འཚེ་མེད་ཡིན་པ་ཞིག་ཡང་ཡང་འཚེ་མེད་ཡིན་ཚུལ་བརྗོད་མི་དགོས།

གཟའ་ཉི་མའི་ཉིན་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ་༼ བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ། ༽ཞེས་པའི་བརྗོད་གཞིའི་ཐོག་བགྲོ་གླེང་དང་། གོ་སྒྲིག་པས་བགྲོ་གླེང་གི་ནང་དོན་ཕྱོགས་སྡོམ་གྱིས་གསར་འགོད་བསྒྲགས་གཏམ་བཅས་སྤེལ་སོང་།

ཁ་སང་ཕྱི་ཚེས་ ༢༠ ཉིན་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་གོ་སྒྲིག་འོག  ༼ བོད་མིའི་ཛ་དྲག་གི་འོས་ལངས་དང་བོད་དོན་འཐབ་རྩོད་ཀྱི་སྟོབས་ཤུགས་གླེང་བ ༽ཞེས་པའི་བགྲོ་གླེང་ཞིག་ཚོགས་ཏེ། བོད་མིའི་མེར་བསྲེགས་ལས་འགུལ་དང་བོད་ནང་གི་ད་ལྟའི་སྟངས། བཙན་བྱོལ་སྤྱི་ཚོགས་ནང་འཐབ་རྩོད་ཀྱི་སྟོབས་ཤུགས་གོང་འཕེལ་གཏོང་ཐབས། རྒྱ་གཞུང་གིས་བོད་ཀྱི་བདེན་པའི་འཐབ་རྩོད་ལ་འཁྱོག་བརྗོད་བྱེད་བཞིན་པ་ཐེར་འདོན་བཅས་ཀྱི་ཐད་གཏམ་བཤད་གནང་སོང་།

ཐེངས་འདིའི་བགྲོ་གླེང་ཐོག་སྤྱི་འཐུས་བསོད་ནམས་རྒྱལ་མཚན་དང་ཤར་གླིང་ཟླ་སྒྲོན། ལི་ཐང་འཇམ་བཟོད། རྨོག་རུ་བསྟན་པ། གངས་ལྷ་མོ་དང་།  དབུས་གཞོན་ནུའི་ཚོགས་གཞོན་ནོར་གྲུབ་ལྷ་དར། བོད་རང་བཙན་སློབ་ཕྲུག་ཚོགས་པའི་ས་གནས་ཚོགས་གཙོ་རྡོ་རྗེ་ཚེ་བརྟན། བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་འཆི་མེད་གཡུང་དྲུང་བཅས་དང་། རྩོམ་པ་པོ་དང་དགེ་རྒན་སོགས་གདན་ཞུས་བགྲོ་གླེང་བ་ ༡༥ དང་ཟུར་ཞུགས་པ་བཅས་མི་གྲངས་ ༥༠ ཙམ་མཉམ་ཞུགས་གནང་སོང་ལ། མཇུག་ཏུ་གོ་སྒྲིག་པའི་ངོས་ནས་བགྲོ་གླེང་སྐབས་ཀྱི་བསམ་ཚུལ་བསྡུ་སྒྲིག་གིས་དོན་ཚན་ ༧ ཅན་གྱི་གསར་འགོད་བསྒྲགས་གཏམ་ཞིག་ཀྱང་སྤེལ་སོང་།

བགྲོ་གླེང་གི་ཐོག་མར་གོ་སྒྲིག་པ་ཚངས་དབྱངས་རྒྱ་མཚོ་ལགས་ཀྱིས་བགྲོ་གླེང་གི་དམིགས་ཡུལ་ངོ་སྤྲོད་གནང་བ་ལྟར་ན། བོད་ནང་རང་ལུས་མེར་བསྲེགས་ཀྱི་ལས་འགུལ་བསྟུད་མུར་འབྱུང་བཞིན་པའི་སྐབས་འདིར། གཞིས་བཞུགས་སྤུན་ཟླ་རྣམས་ཀྱི་བླ་ན་མེད་པའི་གཅེས་སྲོག་གི་མཛད་རྗེས་ཆུད་ཟོས་སུ་མི་གཏོང་ཆེད་དང་།  དེ་དག་གི་འཐབ་རྩོད་ངོ་བོ་ངོས་འཛིན་སྟངས། གཞིས་བྱེས་བོད་མིའི་འཐབ་རྩོད་སྟོབས་ཤུགས་གཅིག་སྒྲིལ་ཡོང་ཐབས། གསར་འགྱུར་མཁོ་སྒྲུབ་དང་ཁྱབ་སྤེལ་གཏོང་ཕྱོགས་སོགས་ཀྱི་ཐད་བགྲོ་གླེང་གོ་བསྡུར་ཧ་ཅང་གལ་ཆེ་བར་མཐོང་སྟེ། བགྲོ་གླེང་འདི་གོ་སྒྲིག་གནང་ཚུལ་བརྗོད་བྱུང་།   

