བོད་བརྒྱུད་ནང་བསྟན་གྱི་དགེ་འདུན་པས་སྣེ་ཁྲིད་དེ་མང་ཚོགས་ནང་ཁོར་ཡུག་ཞབས་ཞུའི་གོ་རྟོགས་དང་ལས་འགུལ་སྤེལ་དགོས་ཟེར།
དེ་རིང་ཞོགས་པར་གངས་དཀར་ཏི་སེ་ཁོར་ཡུག་གོ་རྟོགས་ལས་འགུལ་ཁང་གིས་རྒྱལ་སྤྱིའི་ཁོར་ཡུག་གི་ཉིན་མོ་དང་། གངས་དཀར་ཏི་སེ་ཁོར་ཡུག་གོ་རྟོགས་ལས་འགུལ་ཁང་གསར་འཛུགས་གནང་སྟེ་མི་ལོ་ལྔ་འཁོར་བའི་ཟུང་འབྲེལ་གྱི་ཉིན་མོ་དང་བསྟུན་ཏེ། བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་མི་མང་སྤྱི་འཐུས་བེ་རི་འཇིགས་མེད་དབང་རྒྱལ་མཆོག་དང་། བོད་གཞུང་ཕྱི་དྲིལ་ཁོར་ཡུག་སྡེ་ཚན་གྱི་ཉམས་ཞིབ་པ་དོན་འགྲུབ་སྒྲོལ་མ་ལགས་རྣམ་གཉིས་ཀྱིས་གཙོས། རྒན་ཚེ་རིང་ཆོས་འཕེལ་ལགས་དང་ངྷ་སྟེང་བོད་ཁྱིམ་སློབ་གྲྭའི་རྒན་བསྟན་འཛིན་ལགས། དེ་བཞིན་ངྷ་སའི་ཉེ་ཁུལ་གྱི་དགོན་སྡེ་ ༡༤ ནས་ཕེབས་པའི་གྲྭ་བཙུན་ ༢༨ ལྷག་གདན་ཞུའི་ཐོག བོད་ཀྱི་དགེ་འདུན་པའི་ཁོར་ཡུག་གླེང་སྟེགས་ཞེས་པའི་བོད་བརྒྱུད་ནང་བསྟན་གྱི་དགེ་འདུན་པས་སྣེ་ཁྲིད་དེ་མང་ཚོགས་ནང་ཁོར་ཡུག་ཞབས་ཞུའི་གོ་རྟོགས་ཇི་ལྟར་སྤེལ་བའི་སྐོར་གྱི་བགྲོ་གླེང་ཤིག་གོ་སྒྲིག་གནང་ཡོད།
སྐབས་དེར་བོད་མི་མང་སྤྱི་འཐུས་བེ་རི་འཇིགས་མེད་དབང་རྒྱལ་ལགས་ཀྱིས་སྲིད་པ་འཇིག་རྟེན་ཆགས་པ་ནས་བཟུང་སྣོད་བཅུད་ཀྱི་ཁྱད་པར་ཇི་ལྟར་བྱུང་ཚུལ་དང་། བཅུད་ཀྱི་སེམས་ཅན་གྱིས་ཁོར་ཡུག་ལ་ཕན་གནོད་གང་འདྲ་བྱུང་བའི་སྐོར། དེ་བཞིན་མི་འབོར་གྱི་དབང་གིས་གནོད་སྐྱོན་གང་འདྲ་བྱུང་ཡོད་མེད་སོགས་སྐོར་གྱི་གསུང་བཤད་གནང་བྱུང་བ་དང་འབྲེལ། ཁོང་གིས། མ་འོངས་པར་ང་ཚོ་བོད་མི་ཚོས་ཀྱང་ད་ལྟའི་འཛམ་གླིང་གི་ཛ་དྲག་པའི་ཁོར་ཡུག་གནས་བབ་ལ་གཟིགས་ཏེ། རང་ཉིད་ཀྱི་ངོས་ནས་ཁོར་ཡུག་བདག་གཅེས་ཐུབ་པར་བྱ་རྒྱུ་དང་། དེ་ནི་ང་ཚོ་འགྲོ་བ་མི་ཞིག་ཡིན་པ་དང་བོད་མི་རེ་རེའི་འོས་འགན་ཡིན་པའི་སྐོར་གྱི་གསུང་བཤད་གནང་བྱུང་།
