རྩོམ་པ་པོ། དུང་ཟླ།
རྩོམ་ཁུངས། བོད་ཀྱི་དུས་བབ།
གྲོགས་གཅེས། ང་ཚོ་ནི་གཞན་དང་མི་འདྲ་བར་རང་དབང་དང་རྒྱབ་ཁབ་ཀྱི་འདུ་ཤེས་ཤུགས་དྲགས་པའི་དབང་གིས་རང་ཉིད་ཀྱི་བརྩེ་བའི་ཕ་མ་དང་ཕ་ཡུལ་རྒྱབ་ཏུ་བཞག་ནས་ཡོང་བའི་གྲས་དེ་མ་ཡིན་པར། འཚར་སྣང་དང་རྒྱུས་མངའ་མེད་པའི་ཞེ་འདོད་ཅིག་གི་དབང་དུ་སོང་སྟེ་སོ་སོའི་ལོ་ཚོད་ལས་བརྒལ་བའི་དཀའ་ངལ་རྒྱ་ཕྲག་དང་དུ་བླངས་ནས་རི་ཆུ་གྲངས་ཀྱིས་མི་ལོང་བས་མ་ཁོག་པར་ས་མཐར་ཡོང་། བལ་ཡུལ་དང་རྒྱ་གར། རྒྱ་གར་ནས་བྱིས་དུས་ཀྱི་སློབ་གྲྭ་འགྲིམས་པ་ནས་ཕ་ཡུལ་དང་ཕ་མ་དྲན་པའི་སྐྱོ་བ་དང་རྒྱལ་ཁབ་ཀྱི་འདུ་ཤེས་མཉམ་དུ་རང་ཉིད་ཀྱི་ཁྲག་རྒྱུན་ལ་གསར་དུ་སྐྱེས། སྐབས་དེ་ནས་ང་ཚོའི་སེམས་སུ་ཕ་ཡུལ་གྱི་གནས་སྟངས་དང་སྤུན་ཟླ་ཚོའི་ལུས་སེམས་ཀྱི་བདེ་སྡུག་མང་པོ་ཞིག་ང་ཚོ་དང་འབྲེལ་ཞིང་། ང་ཚོས་ས་མཐར་འཚོ་བ་རོལ་བའང་ཁོ་ཚོའི་བདེ་སྡུག་གི་ཆེད་དུ་ཡིན་པའི་ངེས་ཤེས་གསར་བ་ཞིག་བྱུང་ཡོད། དེ་དུས་ང་ཚོས་སློབ་གྲྭའི་ཞོགས་ཚོགས་སྐབས་སུ་ “ལོངས་ཤོག མི་ལོ་བཅུ་ཕྲག་བར་དུ། ང་ཚོ་ཡི། ཤ་ཟད་རུས་ལ་མ་ཐུག་བར། དགྲ་བོས་བཙན་གནོན་བཏང་བྱུང་། ཆིག་སྟོང་དགུ་བརྒྱ་ལྔ་བཅུ་ང་དགུའི་ལོར། རྒྱལ་གཅེས་མི་མང་འུ་ཐུག་བཟོད་བྲལ་ཐབས་མེད་ཀྱིས། བདེན་པས་ཡར་ལ་ལངས་ཡོད། ལོངས་ཤོག་ལོངས་ཤོག་བོད་མི་རྣམས” ཞེས་ཤ་ཟད་རུས་ལ་མ་ཐུག་བར་དུ་འཐབ་རྩོད་ཀྱི་སྙིང་སྟོབས་མི་ཉམས་པའི་དམ་བཅའ་སྐྱོ་བའི་དབྱངས་དང་ཚིག་ལ་འདྲེས་ནས་བླངས་མྱོངས་ལ། “ལོ་ངོ་ (**) འགྲོ་བའི་གསུམ་བཅུའི་ལངས་གླུ་ལེན། བོད་མི་རྒྱ་དམར་འོག་ནས། སྒེར། ལངས་ཀྱི། རྒྱ་དམར་བཙན་འཇག