འཁོར་སྐར་བརྒྱུད་ཞིབ་འཇུག་བྱས་ཏེ་བོད་དང་ཧི་མ་ལ་ཡའི་ཁུལ་དུ་ས་འོག་གི་ཆུ་ཉུང་དུ་འགྲོ་ཡི་ཡོད་པ་གསལ་སྟོན་བྱས་འདུག
ཁ་སང་ཕྱི་ཚེས་ ༤ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པའི་ནང་། ཉེ་བའི་ལོ་ཤས་ནང་བོད་དང་ཧི་མ་ལ་ཡའི་ཁུལ་དུ་ས་འོག་གི་ཆུ་རིམ་གྱིས་ཉུང་དུ་འགྲོ་བཞིན་ཡོད་པ་མ་ཟད། བོད་ནི་ཨེ་ཤ་ཡའི་ཁུལ་གྱི་ཆུའི་འབྱུང་ཁུངས་གཙོ་བོ་ཞིག་ཡིན་ཡང་། མི་མང་པོས་གནད་དོན་དེའི་ཐོག་དོ་སྣང་བྱེད་ཀྱི་མེད་པ་དང་། དེའི་སྐོར་གླེང་སློང་བྱེད་ཀྱི་མེད་པ་རེད། ཕྱི་ལོ་ ༢༠༠༣ ནས་ ༢༠༢༠ བར་ཞིབ་འཇུག་བྱས་པ་བརྒྱུད། ས་འོག་གི་ཆུ་དེ་གསུམ་ཆ་གཉིས་ཙམ་ཉུང་དུ་ཕྱིན་ཡོད་པ་དང་། འཛམ་གླིང་གི་རྒྱལ་ཁབ་མང་པོ་ཞིག་ལ་འཐུང་ཆུའི་དཀའ་ངལ་དང་། ཞིང་པ་སོགས་ལ་ཆུའི་དཀའ་ངལ་ཤུགས་ཆེན་པོ་འཕྲད་བཞིན་ཡོད་པ་གསལ་སྟོན་བྱས་འདུག
ཨེ་ཤ་ཡའི་ཁུལ་གྱི་ས་འོག་གི་ཆུ་ཡུན་རིང་གནས་མིན་ཐད་དབྱེ་ཞིབ་བྱས་པའི་ནང་། འདས་པའི་ལོ་བཅུ་ཕྲག་གཉིས་རིང་ཨེ་ཤ་ཡའི་ཁུལ་གྱི་ཆུ་དེ་དག་འགྱུར་བ་ཇི་ལྟར་འགྲོ་བཞིན་ཡོད་མེད་ལ་ལྟ་ཞིབ་བྱས་ཡོད་འདུག་ལ། ཞིབ་འཇུག་པ་ཁག་ཅིག་གིས་བཅོས་མའི་རིག་རྩལ་དང་འཁོར་སྐར་བརྒྱུད་ཞིབ་འཇུག་བྱས་ཏེ། གོ་ལའི་གནམ་གཤིས་འགྱུར་ལྡོག་དང་འཛམ་གླིང་ཚ་དྲོད་རྒྱས་པའི་རྐྱེན་གྱིས། ཨེ་ཤ་ཡའི་ཁུལ་གྱི་ས་འོག་གི་ཆུ་བརྒྱ་ཆ་ ༧༠ ལྷག་ཇེ་ཉུང་དུ་འགྲོ་བཞིན་ཡོད་པ་དང་། ལོ་ལྟར་ཨེ་ཤ་ཡའི་ཁུལ་གྱི་ས་འོག་གི་ཆུ་ཊོན་ (tonnes) ཐེར་འབུམ་ ༢༤ ཙམ་གྱོང་གུན་ཐེབས་བཞིན་ཡོད་པར་བརྟེན། མི་གྲངས་ས་ཡ་མང་པོར་ཆུའི་དཀའ་ངལ་འཕྲད་ཉེན་ཡོད་པ་དང་ཆུའི་བདེ་འཇགས་ལ་ཉེན་ཁ་ཡོད་པ་གསལ་སྟོན་བྱས་འདུག