སྔ་དྲོའི་བགྲོ་གླེང་སྐབས་སྤྱི་འཐུས་རྨོག་རུ་བསྟན་པ་ལགས་ཀྱི་གཙོ་སྐྱོང་འོག ༼ བོད་མིའི་མེར་བསྲེགས་ལས་འགུལ་དང་བོད་ནང་གི་འོས་ལངས་ལ་ལྟ་བ༽ཞེས་པའི་བརྗོད་གཞིའི་ཐོག ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་དང་ནོར་གླིང་མཐོ་སློབ་ཀྱི་ལོ་རྒྱུས་དགེ་རྒན་ལྷ་ལུང་རྒྱལ། ལོ་རྒྱུས་ཉམས་ཞིབ་པ་འཇུ་བསྟན་སྐྱོང་། རྩོམ་པ་པོ་བོན་རྒྱ་བསྟན་འཛིན་རབ་རྒྱས་བཅས་ཀྱིས་གཏམ་བཤད་དང་དྲི་བར་ལན་འདེབས་གནང་སོང་། དེའི་རྗེས་ཚངས་དབྱངས་རྒྱ་མཚོ་ལགས་ཀྱི་གཙོ་སྐྱོང་འོག ༼བཙན་བྱོལ་བོད་མིའི་ད་ལྟའི་འཐབ་རྩོད་ཀྱི་སྟོབས་ཤུགས་ཇི་ལྟར་གོང་འཕེལ་དུ་གཏོང་ཐབས ༽ ཞེས་པའི་བརྗོད་གཞིའི་ཐོག་དོན་གྲུབ་ལྷ་དར་ལགས་དང་རྡོ་རྗེ་ཚེ་བརྟན། འཆི་མེད་གཡུང་དྲུང་། དམ་ཆོས་དཔལ་བཟང་བཅས་ཀྱིས་གཏམ་བཤད་དང་དྲི་བར་ལན་འདེབས་གནང་སོང་ལ། ཕྱི་དྲོའི་བགྲོ་གླེང་སྐབས། དོན་གྲུབ་ལྷ་དར་ལགས་ཀྱི་གཙོ་སྐྱོང་འོག ༼རྒྱ་ནག་གི་འཁྱོག་བཤད་དག་ལ་བདེན་པས་རྒོལ་རྡུང་གཏོང་བ༽ ཞེས་པའི་བརྗོད་གཞིའི་ཐོག་སྤྱི་འཐུས་བསོད་ནམས་རྒྱལ་མཚན་དང་ཤར་གླིང་ཟླ་སྒྲོན། རྨོག་རུ་བསྟན་པ། གངས་ལྷ་མོ། འཇམ་དབྱངས་བཟོད་པ་བཅས་ཀྱིས་གཏམ་བཤད་གནང་སོང་།