བོད་ནས། མཐར། སྐྲོད། ཆེད། རྒྱལ་ཁའི་གླུ་དབྱངས་གསུམ་བཅུའི་དྲན་གསོ་འབུལ་” ཞེས་སྐད་ཤུགས་ཆེན་པོས་ཤ་དར་ཁྲག་དར་གྱི་འུ་ཚོའི་སྐད་སྒྲ་ཧི་མ་ལ་ཡའི་བྲག་ཅར་འཁོར་ཏེ་རྒྱ་མིའི་སྙིང་རྩ་འདར་བ་ཞིག་དང་གཞིས་བཞུགས་བོད་མི་ཚོའི་སེམས་ངལ་གསོ་བའི་དབྱངས་སུ་འགྱུར་ཐུབ་པའི་རེ་བ་བཅངས་མྱོང་བ་མ་ཡིན་ནམ། གྲོགས་གཅེས། སྐབས་དེར་ང་ཚོར་འདི་ལྟར་ས་མཐའ་ནས་ལོ་མང་སློབ་སྦྱོང་གིས་བསྐྱལ་བ་ལས་དྲག་པོའི་མཚོན་ཆ་ཐོག་ཏེ་དམག་ས་ནས་འཆི་བར་སྤྲོ་བའི་ལ་རྒྱ་ཡོད་པ་ཁྱོད་ཀྱིས་དྲན་ནམ། དེང་སྐབས་ཕྱི་རྒྱལ་གྱི་འཚོ་བ་ཇེ་ལེགས་དང་ཁྱིམ་ཚང་གི་འཚོ་བའི་བྲེལ་ཟིང་ཁྲོད་ནས་ཁྱོད་ཀྱིས་སྐབས་དེའི་སྙིང་སྟོབས་དང་རེ་བ་ཡོད་ཚད་གཏིང་བརྗེད་དུ་སོང་བའི་གཅོལ་ཆུང་གི་སྐད་ཆ་དེ་ང་ལ་མ་བཤད་རོགས། མི་གཞན་ཞིག་གིས་ང་ལ་དེ་ལྟར་བཤད་ཆོག་ནའང་ཁྱོད་ཀྱིས་ཁ་ནས་ངས་ཚིག་དེ་ཚོ་བཟོད་ཐབས་མི་འདུག དེ་བས་སྐད་ཆ་དེ་འདྲ་ཁྱོད་ཀྱིས་རྣམ་འགྱུར་ཙམ་ནས་ཀྱང་མཚོན་ཐབས་མ་གནང་རོགས།
བོད་ཁྱིམ་གྱི་ཞོགས་ཚོགས་དང་དུས་དྲན་སྲུང་བརྩི་རེ་རེས་ང་ཚོའི་སེམས་སུ་རྒྱལ་ཞེན་གྱི་ཁྲག་ཐིགས་རེ་རེ་བསྐྱེད་དེ་མ་འོངས་པའི་རེ་བ་ཁུར་བའི་མི་བུ་རེ་རེ་གསོ་སྐྱོང་གནང་བ་མ་ཡིན་ནམ། སྐབས་དེར་ང་ཚོའི་སེམས་སུ་རྡ་ས་ཞེས་པའི་བོད་དྲི་བྲོ་བའི་རི་བོ་ཆུང་ཆུང་དེ་ནི་འཐབ་རྩོད་ཀྱི་རྨང་རྡོ་དང་འཐབ་རྩོད་ཀྱི་ཀ་བ་ཐམས་ཅད་གནས་དེ་ན་དྲོང་ངེར་འགྱིང་ཡོད་པའི་ཡིད་ཆེས་ཡོད། གྲོགས་གཅེས། ཁྱོད་ཀྱིས་དྲན་ནམ། སྐབས་དེར་ང་གཉིས་ལ་ངོ་ཤེས་དང་སྤུན་ཉེ་མེད་པས་ཆུ་ཚོད་གཅིག་གཉིས་ཀྱི་བར་ཐག་ལས་མེད་པའི་གནས་དེར་འགྲོ་བའི་གོ་སྐབས་ཧ་ཅང་ཕྲ། རྡ་སར་ཐེངས་གཅིག་ཐོན་པ་ནི་ལྷ་སར་ཐེངས་གཅིག་ཐོན་པ་བཞིན་ང་ཚོས་སེམས་སུ་གཅེས་སྤྲས་ཅི་ཙམ་ཡོད་མྱོངས། སྐབས་དེར་ཚགས་ཤོག་ངོས་སུ་རྒྱ་གར་ས་གནས་སོ་སོ་ནས་སྐད་འབོད་དང་འཐབ་རྩོད་ཀྱི་མེ་ལྕེ་མཆེད་པའི་གསར་འགྱུར་རེ་རེ་མཐོང་བ་ན་རང་ཉིད་ཀྱང་མི་ཚོགས་དེ་དག་གི་ཁྲོད་དུ་ཡོད་ན་ཅི་མ་རུང་སྙམ་པའི་ཚོར་སྣང་དྲགས་པོ་སྐྱེས་ནའང་ང་ཚོ་སྔར་བཞིན་སློབ་གྲྭ་ནས་འདུག་དགོས་བྱུང་བས་སློབ་གྲྭ་ཚར་རྗེས་སུ་ངེས་པར་དུ་དེ་འདྲའི་ནང་བཞུགས་རྒྱུའི་ཆོད་སེམས་བཅངས་མྱོངས། ང་ཚོས་སོ་སོར་བཙན་པོའི་སྙིང་སྟོབས་དང་ལ་རྒྱ་སྲབ་མི་ཉན་པའི་བསྐུལ་ལྕག་གནང་མྱོང་བ་མ་ཡིན་ནམ།
གྲོགས་གཅེས་ལོ་ཟླ་འདི་ལྟར་འགྲོ་མགྱོགས་པས་ང་ཚོ་སློབ་གྲྭ་ནས་མཐོ་སློབ། མཐོ་སློབ་ནས་འཚོ་བའི་ཕྱོགས་སུ་འདི་ལྟར་བསྐྱོད་ཟིན། བྱིས་དུས་ཀྱི་སྙིང་སྟོབས་དང་ལ་རྒྱ་ཡོད་པའི་མི་མང་པོ་ཞིག་འཚོ་བའི་ལྕགས་ཐག་གིས་བཅིངས། འཁོར་བའི་རེ་དོགས་ཀྱི་དོང་ནང་དུ་ལྷུངས་རྗེས། ཁོང་ཚོས་བྱིས་དུས་ཀྱི་ཚོར་བ་ནི་ན་མ་སྨིན་པའི་ཧོལ་རྒྱུགས་དང་ཕུགས་རྒྱང་མེད་པའི་ཚོར་བ་རྐྱང་བ་ཙམ་དུ་བརྩི་བཞིན། རང་ཉིད་ཀྱིས་རང་ཉིད་ལ་སྦྱིན་པའི་ཕུགས་འདུན་གྱི་འཚོ་བ་དེ་སྐྱེལ་གྱིན་ལས་ཞོར་དང་ལམ་ཞོར་དུ་འཐབ་རྩོད་ཀྱི་ཁྲལ་སྒྲུབ་བཞིན་འདུག ཁ་སང་ཕྱི་རྒྱལ་ནས་ཡོང་བའི་ལོ་ཉུང་ཞིག་གིས་དབྱིན་སྐད་ཀྱི་གདངས་འདྲེས་པའི་བོད་སྐད་ཀྱིས་ “ང་ཚོའི་བོད་ཀྱི་ཆོས་དང་རིག་གཞུང་གལ་ཆེན་པོ་རེད། རྒྱ་མིས་བོད་ནང་ལ་བོད་པ་ཚང་མ་ཏག་ཏག་བཟོ་གི་ཡོད་རེད་ད” ཟེར་བ་ཞིག་དྲྭ་ཐོག་ན་ཁྱབ་བཞིན་འདུག་ལ། དྲྭ་ཐོག་གི་བོད་མི་མང་པོ་ཞིག་གིས་ཁོ་མོར་སེམས་ཤུགས་ཡོད་ཚུལ་དང་བོད་སྐད་ཡག་པོ་འཁྱོང་ཚུལ་གྱིས་བསྟོད་པ་གཏོང་བཞིན་འདུག ང་རང་ཁོག་འདར་ཞིག་རྒྱག་ཞོར་བུ་མོ་དེའི་ཕ་མའི་སེམས་སུ་ཅི་ཞིག་དྲན་གྱིན་ཡོད་མེད་ཚོད་དཔག་བྱེད་མི་ཐུབ་པར་གྱུར། གྲོགས་གཅེས། ངས་ཁྱོད་ལ་འདི་ལྟར་ཁྱོད་ཀྱིས་རང་ཉིད་ཀྱི་བྱིས་པའང་བོད་མིན་འདྲེས་མ་ཞིག་ཏུ་གཏོང་བཞིན་པའི་སྐོར་བཤད་ན། ཁྱོད་རང་སྤོ་ལངས་སྲིད་ལ་གཞན་དང་འདྲ་བར་ཕྱི་རྒྱལ་ན་ཁོར་ཡུག་མེད་ཚུལ་དང་ཕ་མ་བྲེལ་བ་ཆེ་ཚུལ་གྱི་རྒྱུ་མཚན་སྣ་མང་ཞིག་དྲངས་ཡོང་བ་ཚོད་དཔག་ཐུབ་ནའང་དེ་ནི་ཁྱོད་རང་གི་བདམས་པའི་ལམ་ཁ་མ་ཡིན་ནམ། ང་ལ་ལན་དེ་ལས་གཞན་པ་གང་ཡང་མི་འདུག་མོད་ང་ཁྱེད་རང་གི་བྱིས་པ་ལ་ངོ་མ་སྙིང་རྗེ་སྐྱེས་ཡོང་། ནོར་འཁྲུལ་ཅིའང་མེད་པའི་བྱིས་པ་ཞིག་བོད་མི་ཚོའི་ཁྲོད་ནས་ཁྲ་ཁྲ་ཞིག་ཏུ་གྱུར་ཟིན་པ་མ་ཡིན་ནམ།
གྲོགས་གཅེས། ངས་ཁྱེད་ལ་སླར་ཡང་ཕྱིར་དྲན་ཅིག་བྱེད། འཛིན་རིམ་བདུན་པ་དང། བརྒྱད་པ། དགུ་བའི་སྐབས་སུ་ང་ཚོའི་འཛིན་གྲྭའི་ནང་ཨང་རིམ་རྩེ་མོར་གསོན་པའི་སློབ་མ་ཚོར་ང་ཚོས་ཆེ་མཐོང་ཅི་ཙམ་ཡོད། ཁོང་ཚོ་ནི་ངོ་མ་མ་འོངས་པའི་སོན་རྩ་ངོ་མ་དེ་ཡིན་པའི་ཚོར་སྣང་ཡོད་མྱོངས་བ་དྲན་ནམ། སྐབས་དེ་དུས་དགེ་རྒན་ཚོས་ཀྱང་ཁོང་ཚོ་མིག་དཔེར་བཟུང་ནས་བཀའ་བཀྱོན་བཏང་མྱོང་ལ་བསླབ་བྱའང་སྐྱོན་མྱོངས་མོད། ད་སྐབས་མང་པོ་ཞིག་ནི་ང་ཚོར་བཀའ་བཀྱོན་གཏོང་བྱེད་ཀྱི་ཚད་ཤིང་ཙམ་ལས་གར་སོང་ཆ་མེད་དམ། ཡང་ན་གོ་མེད་ཚོར་མེད་དུ་གྱུར་འདུག