ཕན་ཚུན་བློ་ཐག་ཧ་ཅང་ཉེ་བའི་ཚོར་བ་ཞིག་བྱུང་སོང་།

ཕྱི་ཚེས་༤ ཉིན་༧གོང་ས་མཆོག་གིས་བཞུགས་སྒར་ཕོ་བྲང་ནས་དྲ་ལམ་བརྒྱད་སྐར་མ་ ༧༥ རིང་རྒྱ་རིགས་མང་པོ་ཞིག་གི་དྲ་བར་ལན་འདེབས་གནང་ཡོད། དེ་ནི་ ༢༠༡༠ ལོར་རྒྱ་རིགས་རྩོམ་པ་པོ་ཝང་ལི་ཞོང་གིས་མགོ་འཛུགས་བྱས་པའི་༼རྒྱ་རིགས་མི་མང་གིས་དྲྭ་ལམ་བརྒྱུད་དེ་ཏཱ་ལའི་བླ་མ་མཆོག་དང་གླེང་མོལ།༽ཞེས་པའི་ལས་གཞི་མུ་མཐུད་པ་ཞིག་ཡིན་ཞིང་། རྒྱ་རིགས་མང་པོ་ཞིག་གིས་གྷོ་གྷིལ་(Google) དྲ་བ་བརྒྱུད་༧གོང་ས་མཆོག་ལ་དྲི་བ་ཁག་ ༣༡༩ ཙམ་ཡོད་པ་རྣམས་ལས། ཐེངས་འདིར་རྒྱ་ནག་པེ་ཅིན་གྱི་ཅཱང་ཐན་ཡཱོང་དང་། ཧྲུན་ཀྲིན་གྱི་འགྲོ་བ་མིའི་ཐོབ་ཐང་ཁྲིམས་རྩོད་པ་ཐུན་པིའོ་གཉིས་ཀྱིས་དྲི་བ་གསུམ་རེ་གདམ་གསེས་བྱས་ཤིང་། ཁོང་གཉིས་སྒེར་ངོས་ནས་དྲི་བ་རེ་བཅས་ཁྱོན་བསྡོམས་དྲི་བ་ ༨ ཙམ་ཕུལ་ཏེ། ༧གོང་ས་མཆོག་གིས་བཀའ་ལན་གནང་ཡོད།

བཀའ་ལན་རྣམས་ཕྱོགས་བསྒྲིགས་ཕབ་བསྒྱུར་ཟིན་རྗེས་ྋགོང་ས་མཆོག་གི་རྒྱ་ཡིག་ཊི་ཝེ་ཊིར་ @DalaiLamaCN དང་། ཝང་ལི་ཞོན་གྱི་ཊི་ཝེ་ཊིར་ @wlixiong །  ཐུན་པིའོ་ཡི་ཊི་ཝེ་ཊིར་ @tenbiao ། ཅཱང་ཐེན་ཡོང་གི་ཊི་ཝེ་ཊིར་ @jtyong བཅས་སུ་བརྒྱུད་གཏོང་བྱས་ཡོད་པ་དང་། ྋགོང་ས་མཆོག་གི་བོད་རྒྱ་དབྱིན་གསུམ་གྱི་དྲྭ་ཚིགས་སྟེང་བརྙན་འཕྲིན་དང་བཅས་ཐད་གཏོང་བྱས་འདུག