བགྲོ་གླེང་སྐབས་གཞོན་ནུའི་ཚོགས་གཞོན་དོན་གྲུབ་ལྷ་དར་ལགས་ཀྱིས་རྒྱ་ནག་གི་དར་དམར་མེར་བསྲེགས་གཏོང་དོན་ནི། ཚོར་བའི་དབང་གིས་མ་ཡིན་པར་ལོ་རྒྱུས་ཀྱི་བདེན་པ་སྲུང་སྐྱོབ་ཆེད་ཡིན་ཚུལ་བརྗོད་དོན། “རང་བཙན་རྩོད་མཁན་ཞིག་གི་ངོས་ནས་སྐར་མ་ལྔ་ཅན་གྱི་དར་ཆ་དེ་ངོས་ལེན་བྱེད་ཐབས་ཡོད་པ་མ་རེད། དེར་བརྟེན་དར་ཆ་དེ་མར་ཕབས་པ་དང་མེར་བསྲེགས་བཏང་སྟེ་ངོས་ལེན་མེད་པའི་རྣམ་འགྱུར་སྟོན་བཞིན་ཡོད།  དར་ཆ་དེ་ངོས་ལེན་མ་ཐུབ་པར་གཞོན་ནུ་ལྷན་ཚོགས་ལ་རྒྱུ་མཚན་གཉིས་ཡོད། དང་པོ། དར་ཆ་དེ་ ༡༩༤༩ ཕྱི་ཟླ་ ༧ པའི་ནང་སྒྲིག་བཟོ་བྱས་པ་རེད། དར་ཆ་དེར་འགྲེལ་བཤད་མ་འདྲ་བ་གསུམ་ཡོད།  ས་ཁོངས་ཀྱི་ངོ་བ་དང་། མི་རིགས་ཀྱི་ངོ་བོ། གྲལ་རིམ་གྱི་ངོ་བོ་བཅས་འགྲེལ་བཤད་རྒྱག་སྟངས་མ་འདྲ་བ་གསུམ་ལས། བོད་དེ་རྒྱ་ནག་གི་ཆ་ཤས་ཡིན་པ་གཞིར་བཞག་ཐོག་འགྲེལ་བཤད་བརྒྱབ་ཡོད་སྟབས།  བོད་རྒྱ་ནག་གི་ཆ་ཤས་ཡིན་པ་ངོས་ལེན་གནང་མ་ཐུབ་པར་རྒྱ་ནག་གི་དར་ཆ་དེ་མེར་བསྲེགས་གཏོང་གི་ཡོད་པ་རེད། གཉིས་པ། སྐར་མ་ལྔ་ཡི་དར་ཆ་དེའི་དབང་སྒྱུར་འོག་བོད་མི་ས་ཡ་གཅིག་ལྷག་འདས་གྲོངས་ཕྱིན་པ་རེད། ང་ཚོར་སོ་སོའི་རྒྱལ་དར་ཞིག་ཡོད་པ་རེད། དེར་བརྟེན། རྒྱ་ནག་གི་དར་ཆ་མེར་བསྲེགས་གཏོང་བཞིན་ཡོད” ཅེས་བརྗོད་དེ།  མི་རེ་འགས་རྒྱ་ནག་གི་དར་ཆ་མེར་བསྲེགས་བཏང་ན་རྒྱ་མིར་ཕོག་ཐུག་འགྲོ་རྒྱུར་དོགས་བཞིན་ཡོད་ཀྱང་།  ང་ཚོའི་འཐབ་རྩོད་དེ་གཞན་ལ་བསྟུན་པའི་ཆེད་དུ་མ་ཡིན་པར། སོ་སོའི་རང་དབང་རང་བཙན་གྱི་ཆེད་ཡིན་སྟབས། རྒྱ་མི་བརྒྱ་ཡི་རྒྱབ་སྐྱོར་ཐོབ་པ་དང་བོད་མི་གཅིག་གི་སེམས་ཤུགས་ཆག་པ་གཉིས་ལས། བོད་མི་གཅིག་གི་སེམས་ཤུགས་ཆག་པ་དེ་གྱོང་ཆེན་པོ་ཡིན་ཚུལ་བརྗོད་སོང་།