དེ་ནི་ངས་ཁོང་ཚོར་འཁང་ར་བྱས་པ་མ་ཡིན་པར་ཁོང་ཚོར་ཡིད་སྨོན་ཤོར་བས་ཡིན། ང་ཁོང་ཚོའི་རྒྱལ་ཁམས་འགྲིམ་པའི་ཁོག་རྒྱར་ཡིད་སྨོན་ཤོར་བས་ཡིན། བྱིས་དུས་སུ་ང་ཚོས་རང་ཉིད་ཀྱི་དད་རྟེན་དུ་བརྩིས་ཤིང་རེ་བ་བཅོལ་སའི་འཐབ་རར་སྒོམ་པའི་ས་གནས་འདི་རྒྱབ་ལ་བསྐྱུར་ཏེ་ཁོང་ཚོ་གནས་སྐབས་ཙམ་མ་ཡིན་པར་གཏན་དུ་ཕྱིན་སོང་བ་མ་ཡིན་ནམ། ངའི་སེམས་སུ་ནམ་ཡིན་ནའང་ང་རང་ལྟ་བུའི་མི་བཅུ་གྲངས་ཤིག་ཕྱིན་པ་ལས་ཁོང་ཚོ་ལྟ་བུ་རེ་གཉིས་ཤིག་ཕྱིན་པར་ཕངས་སེམས་ཆེ་བའི་ཐབས་ཟད་ཀྱི་འགྱོད་པ་ཡང་ཡང་སྐྱེས་མྱོངས།
གྲོགས་གཅེས། ས་མཐའ་ནས་མི་རབས་རྒན་པ་ག་ཚོད་ཅིག་རང་ཉིད་ཀྱི་ཕྱིར་ལོག་གི་ཕུགས་བསམ་ལ་གས་ཆག་ཤོར་ཏེ་སྐྱོ་བའི་མིག་མཐའ་མཆི་མས་ཁེངས་བཞིན་ཕྱི་མའི་ལམ་ཁ་འགྲིམས་དགོས་བྱུང་ཡོད། ཁོང་ཚོའི་སེམས་སུ་ད་དུང་ལོ་གཅིག་གཉིས་ཤིག་གསོན་ཐུབ་ཚེ་ངེས་པར་དུ་རང་ཡུལ་ལ་ལོག་ཐུབ་ངེས་པའི་རེ་བ་ཡོད་ནའང་འཆི་བདག་ལ་སྙིང་རྗེ་ག་ལ་ཡོད་སྲིད། ཁྱོད་རང་གི་སེམས་སུ་དེ་ལྟ་བུའི་རེ་བ་ཡོད་མྱོང་བ་དྲན་ནམ། སྔོན་མ་ང་ཚོ་བོད་མི་སུ་ཞིག་ལ་དེ་ལྟ་བུའི་རེ་བ་མེད་དམ། ཚང་མར་ཡོད་ངེས་པའི་ཡིད་ཆེས་བཅའ་ཆོག་མོད། དུས་ཚོད་འགྲོ་མགྱོགས་ལ་ཚོར་བ་འགྱུར་སླ་བས་ད་སྐབས་བོད་མི་ཚང་མར་དེ་ལྟ་བུའི་སེམས་ཁམས་ཡོད་ངེས་པའི་གདེང་ཚོད་མི་འདུག ང་ལ་མཚོན་ན་བདེ་ཞིང་སྐྱིད་པའི་ཕྱི་རྒྱལ་གྱི་འཚོ་བ་ནི་སྦྲིད་སྨད་ལྟ་བུ་ཞིག་སྟེ། དེས་ཁྱོད་ཀྱི་སེམས་ཁོང་གི་སྡུག་བསྔལ་ངོ་མ་དེ་བརྗེད་དུ་བཅུག་རྗེས་ཡོད་ཚད་བཏང་སྙོམས་སུ་གཏོང་ངེས། ང་རང་རྒྱ་གར