ཐེངས་འདིའི་༸གོང་ས་མཆོག་གི་བཀའ་ལན་གནང་སྐབས།  ད་ལྟ་རྒྱ་ནག་ཧྲིན་ཀྲིན་དུ་ཡོད་པའི་ཁྲིམས་རྩོད་པ་ཐུན་པིའོ་ལགས་ཀྱིས།  ཉེ་ཆར་ཝི་ཀེ་ (WiKileaks) དྲ་རྒྱས་གསལ་བསྒྲགས་བྱས་པའི་ཨ་རིའི་གསང་བ་ཕྱི་གྱར་གྱི་གནས་ཚུལ་ཁྲོད། རྒྱ་གར་གནས་སྡོད་ཨ་རའི་གཞུང་ཚབ་ཀྱིས་བརྗོད་པ་ལྟར་ན།  ༸གོང་ས་མཆོག་ནས་ཆབ་སྲིད་ཀྱི་གནད་དོན་ཐད་བོད་མི་རྣམས་ཀྱིས་ད་དུང་ལོ་ ༥ ནས་ ༡༠ བར་ངང་སྒུག་བྱས་ཆོག་ཀྱང་། བོད་ཁུལ་གྱི་འཁྱག་རོམ་ཞུ་བ་དང་ནགས་ཚལ་གཅོད་འབྲེག གཏེར་ཁ་སྔོག་འདོན་སོགས་ཀྱི་རྐྱེན་པས་གཙང་པོའི་མགོ་ཁུངས་ཀྱི་རང་བྱུང་ཁོར་ཡུག་ཉམ་ཆག་ཏུ་འགྱུར་བཞིན་པ་བཅས་ཀྱི་ཐད་མུ་མཐུད་ངང་སྒུག་བྱེད་ཐབས་བྲལ་སྐོར་བརྗོད་ཡོད་པའི་གནས་ཚུལ་ཐོན་འདུག  དེ་ནི་བདེན་པ་ཡིན་མིན་དང་། གལ་སྲིད་བདེན་པ་ཡིན་ན།  དེ་ཡིས་༸གོང་ས་ཆོག་གི་ལངས་ཕྱོགས་ཐད་འགྱུར་བཅོས་བྱུང་བ་མཚོན་གྱི་ཡོད་མེད་དང་། ཞིབ་ཕྲའི་དགོངས་གཞི་ག་འདྲ་ཡིན་མིན་གྱི་བཀའ་འདྲི་གནང་ཡོད། 

པེ་ཅིན་དུ་ཡོད་པའི་ཁྲིམས་རྩོད་པ་ཅཱང་ཐན་ཡཱོང་གིས་བོད་ཀྱི་གནད་དོན་ཞི་བའི་ཐག་གཅོད་ཡོང་བར་རྒྱ་བོད་མི་མང་དང་། བོད་རྒྱ་ཤེས་ལྡན་པའི་བར་ཕན་ཚུན་འབྲེལ་མོལ་དང་རྒྱུས་ལོན་ཡོང་རྒྱུ་ནི་ཧ་ཅང་གལ་ཆེན་པོ་རེད། ༸གོང་ས་མཆོག་ནས་དེའི་ཐད་ཐུགས་འདུན་ཡོད་མེད་དང་། ཅི་ལྟར་འབྲེལ་མོལ་དང་རྒྱུས་ལོན་ཡོང་ཐབས་བྱ་རྒྱུ་ཡིན་མིན།   དེ་ལྟའི་འབྲེལ་མོལ་དང་རྒྱུས་ལོན་ཡོང་བར་འགོག་རྐྱེན་གཙོ་བོ་གང་དག་འཕྲད་ཀྱི་ཡོད་མེད་བཀའ་འདྲི་གནང་ཡོད།

