ཁྲི་ཟུར་ཟམ་གདོང་རིན་པོ་ཆེ་མཆོག་ནས་བཙན་བྱོལ་བོད་མིའི་སྒྲིག་འཛུགས་ཀྱི་སྲ་བརྟན་དང་བོད་སྐད་ཡིག་སྲུང་སྐྱོབ་ཀྱི་གལ་གནད་ཐོག་བཀའ་སློབ་བསྩལ།
ཕྱི་ཟླ་ ༢ ཚེས་ ༢༦ ཉིན་དྷ་ས་བོད་ཀྱི་ཟློས་གར་ཚོགས་ཁང་དུ། བོད་ཀྱི་ཆབ་སྲིད་བཙོན་ཟུར་བརྟན་བཞུགས་གོ་སྒྲིག་ཚོགས་ཆུང་གི་གོ་སྒྲིག་འོག བཀའ་དྲིན་རྗེས་དྲན་དང་ཐུགས་རྗེ་ཆེ་ཞུའི་གོ་སྟོན་བཀྲ་ཤིས་བསྟོད་དབྱངས་མཛད་སྒོ་ཞིག་འཚོགས་ཡོད་ཅིང་། ཚོགས་ཐོག་ཏུ་༧སྐུ་མགྲོན་གཙོ་བོ་༧སྐྱབས་རྗེ་ཁྲི་ཟུར་ཟམ་གདོང་རིན་པོ་ཆེ་མཆོག་དང་། ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བཀའ་ཟུར་འབྲོང་ཆུང་དངོས་གྲུབ་ལགས། དེ་བཞིན་བོད་མིའི་སྒྲིག་འཛུགས་ཀྱི་ལས་བྱེད་སྲི་ཞུ་བ་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་བཅས་མཉམ་ཞུགས་གནང་འདུག
སྐབས་དེར་ཁྲི་ཟུར་ཟམ་གདོང་རིན་པོ་ཆེ་མཆོག་ནས། ད་ལྟའི་གནས་སྐབས་འདིར་བོད་ཀྱི་གནས་སྟངས་གཉན་འཕྲང་ཅན་ཞིག་ཡིན་པ་ཚང་མས་གཟིགས་ཀྱི་ཡོད་པ་རེད། ཕྱོགས་གཅིག་ནས་༧གོང་ས་མཆོག་གི་སྐུ་ཡི་བབ་ལོ་རེ་ནས་དགུང་གྲངས་མཐོ་རུ་འགྲོ་བཞིན་ཡོད། ༧གོང་ས་མཆོག་ནས་ཆབ་སྲིད་ཐུགས་འགན་མ་བཞེས་པའི་སྐབས་སུ་བོད་མིའི་སྒྲིག་འཛུགས་དེ་དམངས་གཙོའི་ལམ་ཡང་དག་པ་ཞིག་གི་ཐོག་ནས་སྲ་བརྟན་གནས་དགོས་པའི་ཆེད་དུ་དགོངས་པ་བཞེས་ཏེ་ཕྱི་ལོ་ ༢༠༡༡ ནས་བཟུང་ཆབ་སྲིད་ཀྱི་སྐུ་དབང་ཆེ་ཤོས་གནང་གྲུབ་པ་རེད། དེའི་དགོས་དམིགས་གཙོ་བོ་བོད་མིའི་ཆབ་སྲིད་ཀྱི་རང་བཞིན་༧གོང་ས་མཆོག་གི་སྐུ་ཕྲེང་རིམ་བྱོན་ལ་རག་ལས་བ་མ་ཡིན་པར། མི་མང་རང་གིས་མི་མང་གི་དོན་དུ་མི་མང་གི་བཟོས་པའི་སྒྲིག་འཛུགས་ཤིག་གི་ཐོག་ཏུ་གྲ་སྒྲིག་བྱ་ཐུབ་པའི་གོམས་གཤིས་འཇགས་རྒྱུའི་ཆེད་དུ་དུས་ཚོད་སྔ་ཕྱི་འོས་འཚམ་ཞིག་ལ་གནང་བ་རེད། ༧གོང་ས་མཆོག་གི་སྐུ་དབང་ཆེ་ཤོས་ནང་ནས་དམངས་གཙོ་གསོལ་རས་སྩལ་ཏེ་ལོ་ ༢༥ ཡས་མས་འགྲོ་བཞིན་ཡོད། ༧གོང་ས་མཆོག་ནས་ང་མེད་པ་བཞིན་ལས་ཀ་བྱ་དགོས་པའི་བཀའ་སློབ་མང་པོ་བསྩལ་ཡོད་པ་རེད། ༧གོང་ས་མཆོག་མེད་པ་ནང་བཞིན་བོད་པའི་སྤྱི་ཚོགས་ནང་དུ་འཛིན་སྐྱོང་ཐུབ་པའི་གདེང་ཚོད་ཡོད་མེད་གཟིགས་རྒྱུ་གལ་ཆེན་པོ་རེད། དུས་ཚོད་ཀྱི་དབང་དུ་བྱས་ན་གདེང་ཚོད་ཡོད་པར་ཆ་བཞག་དགོས་པ་ཞིག་རེད། ཡིན་ནའང་། ད་ལྟ་༧གོང་ས་མཆོག་གི་ཐུགས་རྗེ་བྱིན་རླབས་དང་རྒྱབ་སྐྱོར་ལམ་སྟོན་ཡོད་བསྡད་པའི་སྐབས་ཤིག་རེད། རིམ་བཞིན་དེ་དག་མེད་པའི་སྐབས་ཤིག་བསླེབ་ཚེ། ང་ཚོས་ད་ལྟ་ནས་ཚོད་དཔག་གནང་དགོས་པ་ཞིག་ཆགས་ཡོད། ༧གོང་ས་མཆོག་གི་གཟིགས་ཕྱོགས་ཐོག་ནས་ཕལ་ཆེར་རང་མགོ་ཐོན་པ་དང་རང་རྐྱ་འཕེལ་བ་ཞིག་ལ་དགོངས་པ་བཞེས་གནང་གི་ཡོད། དེའི་ཆེད་དུ་འོས་འདེམས་དབུ་ཁྲིད་རྣམ་པ་དང་འོས་བླུགས་མཁན་གྱི་མི་མང་རྣམས་དམ་ཚིག་རྡོག་རྩ་གཅིག་སྒྲིལ་གྱི་ཐོག་ནས་བརྟན་པོ་བྱ་དགོས་པ་གལ་ཆེན་པོ་རེད། དེ་ལ་འགལ་རྐྱེན་དང་གནོད་སྐྱོན་མང་པོ་རང་བཞིན་གྱིས་ཡོང་གི་ཡོད། ལྷག་པར་དུ་ང་ཚོའི་ཁ་གཏད་ཀྱིས་ཆེད་དུ་མི་རྒྱུ་ཟོག་གསུམ་གྱི་འགྲོ་སོང་གཏོང་བཞིན་ཡོད། ང་ཚོས་དེ་ལ་ངོས་ཟིན་ཐུབ་པ་བྱས་ནས་དོགས་ཟོན་དང་ཁ་གཏད་གཅོག་ཐུབ་ཀྱི་ཡོད་མེད་ཞིབ་འཇུག་དང་མཐའ་དཔྱད་གནང་དགོས། དེར་འགལ་རྐྱེན་ཡོང་གི་ཡོད་ཚེ་དམངས་གཙོའི་ལམ་ནས་གནང་ཐུབ་པ་བྱ་དགོས། དེ་ཡང་སྤྱིར་ཡང་དག་པའི་དམངས་གཙོའི་ལམ་སྲོལ་དང་། ༧གོང་ས་མཆོག་ནས་ཆབ་སྲིད་ཀྱི་སྐུ་དབང་རྩིས་སྤྲོད་གནང་བ་དེའང་དགོས་པ་རྒྱུ་མཚན་ཡོད་པ་ཞིག་རེད། དེ་ཡི་ཐུགས་རྗེའི་དགོངས་གཞི་ཡོངས་སུ་རྫོགས་པ་འགྲུབ་པ་བྱེད་པར་ད་ལྟའི་གནས་སྐབས་སུ་བཙན་བྱོལ་བོད་མིའི་སྒྲིག་འཛུགས་སུ་ཆ་ཤས་ལེན་མཁན་བཙན་བྱོལ་བོད་མི་མ་གཏོགས་གཞིས་བཞུགས་བོད་མི་རྣམས་ཀྱིས་གོ་སྐབས་ལེན་གྱི་མེད་དུས། འོས་འགན་དེ་བརྒྱ་ཆའི་བརྒྱ་ཐམ་པ་བཙན་བྱོལ་བོད་མི་རྣམས་ལ་འཁྲི་བསྡད་པ་ཞིག་རེད། དེ་བཞིན་རང་དབང་ལུང་པར་ཡོད་པའི་ཆབ་སྲིད་བཙོན་ཟུར་ཁྲོད་ཆབ་སྲིད་བཙོན་ཟུར་ཡོངས་རྫོགས་ཚུད་རྒྱུ་ཁག་པོ་རེད། ཆབ་སྲིད་བཙོན་ཟུར་མང་པོ་ཞིག་ད་ལྟ་གཞིས་སུ་བཞུགས་ཡོད། ཡིན་ནའང་ཆབ་སྲིད་བཙོན་པ་རྣམས་ཀྱིས་དགོངས་པ་རྒྱ་ཆེར་བཞེས་ཏེ་གཞིས་བྱེས་གཉིས་ཀྱི་ཡོངས་མིའི་མགྲིན་ཚབ་གནང་བཞིན་ཡོད། བཙན་བྱོལ་དུ་ཡོད་པའི་ཆབ་སྲིད་བཙོན་ཟུར་རྣམས་ཀྱིས་རང་ཉིད་ཀྱི་ཉམས་མྱོང་ཐོག་ནས་བཙན་བྱོལ་བོད་མིའི་སྒྲིག་འཛུགས་སྲ་བརྟན་དང་། བཙན་བྱོལ་སྤྱི་ཚོགས་ནང་དུ་ཁ་བྲལ་དང་། ༧གོང་ས་མཆོག་ལ་གུས་བཀུར་མེད་པ། བོད་མིའི་སྒྲིག་འཛུགས་ལ་ཡིད་ཆེས་མེད་པ་བཅས་ཀྱི་གནས་ཚུལ་སྔོན་འགོག་གནང་དགོས། དེ་བཞིན་གནས་ཚུལ་དེ་དག་ལ་གདོང་ལེན་བྱེད་པར་བསམ་བློའི་མགོ་ཁྲིད་གནང་བཞིན་ཡོད་ལ། མ་འོངས་བར་ངེས་པར་དུ་གནང་རྒྱུ་གལ་ཆེན་པོ་རེད་བསམ་གྱི་འདུག ཕྱོགས་གཞན་པ་ཞིག་ནས་བལྟས་ན། ༧གོང་ས་མཆོག་ནས་ཆབ་སྲིད་ཀྱི་སྐུ་དབང་རྩིས་སྤྲོད་མ་གནང་གོང་ནས་དགོངས་པ་རླབས་ཆེན་བཞེས་ཏེ། མ་འོངས་བོད་ཀྱི་རྩ་ཁྲིམས་ལས་ལོགས་སུ་བཙན་བྱོལ་བོད་མིའི་བཅའ་ཁྲིམས་གཏན་ལ་ཕབ་ཡོད། བཙན་བྱོལ་བོད་མིའི་བཅའ་ཁྲིམས་དེ་མ་འོངས་བོད་ཀྱི་དབུ་མའི་ལམ་གྱི་སྲིད་ཇུས་ལ་དང་བསྟུན་པའི་མངོན་འདོད་དང་། ད་ལྟ་རྒྱལ་ཁབ་གཞན་ནང་སྐྱབས་བཅོལ་དུ་བསྡད་ཡོད་པའི་གནས་ཚུལ་གཉིས་དང་བསྟུན་ནས་ཡག་པོ་བཟོས་ཡོད། ཇི་སྲིད་བོད་དོན་བདེན་མཐའ་མ་གསལ་བར་དུ་བོད་མིའི་སྒྲིག་འཛུགས་གནས་ཐུབ་དང་མི་ཐུབ་རག་ལས་ས་བཅའ་ཁྲིམས་ཀྱི་དགོངས་དོན་དེ་རེད། དེ་ནི་༧གོང་ས་མཆོག་གི་དགོངས་གཞི་ཡང་ཆགས་ཡོད། དེ་ཡིན་དུས་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་ཇི་མ་ཇི་བཞིན་རྟོགས་ཐུབ་པ་དང་ལག་ལེན་བསྟར་ཐུབ་བྱ་རྒྱུ་གལ་ཆེན་པོ་རེད་བསམ་གྱི་འདུག བཅའ་ཁྲིམས་ཟེར་བ་གཞི་རྩའི་ཁྲིམས་ཡིག་ཡིན་པ་སོང་ཙང་། དེའི་ནང་དུ་ཚིག་གིས་མ་ཟིན་པའི་སྦས་དོན་དང་ཟབ་དོན་གྱི་རྩ་བའི་སྒྲོམ་གཞིའི་རིམ་པ་མང་པོ་ཞིག་ཡོད་པ་རེད། དེ་དག་ཡག་པོ་མ་ཤེས་པའི་ཐོག་ནས་བསྐྱར་བཅོས་བྱས་ཚེ་རྩ་བའི་སྒྲོམ་གཞི་ལ་གནོད་སྐྱོན་འགྲོ་བའི་ཉེན་ཁ་ཡོད་བསྡད་པ་ཞིག་རེད། དེ་འདྲ་ཡིན་དུས་གཞི་རིམ་མང་ཚོགས་ཀྱི་ནང་དུ་བཅའ་ཁྲིམས་སློབ་སྦྱོང་བྱ་དགོས་པ་དང་།བཅའ་ཁྲིམས་ཀྱི་ནང་དོན་ཚགས་ཚད་པོར་རྟོགས་དགོས། དེ་ལ་བརྟེན་ནས་བཙན་བྱོལ་བོད་མིའི་སྒྲིག་འཛུགས་སྲ་བརྟན་ཡོང་ཐབས་སུ་ག་པར་སྐྱོན་ཡོད་ཚེ་དེའི་ཐོག་ལ་སྐྱོན་འཛུགས་བྱ་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
ཡང་ཁྲི་ཟུར་ཟམ་གདོང་རིན་པོ་ཆེ་མཆོག་ནས། ད་ལྟའི་གནས་སྐབས་སུ་ཉེན་ཁ་ཆེ་ཤོས་ཤིག་ནི་བོད་ནང་གིི་གནས་སྟངས་དེ་རེད། བོད་ནང་གི་གནས་སྟངས་ལ་བཙན་དབང་དང་། གཉའ་གནོན། བཤུ་གཞོག