྲེལ་རྒྱལ་ཚོགས་ནས་ཁྲིམས་ཡིག་ལག་བསྟར་ཚུལ་བཞིན་ཡོང་རྒྱུར་རྒྱ་ནག་གཞུང་ལ་གནོན་ཤུགས་དང་སྐུལ་མ་བྱེད་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། སྐལ་བཟང་སྦྱིན་པ།