དེ་མིན་གཞན་པའི་དྲི་བ་ཁག་དྲུག་ནི།  དང་པོ། ང་ཕོད་ངག་དབང་འཇིགས་མེད་ནི་སྔོན་ཆད་སྐུ་ཉིད་ཀྱིས་མངགས་གཏོང་གིས་པེ་ཅིན་ལ་གྲོས་མོལ་ཆེད་སྐྱོད་མཁན་རེད། དེར་མ་ཟད་ཁོས་གྲོས་མཐུན་དོན་ཚན་བཅུ་བདུན་ལ་མཚན་རྟགས་བཀོད་པ་རེད། སྤྱིར་བཏང་ཁྱེད་ཀྱིས་གྲོས་མཐུན་དེར་ཆོག་མཆན་མོས་མཐུན་གནང་མེད་ནའང་། རྗེས་སུ་སྐུ་ཉིད་ནས་ཀྱང་ཐུགས་འདུན་མོས་མཐུན་གནང་དགོས་བྱུང་བ་རེད། དེའི་རྗེས་ནས་བཟུང་ང་ཕོད་ངག་དབང་འཇིགས་མེད་སྐུ་ཉིད་ཀྱི་ཁ་གཏད་དུ་ལངས་ཏེ། བོད་ཀྱི་གནད་དོན་ཐད་རྒྱ་གཞུང་གི་མགྲིན་ཚབ་པར་གྱུར་བ་རེད། སྐུ་ཉིད་ནས་ང་ཕོད་ངག་དབང་འཇིགས་མེད་ཀྱི་ཐད་ལ་ཐུགས་བཞེས་གང་འདྲ་གནང་གི་ཡོད་དམ།

གཉིས་པ།  སྐུ་ཉིད་ལ་བཙན་བྱོལ་ནང་བོད་མི་སྐོར་ཞིག་གི་བྱ་སྤྱོད་ལ་སྟངས་འཛིན་གནང་དཀའ་བའི་ཚད་གཞིར་སླེབས་ཡོད་པའི་དགོངས་ཚུལ་ཡོད་དམ།   གནས་ཚུལ་འདིའི་བྱུང་རྐྱེན་ཅི་ཞིག་ཡིན་མིན་དང་། མ་འོངས་པར་དེའི་ཐད་ཐུགས་འཆར་ག་རེ་ཡོད་དམ།

གསུམ་པ།  གཞན་དབང་སྟབས་བསྟུན་མི་བྱེད་པ་དང་འཚེ་བ་མེད་པའི་ཐབས་ལམ་གྱིས་རྒྱ་ནག་དམར་ཤོག་གཞུང་ལ་ཁ་གཏད་ཀྱི་ནུས་པ་ག་འདྲ་ཞིག་ཐོན་གྱི་ཡོད་དམ།  གལ་སྲིད་སྐུ་ཉིད་ནས་ནུས་པ་ཐོན་ངེས་པའི་དགོངས་བཞེས་ཡོད་ན། བོད་མི་རྣམས་ལ་ཐབས་ལམ་དེ་དག་བརྒྱུད་ནས་དོན་དངོས་ཀྱི་ཁེ་ཕན་ག་རེ་འབྱུང་གི་རེད་དམ།

བཞི་པ།  བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་ལམ་ལུགས་ལ་བསྒྱུར་བཅོས་བཏང་ཆོག་པའི་ལམ་ཁ་ཇི་ལྟར་འཚོལ་དགོས་པའི་ཐད་སྐུ་ཉིད་ནས་འགྲེལ་བཤད་ཅིག་གནང་རོགས། ང་རང་གི་ངོས་ནས་བསྒྱུར་བཅོས་གནང་རྒྱུ་དེ་ནི་བཅོམ་ལྡན་འདས་ཀྱི་ལུང་དང་འགལ་ཡོད་མེད་ལ་ཐེ་ཚོམ་ཡོད།

ལྔ་པ།  ད་ལྟ་རྒྱ་ནག་ནང་མི་མང་པོ་ཞིག་གིས་སྐུ་ཉིད་ལ་ཞེ་འཁོན་དང་སྡང་སེམས་འཛིན་གྱི་ཡོད་སྟབས་སྐུ་ཉིད་ནས་མི་དེ་དག་ལ་བཀའ་གསུང་ཅི་ཞིག་གནང་འདུན་ཡོད་དམ།

དྲུག་པ།  ང་ཚོས་ཤེས་གསལ་ལ།  ཏཱ་ལའི་བླ་མ་སྐུ་གོང་མའི་ཡང་སྲིད་ངོས་འཛིན་སྐབས།  རྒྱ་ནག་མི་སེར་རྒྱལ་ཁབ་ཀྱིས་དབུས་སྲིད་གཞུང་གི་རྣམ་པའི་ཐོག་ནས་ཡང་སྤྲུལ་ཐག་གཅོད་དང་ཁྲི་འདོན་མཛད་སྒོའི་ཐད་ཐེ་ཇུས་བྱས་ཡོད། སྐུ་ཉིད་ཀྱིས་ད་ལྟ་ཐེ་ཝན་དུ་ཡོད་པའི་རྒྱ་ནག་མི་སེར་རྒྱལ་ཁབ་ཀྱི་གཞུང་དེ་ངོས་ལེན་གནང་གི་རེད་དམ། ཐེ་ཝན་གཞུང་གིས་ད་དུང་ཡང་སྲིད་ངོས་འཛིན་ལམ་ལུགས་ཐད་སྔར་མཚུངས་ཀྱི་ནུས་པ་འདོན་ཆོག་པའི་ཐུགས་བཞེས་གནང་གི་ཡོད་དམ། བཅས་ཡིན་འདུག

ཐེངས་འདིར་༸གོང་ས་མཆོག་གིས་དྲ་ལམ་བརྙན་རིས་བརྒྱུད་རྒྱ་རིགས་ཤེས་ལྡན་པ་རྣམས་དང་གླེང་མོལ་གནང་བའི་སྐོར་ལ་སྐུ་སྒེར་དྲུང་ཆེ་རྔ་བ་ཚེ་རྒྱམ་ལགས་ཀྱིས་འཇར་མན་རླུང་འཕྲིན་ཁང་ལ་བརྗོད་དོན།  བཀག་སྡོམ་འདྲ་མིན་གྱི་རྐྱེན་པས་རྒྱ་ནག་ནང་གི་ཤེས་ལྡན་པ་རྣམས་དང་ལྷན་དུ་༸གོང་ས་མཆོག་གིས་ཐད་ཀར་ཐུག་འཕྲད་ཀྱིས་བཀའ་མོལ་གནང་ཐབས་བྲལ་ཡང་། དྲ་རྒྱ་བརྒྱུད་བཀའ་མོལ་གནང་ཐུབ་པ་བྱུང་བ་འདིས་ཕན་ཚུན་ལྷན་གཅིག་ཏུ་བསྡད་དེ་གླེང་མོལ་བྱུང་བའི་སེམས་ཚོར་བྱུང་ལ། དེ་བཞིན་༸གོང་ས་མཆོག་གིས་ཀྱང་མ་འོངས་པར་རྒྱ་རིགས་ཤེས་ལྡན་པ་རྣམས་དང་གླེང་མོལ་སྔར་བས་མང་བ་གནང་ཐུབ་རྒྱུར་ཐུགས་རེ་གནང་གི་འདུག ཅེས་དང་། ༸གོང་ས་མཆོག་གིས་བཙན་བྱོལ་བོད་གཞུང་གི་འཛིན་སྐྱོང་ལས་དོན་གྱི་འགན་དབང་ཆ་ཚང་མི་མང་གིས་འོས་འདེམས་བྱས་པའི་བཀའ་བློན་ཁྲི་པར་སྤྲོད་རྒྱུའི་འཆར་གཞི་ཡོད་པ་རེད། ཡིན་ནའང་། བོད་རྒྱ་བར་གྱི་འབྲེལ་མོལ་གྱི་ཐུགས་འགན་དེ་མཚམས་འཇོག་གནང་གི་མ་རེད།  དེ་བཞིན་༸གོང་ས་མཆོག་གིས་ཆོས་ལུགས་ཕན་ཚུན་བར་གྱི་མཐུན་ལམ་ཡར་རྒྱས་དང་།  བོད་རྒྱ་མི་རིགས་བར་མཐུན་འགྲིག་འབྱུང་ཐབས་ཀྱི་ཐུགས་འགན་མུ་མཐུད་གནང་གི་རེད་ལ། ༸གོང་ས་མཆོག་དང་བོད་ཀྱི་ལས་དབང་གཉིས་དུས་ནམ་ཡང་ཁ་བྲལ་ཐབས་མེད། ཅེས་བརྗོད་ཡོད་པ་རེད།

