དེ་རིང་༸གོང་ས་རྒྱལ་བ་རིན་པོ་ཆེ་མཆོག་གི་ཞབས་པུས་གཡོན་མ་གཤག་བཅོས་ལེགས་གྲུབ་བྱུང་ནས་གཟིམ་ཤག་ཏུ་ཆིབས་བསྒྱུར་བསྐྱངས།
དགའ་ལྡན་ཕོ་བྲང་གི་པར། ༢༠༢༦།༦།༨
ཟླ་འདིའི་ཕྱི་ཚེས་ ༥ ཉིན་༧གོང་ས་རྒྱལ་བ་རིན་པོ་ཆེ་མཆོག་གི་ཞབས་པུས་གཡོན་མར་སྨན་བཅོས་སླད་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་ཡོད་པ་ལྟར། དེ་རིང་༸སྐུའི་ཞབས་པུས་གཤག་བཅོས་ལེགས་གྲུབ་བྱུང་ནས། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨེ་པོ་ལོ་སྨན་ཁང་ནས་གཟིམ་ཤག་ཏུ་གདན་འདྲེན་ཞུས་ཡོད་འདུག
གནད་དོན་དེ་དང་འབྲེལ་ནས་དགའ་ལྡན་ཕོ་བྲང་གི་དྲ་ལམ་བརྒྱུད་༸སྐུའི་ཕྱི་ལུགས་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་གསལ་བསྒྲགས་ཤིག་གནང་བའི་ཁྲོད། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལྡི་ལིའི་ཨོ་པོ་ལོ་ (appolo) སྨན་ཁང་ནས་ཞབས་པུས་གཡོན་ངོས་ཕྱོགས་དེ་གཤག་བཅོས་གནང་ནས་ལེགས་གྲུབ་ཡག་པོ་ཞེ་དྲགས་བྱུང་ཡོད་པ། བོད་ཕྱི་ནང་གཉིས་ཀྱི་བོད་མི་ཡོངས་ལ་མཁྱེན་རྟོགས་སླད་ཞུ་སྙིང་འདོད་སོང་། དེ་བཞིན་ཕྱི་ལོ་ ༢༠༢༤ ལོར་ཞབས་པུས་གཡས་པ་དེ་གཤག་བཅོས་གནང་ཡོད་པས། ད་ལན་༸སྐུའི་ཞབས་པུས་གཉིས་ཀ་གཤག་བཅོས་ལེགས་གྲུབ་བྱུང་ཞེས་ཞུ་ཡ་ཡིན་ལ། ད་ལྟ་ཞབས་པུས་གཤག་བཅོས་ལེགས་གྲུབ་གནང་ནས་གཟིམ་ཆུང་ལ་གདན་འདྲེན་ཞུས་ཚར་ཡོད། དེ་རིང་ལྡི་ལིའི་ཨེ་པོ་ལོ་སྨན་ཁང་དུ་གཤག་བཅོས་གནང་སྐབས་ལས་བྱེད་སྒང་ནས་འོག་བར་ཚང་མས་ཐུགས་ཁུར་ཆེན་པོ་ཞེ་དྲགས་བཞེས་ཙང་གཤག་བཅོས་ལེགས་གྲུབ་ཞེ་དྲགས་ཡག་པོ་བྱུང་སོང་། ཞེས་གསུངས་འདུག
དེ་བཞིན་ཡོངས་འཛིན་གླིང་རིན་པོ་ཆེ་མཆོག་གིས་སྐུ་སྒེར་གྱི་ངོ་དེབ་སྟེང་། ༧གོང་ས་༧སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཞབས་པུས་གཤག་བཅོས་ལེགས་གྲུབ་བྱུང་བར་དགའ་གུས་ཡིད་ཀྱི་འཚམས་འདྲི་གྲངས་མེད་ཞུ་རྒྱུ་དང་། ༧མགོན་པོ་གང་ཉིད་བདག་སོགས་བསྟན་འགྲོའི་མགོན་དཔུང་དམ་པར་སྐུ་ཚེ་མི་གཤིགས་རྡོ་རྗེའི་ཁམས་སུ་བརྟན་ཅིང་། རིང་མིན་ཁ་བ་གངས་ཅན་གྱི་ལྗོངས་སུ་ཞབས་ཟུང་བཀྲ་ཤིས་ཀྱི་རེ་ཁ་མངོན་པར་འཁོད་དེ་གཞིས་བྱེས་མཉམ་འཛོམས་ཀྱི་སྐལ་བཟང་གི་དགའ་སྟོན་མྱུར་དུ་འཆར་བའི་སྨོན་འདུན། ཞེས་གསུངས་འདུག
ཕྱི་ལོ་ ༢༠༢༤ ཟླ ༦ ཚེས་ ༢༨ ཉིན་ཨ་རིའི་ནེའུ་ཡོག་གི་(Hospital of special surgery) ཞེས་དམིགས་བསལ་བཤག་བཅོས་སྨན་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཞབས་པུས་གཡས་པ་སྨན་བཅོས་གནང་ཡོད་ལ། ཟླ་འདིའི་ཕྱི་ཚེས་ ༤ ཉིན་དགའ་ལྡན་ཕོ་བྲང་ཡིག་ཚང་གིས་སྤེལ་བའི་གསལ་བསྒྲགས་ཁྲོད། ༧གོང་ས་རྒྱལ་བ་རིན་པོ་ཆེ་མཆོག་གི་ཞབས་པུས་སྨན་བཅོས་གྲུབ་ཏེ་ཞབས་པུས་དྲག་སྐྱེད་བཞེས་རྗེས། ཟླ་འདིའི་ཟླ་མཇུག་ཙམ་ལ་ལ་དྭགས་སུ་ཆིབས་བསྒྱུར་བསྐྱང་རྒྱུ་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