ཁྲིམས་མཐུན་མ་ཡིན་པའི་ལས་ཀ་མང་པོ་བྱས་དང་བྱེད་བཞིན་པ་རེད། དེ་དག་བཤད་ཚར་རྒྱུ་ཡོད་པ་མ་རེད། དེའི་ཁྲོད་ནས་ན་གཞོན་རྣམས་ཀྱིས་རང་གི་ཡུལ་སྐད་བེད་སྤྱོད་དང་སྲུང་སྐྱོབ་བྱེད་པར་དཀའ་ངལ་འཕྲད་པའི་གནས་སྟངས་དེ་རེད། ལོ་ཆུང་དུས་གཏན་འཇགས་སློབ་གྲྭ་འཇུག་བཞིན་པ་རེད། རྒྱལ་ཁབ་ཞིག་གིས་རྒྱལ་ཁབ་གཞན་ལ་གཉའ་གནོན་བྱེད་སྐབས་གཉའ་གནོན་བྱས་པའི་རྒྱལ་ཁབ་དེ་ཡར་ལངས་རྒྱུ་མེད་པར་བཟོ་བའི་ཐབས་ལམ་དྲག་ཤོས་ཤིག་སྐད་ཡིག་རྩ་མེད་གཏང་རྒྱུ་དེ་བརྩིས་པ་རེད། དེ་གསར་བ་བྱུང་བ་གང་ཡང་མ་རེད། གནའ་སྔ་མོ་ནས་གཉའ་གནོན་བྱེད་མཁན་རྒྱལ་བོ་རྣམས་ཀྱིས་གནས་ཚུལ་དེ་བེད་སྤྱོད་བཏང་བ་རེད། རྒྱ་གར་ལྟ་བུར་མཚོན་ནའང་ཕྱི་རྒྱལ་གྱི་དབང་འོག་ནས་ལོ་ ༢༠༠ ཡས་མས་ཤིག་བསྡད་པ་རེད། དབྱིན་ཇིས་དབང་བསྒྱུར་བྱེད་པའི་སྐབས་སུ་རྒྱ་ནག་བཞིན་དུ་དྲག་གནོན་དང་བཙན་གནོན་བྱེད་བཞིན་མེད་ཀྱང་། རྒྱ་གར་གྱི་ཡུལ་མི་མང་པོ་ཞིག་ལ་སོ་སོའི་ཡུལ་སྐད་བཞག་ནས་དབྱིན་ཇི་སྦྱངས་སུ་བཅུག་པ་རེད། སྐད་ཡིག་ཐོག་དབང་བསྒྱུར་བྱེད་པར་ནུས་པ་ཆེན་པོ་ཡོད་པ་དངོས་མཐོང་ལག་ཟིན་རེད། ཕྱི་ལོ་ ༡༨༣༠ ནང་ནས་དབྱིན་ཇིའི་ཤེས་ཡོན་སྲིད་ཇུས་མགོ་བཙུགས་ཏེ་ཕྱི་ལོ་ ༡༩༠༠ མགོ་སྟོད་དུ་རྒྱ་གར་ནང་གི་སྲོལ་རྒྱུན་གྱི་ཤེས་ཡོན་ལྟེ་གནས་མང་ཤོས་རྩ་འཐོར་ཕྱིན་པ་རེད། ད་ལྟའི་གནས་སྐབས་བོད་ནང་རང་སྐད་སྲུང་སྐྱོབ་བྱེད་པའི་ལས་འགུལ་དེ་གཞིས་བཞུགས་བོད་མི་རྣམས་ལ་སྐུ་ངལ་ཆེན་པ་ཡོད་པས། བཙན་བྱོལ་བོད་མི་རྣམས་ཀྱིས་རྒྱལ་སྤྱིའི་ཐོག་ཞུ་གཏུགས་བྱ་རྒྱུ་མ་གཏོགས་ཁག་པོ་ཆགས་འདུག