ཁྲིམས་རྩོད་པ་ཐུན་པིའོ་ལགས་ཀྱིས་ཐེངས་འདིར་དྲ་ལམ་བརྙན་རིས་བརྒྱུད་༸གོང་ས་མཆོག་དང་ཐད་ཀར་གླེང་མོལ་བྱུང་བའི་སྐོར་འཇར་མན་རླུང་འཕྲིན་ཁང་ལ་བརྗོད་དོན། ༸གོང་ས་མཆོག་གིས་བོད་རྒྱ་མི་རིགས་གཉིས་ཀྱི་མི་མང་ཚོ་དང་། ཕྱོགས་གཉིས་ཀྱི་ཤེས་ལྡན་པ་ཕན་ཚུན་བར་གླེང་མོལ་བརྒྱུད་བོད་ཀྱི་གནད་དོན་ཤེས་རྟོགས་ཡོང་རྒྱུ་དེ་དོན་དག་གལ་ཆེན་ཞིག་ཏུ་གཟིགས་ཀྱི་འདུག་ལ།  ༡༩༨༩ ལོ་ནས་ད་ལྟའི་བར་རྒྱ་རིགས་ཤེས་ལྡན་པ་ ༣༠༠ ལྷག་ལ་གླེང་མོལ་བྱུང་འདུག ད་དུང་མུ་མཐུད་དེ་གླེང་མོལ་བྱ་རྒྱུར་ཐུགས་རེ་གནང་གི་ཡོད་པར་མ་ཟད། འདིའི་ཐད་ཀྱི་འགོག་རྐྱེན་གཙོ་བོ་ནི། གཏན་འཇགས་རང་བཞིན་གྱི་འབྲེལ་ལམ་ཞིག་མེད་པ་དེ་རེད། ཏཱ་ལའི་བླ་མ་མཆོག་སྐུ་སྒེར་གྱི་ངོས་ནས་རྒྱ་ནག་གཞུང་འབྲེལ་དཔོན་རིགས་དང་མང་ཚོགས་གང་ཡིན་ཡང་། མ་འོངས་པར་གཏན་འཇགས་རང་བཞིན་གྱི་འབྲེལ་ལམ་ཞིག་འཛུགས་ཐུབ་རྒྱུར་ཐུགས་རེ་གནང་བཞིན་པའི་སྐོར་སོགས་བརྗོད་འདུག 