་དུ་འཚོ་བ་རོལ་བའི་རྒྱལ་ཁ་ངོ་མའང་དེ་ཡིན་སྲེད་དེ། འཚོ་བ་དེས་ཁྱོད་ཀྱི་སེམས་ཁོང་གི་སྡུག་བསྔལ་ནམ་ཡང་བརྗེད་དུ་མི་འཇུག་པ་མ་ཟད། དུས་ནས་དུས་སུ་ཁྱོད་ལ་རང་ཉིད་ཀྱི་ངོ་བོ་གང་ཡིན་པར་དྲན་གསོ་སློང་ངེས། དེ་བས་སྡུག་བསྔལ་དེའི་ཁྲོད་ན་བདེ་བ་ཞིག་མི་མངོན་པའི་ཚུལ་དུ་གནས་ཡོད། དེ་ནི་རིན་ཐང་ལྡན་པ་ཞིག་མ་ཡིན་ནམ།
ཁྱེད་རང་ལ་ཕྱི་རྒྱལ་མི་སེར་གྱི་ཐོབ་ཐང་ལག་ཁྱེར་ཐོབ་པ་ནས་ཁྱེད་ཀྱིས་འཛམ་གླིང་གཡས་སྐོར་གཡོན་སྐོར་རྒྱབ་ན་ཆོག་མོད། ཡིན་ནའང་ཁྱོད་རང་སྔར་བཞིན་ཕ་ཡུལ་ལ་འཛེམ་དོགས་ཀྱིས་འགྲོ་དགོས་པ་མ་ཡིན་ནམ། ཁྱེད་རང་ང་དང་མི་འདྲ་བར་ཕ་ཡུལ་ལ་འགྲོ་ཐུབ་ནའང་ཕ་ཡུལ་ལ་ཅི་ལྟར་ཉེ་བར་བཅར་བ་དེས་ཁྱོད་ཀྱི་ཡུལ་དུངས་ལ་ཆུ་འཁྱག་བླུགས་པ་བཞིན་ཇེ་སྲབ་ཏུ་སོང་བ་མ་རེད་དམ། ཕ་ཡུལ་དུ་སོང་བའི་མི་མང་པོ་ཞིག་ཕྱིར་འོང་རྗེས་ཕ་ཡུལ་ལ་བརྩེ་འདང་སྔར་བཞིན་མེད་པར་ཕྱིར་ལོག་མི་འདོད་པའི་སེམས་ནད་ཅིག་འགོས་ནས་ཡོང་བས། ང་རང་ཕ་ཡུལ་ལ་མ་སོང་བར་ཕ་ཡུལ་དང་ཕ་མ་དྲན་པའི་ཞེ་འདང་འདི་ཡུན་སྲིང་གིས་སྐྱོང་ན་འདོད། དེ་ནི་ངས་རང་ཉིད་གསོན་གནས་ཐུབ་པའི་རྒྱུ་མཚན་ནམ་ནུས་པ་ཞིག་ལ་གཅེས་སྤྲས་བྱེད་སྟངས་ཡིན། གྲོགས་གཅེས། ཕྱི་རྒྱལ་མི་སེར་གྱི་ཐོབ་ཐང་ལག་ཁྱེར་ཐོབ་རྗེས་ལག་དེབ་ལྗང་ཁུའི་འགན་འཁྲི་དེ་རྡོག་ཁྲི་ཞིག་ཏུ་འགྱུར་བའི་ཚོར་སྣང་བྱུང་མྱོང་ངམ་བྲང་ཁར་ལག་པ་བཞག་ནས་བསམ་གཞིག་ཅིག་གནོང་དང་། ཡང་ན། ལག་དེབ་ལྗང་ཁུ་དེ་ནི་རང་གི་འོས་འགན་ཞིག་ཏུ་བསམ་ཏེ་ཅིའང་མ་ཐུབ་ནའང་འདི་ཐུབ་དགོས་པའི་སེམས་ཤུགས་སྐྱེས་མྱོང་ངམ། ཕྱི་རྒྱལ་ནས་ལག་དེབ་ལྗང་ཁུའི་གནས་བབས་ཧ་ཅང་སྐྱོ་བའི་གནས་ཚུལ་མང་པོ་གོ་རྒྱུ་འདུག