གཞིས་བཞུགས་བོད་མི་རྣམས་ཀྱིས་ག་རེ་གནང་ཐུབ་ཀྱི་རེད་ཟེར་ན།སོ་སོའི་ཁྱིམ་ཚང་ནང་དུ་ནང་མིར་སྐད་ཆ་བཤད་པའི་སྐབས་སུ་བོད་སྐད་དེ་བདེན་པའི་ཨུ་ཚུགས་ཟོལ་གྱིས་བཤད་ཐུབ་པ་ཡིན་ན། ཧ་ཅང་རྒྱ་ཆེན་པོ་དེ་འདྲ་གནང་མ་ཐུབ་ཀྱང་སོ་སོའི་བུ་ཕྲུག་འཚར་ལོངས་བྱུང་རྗེས་བོད་སྐད་བསླབ་མི་དགོས་པ་ཞིག་བྱུང་ཚེ། དེས་ཧ་ཅང་ཁྱད་པར་ཆེན་པོ་འགྲོ་ཡི་རེད་བསམ་གྱི་འདུག དེ་ལ་རྒྱ་མི་དམར་པོས་དོགས་ཟོན་དང་མ་དགའ་བ་ཉེས་བ་གཏང་རྒྱུ་དེ་འདྲ་ཡོང་སྲིད། ཡིན་ནའང་སོ་སོའི་ཁྱིམ་ནས་བོད་སྐད་བཤད་རྒྱུ་མ་ཉམས་པར་འབད་བརྩོན་བྱ་དགོས། རྒྱལ་ཁབ་འདྲ་མིན་ནང་གཞིས་ཆགས་པའི་བོད་མི་རྣམས་ཀྱིས་ཀྱང་བོད་སྐད་ཀྱི་ཐོག་ནས་སྐད་ཆ་བཤད་ཐུབ་ཚེ། གང་ལ་གང་འཚམ་གྱི་ནུས་པ་ཡོད་པ་ཞིག་རེད། ཅེས་དང་། ད་ལྟའི་གནས་སྐབས་སུ་ང་ཚོས་སྐད་ཡིག་སྲུང་སྐྱོབ་ཐོག་འབད་བརྩོན་བྱེད་མ་ཐུབ་ཚེ། ང་ཚོའི་གནས་ཚང་རྒྱ་གར་ཆབ་སྲིད་ཀྱི་རང་བཙན་ཐོབ་ནས་ལོ་ ༧༠ ལྷག་འགྲོ་བཞིན་ཡོད་ཀྱང་། སྐད་ཡིག་གི་རང་བཙན་ད་དུང་ཡང་མ་ཐོབ་པར་གཞུང་སྒེར་ཚང་མ་ཕྱི་རྒྱལ་གྱི་སྐད་ཡིག་ལ་མ་བརྟེན་པར་ཐབས་མེད་པ་མཐོང་བཞིན་པ་རེད། མ་འོངས་བའི་བོད་ལ་འདི་འདྲའི་གནས་ཚུལ་ཞིག་ཆགས་པ་ཡིན་ན། བོད་ཀྱི་རང་བཞིན་དང་། ངོས་འཛིན་གྱི་གནས་བབ་ཐོག་ར་མ་ལུག་ལྟ་བུ་ཞིག་ཆགས་པའི་ཉེན་ཁ་ཡོད་པ་ཞིག་རེད། ལྷག་པར་དུ་བོད་བརྒྱུད་ནང་བསྟན་གྱི་གཞི་རྒྱ་ཆེ་བའི་ཤེས་ཡོན་ཡང་ཉམས་པའི་ཉེན་ཁ་ཡོད་པས། བཙན་བྱོལ་སྤྱི་ཚོགས་ཀྱིས་ག་རེ་བྱེད་ཐུབ་མིན་ཐོག་དགོངས་པ་བཞེས་རྒྱུ་གལ་ཆེན་པོ་རེད་ལ། གཞིས་བཞུགས་བོད་མི་རྣམས་ཀྱིས་ཀྱང་སོ་སོའི་ཁྱིམ་དང་བོད་པ་ཡོད་སར་བོད་སྐད་བཤད་རྒྱུ་ནི་ཛ་དྲག་ཆེ་བའི་གནས་ཚུལ་ཞིག་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
