ཇོ་ནང་སྨོན་ལམ་ཆེན་མོ་སྐབས་བཅུ་དགུ་པ་འཚོག་གིན་འདུག

ཟླ་འདིའི་ཚེས་ ༦ ནས་ ༡༠ བར་གནས་མཆོག་རྡོར་གདན་དུ་འཛམ་གླིང་ཞི་བདེའི་ཆེད་དུ་སྐབས་བཅུ་དགུ་པའི་ཇོ་ནང་སྨོན་ལམ་ཚོགས་ཆེན་འཚོག་གིན་འདུག

དེ་རིང་ཕྱི་ཚེས་ ༦ ནས་ ༡༠ བར་ཉིན་གྲངས་ལྔའི་རིང་གནས་མཆོག་རྡོ་རྗེ་གདན་གྱི་མཆོད་རྟེན་རིན་པོ་ཆེའི་དྲུང་དུ། རྡོར་གདན་ཇོ་ནང་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་སྐབས་བཅུ་དགུ་པ་དབུ་འཛུགས་བསྐྱངས་ཡོད་པ་དང་། སྨོན་ལམ་ཆེན་མོ་འདིའི་སྟེང་དུ་༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ཆོས་ཀྱི་སྣང་བ་མཆོག་གི་དབུས་པའི་དཔལ་རྒྱལ་བ་ཇོ་ནང་པའི་དགོན་གོང་འོག་བར་གསུམ་གྱི་མཁན་བླ་ཆེན་རྣམ་པ་དང་། དེ་བཞིན་དགེ་བཤེས་དང་དགེ་འདུན་པ། བཙུན་མ་རྣམ་པ།  གོས་དཀར་ལྕང་ལོ་ཅན་སོགས་གྲྭ་བཙུན་སྔགས་གསུམ་ཁྱོན་ ༤༠༠ ལྷག་ཕེབས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ཇོ་ནང་སྨོན་ལམ་ཆེན་མོའི་སྐོར་ལ་མཁན་ཟུར་རིན་པོ་ཆེ་ཀུན་དགའ་འཚམས་ཆུང་ལགས་སུ་བཀའ་འདྲི་ཞུས་པར་ཁོང་གིས།  དཔལ་ལྡན་རྒྱལ་བ་ཇོ་ནང་བའི་སྨོན་ལམ་ཆེན་མོ་འདི་ཉིད་ཐོག་མར་ཇོ་ནང་བསྟན་པའི་གསལ་བྱེད་མཆོག་སྤྲུལ་བཀྲ་ཤིས་རྒྱལ་མཚན་རིན་པོ་ཆེ་མཆོག་སྐུ་སྒེར་ནས་སྦྱིན་བདག་གནང་ཞིང་ཇོ་ནང་བའི་དགོན་ཁག་རྣམས་ནས་འགན་ཁུར་བཞེས་པ་ཞིག་རེད། ཏོག་དབྱིབས་གཉན་རིམས་ཀྱི་སྐབས་སུ་ལོ་གཅིག་རིང་ཚོགས་ཐུབ་མེད་པ་མ་གཏོགས་ལོ་བསྟར་ཆགས་སུ་ཚོགས་ཐུབ་ཡོད། ཅེས་གསུངས་བྱུང་།

ཇོ་ནང་སྨོན་ལམ་ཆེན་མོ་ཚོགས་པའི་དགོས་དམིགས་ནི། ཐུབ་པ་སངས་རྒྱས་བཅོམ་ལྡན་འདས་ཀྱི་ལུང་རྟོགས་ཀྱི་བསྟན་པ་རིན་པོ་ཆེ་སྤྱི་དང༌། བྱེ་བྲག་ཏུ་དཔལ་དུས་ཀྱི་འཁོར་ལོའི་བསྟན་པ་འདི་ཉིད་མི་ཉམས་ཡུན་རིང་དུ་གནས་པ་དང༌། ༸གོང་ས་རྒྱལ་བ་རིན་པོ་ཆེ་མཆོག་གི་གཙོས་རིས་མེད་ཀྱི་བསྟན་འཛིན་ཀུན་གྱི་སྐུ་ཚེ་བསྟན་པ་དང་མཛད་འཕྲིན་རྒྱས་ཕྱིར། གནས་སྐབས་འཇིག་རྟེན་ཁམས་སུ་ནད་མུག་འཁྲུག་རྩོད་སོགས་ཞི་ནས་འཛམ་གླིང་ཞི་བདེ་ཡོང་བ་དང་། དད་ལྡན་སྦྱིན་པའི་བདག་པོ་རྣམས་ཀྱི་གཙོས་སེམས་ཅན་རྣམས་སྡུག་བསྔལ་ལས་གྲོལ་ཞིང་བདེ་སྐྱིད་ཀྱི་དཔལ་ལ་ལོངས་སུ་སྤྱོད་པ་དང་། མཐར་ཐུག་རྣམ་མཁྱེན་རྒྱལ་བའི་གོ་འཕང་འཐོབ་ཆེད་སྤྱིར་འགྲོ་བ་ཡོངས་ལ་ནད་མེད་འཁྲུག་རྩོད་ཞི་ཞིང༌། ཀུན་ལ་བདེ་སྐྱིད་དཔལ་ལ་སྤྱོད་པར་དམིགས་ནས་སྨོན་ལམ་ཆེན་མོ་ལོ་བསྟར་ཆགས་སུ་འཚོགས་པ་ཞིག་ཡིན་འདུག་ལ། ཇོ་ནང་སྨོན་ལམ་ཆེན་མོ་ཕྱི་ལོ་ ༢༠༠༦ ཙམ་ནས་དབུ་འཛུགས་གནང་ཡོད་འདུག

གསར་འགོད་པ། སྐལ་བཟང་སྦྱིན་པ།