དབུས་འོས་བསྡུ་ལས་ཁང་ནས་བཀྲ་ཤིས་སྟོབས་རྒྱལ་ལགས་ཀྱིས་འོས་བསྡུའི་སྒྲིག་གཞིར་འགལ་འཛོལ་བྱུང་བས་ལོ་ལྔའི་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་པའི་ཉེས་ཆད་བཅད་པ་གསལ་བསྒྲགས་གནང་སོང་།
དེ་རིང་ཕྱི་ཚེས་ ༢༣ ཉིན་གྱི་སྔ་དྲོའི་ཆུ་ཚོད་ ༡༠།༠༠ ཐོག་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་དང་། འགན་འཛིན་ལས་འཕར་ཚེ་རིང་གཡུ་སྒྲོན་ལགས། སྣང་ས་ཆོས་སྒྲོན་ལགས་བཅས་དབུ་བཞུགས་ཐོག ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་། སྐབས་དེར་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་ཀྱིས་སྲིད་སྤྱི་འོས་གཞིར་བཞེང་མཁན་རྣམས་ཀྱིས་མང་ཚོགས་ཀྱི་རེ་འདུན་ལ་གུས་བརྩི་ཐོག་མང་ཚོགས་ཀྱི་འོས་བསྡུའི་དྲིལ་བསྒྲགས་དང་། གསར་ལམ་ཁག་ཏུ་བཅར་འདྲི་དང་ལེན་གང་ཐུབ་ཡོང་བའི་འབོད་སྐུལ་ཞུས་སོང་། དེ་བཞིན་སྲིད་སྐྱོང་འོས་མི་བཀྲ་ཤིས་སྟོབས་རྒྱལ་ལགས་ཀྱིས་ཕྱི་ལོ་ ༢༠༢༥ ཟླ་ ༡༡ ཚེས་ ༢༩ ཉིན་དྷ་ས་ས་གནས་མགོ་འཛིན་གྱི་ཚོགས་ཁང་དུ་སྲིད་སྐྱོང་འོས་མིར་ལང་རྒྱུའི་གསལ་བསྒྲགས་སྤེལ་སྐབས། འོས་བསྡུའི་སྒྲིག་གཞིར་འགལ་འཛོལ་བྱུང་བས་ལོ་ལྔའི་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་པའི་ཉེས་ཆད་བཅད་པ་གསལ་བསྒྲགས་གནང་སོང་།
འོས་བསྡུ་ཆེན་མོའི་ལས་དོན་སྐོར་ལ་དབུས་འོས་བསྡུ་ལས་ཁང་གི་འགན་འཛིན་བློ་བཟང་ཡེ་ཤེས་ལགས་ཀྱིས། དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༥་་༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་ཚགས་ཚུད་ཡོང་སླད་དང་། མང་ཚོགས་ལ་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་རྩ་འཛིན་ལམ་སྟོན་སོགས་གོ་རྟོགས་སྤེལ་ཆེད། ཕྱི་ལོ་ ༢༠༢༥ ཟླ་ ༡༠ ཚེས་ ༡༤ ནས་མགོ་འཛུགས་ཀྱིས་ཕྱི་ཟླ་ ༡༢ ཚེས་ ༨ བར་རྒྱ་གར་ནང་བོད་མིའི་འདུས་སྡོད་ས་གནས་ཁག་ ༤༥ དང་། ཕྱི་རྒྱལ་ཡུལ་གྲུའི་ནང་བོད་མིའི་འདུས་སྡོད་ས་ཁུལ་ཆེ་ཁག་ ༡༡ བཅས་ཁྱོན་ས་གནས་གྲངས་ ༥༦ ནང་མང་ཚོགས་དང་། ས་གནས་འོས་བསྡུ་ལས་ཁང་གི་ཚོགས་མི་སོ་སོར་ཚོགས་འདུ་ཁྱོན་སྡོམ་ཐེངས་ ༡༠༠ ཚོགས་ཐུབ་པ་བྱུང་ཡོད། ཕྱི་ལོ་ ༢༠༢༥ ཟླ་ ༡༠ ཚེས་ ༨ ནས་འོས་བསྡུའི་དེབ་སྐྱེལ་གྱི་ལས་རིམ་མགོ་འཛུགས་ཀྱིས་ཟླ་ ༡༡ ཚེས་ ༣༠ བར་མཇུག་སྒྲིལ་ཡོད་པར། རྒྱ་བལ་འབྲུག་གསུམ་ནང་ཁྱོན་འོས་འཕེན་པའི་དེབ་སྐྱེལ་གྲངས་ ༥༦,༧༤༩ དང་། ཕྱི་རྒྱལ་ཡུལ་གྲུ་ཁག་ནས་འོས་འཕེན་པའི་དེབ་སྐྱེལ་གྲངས་ ༣༤,༢༩༣ བཅས་ཁྱོན་བསྡོམས་དེབ་འགོད་བྱེད་མཁན་འོས་འཕེན་པ་གྲངས་ ༩༡,༠༤༢ བྱུང་ཡོད། ཅེས་བརྗོད་སོང་།
