མི་ལོ་ ༤༠ ཙམ་རིང་བཙན་བྱོལ་བོད་མིར་རོགས་རམ་རྒྱ་ཆེན་གནང་མཁན་ལྕམ་སྐུ་དྷེ་བྷི་ལགས་ཀྱིས་ཁོང་ཚོས་ལས་ཀ་ག་རེ་བྱས་ནའང་བོད་མིའི་བདེ་རྩ་དང་བོད་ལ་རང་དབང་འཐོབ་རྒྱུར་རེ་བ་སྐྲུན་ཐབས་བྱེད་ཀྱི་ཡོད་སྐོར་བརྗོད་བྱུང་།
དེ་རིང་ཕྱི་ཚེས་ ༢༧ ཉིན་གྱི་སྔ་དྲོར། ཨེ་ཊ་ལི་ཡི་ཝེ་མཱ་ལཱ་ཚོགས་པ་(the Vimala Association Italy)ཡི་ཚོགས་གཙོ་ལྕམ་སྐུ་དྷེ་བྷི་ཁཱ་ར་ནི་ (Debbie Carrani) ལགས་ཀྱིས་༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། ཁོང་མོ་དང་ཁོང་མོའི་ཚོགས་པ་དེས་འདས་པའི་མི་ལོ་ ༤༠ ཙམ་རིང་བཙན་བྱོལ་བོད་མིར་རོགས་རམ་རྒྱ་ཆེན་པོ་གནང་དང་གནང་མུས་ཡིན་འདུག་ལ། དེ་རིང་ཁོང་མོས་འདི་ག་དུས་བབ་ཀྱི་གསར་འགོད་པར་༧གོང་ས་མཆོག་རྒྱ་གར་ནང་བཞུགས་ཡོད་པ་ལྟར་བོད་མི་རྣམས་རྒྱ་གར་ནང་བསྡད་དེ་སོ་སོའི་རིག་གཞུང་བདག་ཉར་དང་བོད་ནང་གི་བོད་མིར་བརྡ་ལན་སྤྲོད་ཐབས། དེ་བཞིན་གཞིས་ཆགས་ནང་ནུས་པ་ལྡན་པ་ཞིག་ཡོང་བར་འབད་དགོས་སྐོར་བརྗོད་བྱུང་།
འདི་གའི་གསར་འགོད་པས་ལྕམ་སྐུ་དྷེ་བྷི་ལགས་སུ་བཅར་འདྲི་ཞུ་སྐབས་ཁོང་མོས། ང་ཚོ་བོད་མི་རྣམས་དང་མཉམ་དུ་ཡོད་པས་དུས་རྟག་ཏུ་སེམས་ཤུགས་མ་ཆགས། ནམ་ཡང་སེམས་ཤུགས་མ་ཆགས། ང་ཚོས་གདེང་སྤོབས་ཀྱི་ཐོག་ནས་བོད་དོན་རྒྱབ་སྐྱོར་བྱས་ཏེ་གོ་ལ་ཡོངས་སུ་གནས་ཚུལ་ཁྱབ་སྤེལ་བྱེད་ཀྱི་ཡིན། ང་ཚོས་ཚིག་ཙམ་མ་མིན་པར་སེམས་གཏིང་ནས་བོད་རྒྱལ་ལོ་ཞེས་འབོད་ཀྱི་ཡོད། དེར་བརྟེན་བོད་མི་རྣམས་ཀྱིས་ང་ཚོ་དུས་རྟག་ཏུ་ཁྱེད་ཚོ་དང་མཉམ་དུ་ཡོད་པ་ཚོར་དགོས། ཞེས་བརྗོད་བྱུང་།
ཡང་ལྕམ་སྐུ་དྷེ་བྷི་ལགས་སུ་བོད་པའི་གཞོན་སྐྱེས་ཚོར་བརྡ་ལན་གང་ཡོད་དྲིས་པར་ཁོང་མོས། རྒྱ་གར་ནང་དུ་སྡོད། ཨ་རི་དང་ཁེ་ན་ཌ། ཡུ་རོབ་ནང་མ་འགྲོ། ཁྱེད་རང་ལ་རྒྱལ་ཁབ་དེ་དག་ནང་སྦྱོང་རྒྱུ་གང་ཡང་ཡོད་པ་མ་རེད། ནཱལེནྜའི་ཡུལ་འདི་འཚོ་གནས་བྱ་སའི་ཡུལ་ཞིག་ཆགས་ཡོད། རྒྱ་གར་གྱི་ཡུལ་འདི་༸གོང་ས་རྒྱལ་བ་རིན་པོ་ཆེ་མཆོག་གི་བཞུགས་གནས་སུ་བདམས་ཡོད་པ་ལྟར། བོད་མི་རྣམས་ཀྱི་གནས་ཡུལ་དེ་རྒྱ་གར་རང་ཆགས་བསྡད་ཡོད་པ་རེད། ཁྱེད་རང་ཚོ་འཚར་ལོངས་བྱུང་ས་དང་སོ་སོའི་རིག་གཞུང་གཅེས་ཉར་བྱེད་ཐུབ་ས་རེད་ལ། ཁྱེད་རང་ཚོ་གཞིས་ཆགས་ནང་བསྡད་དེ་བོད་ནང་གི་བོད་མི་ཚོར་བརྡ་ལན་འབུལ་ཐུབ་ཀྱི་རེད། དེར་བརྟེན། གཞིས་ཆགས་ནང་བསྡད་དེ་ནུས་སྟོབས་སྤེལ་བ་གནང་དགོས། དེ་ནི་ངས་བོད་ཀྱི་གཞོན་སྐྱེས་ཚོས་ངེས་པར་དུ་ཤེས་དགོས་པ་ཞིག་རེད་བསམ་གྱི་འདུག