ཀང་ར་རྫོང་ཁོངས་སུ་མི་ཊར་སུམ་སྟོང་ཡན་གྱི་རི་མགོར་འཛེག་མི་ཆོག་པའི་བཀའ་ཁྱབ་བཏང་ཡོད་པ་དང་དེའི་ནང་དྷ་རམ་ས་ལའི་ཊི་རོན་ཌི་རི་སྒང་དུ་འགྲོ་བར་དམིགས་བསལ་ཆོག་མཆན་ཞུ་དགོས་སྐོར་བརྗོད་འདུག
ཧི་མ་ཅལ་མངའ་སྡེའི་དྷོ་ལ་དྷར་རི་རྒྱུད་ནི་ཧི་མ་ལ་ཡ་དབུས་མ་ཞེས་འབོད་སྲོལ་ཡོད་པ་ལྟར། དགུན་དུས་བསླེབས་པ་དང་བསྟུན་ས་བབ་དམའ་ཞིང་ཚ་བ་ཆེ་སའི་རྒྱ་གར་བ་མང་པོ་ཞིག་ཧི་མ་ཅལ་གྱི་ཁ་བའི་ཡུལ་ལྗོངས་ལ་ལྟ་སྐོར་དུ་ཡོང་མུས་ཡིན། ཟླ་འདིའི་ཕྱི་ཚེས་ ༦ ཉིན་ཧི་མ་ཅལ་མངའ་སྡེ་ཀང་ར་རྫོང་གིས། འདི་ལོའི་དགུན་དུས་སུ་ཀང་ར་རྫོང་ཁོངས་ཀྱི་ཡུལ་སྐོར་བའི་ལྟེ་གནས་སུ་གྱུར་བའི་མི་ཊར་སུམ་སྟོང་ཡན་གྱི་རི་མགོ་ཁག་ཏུ་འཛེག་མི་ཆོག་པའི་བཀོད་ཁྱབ་བཏང་འདུག་ལ། དེ་ནི་གྲང་ངར་ཆེ་བའི་དགུན་དུས་སུ་ཡུལ་སྐོར་བའི་བདེ་འཇགས་ལ་དམིགས་ཚད་བཟུང་བ་ཡིན་འདུག
དེ་འབྲེལ་ཧི་མ་ཅལ་མངའ་སྡེའི་ཀང་ར་རྫོང་གོད་ཆག་དོ་དམ་ལས་ཁུངས་ཀྱིས། ཀང་ར་རྫོང་ཁོངས་ནང་མི་ཊར་ ༣༠༠༠ ལས་མཐོ་བའི་རི་མགོར་འཛེག་པའི་བྱེད་སྒོ་ཚང་མ་བཀག་སྡོམ་བྱས་པ་ཡིན་ཞེས་བརྗོད་འདུག་ལ། ཀང་ར་རྫོང་ཁོངས་ཀྱི་ཡུལ་སྐོར་བའི་ལྟེ་གནས་ཀ་རེ་རི་(Kareri)དང་དྷ་རམ་ས་ལའི་ཊོ་རོན་ཌི་ (Triund)། ད་དུང་ཅམ་མོན་ཌིའི་ (Adi Himani) སོགས་སུ་འགྲོ་བར་ཀང་ར་རྫོང་ཉེན་རྟོག་ལས་ཁུངས་ནས་དམིགས་བསལ་ཆོག་མཆན་ཡི་གེ་ཞུ་དགོས་པ་བཟོས་ཡོད་འདུག
ད་ལྟ་བཀོད་ཁྱབ་འདི་དྷ་ས་མེག་གྷན་གྱི་ཡུལ་སྐོར་རི་འཛེག་ལས་ཁུངས་གཙོས་ཀང་ར་རྫོང་ཁོངས་ཀྱི་ཡུལ་སྐོར་བའི་བྱེད་སྒོ་གཉེར་མཁན་ཡོངས་ལ་བཏང་ཟིན་པ་དང་། བཀོད་ཁྱབ་འདིའི་འོག་ཀང་ར་རྫོང་ཁོངས་ཀྱི་ཛ་དྲག་མྱུར་སྐྱོབ་ཚན་པ་དང་གོད་ཆག་དོ་དམ་ལས་ཁུངས། ཉེན་རྟོག་པ་སོགས་ཚུད་ཀྱི་མེད་པ་རེད།
གཟའ་འཁོར་སྔོན་མའི་ནང་ཡུལ་སྐོར་བ་བཞི་དྷ་རམ་ས་ལའི་ཊི་རོན་ཌི་རི་སྒང་དུ་ཕྱིན་སྐབས་འགྲོ་ལམ་མ་ཤེས་པར་མཚན་མོའི་བར་རི་ངོས་སུ་ལྷག་སྟེ་མཐར་ཉེན་རྟོག་པ་སོགས་ཀྱིས་མྱུར་སྐྱོབ་བྱེད་དགོས་བྱུང་ཡོད་ལ། འདས་ལོའི་ཕྱི་ཟླ་ ༡༢ ནང་ཊི་རོན་ཌི་རི་སྒང་དུ་འགྲོ་མཁན་རྒྱ་གར་ལྷོ་ཕྱོགས་ཀྱི་མི་ཞིག་གཡང་གཟར་ནས་མར་ཟགས་ཏེ་འདས་གྲོངས་སུ་ཕྱིན་ཡོད།
གསར་འགོད་པ། སྐལ་བཟང་སྦྱིན་པ།
