རྩོམ་པ་པོ། སློབ་དགེ་རྡོ་རྗེ་རིན་ཆེན།
རྩོམ་ཁུངས། བོད་ཀྱི་དུས་བབ།
བཙན་བྱོལ་བོད་མིའི་སྒྲིག་འཛུགས་བཀའ་ཤག་སྐབས་བཅུ་གསུམ་པས་ཤེས་ཡོན་སྲིད་བྱུས་གཏན་འབེབས་གནང་སྟེ། ཤེས་རིག་ལས་ཁུངས་ཀྱི་ཁྱབ་ཁོངས་སཾ་བྷོ་ཊ་བོད་སློབ་འཛིན་ཚོགས་འོག་ཡོད་པའི་གཏན་ཉིན་སློབ་གྲྭ་ཁག་ནང་ལག་བསྟར་གནང་ཡོད། དེ་ནས་ལོ་བཅུ་ཕྲག་གཅིག་ལྷག་གི་རྗེས་སུ་རྒྱ་གར་བོད་སློབ་འཛིན་ཚོགས་འོག་ཡོད་པའི་སློབ་གྲྭ་ཁག་རིམ་བཞིན་རྩིས་བླངས་ཏེ། སཾ་བྷོ་ཊ་བོད་སློབ་འཛིན་ཚོགས་འོག་ཟླ་སྒྲིལ་བཏང་བ་དང་ཆབས་ཅིག་གཞི་རིམ་སློབ་གྲྭ་ཁག་ཏུ་ ནུས་པ་ཐོན་མིན་དང་། ཁ་ཕྱོགས་གསལ་མིན། སྒྲོམ་གཞི་དང་འཆར་འགོད། དེ་བཞིན་མཇུག་གནོན་བཅས་ཇི་ལྟར་ཚད་ལྡན་ཡིན་མིན་སོགས་ལ་མ་ལྟོས་པར། ད་ལྟའི་སཾ་བྷོ་ཊའི་འཛིན་སྐྱོང་འོག་གི་སློབ་གྲྭ་ཡོངས་རྫོགས་ནང་ཤེས་ཡོན་གྱི་སྒྲོམ་གཞིའམ་ལམ་ལུགས་ཁག་གཉིས་མི་རིགས་ཤིག་གི་གཞི་རྩའི་རིག་གཞུང་གི་དགོས་མཁོ་གཞིར་བཞག་སྟེ་རྒྱུན་འཁྱོངས་བྱེད་བཞིན་ཡོད།
དེ་གཉིས་ལས་གཅིག་ནི་གོང་བརྗོད་ལྟར་གྱི་ཤེས་ཡོན་སྲིད་བྱུས་དང་། གཞན་དེ་འདས་པའི་ལོ་ཤས་ནས་ཁྱབ་སྤེལ་བཏང་དང་གཏོང་བཞིན་པའི་སཱི་ཤེས་ཡོན་སློབ་གསོ་དེ་ཡིན། སྤྱིར་བཏང་གཞི་རིམ་སློབ་གྲྭ་ཁག་ནང་སྐབས་འབྲེལ་སོ་སོར་དགེ་རྒན་ཚོར་ཟབ་སྦྱོང་སྣ་མང་སྤྲད་དེ། ཤེས་ཡོན་སློབ་གསོ་གོང་འཕེལ་ཐད་མཐུན་རྐྱེན་སྦྱོར་འཇགས་བྱས་དང་བྱེད་བཞིན་ཡོད་ཀྱང་། སློབ་གསོ་དེ་དག་གི་ཁྲོད་ཅུང་འབོད་སྒྲ་ཆེ་ཞིང་ངོ་བོ་གསལ་བ་ལྟ་བུ་ནི་གོང་འཁོད་ཀྱི་ཤེས་ཡོན་ལམ་ལུགས་དེ་གཉིས་ཡིན།
དེ་གཉིས་ཀྱང་མཚུངས་བསྡུར་ཞིག་བྱས་ན། གཞི་རིམ་སློབ་གྲྭ་ཁག་ཏུ་ཤེས་ཡོན་སྲིད་བྱུས་ནི་དངོས་གཟུགས་ནས་གྲིབ་གཟུགས་ལྟ་བུ་ཞིག་དང་། སཱི་ཤེས་ཡོན་སློབ་གསོ་ནི་དངོས་གཟུགས་ལྟ་བུ་ཞིག་ཏུ་ཆགས་ཡོད། དེ་ཡང་ཁ་གསལ་དུ་བཏང་ན། ཤེས་ཡོན་སྲིད་བྱུས་ནི་འབོད་སྒྲ་ཙམ་ཞིག་དང་། དངོས་སུ་ལག་བསྟར་བྱེད་བཞིན་པ་ནི་སཱི་ཤེས་ཡོན་སློབ་གསོ་དེ་ཆགས་ཡོད།
