ཕྱི་ཚེས་ ༡༠ ཉིན་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མི་ཚོས་རྒྱ་ནག་གི་བཙན་གནོན་ལ་ཞི་བའི་ངོ་རྒོལ་གྱི་དུས་དྲན་ཐེངས་ ༥༢ པ་སྲུང་བརྩི་བྱས་ཡོད་པ་ལྟར། བལ་ཡུལ་བོད་མི་ཚོས་ཡར་སྔོན་ནས་བལ་ཡུལ་གཞུང་གིས་བོད་མི་འདུས་སྡོད་ཀྱི་ས་གནས་གང་སར་དམག་མི་དང་ཉེན་རྟོག་མི་སྣ་འགྲེམས་འཇོག་གིས་དམ་དྲག་བྱས་མིན་ལ་མ་ལྟོས་པར། བལ་ཡུལ་གྱི་མཆོད་རྟེན་བྱ་རུང་ཁ་ཤོར་གྱི་ཉེ་འགྲམ་དུ་ཡོད་པའི་གཞུང་དགོན་བསམ་གཏན་གླིང་འདུ་འཛོམས་ཀྱིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་མངའ་གསོལ་མཛད་དེ་མི་མང་ལངས་གླུ་དང་རྒྱལ་གླུ་གྱེར་འདོན་བྱས་ཤིང་། ༧གོང་ས་མཆོག་གི་གསུམ་བཅུ་དུས་དྲན་ཐེངས་ ༥༢ པར་བསྩལ་བའི་གསུང་འཕྲིན་དང་བཀའ་སྤྱི་གཉིས་ཀྱི་གསུང་འཕྲིན་སྒྲོག་སྦྱོང་གནང་སྟེ་དུས་དྲན་སྲུང་བརྩི་བྱས་ཡོད། དུས་དྲན་མཛད་སྒོ་གྲོལ་རྗེས་བོད་མི་ཚོས་མཆོད་རྟེན་སྐོར་ལམ་དང་རྒྱ་ནག་གཞུང་ཚབ་ཀྱི་མདུན་བཅས་སུ་ཁག་བགོས་ཀྱིས་འབོད་ཚིག་འདྲ་མིན་འོག་ལས་འགུལ་སྤེལ་མགོ་རྩོམ་སྐབས། མཆོད་རྟེན་བྱ་རུང་བསྐོར་ལམ་དུ་ཉེན་རྟོག་མི་སྣ་བརྒྱ་ཕྲག་མང་པོ་བསླེབས་ཏེ་བོད་མི་ཚོར་གཅར་རྡུང་དང་བོད་ཀྱི་རྒྱལ་དར་བཙན་འཕྲོག་སོགས་བྱས་ཡོད་པར་མ་ཟད། རྒྱ་ནག་གཞུང་ཚབ་ཉེ་འགྲམ་བཅས་ནས་བོད་མི་ ༡༠ ལྷག་འཛིན་བཟུང་བྱས་ཡོད་འདུག་ལ། བོད་མི་ ༡༥ ཙམ་ལ་གཅར་རྡུང་བྱས་ཏེ་རྨས་སྐྱོན་ཚབས་ཆེན་ཕོག་ཡོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ཉེ་བའི་དུས་ནས་བལ་ཡུལ་གཞུང་གིས་བོད་མི་ཚོའི་འོས་སྒམ་བཙན་འཕྲོག་དང་དུས་དྲན་ཁག་དང་འདུ་འཛོམས་སོགས་ལ་སྔར་ལས་ལྷག་པའི་དམ་དྲག་བྱས་པའི་དབང་གིས། ཐེངས་འདིའི་གསུམ་བཅུའི་དུས་དྲན་སྟེང་སློབ་གྲྭ་ཁག་མང་པོ་ཞིག་མཉམ་ཞུགས་གནང་ཐུབ་མེད་པར་མ་ཟད། ས་གནས་བོད་མི་མང་པོ་ཞིག་ཀྱང་འཇིགས་སྣང་གི་དབང་གིས་དུས་དྲན་སྟེང་ཞུགས་ཐུབ་མི་འདུག་ལ། གནས་སྟངས་འདིའི་ཐད་བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་པའི་ངོས་ནས་སྐྱོན་བརྗོད་བྱས་ཡོད་འདུག
གསར་འགོད་པ། དོན་གོ
