བོད་རྒྱལ་ལོ་ ༢༡༥༢ ལོར་བཞུགས་སྒར་ཐེག་ཆེན་གཙུག་ལག་ཁང་དུ་བསྩལ་བའི་གསུང་ཆོས་དང་བཀའ་སློབ།

༸གོང་ས་མཆོག་ནས་སྐྱེས་རབས་དང་སེམས་བསྐྱེད་ཀྱི་བཀའ་ཆོས་བསྩལ།

ཕྱི་ལོ་ ༢༠༢༥ ཟླ་ ༣ ཚེས་ ༡༤ བོད་ཟླ་ ༡ ཚེས་ ༡༥ ཆོ་འཕྲུལ་དུས་ཆེན་ཉིན་གྱི་སྔ་དྲོ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༸གོང་ས་རྒྱལ་བ་རིན་པོ་ཆེ་མཆོག་ཆོ་འཕྲུལ་དུས་ཆེན་གྱི་ཚོགས་མགོན་དུ་ཆིབས་བསྒྱུར་བསྐྱངས་ཏེ། དད་ལྡན་དོན་གཉེར་ཅན་བརྒྱ་ཕྲག་མང་པོར་སྐྱེས་རབས་དང་སེམས་བསྐྱེད་ཀྱི་ཆོས་འབྲེལ་བཀའ་དྲིན་བསྐྱངས་ཡོད་ཅིང་། སྐབས་དེར་༧གོང་ས་མཆོག་ནས། ངོས་རང་ལ་སྤྱན་སྟོང་མེད་ཀྱང་ལྷག་བསམ་རྣམ་དག་གིས་གདུལ་བྱའི་ཁམས་དང་མོས་པ་དང་འཚམ་པ་ཞིག་གིས་བསྟན་པ་དང་འགྲོ་བའི་དོན་བྱེད་བཞིན་ཡོད། ད་ལྟའི་བར་དུ་འགྲོ་དོན་ཡག་ཐག་ཆོད་བྱུང་བ་རེད།ད་དུང་ཡིན་ནའང་རྨི་ལམ་ལ་བརྟག་དུས་ཕལ་ཆེར་ལོ་བརྒྱ་དང་བཅུ་གྲངས་རིང་སྡོད་པ་ཞིག་འདུག ཅེས་གསུངས་འདུག

གཞུང་འབྲེལ་ཐོག་༧སྐུའི་འཁྲུངས་སྐར་སྲུང་གཙི་ཞུས།

ཕྱི་ལོ་ ༢༠༢༥ ཟླ་ ༧ ཚེས་ ༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་འཁྲུངས་སྐར་གཞུང་འབྲེལ་ཐོག་སྲུང་གཙི་ཟབ་རྒྱས་ཞུས་སོང་བ་དང་། མཛད་སྒོའི་ཐོག་༧གོང་ས་མཆོག་ནས་ངོས་ནས་སྤྱོད་འཇུག་གི་བསམ་བློ་ཤུགས་ཆེན་པོ་གཏོང་གི་ཡོད། འགྲོ་བ་སེམས་ཅན་ཐམས་ཅད་རང་གི་གཉེན་དུ་བལྟས་ནས་སྒོ་གསུམ་གྱི་ནུས་པ་ཅི་ཡོད་པ་དེ་གཞན་དོན་ལ་ཕན་པར་ཤོག་ཅེས་ངོས་ནས་སྨོན་ལམ་རྒྱག་བཞིན་ཡོད། ཅེས་དང་། ཁྱོད་ཚོ་ཅི་ཙམ་གྱིས་ངོས་ལ་བརྩེ་བ་ཡོད་པ་དེའི་ཚོད་ཀྱིས་ཁྱོད་ཚོས་བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ག་ཚོད་ཐུབ་ཐུབ་ཀྱིས་ཉམས་ལེན་གནང་རོགས་ཞུ་རྒྱུ་ཡིན། ཞེས་བཀའ་སློབ་སྩལ་འདུག

༸གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་དད་ལྡན་མང་ཚོགས་ལ་ཆོས་འབྲེལ་མཛད།

ཐའེ་ཝན་བོད་བརྒྱུད་ནང་བསྟན་མཐུན་ཚོགས་ཀྱིས་ཇི་ལྟར་གསོལ་བ་བཏབ་པ་ལྟར། ཕྱི་ལོ་ ༢༠༢༥ ཟླ་ ༡༠ ཚེས་ ༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ།༸གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་དད་ལྡན་མང་ཚོགས་ལ་དགའ་ལྡན་ལྷ་རྒྱ་མ་དང་། སེམས་བསྐྱེད། བྱང་སྡོམ་བཅས་ཀྱི་ཆོས་འབྲེལ་མཛད་ཡོད་ཅིང་།  སྐབས་དེར་ ༸གོང་ས་མཆོག་ནས་ངོས་རང་ལོ་མཐོ་བོར་སླེབས་ཡོད་ཀྱང་གཟུགས་པོ་དང་བསམ་བློའི་ཆ་ནས་མུ་མཐུད་དུ་བསྟན་པའི་ཞབས་འདེགས་སྒྲུབ་བསམ་པའི་སེམས་ཤུགས་ཉམས་པ་མེད་པ་ཡོད། ཅེས་གསུངས་སོང་།

