བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་དང་བློ་གྲོས་དཔལ་ལྡན་ལགས་གཉིས་ཀྱིས་རྒྱ་གར་གྱི་མངའ་སྡེ་ ༢༡ དང་རང་སྐྱོང་ཁུལ་ ༢ ནང་སྦག་སྦག་སྐོར་སྐྱོད་ཀྱི་བོད་དོན་དྲིལ་བསྒྲགས་བྱེད་བཞིན་འདུག
༸གོང་ས་༧རྒྱལ་བ་རིན་པོ་ཆེ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༦ འཁོར་བ་དང་། འདི་ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་དང་། བློ་གྲོས་དཔལ་ལྡན་ལགས་གཉིས་ཀྱིས་བཞུགས་སྒར་དྷ་རམ་ས་ལ་ནས་མགོ་བཙུགས་ཏེ་ཟླ་གསུམ་རིང་རྒྱ་གར་རྒྱལ་ཡོངས་སུ་སྦག་སྦག་སྐོར་སྐྱོད་ཀྱི་་བོད་དོན་དྲིལ་བསྒྲགས་ཀྱི་ལས་འགུལ་སྤེལ་བཞིན་ཡོད་པ་ལྟར། དེ་རིང་ཕྱི་ཚེས་ ༡༥ ཉིན་གྱི་ཆུ་ཚོད་ ༡ ཙམ་ལ་ཁོང་གཉིས་རྒྱ་གར་ཡུག་པི་མངའ་སྡེའི་(Utter Predesh ) གྷོ་ར་པུར་གྲོང་ཁྱེར་གྱི་ཉེ་འགྲམ་དུ་འབྱོར་ཡོད་ཅིང་། ཕྱི་ལོ་ ༢༠༢༦ ལོའི་བོད་ཀྱི་གསུམ་བཅུའི་དུས་དྲན་ཉིན་རྒྱ་གར་གྱི་རྒྱལ་ས་ལྡི་ལི་རུ་འབྱོར་འཆར་འདུག
ཐེངས་འདིའི་སྦག་སྦག་སྐོར་སྐྱོད་ལས་འགུལ་སྐོར་ལ་འཇམ་དབྱངས་བསྟན་འཛིན་ལགས་ཀྱིས་འདི་གའི་གསར་འགོད་པར། ཞོགས་པ་དང་དགོང་མོའི་སྐབས་སུ་གནམ་གཤིས་ཀྱི་རྐྱེན་གྱིས་སྨུག་པ་འཐིབས་ཏེ་སྦག་སྦག་སྐོར་སྐྱོད་བྱེད་པར་དཀའ་ངལ་ཅུང་ཙམ་འཕྲད་ཀྱི་འདུག ཡིན་ནའང་། ངེད་གཉིས་ཀྱིས་ཁས་ལེན་བྱས་པ་བཞིན་འགྲོ་ཐུབ་ཀྱི་རེད་བསམ་གྱི་འདུག རྒྱ་གར་གྱི་ས་གནས་ཁག་ཏུ་སླེབས་དུས་ཡུལ་མི་རྣམས་ཀྱིས་དོ་སྣང་ཡག་པོ་བྱེད་ཀྱི་འདུག མཚམས་མཚམས་སུ་བོད་ཀྱི་སྐོར་ལ་ཅི་ཡང་མི་ཤེས་མཁན་དེ་འདྲ་ཡང་ཡོང་གི་འདུག དེ་ཚོ་བོད་ཀྱི་ལོ་རྒྱུས་དང་བཙན་བྱོལ་བའི་གནས་སྟངས་འགྲེལ་བཤད་བརྒྱབ་སྟེ། བོད་དོན་ཐོག་རྒྱབ་སྐྱོར་བྱེད་པའི་འབོད་སྐུལ་ཞུས་པ་ཡིན། ས་གནས་ཁག་གི་ཡུལ་མི་རྣམས་དང་འབྲེལ་བ་ཡག་པོ་བྱ་ཐུབ་ཚེ་དྲིལ་བསྒྲགས་ཤུགས་ཆེན་པོ་བྱ་རྩིས་ཡོད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ངས་ལོ་གསུམ་རིང་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་སྤེལ་བ་ཡིན། ད་དུང་བོད་དོན་ཐོག་མུ་མཐུད་དུ་ལས་འགུལ་སྤེལ་བའི་འཆར་གཞི་མང་པོ་ཡོད། བོད་དོན་གྱི་ལས་འགུལ་སྤེལ་བར་བོད་མི་ཚང་མས་རྒྱབ་སྐྱོར་བྱ་དགོས་ཀྱི་འདུག ངས་རྒྱུན་དུ་བོད་མི་ཚང་མ་མཐུན་སྒྲིལ་བྱེད་རོགས་ཞུ་ཡི་ཡོད། བོད་མི་ནང་ཁུལ་དུ་འཆམ་པོ་མེད་ན་སེམས་པ་སྐྱོ་བ་རེད། ངའི་རྐང་འཁོར་སྐོར་སྐྱོད་ཐེངས་བདུན་པ་མཇུག་སྒྲིལ་རྗེས་ངལ་གསོ་ཡག་པོ་ཞིག་བྱེད་ཐུབ་མ་པར་བློ་གྲོས་དཔལ་ལྡན་གྱིས་འབོད་སྐུལ་ཞུས་པ་བཞིན་ཁས་ལེན་བྱས་པ་ཡིན། བོད་དོན་གྱི་ལས་འགུལ་ཡིན་ཚེ་ངས་རྒྱབ་སྐྱོར་བརྒྱ་ཆ་བརྒྱ་ཞུ་ཡི་ཡོད། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་ང་ཚོ་འཛམ་གླིང་ནང་མེད་པའི་བཙན་བྱོལ་བོད་མིའི་སྒྲིག་འཛུགས་ཤིག་ཡོད་པ་རེད། བོད་མི་རྣམས་ཀྱིས་རེ་བ་ཆེན་པོའི་ཐོག་བོད་དོན་ལས་འགུལ་སྤེལ་རྒྱུ་གལ་ཆེན་པོ་རེད། ཅེས་འགྲེལ་བརྗོད་གནང་བྱུང་།