ཡིན་ནའང་གོང་བརྗོད་བཞིན་བཙན་བྱོལ་བོད་མིའི་སྒྲིག་འཛུགས་བཀའ་ཤག་སྐབས་བཅུ་གསུམ་པས་ཤེས་ཡོན་སྲིད་བྱུས་གཏན་འབེབས་གནང་བ་ནས་བརྩིས་ན། མི་ལོ་བཅུ་དགུ་ལྷག་ཅིག་ཕྱིན་ཡོད་པ་དང་། འདི་ག་རྡོར་གླིང་གཏན་སློབ་དེ་བཞིན་སཾ་བྷོ་ཊ་བོད་སློབ་འཛིན་ཚོགས་འོག་རྩིས་བླངས་རྗེས། ཤེས་ཡོན་སྲིད་བྱུས་ཀྱི་གྲིབ་གཟུགས་འོག་འཚར་ནས་ལོ་བཞི་ཙམ་ཕྱིན་པའི་འཛིན་རིམ་ལྔ་པའི་སློབ་ཕྲུག་ཀུན་གསལ་ལྷ་མོ་ལགས་ཀྱིས། ད་ལན་༸གོང་ས་མཆོག་གི་སྐུའི་གོ་སྟོན་ལ་དམིགས་ཏེ་ཀུན་གསལ་ལྷ་མོའི་གླུ་དབྱངས་ཞེས་པའི་སྙན་དེབ་ཅིག ༸གོང་ས་མཆོག་གིས་ནོ་སྦེལ་ཞི་བདེའི་གཟེངས་རྟགས་འབུལ་བཞེས་བསྐྱངས་ནས་བགྲང་བྱ་སོ་དྲུག་འཁོར་པའི་དུས་དྲན་མཛད་སྒོ་དང་སྟབས་བསྟུན་དབུ་འབྱེད་འགྲེམས་སྤེལ་གནང་ཐུབ་པ་བྱུང་ནི་ཆེས་དགའ་འོས་པ་ཞིག་ཡིན།
མདོར་བསྡུས་ནས་ཞུས་ན། འཛིན་རིམ་ལྔ་པའི་སློབ་ཕྲུག་ཅིག་གིས་ཚིགས་བཅད་སྙན་རྩོམ་དང་། ཚིག་ལྷུག་སྙན་རྩོམ། སྒྱུར་རྩོམ། ཡིག་གཟུགས་བཅས་སྡེ་ཚན་བཞིར་དབྱེ་བའི་ཤོག་བུ་བརྒྱ་དང་ཉེར་གསུམ་ཅན་གྱི་དཔེ་དེབ་ཅིག་འདི་ལྟར་དངོས་སུ་འདོན་སྤེལ་ཐུབ་པ་བྱུང་བ་ནི། རྒྱ་གར་བོད་སློབ་འཛིན་འོག་ཡོད་པའི་སློབ་གྲྭ་ཁག་རང་ཁོངས་སུ་རྩིས་བླངས་པ་དང་། རྩིས་བླངས་ཟིན་པའི་སློབ་ཁག་དེ་དག་ནང་ཤེས་ཡོན་སྲིད་བྱུས་ཀྱི་གྲིབ་གཟུགས་མ་ཡལ་བ། ལྷག་པར་དུ་ཁོ་མོར་ཆེད་དུ་བོད་སྐད་ཡིག་སློབ་ཁྲིད་གནང་མཁན་ལྟ་གྲུབ་སློབ་དཔོན་མཆོག སློབ་ཕྲུག་ཁོ་མོས་སྐྱེས་སྟོབས་དང་སྦྱངས་སྟོབས་བཅས་ཐུན་མོང་གི་འབྲས་བུ་ཞིག་ལག་པས། གོ་སྐབས་སྐབས་འདི་བརྒྱུད་ནས་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུའོ། །