དེ་ནི་ངོ་མ་ཡིད་སེམས་སྐྱོ་དགོས་པ་ཞིག་མ་ཡིན་ནམ། ཕྱོགས་གཅིག་ནས་ལག་དེབ་ལྗང་ཁུ་ཐང་ལ་འཕེན་མཁན་ཚོས་ཕྱི་རྒྱལ་མི་སེར་གྱི་ལག་ཁྱེར་ཡོད་པས་ཐམས་ཅད་གྲུབ་སོང་བའི་གདེང་ཚོད་ཅིག་ཡོད་པས་ཡིན་སྲིད། དོན་དུ་ཁོང་ཚོས་རང་ཉིད་ལས་ཡོད་ཚད་དོར་སོང་བ་མ་ཡིན་ནམ།
ཁ་སང་གྲོགས་མོ་ཞིག་གི་བུ་མོ་ལོ་བཅུ་གསུམ་ཅན་ཞིག་གིས་མོ་རང་ངེས་པར་དུ་ཁེ་ན་ཊ་ལ་འགྲོ་འདོད་ཡོད་ཅེས་ས་ཆ་དེར་སྤྲོ་འཁྱམ་འགྲོ་ས་གང་དང་གང་ཡོད་པ། ད་དུང་ཟ་མ་གང་དང་གང་ཡོད་པ་སོགས་མོ་རང་དངོས་སུ་སོང་མྱོང་བ་ལྟ་བུ་ཞིག་བཤད་སོང་། ངས་ད་དུང་བུ་མོ་ལོ་ཉུང་འདི་ལྟ་བུའི་བོད་ཕྲུག་མང་པོ་ཞིག་ལ་ལམ་ཁ་འདི་འདྲ་ཞིག་ཡོད་པའི་ལམ་སྟོན་སུས་བྱེད་ཀྱི་ཡོད་མེད་ལ་དོགས་སློང་མི་བྱེད་ཀ་མེད་བྱུང་། མ་འོངས་པའི་སོན་རྩ་ཟེར་བའི་ལོ་ཉུང་ཚོ་རིམ་བཞིན་ཕྱི་རྒྱལ་དུ་རིམ་པ་དམའ་བའི་ལས་རིགས་གཉེར་བར་ཆས་སོང་ན། འཐབ་རྩོད་ཀྱི་བཙན་མཁར་དུ་བརྩི་བཞིན་པའི་བོད་མིའི་སྒྲིག་འཛུགས་འདི་སྲུང་བའི་འགན་འཁྲི་སུ་ལ་ཡོད་དམ། ཁྱེད་རང་གིས་གནད་དོན་འདི་ཉེན་ཁ་ཅི་ཙམ་ཆེ་བའི་ངེས་ཤེེས་རྙེད་ཐུབ་སོང་ངམ། འདི་ནི་མི་རབས་རྒན་པ་ཚོས་ལོ་མང་དཀའ་སྤྱད་སྡུག་རུས་ཀྱིས་བཞེངས་པའི་གསེར་གྱི་རི་བོ་ཞིག་ཕྱི་རྐྱེན་མེད་པར་རང་ཤུགས་ཀྱིས་འཇིག་སོང་བ་མ་ཡིན་ནམ། ཕ་ཡུལ་དུ་ཆེས་མཐའ་མའི་འབྲོག་ས་སྲུང་མཁན་མཁོ་བ་བཞིན་དུ་བཙན་བྱོལ་ནས་ཀྱང་ཆེས་མཐའ་མའི་སྒྲིག་འཛུགས་འདི་སྲུང་མཁན་ཡང་ངེས་པར་མཁོ་བ་མ་ཡིན་ནམ། གྲོགས་གཅེས།