དེང་སྐབས་འཛམ་གླིང་གི་གནམ་གཤིས་ཆེད་མཁས་པ་དག་གིས། རྒྱ་ནག་གཞུང་གིས་བོད་ནང་གི་གཙང་པོ་དག་ལ་ཆུ་མཛོད་དང་། གློག་འདོན་ས་ཚིགས་སོགས་གསར་རྒྱག་གི་ལས་གཞི་མང་དག་ཅིག་སྤེལ་བར་བརྟེན། འཛམ་གླིང་གི་སྣེ་མོ་གསུམ་པར་འབོད་པའི་བོད་ཀྱི་གངས་རི་དང་འཁྱགས་རོམ་གྱི་ཞུ་ཚད་ཇེ་མགྱོགས་སུ་འགྲོ་མུས་དང་། བོད་ནང་ཆུ་ལོག་གཙོས་རང་བྱུང་ཁོར་ཡུག་ལ་འཇིག་པ་མང་དག་ཅིག་བྱུང་དང་འབྱུང་མུས་ཡིན་པའི་ཁར། བོད་ཀྱི་གཙང་པོ་དག་ནི་རྒྱ་གར་གཙོས་ཨེ་ཤ་ཡའི་ལྷོ་རྒྱུད་རྒྱལ་ཁབ་དག་གི་ཆག་འཇིག་ལ་འབྲེལ་ལམ་ཟབ་པོ་ཡོད་པའི་ཐད་གླེང་སློང་ཤུགས་ཆེན་གནང་གི་ཡོད།
བོད་ནི་འཛམ་གླིང་གི་གཙང་པོ་ཆེ་ཁག་གི་མགོ་ཁུངས་དང་སྣེ་མོ་གསུམ་པ་རུ་འབོད་ཀྱིན་ཡོད་ཀྱང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་ས་གནས་མང་དག་ཅིག་ཏུ་ཆུ་རགས་གསར་རྒྱག་དང་། འཛུགས་སྐྲུན་གྱི་ལས་གཞི་མང་དག་ཅིག་སྤེལ་བར་བརྟེན། བོད་ནང་དུ་ཚ་དྲོད་འཕེལ་ནས། གངས་རི་དང་འཁྱག་རོམ་མགྱོགས་པོ་ཞུ་ཡི་ཡོད་པ་མ་ཟད། ད་ལྟ་བོད་ནང་དུ་ཚ་ཚད་ལྡབ་འགྱུར་གྱིས་འཕར་གྱིན་ཡོད་སྟབས། བོད་ཀྱི་འཁྱག་རོམ་ཞུ་བ་དང་ཚ་ཚད་འཕར་བ་དེས། འཛམ་གླིང་ཁྱོན་ཡོངས་ཀྱི་ཚ་ཚད་འཕར་ཉེན་ཡོད་པ་མ་ཟད། ལྷག་པར་ཨེ་ཤ་ཡ་དང་ཁྱིམ་མཚེས་རྒྱལ་ཁབ་སོགས་སུའང་ཆུའི་གནོད་འཚེ་ཡོང་ཉེན་ཡོད་འདུག དེ་བཞིན་རྒྱ་ནག་གཞུང་གིས་བོད་ཀྱི་གཙང་བོ་དང་རྒྱུག་ཆུ་ཁ་བསྒྱུར་དང་ཆུ་རགས་གསར་རྒྱག་སོགས་བྱས་པ་དེས། རྒྱ་གར་གཙོས་ཨེ་ཤ་ཡའི་ལྷོ་རྒྱུད་དུ་ཆགས་པའི་རྒྱལ་ཁབ་ཁག་གི་མི་གྲངས་དུང་ཕྱུར་ ༡།༣ ཀྱི་ཚེ་སྲོག་དང་འཚོ་གནས་ལ་གནོད་འཚེ་ཐེབས་ཀྱི་ཡོད། ཕྱི་ལོ་ ༢༠༢༣ ལོར་རྒྱ་གར་ནུབ་བྱང་གི་ཐར་བྱེ་ཐང་ཆེན་མོ་དང་ཡུ་གུར་གྱི་ཊག་ལ་མ་ཀན་བྱེ་ཐང་གཉིས་ཀྱི་ས་བབ་ཆགས་ཚུལ་དང་ནུབ་ཕྱོགས་ནས་ལྡང་བའི་རླུང་བུས་དེད་པའི་ཐལ་རྡུལ་དག་བོད་མཐོ་སྒང་གི་འཁྱག་རོམ་ངོས་སུ་འབྱར་བ་དེས། འཁྱག་རོམ་ལ་གནོད་འཚེ་ཐེབས་ནས་ཞུ་ཚད་ཇེ་མགྱོགས་དང་རྒྱལ་སྤྱིའི་གནམ་གཤིས་འགྱུར་ལྡོག་ལའང་འགྱུར་བ་ཆེན་པོ་ཐེབས་ཉེན་ཡོད་པ་ཤེས་རྟོགས་བྱུང་ཡོད།
གསར་འགོད་པ། བསྟན་འཛིན་ཕུར་བུ།
