བོད་ནང་རང་ལུས་མེར་བསྲེག་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་མཚོན་ཆེད་ནོར་གླིང་ཉེ་འཁྲིས་སུ་ཡོད་པའི་བོད་མི་ཚོས་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་སོང་།
ཁ་སང་ཕྱི་ཚེས་ ༤ ཉིན་དགོང་དྲོའི་ཆུ་ཚོད་ ༦ པའི་ཐོག་དབུས་བོད་ཀྱི་གཞོན་ནུ་ལྷན་ཚོགས་དང་དབུས་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ་བཅས་ཀྱི་གོ་སྒྲིག་འོག བོད་ནང་རང་ལུས་མེར་བསྲེག་བཏང་བའི་རྒྱལ་གཅེས་དཔའ་བོ་དཔའ་མོ་རྣམ་པར་གདུང་སེམས་མཉམ་སྐྱེད་མཚོན་ཆེད་ནོར་གླིང་མཐོ་སློབ་ནས་འཆི་མེད་དགའ་ཚལ་གླིང་བར་མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་སོང་། མར་མེ་ཁྲོམ་སྐོར་གྱི་ལས་འགུལ་ནང་ནོར་གླིང་བོད་ཀྱི་མཐོ་རིམ་སློབ་གཉེར་ཁང་དང་ཤེས་རབ་དགའ་ཚལ་སློབ་གླིང་གཉིས་ཀྱི་དགེ་སློབ་དང་། འཆི་མེད་དགའ་ཚལ་གླིང་གི་དགེ་འདུན་པ་བཅས་སེར་སྐྱ་མི་མང་ ༥༠༠ མ་ཟིན་ཙམ་ཞིག་འདུ་འཛོམས་བྱུང་འདུག
མར་མེ་ཁྲོམ་སྐོར་གྱི་ལས་འགུལ་ཐོག་བོད་ཀྱི་ཆབ་སྲིད་བཙོན་ཟུར་དཀར་མཛེས་བ་ཕུན་ཚོགས་ཚེ་རིང་དང་མདོ་སྨད་སྤྱི་འཐུས་སྒྲོལ་དཀར་སྐྱབས། དབུས་བོད་ཀྱི་བུད་མེད་ལྷན་ཚོགས་ཀྱི་ཟུང་དྲུང་བསྟན་འཛིན་སྒྲོལ་མ། བོད་རང་བཙན་སློབ་ཕྲུག་ཚོགས་པའི་ས་གནས་ཚོགས་གཙོ་རྡོ་རྗེ་ཚེ་བརྟན། ཤེས་རབ་དགའ་ཚལ་སློབ་གླིང་གི་སྤྱི་ཁྱབ་རྒན་བདག་ལས་ཚབ་བཀྲ་ཤིས་རབ་བརྟན། བོད་ཀྱི་གཞོན་ནུ་ལྷན་ཚོགས་ཀྱི་རིག་གཞུང་འགན་འཛིན་འཇིགས་མེད་བཅས་ཀྱིས་རྒྱ་གཞུང་གིས་བོད་མིའི་ཆོས་དང་རིག་གཞུང་རྩ་མེད་བཟོ་ཆེད་དངོས་ཤུགས་བརྒྱུད་གསུམ་ནས་བོད་ནང་གི་བོད་མི་ཚོར་དྲག་གནོན་བྱས་ཡོད་པ་དང་། གནས་ཚུལ་དེ་དག་ལ་བརྟེན་ནས། འདི་ལོ་ཕྱི་ཟླ་ ༣ པ་ནས་ད་ལྟའི་བར་བོད་ནང་བོད་མི་སྐྱ་སེར་ ༡༡ གིས་རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་བྱས་ཡོད་སྟབས། ང་ཚོ་ཕྱི་ཕྱོགས་སུ་ཡོད་པའི་བོད་མི་ཚོས་བོད་ནང་གི་དངོས་ཡོད་ཀྱི་གནས་སྟངས་ལ་དོ་སྣང་དང་རྒྱུས་ལོན་བྱས་ཏེ། གནས་ཚུལ་རྣམས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་ཁབ་ཁག་གི་གནད་ཡོད་མི་སྣའི་རྣ་ལམ་དུ་བསྐྱལ་ཏེ་རྒྱ་ནག་གཞུང་ལ་གནོན་ཤུགས་སྤྲོད་ཐབས་བྱ་རྒྱུ་དང་། དེ་བཞིན་བཙན་བྱོལ་བོད་མི་ཚོས་ཀྱང་རང་ནུས་ཅི་ལྕོགས་ཀྱིས་ལས་འགུལ་རིམ་པ་སྤེལ་དགོས་པའི་འབོད་སྐུལ་སོགས་གནང་སོང་།
གསར་འགོད་པ། དོན་གོ
སྟོང་བཙན་ལགས
ང་ཚོའི་མི་ཚེ་ནང་རང་ལ་མེད་ནི་མི་སྡུག མི་ལ་ཡོད་ནི་སྡུག་ཅེས་པའི་ན་ཟུག་འདི་ཁྱབ་ཤུགས་ཆེན་པོ་ཡིན། ཁྱེད་ལའང་འདི་འགོས་ཚར་འདུག གང་མགྱོགས་བཤགས་བཅོས་བགྱི་དང་། ཁྱེད་ཀྱང་དཔེ་ཁུག་རྒྱབ་ཏུ་འཁུར་ཏེ་རྣམ་དབྱེ་བདུན་པ་དང་རྣམ་དབྱེ་གསུམ་པའི་སློབ་གླིང་གི་སྐྱེད་ཚལ་ལ་འགྲིམ་ཆོག
ཞུ་འདོད་པ་ཞིག་ལ། གདུངས་སེམས་མཉམ་བསྐྱེད་ནི་བོད་ཆོལ་གསུམ་མཚོན་པའི་བོད་མི་ཡོད་དོ་ཅོག་གི་ལས་འགུལ་ཞིག་ཡིན་པས། དམིགས་སུ་བཀར་དགོས་བ་མེད་མོད། འོན་ཀྱང། སློབ་གྲྭ་ཁ་ཤས་དང་མི་ཁ་ཤས་བེད་སྤྱོད་བྱས་ཏེ་ཚོགས་པའི་མིང་འཁྱེར་བཞིན་ཡོད་པ་འདི་ནི་དངོས་གནས་དྲང་བདེན་ཞིག་ཏུ་མ་མཐོང།
གང་ཡིན་ཟེར། གོང་གི་ལས་འགུལ་འདི་མཚོན་པའི་ལས་འགུལ་མང་ཆེ་བ་ཞིག་ཤེས་རབ་དགའ་ཚལ་གླིང་གི་སློབ་མ་དག་གཙོ་བོར་གྱུར་ཡོད་པ་མ་གཏོགས། ནོར་གླིང་རང་ངོས་ཀྱི་མི་ཕལ་ཆེར་བརྒྱ་ཆ་བཅུ་ལས་ཡོད་པ་མ་རེད། གོང་གི་པར་ངོས་མི་འདི་དག་ཚང་མ་སོག་སློབ་རྐྱང་རྐྱང་ཡིན་པས། ནོར་གླིང་མ་ཡིན། ལས་འགུལ་འོག་འཛུགས་གི་ཉིན་ཁ་ཤས་རིང་ཤེས་རབ་དགའ་ཚལ་གླིང་གི་སློབ་མ་དག་སློབ་གྲྭ་ནས་བརྒྱུད་སྟོད་པར་མར་མེ་ཁྲོམ་ལ་འགྲོ་བཞིན་ཡོད་པ་མ་གཏོགས་ནོར་གླིང་མཐའ་བསྐོར་ཀྱི་མི་མང་ཆེ་བ་རང་གནས་འཛུལ་ནས་བསྡད་ཡོད་པ་གསལ་བོ་ཡིན་པས། གཞུང་སྒེར་ཚོགས་པ་གང་ཡིན་ཡང། སློབ་ཕྲུག་དག་བེད་སྤྱོད་བྱས་ཏེ་མིང་ཙམ་མི་ལེན་པའི་རེ་བ་ཞུ་ཞུ་བ་ཡིན།