རྩོམ་པ་པོ། བོད་མི་མང་སྤྱི་ཟུར་ཆབ་བྲག་ལྷ་མོ་སྐྱབས།
རྩོམ་ཁུངས། བོད་ཀྱི་དུས་བབ།
སྐྱེ་བོ་སུ་ཞིག་ས་གནས་འོས་བསྡུ་ལས་ཁང་གི་ཚོགས་མི་ཡིན་བཞིན་དུ་སྤྱི་འཐུས་སུ་དང་བླངས་འཛུལ་ཞུགས་བྱས་དང་་བྱེད་བཞིན་པ་དག་ནི། བཙན་བྱོལ་བོད་མིའི་འོས་བསྡུའི་སྒྲིག་གཞི་དང་འགལ་ཡོད། དེ་ཡང་། དོན་ཚན་སོ་དགུ་པ། བོད་མི་མང་སྤྱི་འཐུས་ཀྱི་འོས་ཆོས་ལས། “༨༽ སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་འོས་བསྡུའི་ཁྲིམས་ལུགས་སམ་ཁྲིམས་སྒྲིག་ཅི་རིགས་དང་མི་འགལ་བ།” ཞེས་པ་དང་འགལ་ཡོད།
འགལ་ཚུལ་ཇི་ལྟར་ཡིན་ཞེ་ན། བཙན་བྱོལ་བོད་མིའི་འོས་བསྡུའི་སྒྲིག་གཞིའི་དོན་ཚན་བཅུ་བཞི་པར། “ས་གནས་འོས་བསྡུ་ལས་ཁང་གི་ཚོགས་མི་དང་ཁོངས་གཏོགས་ལས་བྱ་བོད་མི་མང་སྤྱི་འཐུས་འོས་གཞིར་དང་བླངས་འཛུལ་ཞུགས་བྱ་འཆར་ཡོད་པ་རྣམས་དང༌། སྲིད་སྐྱོང་དང་སྤྱི་འཐུས་ཀྱི་འོས་གཞིར་ཞུགས་འཐུས་གསལ་བསྒྲགས་ཟིན་པའི་བོད་མིའི་སྒྲིག་འཛུགས་ཀྱི་ལས་བྱེད། ཡང་ན་འོས་འཕེན་པའི་མཚན་ཉིད་མི་ལྡན་པའམ། ཁྲིམས་ཞིབ་ཁང་ནས་ར་འཕྲོད་འཕེར་ངེས་ཀྱི་ཀླན་ཀ་ཡོད་རིགས་ལ་བསྐོ་གཞག་ནམ་ཡང་མི་ཆོག” ཅེས་མི་ཆོག་པ་གསུམ་བསྟན་ཡོད་པ་ལས། “ས་གནས་འོས་བསྡུ་ལས་ཁང་གི་ཚོགས་མི་དང་ཁོངས་གཏོགས་ལས་བྱ་བོད་མི་མང་སྤྱི་འཐུས་འོས་གཞིར་དང་བླངས་འཛུལ་ཞུགས་བྱ་འཆར་ཡོད་པ་རྣམས་བསྐོ་གཞག་ནམ་ཡང་མི་ཆོག་པ་དེ་དང་རྒྱབ་འགལ་ཆགས་ཡོད།
དེ་ཡང་གསལ་བོར་བཤད་ན། སྐྱེ་བོ་སུ་ཞིག་རང་ངོས་ནས་བོད་མི་མང་སྤྱི་འཐུས་ཀྱི་འོས་གཞི་ལ་དང་བླངས་སྒོ་ནས་འཛུལ་ཞུགས་བྱ་རྒྱུའི་འཆར་གཞི་ཡོད་པ་ཞིག་ཡིན་ན། དེ་གནས་འོས་བསྡུ་ལས་ཁང་གི་ཚོགས་མིའི་འོས་ཆོས་མ་ཚང་བ་ཡིན་པས། ཐོག་མ་ནས་བསྐོ་གཞག་མི་ཆོག་པ་གསལ་བོར་བསྟན་ཡོད་ལ། ལྷག་པར་དུ་ཡང་། ས་གནས་འོས་བསྡུ་ལས་ཁང་གི་ཚོགས་མིར་བདམས་ཐོན་བྱུང་རྗེས། སུ་ཞིག་གིས་རང་ཉིད་སྤྱི་འཐུས་འོས་གཞིར་དང་བླངས་འཛུལ་ཞུགས་བྱས་པ་ཡིན་ན། དེ་ནི་དེ་བས་ཀྱང་མ་འོས་པའམ་སྒྲིག་དོན་ལ་དངོས་འགལ་བྱས་པ་ཞིག་ཅི་ལ་མིན།
གལ་ཏེ་དོ་བདག་རང་ངོས་ནས་ཐོག་མ་ཉིད་ནས་སྤྱི་འཐུས་འོས་གཞིར་དང་བླངས་འཛུལ་ཞུགས་མ་བྱས་པར་མི་མང་གིས་འོས་ཤོག་བླུགས་ཏེ་དངོས་གཞིའི་འོས་བསྡུའི་ཁོངས་སུ་ཚུད་སོང་ན། དེ་ནི་དོ་བདག་གིས་ཁྲིམས་སྒྲིག་མ་བརྩིས་པ་ཞིག་ཆགས་མེད་ན་ཡང་། སྐབས་དེར་འོས་གཞི་ནས་དགོངས་པ་མ་ཞུས་ན། ས་གནས་འོས་བསྡུ་ལས་ཁང་གི་ཚོགས་མི་ནས་རང་བཞིན་ཕྱིར་འཐེན་བྱེད་དགོས་པའི་སྐོར་ལ་ཡང་གོང་གསལ་དོན་ཚན་བཅུ་བཞི་པ་ན་འདི་ལྟར་གསལ།
“གལ་སྲིད་ས་གནས་འོས་བསྡུ་ལས་ཁང་གི་ཚོགས་མི་གང་ཞིག་དབུས་འོས་བསྡུ་ལས་ཁང་ནས་དངོས་གཞིའི་འོས་གཞིར་གསལ་བསྒྲགས་ཟིན་ཁོངས་སུ་ཡོད་ཚེ། གསལ་བསྒྲགས་ཡིག་ཆ་ས་གནས་འོས་བསྡུ་ལས་ཁང་ལ་འབྱོར་ཚེས་ནས་བཟུང་བདུན་ཕྲག་གཅིག་གི་ནང་ཚུན་དོ་བདག་གིས་ས་གནས་འོས་བསྡུ་ལས་ཁང་གི་ཚོགས་མི་ནས་རང་བཞིན་ཕྱིར་འཐེན་བྱེད་དགོས་ཤིང༌། ཚབ་གསར་སྐབས་འཕྲལ་སོ་སོར་དོན་ཚན་ ༡༢ དང་ ༡༣ ནང་གསལ་ལྟར་བསྐོ་གཞག་དགོས། གལ་སྲིད་དོ་བདག་ནས་སྒྲིག་དོན་ཉམས་ལེན་མ་ཞུས་ཚེ་ཉེས་ཆད་དུ་ས་གནས་དེ་ནས་འོས་བསྡུ་དངོས་གཞིའི་སྐབས་འོས་གཞི་དེར་འོས་གྲངས་ཇི་ཡོད་དབུས་འོས་བསྡུ་ལས་ཁང་ནས་རྩིས་མེད་གཏོང་རྒྱུ།”
གཞན་ཡང་དེང་སང་ང་ཚོའི་སྤྱི་ཚོགས་ནང་ལ། སྤྱི་འཐུས་ཀྱི་འོས་གཞིར་དང་བླངས་འཛུལ་ཞུགས་པ་ཇེ་མང་ལ་འགྲོ་བཞིན་པ་ནི་དགའ་འོས་པ་ཞིག་ཡིན་པས་བཙན་བྱོལ་བོད་མིའི་འོས་བསྡུའི་སྒྲིག་གཞི་ནང་གསལ་དོན་ཚན་འགའ་རེར་ངེས་པར་ཡིད་གཟབ་གནང་དགོས།