བོད་ཀྱི་ཁོར་ཡུག་ཉམས་ཞིབ་པ་དོན་འགྲུབ་སྒྲོལ་མ་ལགས་ཀྱིས་བོད་འདི་འཛམ་གླིང་གི་ལྷོ་བྱང་སྣེ་གཉིས་ཕུད་པའི་འཁྱགས་ཀླུང་སྟོང་ཕྲག་ ༤༦ ཡོད་པའི་ཁྲོད་ཀྱི་ཆུའི་ཐོན་ཁུངས་མང་ཤོས་ཀྱི་ཡུལ་གྲུ་ཞིག་ཡིན་སྟབས། འཛམ་གླིང་གི་སྣེ་གསུམ་པ་ཞེས་འབོད་ཀྱིན་ཡོད་པ་དང་། བོད་ཀྱི་ཆུ་བོ་མང་ཆེ་བ་བོད་རང་གི་ཡུལ་གྲུ་ཙམ་མིན་པར་རྒྱ་ནག་དང་པ་ཀི་སི་ཐན། རྒྱ་གར། བྷེང་ལ་ཌེ་ཤི་སོགས་རྒྱལ་ཁབ་མང་པོ་ཞིག་ཏུ་བཞུར་གྱིན་ཡོད་པའི་ཁྲོད། ཨེ་ཤ་ཡའི་ཆུ་བོའི་བརྒྱ་ཆ་ ༥༠ ལྷག་དང་། རྒྱ་ནག་གི་ཆུ་བོའི་བརྒྱ་ཆ་ ༣༠ ལྷག་བོད་ནས་བཞུར་གྱིན་ཡོད་པ་སོགས་འདས་པའི་ཉམས་ཞིབ་ཀྱི་བརྒྱུད་རིམ་པར་རིས་དང་འབྲེལ་ངོ་སྤྲོད་གནང་བྱུང་བར་མ་ཟད། བོད་ཀྱི་ནགས་ཚལ་དང་རྩྭ་ཐང་། སྤང་ལྗོངས། གཏེར་ཁ། འདམ་རྭ་སོགས་འདས་པའི་དུས་དང་བསྡུར་ན་ལོ་རེེར་ཉམ་ཆག་ཤུགས་ཆེར་འགྲོ་བཞིན་པ་དང་། ལྷག་པར་དུ་རྒྱ་ནག་གིས་བོད་བཙན་བཟུང་བྱས་པ་ནས་བཟུང་གནམ་གཤིས་འགྱུར་ལྡོག་དང་། ཁོར་ཡུག་གི་གནོད་སྐྱོན་གྱི་རྐྱེན་པས་ཉིན་རེར་རྨ་འབྲི་རྫ་གསུམ་གྱི་མགོ་ཁུངས་གཙོས་པའི་བོད་ནང་གི་སྣོད་བཅུད་ཡོངས་རྫོགས་ཉམ་ཆག་འགྲོ་བཞིན་པའི་སྐོར་དེར་ཡོད་གྲྭ་བཙུན་ཡོངས་ལ་ངོ་སྤྲོད་གནང་བྱུང་།
ཉིན་འདིའི་རྒྱལ་སྤྱིའི་ཁོར་ཡུག་གི་ཉིན་མོ་སྲུང་གཙི་བརྒྱུད་གངས་དཀར་ཏི་སེ་ཁོག་ཡུག་གོ་རྟོགས་ལས་འགུལ་ཁང་གིས། ལོ་ལྟར་མི་སྒེར་དང་ཚོགས་པ་ཁག་ལ་ཁོར་ཡུག་ཞབས་ཞུའི་བྱ་དགའ་འབུལ་བཞིན་པ་ལྟར། འདི་ལོའི་བྱ་དགའ་དེ་རང་བྱུང་ཁོར་ཡུག་སྲུང་སྐྱོབ་ཚོགས་པར་ཕུལ་ཡོད་ལ། དེ་དང་འབྲེལ་ལས་འགུལ་ཁང་རང་ནས་པར་བསྐྲུན་བྱས་པའི་སྐྱེ་ལྡན་ཞིང་ལས་ཀྱི་གལ་ཆེའི་རང་བཞིན་སྐོར་ངོ་སྤྲོད་དང་པི་ཝི་སི་འགྱིག་ཆས་དང་འབྲེལ་བའི་ཁོར་ཡུག་དང་འཕྲོད་བསྟེན་གྱི་དཀའ་ངལ། སྐྱེ་འགྲོ་ཡོངས་ཀྱི་འདུན་མའི་ཆེད་དུ་བསམ་མནོ་ཇི་ལྟར་གཏོང་བ་ཞེས་པའི་དཔེ་དེབ་གསུམ་དབུ་འབྱེད་གནང་བྱུང་བར་མ་ཟད། ཉིན་རྒྱབ་ཏུ་དགེ་འདུན་པ་རྣམས་ཀྱིས་ས་གནས་སོ་སོའི་དགོན་སྡེ་ཁག་གི་གྲྭ་བཙུན་དང་ཡུལ་མི་རྣམས་ལ་ཁོར་ཡུག་གོ་རྟོགས་ཇི་ལྟར་སྤེལ་ཚུལ་དང་། གད་སྙིགས་གཙང་སེལ་དང་ས་ཆུ་བདག་གཅེས། དུག་རླངས་ཉུང་འཕྲི་སོགས་ཀྱི་ཐབས་ལམ། ཆོས་ཕྱོགས་ནས་ཡུལ་ལྷ་བསང་གསོལ་དང་ས་བཅུད་བུམ་པ། ཆར་འབེབ་སོགས་ཀྱི་སྐོར་བཅས་བརྗོད་གཞི་བརྒྱད་ཀྱི་སྟེང་བགྲོ་གླེང་གོ་བསྡུར་གནང་ཡོད།