སྨན་རྩིས་མཐོ་སློབ་ཀྱི་བསླབ་པ་མཐར་སོན་པའི་སློབ་ཕྲུག་རྣམས་ལ་བཀའ་སློབ་སྩལ།

ཕྱི་ལོ་ ༢༠༢༥ ཟླ་ ༤ ཚེས་ ༡༦ ཉིན་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་འགྲོ་ཕན་བོད་ཀྱི་སྨན་རྩིས་ཁང་གི་སྐབས་ ༢༢ པའི་སྨན་གྱི་སློབ་སྦྱོང་ཐོན་པའི་སློབ་ཕྲུག་ ༢༤ དང་། རྩིས་ཀྱི་སློབ་སྦྱོང་ཐོན་པའི་སློབ་ཕྲུག་ ༧ དགེ་རྒན་གཅིག་བཅས་ལ་མཇལ་ཁ་སྩལ་ཡོད་ཅིང་།སྐབས་དེར་༧གོང་ས་མཆོག་ནས་ང་ཚོའི་བོད་ཀྱི་ཆོས་དང་རིག་གཞུང་འདི་ཧ་ཅང་རྒྱ་ཆེན་པོ་དང་གཏིང་ཟབ་པོ་ཞིག་ཡོད་པ་ཞིག་རེད། འདི་ལེགས་སྦྱར་ལྟ་བུའི་སྐད་ཡིག་ལ་བརྟེན་མི་དགོས་པར་སོ་སོའི་སྐད་ཡིག་གི་ཐོག་ནས་ཆ་ཚང་ཞིག་འགྲེལ་བཤད་རྒྱག་ཐུབ་ཀྱི་ཡོད། ཅེས་བཀའ་སློབ་སྩལ་འདུག

བོད་ཀྱི་ཞོ་སྟོན་ཐེངས་ཉེར་བརྒྱད་པའི་འཁྲབ་སྟོན་པ་རྣམས་ལ་བཀའ་སློབ་སྩལ།

ཕྱི་ལོ་ ༢༠༢༥ ཟླ་ ༥ ཚེས་ ༡༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར། ༧གོང་ས་རྒྱལ་བ་རིན་པོ་ཆེ་མཆོག་ནས་ཞོ་སྟོན་ཐེངས་ ༢༨ པར་ཕེབས་པའི་ས་གནས་ཁག་བཅུ་གསུམ་གྱི་ལྷ་མོའི་འཁྲབ་སྟོན་པ་རྣམ་པ་དང་། བོད་ཀྱི་ཟློས་གར་ཚོགས་པའི་ཚོགས་མི་རྣམས་ལ་མཇལ་ཁ་བསྩལ་ཡོད་ཅིང་།སྐབས་དེར་༧གོང་ས་མཆོག་ནས་ང་ཚོའི་རིག་གཞུང་ནི་གཙོ་བོ་སེམས་ཁམས་རིག་པ་དང་འབྲེལ་བའི་རིག་གཞུང་ཞིག་ཆགས་ཡོད་པས། སེམས་ཀྱི་ཞི་བདེ་སྒྲུབ་པའི་རིག་གཞུང་ཆགས་ཡོད་པས་ཕྱིའི་དུས་ཀྱི་འགྱུར་བ་ལ་ལྟོས་པ་མེད་པར་མུ་མཐུད་ནས་གནས་ཀྱི་རེད། ཅེས་བཀའ་སློབ་སྩལ་འདུག

