བོད་སྟེང་ཆེན་རྫོང་ནས་དབྱར་རྩྭ་དགུན་འབུ་བརྐོ་ཆོག་པའི་དཔང་ཡིག་མེད་པའི་ཉེས་མིང་འོག་བོད་མི་ ༣༥ འཛིན་བཟུང་བྱས་འདུག་ལ་དཔང་ཡིག་དེ་མེད་ན་ཁྲིམས་འགལ་ཉེས་ཆད་གཅོད་ཀྱི་ཡོད་འདུག
རྒྱ་ནག་གཞུང་གིས་བོད་ཁུལ་དུ་དབྱར་རྩྭ་དགུན་འབུ་རྐོ་ཆོག་པའི་དཔང་ཡིག་(冬虫夏草采挖证)ཞེས་པ་ཞིག་བཟོ་ཡི་ཡོད་པ་ལྟར། ཟླ་འདིའི་ཕྱི་ཚེས་ ༡༢ ཉིན་བོད་སྟེང་ཆེན་རྫོང་ནས་བོད་མི་ ༣༥ ཡིས་དབྱར་རྩྭ་དགུན་འབུ་རྐོ་ཆོག་པའི་དཔང་ཡིག་མེད་པར་འབུ་བརྐོས་ཡོད་པའི་ཉེས་མིང་འོག་འཛིན་བཟུང་བྱས་འདུག་ལ། ད་ལྟའི་ཆར་ཁོང་ཚོའི་གནས་སྟངས་གང་ཡང་ཤེས་རྟོགས་ཐུབ་ཀྱི་མི་འདུག
གསར་འགོད་པས་རྒྱུས་ལོན་བྱས་པ་ལྟར་ན། རྒྱ་ནག་གཞུང་གིས་ལོ་ཤས་སྔོན་ནས་བཟུང་བོད་མཚོ་སྔོན་དང་སི་ཁྲོན་སོགས་སུ་དབྱར་རྩྭ་དགུན་འབུ་རྐོ་ཆོག་པའི་དཔང་ཡིག་ཅེས་པ་ཞིག་བཟོ་ཡི་ཡོད་འདུག་ལ། དཔང་ཡིག་དེ་བཟོ་བར་མི་སྒེར་གྱི་ཐོབ་ཐང་དཔང་ཡིག་དང་ཁྱིམ་ཐོ། གཞུང་གི་ཁྲལ་དང་འབབ་དངུལ་གཙང་འབུལ་ཟིན་པའི་ཡི་གེ། རེ་ཞུ་ཡི་གེ་བཅས་ས་གནས་སྲིད་གཞུང་ལ་སྤྲོད་དགོས་ཀྱི་འདུག ས་གནས་ཁག་ཅིག་ཏུ་དཔང་ཡིག་དེ་ལེན་པར་རྒྱ་སྒོར་ ༢༠༠ ཡང་སྤྲོད་དགོས་ཀྱི་འདུག དཔང་ཡིག་དེ་མི་གཅིག་ལ་གཅིག་དང་། ལོ་གཅིག་ལ་གཅིག་ཡིན་པ་མ་ཟད། འབུ་རྐོ་ཡུལ་དང་རྐོ་དུས་བཅས་ཁ་གསལ་ཡོད་འདུག འབུ་རྐོ་བའི་དུས་ཡུན་ལོ་རེའི་ཕྱི་ཟླ་ ༥ པའི་ཟླ་དཀྱིལ་ནས་མགོ་བརྩམས་ཏེ་ཕྱི་ཟླ་ ༦ ཚེས་ ༣༠ བར་ཡིན་འདུག་ལ། ས་གནས་ཀྱི་ལས་བྱེད་པས་དུས་ནས་དུས་སུ་དཔང་ཡིག་དེ་ཡོད་མེད་ལྟ་རྟོག་དང་འདྲི་བརྩད་བྱེད་ཀྱི་ཡོད་འདུག གལ་སྲིད་དཔང་ཡིག་དེ་མེད་པ་ཡིན་ན་ཁྲིམས་འགལ་དུ་བརྩིས་ནས་དངུལ་གྱི་ཉེས་ཆད་དང་བཀག་ཉར་འདྲི་བརྩད་སོགས་ཀྱི་ཡོད་འདུག
ད་ལོར་བོད་ནང་དབྱར་རྩྭ་དགུན་འབུའི
འདི་གའི་གསར་འགོད་པས་བོད་ནང་གི་
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