ཐེངས་འདིའི་སྦག་སྦག་སྐོར་སྐྱོད་དེ་ནི་༸གོང་ས་མཆོག་གི་བྱམས་བརྩེའི་ལོ་སྲུང་བརྩི་ཞུ་རྒྱུ་དང༌། རྒྱ་གར་ལ་སྙིང་ཐག་པ་ནས་བཀའ་དྲིན་རྗེས་དྲན་ཞུ་བ། དགྲ་བོ་རྒྱ་དམར་སྲིད་གཞུང་གིས་བོད་ཀྱི་ངོ་བོ་རྩ་མེད་བཟོ་བའི་དྲག་གནོན་ལ་ངོ་རྒོལ། རྒྱ་གར་གཞུང་ནས་བོད་ནི་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཡིན་པར་ངོས་འཛིན་ཡོང་རྒྱུར་འབོད་སྐུལ་ཞུ་རྒྱུ་ཡིན་འདུག དེ་བཞིན་བདེན་པ་སྲུང་སྐྱོབ་དང༌། བོད་ཀྱི་ངོ་བོ་དང་རིག་གཞུང་སྲུང་སྐྱོབ། རྒྱ་བོད་གཉིས་ཀྱི་འབྲེལ་ལམ་སྔར་ལྷག་ཤུགས་ཆེར་གཏོང་བ་བཅས་ཀྱི་ཆེད་དུ་ཡིན་འདུག
བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་ཕྱི་ལོ་ ༢༠༢༣ ལོའི་ཟླ་ ༡༠ ནང་ང་ཚོས་བོད་ནམ་ཡང་མ་བརྗེད་ཅེས་པའི་འབོད་ཚིག་འོག བཞུགས་སྒར་དྷ་རམ་ས་ལ་མེག་གྷན་ཁྲོམ་གཞུང་ནས་རྡོ་རྗེ་གདན་བར་དུ་སྤྱི་ལེ་ ༣༠༠༠ རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་ཐེངས་དང་པོ་སྤེལ་ཡོད་པ་དང་། ལོ་དེའི་ཕྱི་ཟླ་ ༡༢ པའི་ནང་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྦེལ་ཀོབ་གཞིས་ཆགས་ནས་ཨུ་ཊར་ཁན་ཌི་མངའ་སྡེའི་རྡེ་ར་ལྡུན་བདེ་སྐྱིད་གླིང་བར་སྤྱི་ལེ་ ༣༠༠༠ རྐང་འཁོར་སྐོར་སྐྱོད་ཐེངས་གཉིས་པ་སྤེལ། ཕྱི་ལོ་ ༢༠༢༤ ལོའི་ཟླ་ ༣ པའི་ནང་རྡེ་ར་ལྡུན་བདེ་སྐྱིད་གླིང་ནས་ལྡི་ལི་བར་སྤྱི་ལེ་ ༢༥༠ རྐང་འཁོར་སྐོར་སྐྱོད་ཐེངས་གསུམ་པ་དང་། ཕྱི་ལོ་ ༢༠༢༤ ལོའི་ཟླ་ ༥ པའི་ནང་ལ་དྭགས་མཁར་གདོང་ལ་ནས་དྷ་རམ་ས་ལའི་བར་སྤྱི་ལེ་ ༨༠༠ རྐང་འཁོར་སྐོར་སྐྱོད་བཞི་བ། ལོ་དེའི་ཕྱི་ཟླ་ ༩ ཚེས་ ༢༧ ཉིན་ནས་ ཨ་རུ་ན་ཅལ་མངའ་སྡེའི་མོན་རྟ་དབང་གི་༧རྒྱལ་དབང་ཚངས་དབྱངས་རྒྱ་མཚོའི་འཁྲུངས་ཡུལ་ནས་རྒྱ་གར་གྱི་རྒྱལ་ས་ལྡི་ལིའི་ཇན་ཏར་མན་ཏར་བར་རྐང་འཁོར་སྐོར་སྐྱོད་ཀྱི་ཞི་བའི་ལས་འགུལ་ཐེངས་ལྔ་པ། རྒྱ་གར་བྱང་ཕྱོགས་རྡེ་ར་ལྡུན་ནས་མགོ་བཙུགས་ཏེ་སིམ་ལ་ནས་མ་ནཱ་ལི་བར་དང་།དྷ་རམ་ས་ལ་ནས་ལྡི་ལིའི་བར་དུ་བོད་དོན་ཞི་བའི་གོམ་བགྲོད་ཐེངས་དྲུག་པ།དེ་བཞིན་འདི་ལོའི་༧གོང་ས་མཆོག་གི་༧སྐུའི་འཁྲུངས་སྐར་དང་བསྟུན།རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནས་མགོ་བཙུགས་ཏེ་རྒྱ་གར་གྱི་གྲོང་ཁྱེར་ཆེ་ཁག་བརྒྱུད་བཞུགས་སྒར་དྷ་རམ་ས་ལའི་བར་བོད་དོན་ཐོག་རྐང་འཁོར་སྐོར་སྐྱོད་ཐེངས་བདུན་པ་བཅས་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
འབྲེལ་ཡོད་གསར་འགྱུར། https://tibettimes.net/2025/12/10/247621/