སྤྱི་འཐུས་འཇམ་དབྱང་བཟོད་པ་ལགས་ཀྱིས། “མ་གཞི་ནས་འཚེ་མེད་ཞི་བ་ཡིན་པ་ཞིག་ལ་ཡང་དང་བསྐྱར་དུ་རེད་ཅེས་ཨུ་ཚུགས་རྒྱག་དགོས་དོན་མི་འདུག གལ་སྲིད། འཚེ་བའི་ལས་འགུལ་ཡིན་ན་ནི་དེ་ལ་འཚེ་མེད་ཞི་བ་ཡིན་པར་ཨུ་ཚུགས་རྒྱག་དགོས་ཆགས་གི་རེད། དཔེར་ན། བོད་རྒྱ་ནག་གི་ཆ་ཤས་མིན་པས་རྐྱེན་གྱིས། རྒྱ་གཞུང་གིས་ཀྲུང་གོའི་བོད་ལྗོངས། ཀྲུང་གོའི་ལྷ་ས་སོགས་ཀྲུང་གོ་ཞེས་ཨུ་ཚུགས་རྒྱག་གི་ཡོད་པ་རེད། དེ་དང་གཅིག་མཚུངས་རེད། ང་ཚོས་བོད་པ་རང་གི་ལུས་འགུལ་དེ་འཚེ་མེད་ཡིན་པ་གང་ཞིག་ལ། ཡང་དང་བསྐྱར་དུ་འཚེ་མེད་ཅེས་ཨུ་ཚུགས་བརྒྱབ་སྟེ་བཤད་བསྡད་པ་ཡིན་ན། དེ་ནི་བོད་པའི་འཐབ་རྩོད་ཀྱི་ངོ་བོ་དེ་འཚེ་བ་ཡིན་མིན་གཞན་ལ་དོགས་སློང་བྱེད་ཀྱི་ཡོད་པ་རེད” ཅེས་བརྗོད་དེ།  འཛམ་གླིང་སྒང་སཱ་དམ་མའོ་སཱན་དང་། དྷ་ཌ་ཧྥེ། ཨོ་ས་མཱན་ལ་ཌན་སོགས་དམར་གསོད་བཏང་བ་ཡིན་ནའང་། དེ་ལ་རྒྱལ་སྤྱིའི་ཐོག་འཚེ་བ་རེད་ལབ་མཁན་གཅིག་ཀྱང་བྱུང་ཡོད་པ་མ་རེད། དེར་བརྟེན། ང་ཚོ་བོད་པའི་རང་ལུས་མེར་བསྲེགས་ཞི་རྒོལ་ལ་འཚེ་བ་རེད་ཅེས་བརྗོད་སའི་གཞི་གང་ཡང་མེད་སྟབས།  འཚེ་བ་ཡིན་མིན་གྱི་གླེང་སློང་བྱས་ན་ཡག་པོ་མེད་སྐོར་བརྗོད་སོང་།

བགྲོ་གླེང་མཇུག་སྒྲིལ་རྗེས་བགྲོ་གླེང་སྐབས་བྱུང་བའི་བསམ་ཚུལ་རྣམས་བསྡུ་སྒྲིག་གིས་ ༼ང་ཚོས་ཅིའི་ཕྱིར་ངོ་རྒོལ་སྤེལ༽ཞེས་པའི་དོན་ཚན་ ༧ ཅན་གྱི་གསར་འགོད་བསྒྲགས་གཏམ་ཞིག་ཀྱང་སྤེལ་སོང་། དོན་ཚན་ཁག་ནི། གཅིག བོད་འདི་སྔ་མོ་ནས་ཀྲུང་གོའི་ཆ་ཤས་ཤིག་ཡིན་ཚུལ་གྱི་ལོ་རྒྱུས་རྫུན་མ་དེས་མི་རབས་གསར་བའི་བསམ་བློ་རྨོངས་སྒྱུར་དང་མི་རིགས་ཀྱི་ལོ་རྒྱུས་ནག་གསུབ་བཏང་བའི་ཉེས་པ་ཆེན་པོ་བསགས་པ། གཉིས། བོད་ཞི་བས་བཅིངས་འགྲོལ་བཏང་ཚུལ་གྱི་ཧམ་བཤད་དེ་གཉའ་གནོན་དང་བཙན་འཛུལ་གྱི་ནག་ཉེས་ཡོད་དོ་ཅོག་འགེབ་སྦས་ཀྱི་བྱུས་ངན་ཡིན་པ། གསུམ། བོད་ཆོལ་ཁ་གསུམ་པོ་དུམ་བུ་མང་པོར་བཅད་བགོས་ཀྱིས་མི་རིགས་གཅིག་གྱུར་གྱི་རང་སྐྱོང་ཁེ་དབང་ལ་གནོད་ཚབས་ཆེ་ཞིང་མི་རིགས་ཀྱི་ངོ་བོ་གཞན་འགྱུར་གྱི་བྱུས་ངན་སྤེལ་བ། བཞི། རྒྱ་མི་མང་པོ་བོད་དུ་གནས་སྤོ་ཤུགས་ཆེན་གྱིས་བོད་ཡུལ་མི་སེར་སྤེལ་ཡུལ་བཟོ་བཞིན་པ་དང་། བོད་ཀྱི་འབྲོག་པ་རྩ་སྟོང་དང་མཉམ་ལས་སྲིད་བྱུས་སྤེལ་བ། ལྔ། ༧གོང་ས་མཆོག་ལ་ཉེས་འགེལ་མཚན་དམོད་ཀྱིས་བོད་མིའི་རང་དབང་དད་མོས་ལ་བཙན་གནོན་རྒྱུན་མུར་སྤེལ་བ། དྲུག བོད་རིགས་མང་ཚོགས་ཀྱིས་༸གོང་ས་མཆོག་བོད་དུ་གདན་ཞུ་དང་། བོད་ཀྱི་ཆོས་ལུགས་དད་མོས་རང་དབང་དང་། བོད་མིའི་ཁེ་དབང་སྲུང་སྐྱོབ། བོད་རང་དབང་རང་བཙན་བཅས་ཀྱི་ཆེད་ཞི་བའི་ངོ་རྒོལ་ལ་རྒྱ་གཞུང་གིས་དྲག་གནོན་དམར་གསོད་བྱས་པ། བདུན། ༸གོང་ས་མཆོག་དང་དབུས་བོད་མིའི་སྒྲིག་འཛུགས་ཀྱིས་འབྱུང་འགྱུར་བོད་འདི་ཀྲུང་གོའི་མངའ་ཁོངས་སུ་མཉམ་གནས་འཆམ་མཐུན་གྱིས་འཚོ་ཐབས་སུ་བསམ་འཆར་ཡིག་ཆ་ཕུལ་ཡང་། རྒྱ་གཞུང་གིས་ཡ་ལན་མེ་པར་ཉེས་འཛུགས་སྣ་ཚོགས་བྱས་ཡོད་པ་བཅས་རེད།

དེ་བཞིན།  གོང་གསལ་གནད་དོན་དེ་དག་གི་རྐྱེན་པས་གཞིས་བཞུགས་བོད་མིའི་སེམས་ལ་རྨ་ཁ་ཆེན་པོ་བཟོས་ཏེ། རྒྱ་གཞུང་ལ་ངོ་རྒོལ་གྱི་རླབས་ཕྲེང་དང་མེ་ལྕེ་ཤུགས་ཀྱིས་མཆེད་བཞིན་པ་ཡིན་སྟབས།  འགན་ཡོངས་རྫོགས་རྒྱ་གཞུང་གིས་འཁུར་དགོས་པར་མ་ཟད། རྒྱ་ནག་མི་མང་གི་གཙོས་འཛམ་གླིང་གི་མི་མང་ཡོངས་ཀྱིས་དེ་དོན་གསལ་རྟོགས་ཐུབ་རྒྱུའི་འབོད་སྐུལ་དང་། གཞིས་བཞུགས་བོད་རིགས་སྤུན་ཟླ་མང་པོ་ཞིག་གིས་བོད་དོན་ཆེད་སྙིང་སྟོབས་ཆེན་པོའི་སྒོ་ནས་རང་ལུས་མེ་མཆོད་ལ་ཕུལ་བཞིན་པ་ནི་དངོས་གནས་བློ་ཡུལ་ལ་ཤོང་དཀའ་བའི་བློས་གཏོང་ཆེན་པོ་ཞིག་དང་། སྙིང་སྟོབས་ཆེན་པོ་ཞིག་ཡིན་པར་ངོས་འཛིན་དང་འབྲེལ། རྒྱལ་སྤྱིའི་གཟུར་གནས་གཞུང་མང་ཡོངས་ཀྱིས་ད་ལྟའི་བོད་ནང་གི་གནས་སྟངས་དང་། བོད་མི་མང་པོ་ཞིག་གིས་རང་སྲོག་བློས་བཏང་གིས་རང་ལུས་མེ་མཆོད་འབུལ་བཞིན་པའི་དགོས་དོན་གང་ཡིན་པ་དང་། རྒྱ་གཞུང་གི་ཐ་ཤལ་གྱི་སྤྱོད་པ་སོགས་ལ་རྒྱུས་ལོན་བྱས་ཏེ་དྲང་བདེན་གྱི་སྒོ་ནས་རྒྱབ་སྐྱོར་ཅི་ནུས་གནང་སྐྱོང་ཡོང་བའི་གཞེན་སྐུལ་ཡང་ཞུས་སོང་།

གསར་འགོད་པ། ཚེ་རིང་རྒྱལ།