དོན་ཚན་ཞེ་གཅིག་པ་ན། ཐོབ་ཁུངས་གང་རུང་ནས་སྤྱི་འཐུས་ཀྱི་འོས་གཞིར་དང་བླངས་འཛུལ་ཞུགས་བྱེད་པ་ལ་ཐོག་མའི་ཆ་རྐྱེན་གཉིས་གཏོན་འདུག་པ་ནི།
ཀ དོན་ཚན་ ༣༩ ནང་གསལ་སྤྱི་འཐུས་ཀྱི་འོས་ཆོས་ཚང་བ།
ཁ ཐོབ་ཁུངས་དེ་གའི་འོས་འཕེན་པ་ཚད་ལྡན་རྒྱུས་ཅན་ ༢༥ ནས་འགན་འཁུར་གྱིས་རྒྱབ་སྐྱོར་ཡོད་པ།
དོན་ཚན་ཞེ་གཉིས་པར། དང་བླངས་འོས་གཞིའི་འགེངས་ཤོག་འབུལ་ཚུལ་ལ་སྒྲུབ་དགོས་པའི་ཆ་རྐྱེན་གསུམ་བཏོན་འདུག་པ་ནི།
༡ ས་གནས་འོས་བསྡུ་ལས་ཁང་དུ་དོ་བདག་སྤྱི་འཐུས་འོས་གཞིར་དང་བླངས་འཛུལ་ཞུགས་བྱ་རྒྱུའི་སྙན་ཞུ་ཕུལ་ཏེ། དང་བླངས་འོས་གཞིའི་འགེངས་ཤོག་དང༌། རྒྱབ་སྐྱོར་འགེངས་ཤོག་རྩིས་ལེན་བྱེད་དགོས།
༢ ཟུར་འཛར་ ཆ༽ དང་ ཇ༽ གཞིར་བཟུང་འོས་གཞིའི་འགེངས་ཤོག་དང་རྒྱབ་སྐྱོར་འགེངས་ཤོག་ནང་འཚེམས་ལུས་ནོར་འཁྲུལ་མེད་པར་བསྐངས་ནས། དང་བླངས་འོས་གཞིར་འཛུལ་ཞུགས་བྱེད་པོ་རང་ཉིད་དང༌། ཐོབ་ཁུངས་དེ་གའི་འོས་འཕེན་པ་ཚད་ལྡན་རྒྱུས་ཅན་ ༢༥ ནས་འགན་འཁུར་རྒྱབ་སྐྱོར་གྱི་མིང་རྟགས་འཁོད་པའི་ཡིག་ཆ་བཅས་དབུས་འོས་བསྡུ་ལས་ཁང་གི་གཏན་འབེབས་དུས་ཚེས་ནང་ཚུན་ས་གནས་འོས་བསྡུ་ལས་ཁང་ལ་ཕུལ་ཟིན་པ་དགོས།
༣ དང་བླངས་འཛུལ་ཞུགས་བྱེད་པོ་སོ་སོ་ནས་འགེངས་ཤོག་ཁག་དང་ཆབས་ཅིག་འབབ་དངུལ་རྒྱ་བལ་འབྲུག་གསུམ་ནས་ཧིན་སྒོར་ ༡༥༠༠༠ རེ་དང༌། རྒྱ་བལ་འབྲུག་གསུམ་ཕུད་པའི་ཕྱི་རྒྱལ་ཡུལ་གྲུ་ཁག་ནས་ཨ་སྒོར་ ༥༠༠ རེ་ས་གནས་འོས་བསྡུ་ལས་ཁང་དུ་ཟུར་འཇོག་བྱེད་དགོས།
གོང་གསལ་ཆ་རྐྱེན་ནམ་གོ་རིམ་འདི་དག་མ་བརྒྱུད་པར་གང་བྱུང་དུ་སྤྱི་འཐུས་འོས་གཞིར་ལངས་ནས་གཏམ་བཤད་སོགས་བྱས་ན་ཡང་ནོར་འཁྲུལ་ཞིག་ཆགས་ཡོད་པ་བཅས་ཀྱི་གསལ་བཤད་ཙམ་ཡིན།
མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།