ཐུན་པིའོ་ཡིས་མུ་མཐུད་དུ་བརྗོད་དོན། ༸གོང་ས་མཆོག་ནི་ཧ་ཅང་ཐུགས་གཤིས་འཇམ་ལ་རྩེད་མཚར་སློང་མཁས་པོ་ཞིག་འདུག་པ་མ་ཟད།  ལྷད་མེད་དྭངས་གཙང་གི་བྱིས་པ་ཞིག་དང་འདྲ་བར་ཧ་ཅང་ལྷག་བསམ་ཟོལ་མེད་ཅན་ཞིག་ཀྱང་རེད། ཅེས་དང་། ང་ལ་མཚོན་ན། ཐེངས་འདིར་༸གོང་ས་ཏཱ་ལའི་བླ་མ་མཆོག་དང་ལྷན་དུ་བརྙན་རིས་བརྒྱུད་ཐད་ཀར་གླེང་མོལ་བྱུང་བ་ཐོག་མ་ཡིན་ཡང་། ཕན་ཚུན་བློ་ཐག་ཧ་ཅང་ཉེ་བའི་ཚོར་བ་ཤུགས་ཆེན་པོ་བྱུང་སོང་། མ་གཞི་ནས་ང་རང༸གོང་ས་མཆོག་ལ་དད་གུས་ཆེན་པོ་ཡོད་ལ། ༢༠༠༧ ལོར་༸གོང་ས་ཏཱ་ལའི་བླ་མར་ཨ་ཪིའི་གྲོས་ཚོགས་ཀྱི་གསེར་གྱི་རྟགས་མ་འབུལ་བཞེས་ཀྱི་མཛད་སྒོ་དེར་ཐད་གཏོང་བརྙན་འཕྲིན་ནས་བལྟས་མྱོང་བ་དང་། ༧གོང་ས་མཆོག་གི་མི་གཤིས་དང་། ཐུགས་རྒྱུད། བྱམས་བརྩེ་བཅས་ཀྱིས་མི་རྣམས་ལ་རང་དབང་མེད་པར་ཡིད་འགུ་བ་དང་དད་གུས་སྐྱེ་རུ་འཇུག་ཐུབ་མཁན་ཞིག་རེད། ཅེས་བརྗོད་ཡོད་པ་རེད། 

གཞན་ཡང་། ཁོང་གིས་ཉེ་ལམ་རྒྱ་རིགས་ཤེས་ལྡན་པ་རེ་འགས་མི་རིགས་རང་ལུགས་ཀྱི་ཕྱོགས་ལྷུང་གི་ལྟ་བ་ཤུགས་ཆེན་པོ་འཆིང་བཞིན་ཡོད་པའི་སྐོར་ལ་བརྗོད་དོན།  རྒྱ་རིགས་མང་པོར་མི་རིགས་རང་ལུགས་ཀྱི་ལྟ་ཚུལ་འབྱུང་རྐྱེན་གཙོ་བོ་ནི།  རྒྱ་གཞུང་གིས་མི་རིགས་རང་ལུགས་དྲིལ་བསྒྲགས་དང་། དེ་འབྲེལ་གྱི་སྒྲིག་སྲོལ་ལམ་ལུགས་མང་པོ་ཞིག་བཙུགས་ཡོད་པའི་རྐྱེན་གྱིས་ཡིན་ལ། གནད་དོན་དེ་སེལ་ཐབས་ལེགས་ཤོས་ནི་མི་རིགས་ཕན་ཚུན་བར་གྱི་འབྲེལ་ལམ་ཤུགས་ཆེ་རུ་གཏོང་དགོས་པ་དེ་རེད། ཁོ་རང་ནི་འགྲོ་བ་མིའི་ཐོབ་ཐང་བརྩོད་ལེན་བྱེད་མཁན་གྱི་ཁྲིམས་རྩོད་པ་ཞིག་ཡིན་སྟབས། བོད་ནང་ ༢༠༠༨ ལོའི་ ༣་༡༤ དོན་རྐྱེན་བྱུང་རྗེས་༼ བོད་མིར་ཁྲིམས་ལུགས་ཀྱི་རྒྱབ་རོགས་བྱ་རྒྱུར་ང་ཚོར་མོས་མཐུན་ཡོད་པའི་སྤྱི་བསྒྲགས། ༽ཞེས་པའི་ཡིག་ཆ་འགྲེམས་སྤེལ་བྱས་པར་བརྟེན། ཁོ་རང་གི་ཁྲིམས་རྩོད་པའི་ཐོབ་ཐང་ལག་འཁྱེར་ཀྱང་རྒྱ་གཞུང་གིས་རྩིས་མེད་བཟོས་ཡོད་ཀྱང་།  ཁོས་མུ་མཐུད་དུ་བོད་མི་རིགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་དོན་ཐད་ཧུར་བརྩོན་གནང་གི་ཡིན་སྐོར་སོགས་བརྗོད་འདུག

གསར་འགོད་པ། ཚེ་རིང་རྒྱལ།