རྒྱལ་ཡུམ་ཆེན་མོའི་རྗེས་རྩེད་འགྲན་པ་རྣམས་ལ་བཀའ་སློབ་སྩལ།

ཕྱི་ལོ་ ༢༠༢༥ ཟླ་ ༦ ཚེས་ ༥ ཉིན་བཞུགས་སྒར་ཕོ་བྲང་དུ། ༸གོང་ས་རྒྱལ་བ་རིན་པོ་ཆེ་མཆོག་ནས་རྒྱལ་ཡུམ་ཆེན་མོའི་རྗེས་དྲན་རྐང་རྩེད་པོ་ལོའི་འགྲན་བསྡུར་ཐེངས་སུམ་ཅུ་པའི་རྩེད་འགྲན་པ་རྣམས་ལ་མཇལ་ཁ་སྩལ་ཡོད་ཅིང་། སྐབས་དེར་༧གོང་ས་མཆོག་ནས་བསམ་བློ་གུ་ཡངས་གཏོང་བ་དང་། བསམ་བློ་རྒྱ་ཆེ་ས་ནས་བཏང་ན། ཏན་ཏན་རྙོག་དྲ་ཉུང་བ་ཡོང་གི་རེད། བསམ་བློ་ཆུང་ཆུང་ཞིག་གིས་བྱས་ནས་གྲ་མི་འགྲིག་པ་ཡོང་ཚེ་སེམས་མི་སྐྱིད་པ་ཆགས་ཀྱི་རེད། བསམ་བློ་རྒྱ་ཆེ་ས་ནས་བཏང་ན། བསམ་བློ་གུ་ཡངས་པོ་ཆགས་ཀྱི་རེད། ཅེས་བཀའ་སློབ་སྩལ་འདུག

སོག་པོའི་དད་ལྡན་སེར་སྐྱ་ཁག་ཅིག་ལ་བཀའ་སློབ་བསྩལ།

ཕྱི་ལོ་ ༢༠༢༥ ཟླ་ ༦ ཚེས་ ༢༠ ཉིན་བཞུགས་སྒར་ཕོ་བྲང་གི་མཇལ་འཕྲད་ཚོགས་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་སོག་པོའི་མན་ཛུ་ཤྲི་ཧོ་ཐོག་ཐུ་བསྟན་འཛིན་འཇམ་དབྱངས་རྡོ་རྗེ་མཆོག་གིས་གཙོས་དད་ལྡན་མཇལ་བཅར་བ་ ༡༥༢ ལ་མཇལ་ཁ་བསྩལ་ཡོད་ཅིང་། ༧གོང་ས་མཆོག་ནས་ང་ཚོ་བཙན་བྱོལ་བ་ཆགས་ནས་སྤྱིར་བཏང་གི་འགྲོ་སྟངས་བྱས་ན་ཉམས་ཐག་པོ་ཞིག་ཡིན་ཡང་། དེ་སྔ་སློབ་སྦྱོང་བྱས་པའི་གཟི་བརྗིད་མུ་མཐུད་ནས་འཕྲོ་སྡོད་པ་མ་གཏོགས་ཉམས་རྒྱུ་མི་འདུག རྒྱ་གར་དུ་སླེབས་ནས་ལོ་མང་པོ་ཕྱིན་པ་རེད། སངས་རྒྱས་པའི་ཆོས་ཀྱི་ལྟ་གྲུབ་སྐོར་ལ་དོ་སྣང་བྱེད་མཁན་འཛམ་གླིང་ཡོངས་སུ་ཤུགས་ཆེ་རུ་འགྲོ་བཞིན་འདུག ངོས་ཀྱིས་ཆུང་ཆུང་སྐབས་ནས་བསླབ་པའི་ལྟ་གྲུབ་ཀྱི་སྐོར་དེང་སང་གི་དུས་ཚོད་འདིར་ཕན་ཐོགས་ཆེན་པོ་འདུག ཅེས་བཀའ་སློབ་སྩལ་འདུག

བོད་མིའི་སྒྲིག་འཛུགས་ཀྱི་ས་གནས་མགོ་འཛིན་རྣམས་ལ་བཀའ་སློབ་སྩལ།

ཕྱི་ལོ་ ༢༠༢༥ ཟླ་ ༡༡ ཚེས་ ༡༢ ཉིན་བཞུགས་སྒར་རྒྱལ་བའིི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅུ་དྲུག་པར་ཕེབས་པའི་ཚོགས་བཅར་བ་རྣམས་ལ་མཇལ་ཁ་སྩལ་ཡོད་ཅིང་། སྐབས་དེར་༧གོང་ས་མཆོག་ནས། ང་ཚོ་བོད་པ་ཟེར་དུས་ལྐུགས་པ་ལྟ་བུ་ཞིག་རྩ་བ་ཉིད་ནས་ཆགས་མེད། ང་ཚོར་རིག་གཞུང་གཏིང་ཟབ་ཡོད་པ་དང་། མི་ཐོག་མང་པོའི་རིང་བདག་པོ་བརྒྱབ་ནས་བསྡད་པ་རེད། ད་དུང་འབྱུང་འགྱུར་ང་ཚོར་གཏིང་ཟབ་པའི་རིག་གཞུང་ཡོད་པ་འདི་ལ་བདག་པོ་ཡག་པོ་རྒྱག་དགོས། ཞེས་བཀའ་སློབ་སྩལ་འདུག

གསར་འགོད་པ་བྱམས་པ་ཚེ་རིང་གིས་ཕྱོགས་སྒྲིག་བྱས།