དམིགས་བསལ་གྱིས་སློབ་གྲྭ་ཁག་གི་ཤེས་ཡོན་སློབ་གསོའི་ཐད་༧གོང་ས་མཆོག་ནས་དུས་རྒྱུན་དུ་ང་ལ་སློབ་གྲྭ་ཁག་གི་ནང་འགྲོ་དགོས་པའི་ལམ་སྟོན་གནང་སྟེ་ཤེས་ཡོན་སློབ་གསོ་ཞེས་པ་འདི་དཔེ་མི་སྲིད་པས་གལ་ཆེན་པོ་རེད་གསུང་གི་ཡོད་པ་ལྟར། བོད་མི་ཚོས་དེའི་ཐད་བསམ་བློ་གཏོང་དགོས་རེད། སྒེར་སེམས་གྱི་ཐོག་ནས་ང་རང་ཚོ་རང་གི་ཆེད་དུ་ཅིག་བྱེད་ཀྱི་ཡིན་བསམ་ན་འགྲིག་གི་ཡོད་པ་མ་རེད། བོད་པ་ཟེར་དུས་སྤྱི་ཚོགས་ཤིག་ཆགས་བསྡད་ཡོད་པ་རེད། ང་ཚོ་ཕན་ཚུན་འབྲེལ་བསྡད་ཡོད་པ་ཞིག་ཡིན་དུས་ང་ཚོས་རང་ལས་གཞན་གཅེས་ཀྱི་ཐོག་བསམ་བློ་གཏོང་དགོས། ཞེས་བརྗོད་འདུག
༸གོང་ས་མཆོག་ལ་མཇལ་བཅར་ཞུས་ཏེ་ཚོར་བ་ཇི་བྱུང་སྐོར་ཁོང་མོས། ང་ག་དུས་༧གོང་ས་མཆོག་གི་མདུན་དུ་བསླེབས་ནའང་གོ་སྐབས་དེ་བཟུང་ནས་བོད་ནང་གི་བོད་མི་ཡོངས་ཀྱི་ཚབ་ཞུས་ཏེ་མཇལ་ཁ་འདི་ཞུ་ཡི་ཡོད་བསམ་པའི་འདུ་ཤེས་ཤིག་འཛིན་གྱི་ཡོད། ང་ལ་ཐོབ་པའི་བྱིན་རླབས་ཀྱི་ནུས་སྟོབས་དེ་བོད་ནང་གི་བོད་མི་ཚོར་ཐོབ་པར་ཤོག་བསམ་པའི་སྨོན་ལམ་རྒྱག་གི་ཡོད། ང་ཚོས་ལས་ཀ་ག་རེ་བྱེད་པར་འབད་ཀྱི་ཡོད་ནའང་བོད་མིའི་བདེ་རྩའི་ཆེད་དང་བོད་ལ་རང་དབང་འཐོབ་རྒྱུར་རེ་བ་ལྡན་པ་ཞིག་ཡོང་བའི་ཆེད་དུ་ཡིན། ང་ཚོས་བོད་མི་རྣམས་སོ་སོའི་ལུང་པར་ལོག་ཐུབ་ཐབས་སུ་དངོས་གནས་ཀྱི་འཐབ་རྩོད་པ་ཞིག་ཏུ་སྐྲུན་ཐབས་བྱེད་ཀྱི་ཡོད། ཅེས་བརྗོད་འདུག
ལྕམ་སྐུ་དྷེ་བྷི་ལགས་ནི་དགུང་ལོ་ ༡༨ ཙམ་ནས་བཟུང་བཙན་བྱོལ་བོད་མིར་རོགས་རམ་གནང་བའི་མགོ་བཙུགས་ཡོད་འདུག་ལ། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་ལམ་སྟོན་འོག་ཁོང་མོ་དང་ཁོང་མོའི་ཚོགས་པ་ཨེ་ཊ་ལི་ཡི་ཝེ་མཱ་ལཱ་ཚོགས་པ་ཡིས་བོད་མིའི་སྒྲིག་འཛུགས་དང་། བོད་ཕྲུག་ཁྱིམ་སྡེ་གཙོ་བོར་གྱུར་བའི་སློབ་གྲྭ་ཁག་གི་ཤེས་ཡོན་སློབ་གསོ་དང་། གཞིས་ཆགས་དང་རྒན་གསོ་ཁང་གཙོ་བོར་གྱུར་བའི་བཙན་བྱོལ་བོད་མིའི་ཟས་གོས་གནས་མལ་གྱི་ཐད་རོགས་རམ་རྒྱ་ཆེན་གནང་དང་གནས་མུས་ཡིན་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