གསར་འགོད་པ་དོན་གོ།
ངས་བསམ་ན་འུ་ཚང་གི་ཁོར་ཡུག་འདི་དུས་དྲན་གཅིག་པོ་མ་གཏོགས་ཁོར་ཡུག་གི་རྒྱུན་ཤེས་མེད་པར་མ་ཟད།ཁོར་ཡུག་སྲུང་སྐྱོབ་ཀྱི་འདུ་ཤེས་མག་མོག་ཞིག་ཡོད་མེད་དོགས་པ་རེད།དེའི་ཕྱིར།ངེས་པར་དུ་ཁོར་ཡུག་སྐོར་གྱི་ཟབ་སྦྱོང་གང་མང་གནང་རྒྱུ་གལ་ཆེན་རེད་འདོད་གི།
དེ་རིང་འཛམ་གླིང་ཁོར་ཡུག་ཉིན་མོར་ལྷ་སྤྱི་ཚོགས་ཞབས་ཞུ་ཚོགས་པའི་དགེ་ལས་སློབ་ཕྲུག་དང་དང་བླངས་བ་སོགས་ནས་མེ་ལོར་གཙུག་ལག་ཁང་གཡས་གཡོན་དང་གླིང་སྐོར་ལམ་སོགས་སུ་གཙང་མ་བཟོས་ཏེ་འཛམ་གླིང་ཁོར་ཡུག་ཉིན་མོར་སྲུང་རྩིས་ཞུ་ཡོད་པ་རེད།
དེ་བཞིན་དྷ་སར་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་འོག་དྷ་སར་ཡོད་པའི་གཞུང་འབྲེལ་མ་ཡིན་པའི་ཚོགས་པ་འགའ་ཤས་དང་མཉམ་འབྲེལ་གྱིས་འཛམ་གླིང་ཁོར་ཡུག་ཉིན་མོར་སྲུང་རྩིས་ཞུས་ཡོད་པ་དང༌། སྤྱིར་ཁོར་ཡུག་གཙང་བཟོ་བྱེད་རྒྱུ་དེ་ཁོར་ཡུག་ཉིན་མོར་ཙམ་མ་ཡིན་པར་རྒྱུན་དུ་ཁོར་ཡུག་ལ་བདག་གཅེས་ཚུལ་བཞིན་དུ་བྱེད་དགོས་པ་དེ་སྐྱེ་བོ་ཚང་མའི་འོས་འགན་ཡིན་ཞིང༌། དེ་སང་རྒྱལ་སྤྱིའི་ནང་ཁོར་ཡུག་གི་གནས་སྟངས་དེ་ཉིན་རེ་བཞིན་ཛ་དྲག་ཏུ་འགྲོ་བཞིན་ཡོད་པ་རེད། བོད་ཀྱི་བླ་ཆེན་རྣམ་པའི་སྣེ་ཁྲིད་ཏེ་ཁོར་ཡུག་སྲུང་སྐྱོབ་ཀྱི་ལས་འགུལ་མང་ཚང་སྤེལ་ཐུབ་དོན་ཕན་ལྡན་པ་ཡོང་སྲིད། ལྷག་པར་ཉེ་དུས་རྒྱ་གཞུང་འཛིན་བཟུང་བྱས་པའི་བོད་ནང་ཁོར་ཡུག་སྲུང་སྐྱོབ་ལས་འགུལ་བ་དང་གྲགས་ཅན་ཚོང་པ་ཀརྨ་བསམ་གྲུབ་ལགས་ཆ་རྐྱེན་གང་ཡང་མེད་པའི་ཐོག་ནས་མགྱོགས་མྱུར་གློད་བཀྲོལ་ཡོང་བའི་རེ་འབོད་དང་རྒྱབ་སྐྱོར་མང་ཙམ་ཡོང་བ་ཞུ།
བོད་གངས་ཅན་ཆུ་ཡི་མཛོད་ཡིན།
རྒྱ་དཀར་ནག་དེ་ཡི་གཤེད་ཡིན།
གཤེད་དེ་ཚོ་གདོང་ཐུག་བརྒྱབ་ན།
སྐྱིད་མེད་ཀྱང་སྡུག་གིས་མི་མནར།
དེ་རེད་དམ་མ་རེད་བཤད་རོགས།