འོས་བསྡུ་ཆེན་མོའི་ལས་རིམ་སྐབས་ས་གནས་འོས་བསྡུ་ལས་ཁང་ཁག་ནས་ལས་དོན་བྱེད་ཕྱོགས་དང་མང་ཚོགས་ནས་འགན་འཁུར་ཞུ་ཕྱོགས་ཀྱི་རྩ་འཛིན་ལམ་སྟོན་དོན་ཚན་བརྒྱད་ཅན་འཕར་མ་ཟུར་དུ་གཏན་འབེབས་ཞུས་ཡོད་པའི་ནང་། ༡། ས་གནས་སོ་སོར་འོས་ཤོག་གྲངས་བཤེར་ཟིན་རྗེས་ཆུ་ཚོད་ ༢༤ ནས་མ་འགྱངས་པར་ཐོབ་ཁུངས་སོ་སོའི་འོས་གྲངས་ཇི་ཐོབ་ས་གནས་འོས་བསྡུའི་ཚོགས་མི་མཉམ་འཛོམས་ཐོག་ས་གནས་འོས་བསྡུའི་འགན་འཛིན་ནས་གསལ་བསྒྲགས་བྱ་རྒྱུ་དང་། ཞིབ་ཕྲའི་གནས་ཚུལ་གསར་འགྱུར་བརྒྱུད་ལམ་ཁག་དང་ས་གནས་འོས་བསྡུའི་ལས་ཁང་ཁག་བཅས་བརྒྱུད་དབུས་འོས་བསྡུ་ལས་ཁང་ནས་ཡོངས་ཁྱབ་གསལ་བསྒྲགས་ཞུ་རྒྱུ། ༢། སྲིད་སྤྱི་གཉིས་ཀྱི་འོས་མི་བཞེངས་མཁན་རྣམས་ཀྱིས་མི་མང་ལ་གཏམ་བཤད་དང་། གསར་འགྱུར་བརྒྱུད་ལམ་ཁག་ཏུ་བཅར་འདྲི་གནང་སྐབས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་དང་། བཙན་བྱོལ་བོད་མིའི་འོས་བསྡུའི་སྒྲིག་གཞི། རྩ་འཛིན་ལམ་སྟོན་བཅས་ཀྱི་དགོངས་དོན་དང་མི་འགལ་བ་གཙོ་འདོན་ཐོག མང་ཚོགས་ཀྱི་སེམས་ཁམས་ལ་ཕོག་ཐུག་དང་། སྤྱི་ཚོགས་འཁྲུགས་གཞིའི་བཀའ་མོལ་རིགས་མི་གནང་བའི་ཡིད་གཟབ་དགོས་རྒྱུ། ༣། སྲིད་སྤྱི་གཉིས་ཀྱི་འོས་མི་འདེམས་སྒྲུག་བྱས་པའི་སྐྱེ་བོ་གང་ཞིག་འོས་གཞིའི་འོས་ཆོས་ཚང་མིན་གྱི་ཀླན་ཀ་བྱུང་རིགས་ལ་ས་གནས་འོས་བསྡུ་ལས་ཁང་ནས་ཐག་གཅོད་བྱ་རྒྱུ་དང་། དེ་མིན་དབུས་འོས་བསྡུ་ལས་ཁང་ལ་ཞུ་གཏུགས་ཆོག་པ་ཡིན། ༤། ས་གནས་འོས་བསྡུ་ཚོགས་ཆུང་གི་ཚོགས་མི་དང་ཟུར་དཔང་རྣམས་ཀྱིས་འོས་བསྡུའི་སྐབས་འོས་མི་དང་རྒྱབ་སྐྱོར་གནང་མཁན་ལ་དངོས་ཤུགས་བརྒྱུད་གསུམ་ནས་ཐེ་བྱུས་རྒྱབ་སྐྱོར་སོགས་བྱེད་མི་ཆོག ༥། སྔོན་འགྲོ་དང་དངོས་གཞིའི་འོས་བསྡུའི་སྐབས་འོས་འཕེན་པ་རྣམས་ནས་སྤྱིལ་བུའི་ནང་ལག་ཐོགས་ཁ་པར་སོགས་མཉམ་འཁྱེར་མི་ཆོག ༦། འོས་བསྡུའི་ལས་བྱེད་ཡོངས་ཀྱིས་འོས་བསྡུའི་གསང་རྒྱ་དགོས་པས་འོས་ཤོག་གྲངས་བཤེར་སྐབས་ལག་ཐོགས་ཁ་པར་མཉམ་འཁྱེར་མི་ཆོག ༧། འདི་ལོའི་འོས་བསྡུ་ཆེན་མོའི་ནང་དཔྱ་ཁྲལ་ལག་དེབ་དུས་འགྱངས་ཞུས་ཡོད་མེད་ལ་མ་ལྟོས་པར་འོས་འཕེན་པའི་ཆ་རྐྱེན་ཚང་རིགས་ལ་འོས་འཕེན་གྱི་གོ་སྐབས་གནང་དགོས། ༨། འོས་འཕེན་པ་སུས་ཀྱང་དབུས་སའི་འོས་བསྡུའི་ལས་དོན་སྐོར་མི་མང་དང་། སྤྱི་ཚོགས་དྲ་རྒྱ། གསར་འགོད་པ་བཅས་ལ་དྲང་བདེན་མིན་པའི་གནས་ཚུལ་གསལ་བསྒྲགས་བྱེད་པ་དང་། ཡིག་ཆ་འགྲེམས་སྤེལ་རིགས་མི་ཆོག དེ་བཞིན་སྤྱི་ཚོགས་དྲྭ་ལམ་ཁག་བརྒྱུད་དངོས་མིན་གནས་ཚུལ་ཁྱབ་སྤེལ་སོགས་མང་ཚོགས་ནས་ཐུགས་གཟབ་དགོས་པ་བཅས་གསལ་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
